muslim.uz
Ахборотда холислик муҳим
Бугун ахборот алмашинуви шиддат билан ривожланиб бормоқда. Шу билан бирга ҳар бир ахборот тарқатувчининг ўз вазифасига холисона ва ҳаққоний ёндашиш каби мезонларга риоя этиши ҳам зарурдир.
Динмиз таълимотларида нотаниш одам ёки хабари синаб кўрилмаган кимсанинг хабари текширилмай туриб, қабул қилинмайди. Бошқа ишончли манбалардан хабарнинг тўғрилиги собит бўлсагина, қабул қилинади.
Аллоҳ таоло мўминларни бирор киши ҳақида ёлғондан ҳукм чиқариб қўймасликлари учун “Ҳужурот” сурасида қуйидагича марҳамат қилган:
“Эй иймон келтирганлар! Агар фосиқ хабар келтирса, аниқлаб кўринглар, билмасдан, бир қавмга мусибат етказиб қўйиб, қилганингизга надомат чекувчи бўлманглар”.
Бир хабарни эшитиши биланоқ, суриштирмай, бирор иш қилинса, кейин хабарнинг ёлғонлиги ёки хатолиги аён бўлса, ҳақиқатан, афсус-надоматга сабаб бўлади.
Кеча, 10 сентябрь куни айрим Интернет нашрлари ва ижтимоий тармоқларда Ўзбекистон мусулмонлари идораси раиси, муфтий Усмонхон Алимов лавозимидан озод этилди, деган мазмундаги асоссиз ва сохта хабарлар тарқатилди. Бу билан юртимиз мусулмонларининг раҳбари, дин соҳасидаги замонамизнинг етук олимларидан бири, бир қанча диний-маърифий асарларнинг муаллифини обрўсизлантиришга бўлган ҳаракат деб биламиз.
Олимга нисбатан ҳурматсизлик, душманлик қилиш Аллоҳга уруш қилганга ўхшайди. Аллоҳ азза ва жалла билан урушган ғолиб бўлармиди?! Расулуллоҳ соллаллоҳу алайҳи васаллам айтадилар: “Аллоҳ айтади: “Ким менинг дўстимга душманлик қилса, унга уруш эълон қиламан” ( Бухорий ривояти).
Ибн Ҳажар роҳматуллоҳи алайҳи айтади: “Аллоҳнинг дўстидан мурод Аллоҳни танийдиган, Унинг тоатида доим бўладиган олимдир” (Фатҳул Борий, 11-жилд, 342-бет).
Олимларга нисбатан меҳрли бўлишимиз, уларнинг ҳақларига Аллоҳдан офият сўрашимиз, хато қилган бўлсалар, Аллоҳдан улар учун мағфират сўрашимиз лозим бўлади.
Аллоҳ таоло Муфтий ҳазратларининг динимиз, мусулмонлар учун қилаётган хайри ишларида Ўзи мададкор бўлсин. Узоқ йиллар мўмин-мусулмонларимиз хизматида бардавом бўлишларини насиб этсин!
Муаллиф: Зайниддин домла Эшонқулов
ЎМИ Самарқанд вилояти вакили
Шайх Абдулазиз Мансур янги лавозимга ўтказилди
2019 йил 12 сентябрь куни Ўзбекистон мусулмонлари идораси раисининг ўринбосари Шайх Абдулазиз Мансур ҳазратлари Ислом дини илмлари ривожига беқиёс ҳисса қўшган буюк алломаларимизнинг бой меросини чуқур ўрганиш, улар томонидан асос солинган илмий фаолиятни қайта тиклаш ва ривожлантириш борасидаги ишларни жадаллаштириш мақсадида, Ўзбекистон Ислом цивилизацияси маркази директорининг ўринбосари лавозимига ўтказилди.
Шайх Абдулазиз Мансур ҳазратларининг масъулиятли ва шарафли янги вазифаларида Аллоҳ таборака таолодан улкан муваффақиятлар тилаймиз.
Ўзбекистон мусулмонлари идораси Матбуот хизмати
Саломлашганда бажариладиган 6 амал
Саҳобалар розияллоҳу анҳум Расулуллоҳ соллаллоҳу алайҳи васалламдан “Энг яши амал қайси?” деб сўрашди. Шунда У зот алайҳиссалом: “Таом улашишинг ҳамда таниган-танимаганингга салом беришинг”, дедилар (Имом Бухорий, Имом Муслим ривояти).
- "Ассаламу алайкум ва роҳматуллоҳи ва барокатуҳ" деб салом бериш.
