www.muslimuz

www.muslimuz

Хушхабар

 

Масжид – мўмин-мусулмонларнинг Аллоҳ таолога ибодат қилишлари учун барпо этилган табаррук маскан. Шу боис шариатимизда масжид “Байтуллоҳ”, яъни “Аллоҳнинг уйи” деб аталади. Халқимиз масжидларга алоҳида эҳтиром кўрсатади, Аллоҳнинг уйини ҳар жиҳатдан обод қилишга интилади.

“Тўйга тўёна билан” деганларидек, энг улуғ, энг азиз айём – Мустақиллик байрами арафасида Тошкент вилояти Юқори Чирчиқ туманидаги “Омилхон Эшон” жоме масжидининг янги биноси фойдаланишга топширилди.

Қуръони карим тиловати билан бошланган тадбирда Тошкент вилояти бош имом-хатиби Жасурбек домла Раупов, туман ҳокими Ускенбой Атемов, имом-домлалар, маҳалла фаоллари, ҳомийлар иштирок этди.

Аслида, масжидни имони мустаҳкам кишиларгина обод қиладилар. Аллоҳ таоло: «Албатта, Аллоҳнинг масжидларини фақат Аллоҳга ва охират кунига имон келтирганлар, намозни тўкис адо этганлар, закотни берганлар ва Аллоҳдан бошқадан қўрқмаганларгина обод қилурлар. Ажаб эмаски, ана ўшалар ҳидоят топгувчилардан бўлсалар» (Тавба сураси, 18-оят), деб марҳамат қилган.

Муфассирларнинг таъкидлашича, ободлик икки турдан иборат: ҳиссий – уни қуриш, тузатиш, тозалаш, таъмирлаш, вайрон этишдан сақлаб қолиш; маънавий – намоз ўқиш, зикрда бўлиш, дуо қилиш, улуғлаш ва ибодат учун қатнашдан иборат.

Ҳадиси шарифларда ҳам масжиднинг ободлигига ҳисса қўшган кишиларга улуғ ажрлар ваъда қилинган. Абу Саид  розияллоҳу анҳудан ривоят қилинади