Расулуллоҳ соллаллоҳу алайҳи васалламнинг олдиларига бир киши келди ва “Ассаламу алайкум”, деб салом берди. У зот унга жавоб қайтардилар ва “Ўнта”, дедилар. Кейин яна бир киши келиб, “Ассаламу алайкум ва роҳматуллоҳ”, деди. У зот унга ҳам жавоб қайтардилар ва “Йигирмата”, дедилар. Сўнгра яна бир киши келди-да, “Ассаламу алайкум ва роҳматуллоҳи ва барокатуҳ”, деди. У зот унга жавоб қайтаргач, “Ўттизта”, дедилар (Имом Абу Довуд ривояти).
- Табассум билан сўрашиш.
Набий соллаллоҳу алайҳи васаллам: “Яхши амалдан бирор нарсани арзимас санама, ҳатто биродаринг юзига очиқ чеҳра билан йўлиқишни ҳам”, деганлар (Имом Муслим ривояти).
- Икки қўл билан кўришиш.
Расулуллоҳ соллаллоҳу алайҳи васаллам: “Икки мусулмон бир-бирларига йўлиқиб, қўл бериб кўришар экан, улар ҳали ажралмай туриб, албатта, уларнинг гуноҳлари мағфират қилинади”, деганлар (Имом Абу Довуд ривояти).
- Аллоҳ ҳамд ва истиғфор айтиш.
Набий соллаллоҳу алайҳи васаллам: "Қачон икки мусулмон учрашиб, қўл олиб сўрашсалар, Аллоҳга ҳамд ва истиғфор айтсалар, икковлари мағфират қилинади", дедилар (Имом Абу Довуд ривояти).
- Гўзал сўз сўзлаш.
Аллоҳ таоло марҳамат қилади: “одамларга ширинсўз бўлинг...” (Бақара сураси, 83-оят)
Набий соллаллоҳу алайҳи васаллам: “Яхши сўз садақадир”, деганлар (Имом Бухорий, Имом Муслим ривояти).
- Салом бериш билан хайрлашиш.
Расулуллоҳ соллаллоҳу алайҳи васаллам: “Сизлардан бирортангиз бир мажлисга келса, салом берсин, қайтмоқчи бўлса, яна салом берсин. Биринчи салом иккинчисидан ҳақли эмас”, деганлар (Имом Абу Довуд, Имом Термизий ривояти).
Даврон НУРМУҲАММАД
Муфтий Усмонхон Алимов ҳазратлари: Масжид илму маърифат тарқатишга хизмат қилади
Аллоҳ таборака ва таолога шукрки, юртимизда ҳукм сураётган тинчлик-омонлик ва динимизга бўлган юксак эътибор сабаб, масжидларда бунёдкорлик ишлари қизғин давом этмоқда.
Тошкент вилояти Зангиота тумани Иттифоқ маҳалласида жойлашган “Салмон Форсий” жоме масжиди дастлаб 1992-1994 йилларда ҳашар йўли билан қурилган. Ўтган давр мобайнида масжид биноси эскириб, ер тўла қисми, пойдеворлари яроқсиз ҳолга келиб қолган эди. Қолаверса, охирги пайтларда масжид жамоати сезиларли даражада ортиб, хонақоҳ торлик қилаётган эди. Шу сабабли маҳалла аҳли эзгу ният билан масжидни қайта қуриш таклифини олға суришди. Ушбу хайрли ташаббус Ўзбекистон мусулмонлари идораси томонидан қўллаб-қувватлангач қайта қуриш ишлари бошлаб юборилди.
Шу йилнинг 11 сентябрь куни Тошкент вилояти Зангиота туманида жойлашган “Салмон Форсий” жоме масжидининг янги биносига биринчи ғишт қўйиш тадбири бўлиб ўтди. Муфтий ҳазратлари қурилаётган масжид қиёматгача хизмат қилишини ният қилиб, биринчи ғиштни қўйиб бердилар. Нуронийлар ва эзгу ниятда йиғилган қалби пок инсонлар ҳам бирин-кетин пойдеворга ғишт қўйдилар.
Муфтий Усмонхон Алимов ҳазратлари маросимда масжид аҳлини ушбу Аллоҳнинг уйи билан табрик қилиб, жумладан шундай сўзларни билдирдилар:
– Аллоҳ таолога ҳамду санолар бўлсинки, буюк алломалар юрти бўлмиш юртимизда сўнгги йилларда масжид-мадрасалар қуриш одатий жараёнга айланиб бормоқда. Ҳар куни юртимизнинг турли вилоятларидан янги-янги масжид қурилаётгани ёки қуриб битказилиб, ишга тушгани ҳақида хушхабарлар келиб турибди, кўпларида ўзимиз ҳам иштирок қиляпмиз.
Муҳтарам Юртбошимизнинг раҳнамоликларида мўмин-мусулмонларимизнинг талаб ва истакларидан келиб чиқиб, сўнгги йилларда 24 та янги жоме масжид очилди, 116 та масжид қайтадан барпо этилди ва 200 тасида жорий таъмирлаш ишлари амалга оширилди.
Эндиликда мана шундай кўркам масжидларда имом-домлаларимиз халқимизга, айниқса, ёшларимизга Ислом дини маърифатини етказиш, уларнинг таълим-тарбиясини яхшилаш ва эзгуликлар тарқатиш ишида жуда ҳам фаол бўлишлари зарур. Шунингдек, бугунги мураккаб даврда айрим ғўр кимсаларнинг бузғунчи оқимлар таъсирига тушиб қолишининг олдини олиш долзарб вазифа бўлмоқда.
Муфтий ҳазратлари сўзларининг давомида Пайғамбаримиз Муҳаммад соллаллоҳу алайҳи васалламнинг «Ким бир масжид қурса, Аллоҳ унга жаннатда шунинг мислини қуриб беради», деган ҳадиси шарифларини келтириб, мазкур жомени барпо этишга ҳисса қўшган барчанинг ҳаққига дуолар қилдилар.
Тадбирда уламолар, маҳалла фаоллари, мўйсафид отахонлар ва кенг жамоатчилик вакиллари иштирок этди.
Муфтий ҳазратлари Тошкент вилояти Зангиота туманидаги “Имоми Аъзам” жоме масжидида якунига етаётган қурилиш-таъмирлаш ишлари билан ҳам яқиндан танишдилар.
Аллоҳ таоло ушбу жоме масжидларни халқимизга муборак айласин!
p>
Ўзбекистон мусулмонлари идораси Матбуот хизмати
Тожикистонда ўрта асрларга оид расадхона топилди
Археологлар Тожикистоннинг Дарваз туманида жойлашган Карон шаҳарчасидан расадхона топишди.
Унинг ичида топилган буюмлар ушбу топилмани расадхона эканини тасдиқлайди.
Топилма хусусида Тожикистон Фанлар Академияси академиги Юсуфшо Ёқубов бундай дейди: “Расадхонанинг вайроналари ичида турли геометрик шаклга эга бўлган тош буюмлар топилди”.
Карон шаҳарчаси 2012 йилда Юсуфшо Ёқубов томонидан топилган эди. У денгиз сатҳидан 2000 м. баландликда жойлашган бўлиб, 100 га. майдонга эга. Археологлар бу шаҳар ёшини 4000 йилдан ортиқ деб ҳисобламоқда.
Етти йилдирки олиб борилаётган қазишмалар натижасида олимлар бу ердан жуда кўп археологик ёдгорликларни топишди. Беш гумбазли ибодатхона қолдиқлари, сув ибодатхонаси ва иккита шамол ибодатхоналари шулар жумласидандир. Бу топилмалар шаҳар аҳолисини 10 асрга қадар зардуштийлик динида бўлган, деган хулоса чиқаришга имкон беради.
Юсуфшо Ёқубов бундай деди: “Карон – шоҳлар шаҳри бўлган. Бу ерда қирол, вазирлар ва подшо хизматкорлари яшаган. Оддий халқ эса, унинг атрофида, яқин қишлоқларда турмуш кечирган. Милоднинг 10 асригача бу ердагилар зардуштийлик динида бўлган. Бу ерда сўзимизни тасдиқлайдиган оташкада (олов уйи)дан ташқари дунёдаги энг қадимги муқаддас “Авесто” китоби қўйиладиган тошдан ишланган лавҳлар ҳам бор”.
Шунингдек, шаҳарчадан шамол тегирмоннинг қолдиқлари, маъмурий ва турар-жой бинолари ҳамда поло ўйини майдони ҳам топилган.
Шаҳар ва унда топилган обсерватория тарихига оид батафсил маълумотларни шаҳар ҳақида атрофлича ўрганишлардан кейингина бериш мумкин. Ушбу изланишларга тахминан 20 йилга яқин муддат талаб этилади. Шу нарса маълумки, аҳоли 15 аср бошларида ичимлик манбалари етишмовчилиги сабабли шаҳарни тарк этишган.
Интернет маълумотлари асосида Халқаро алоқалар бўлими ходими
Масайитов САЙИДЖАМОЛ
тайёрлади.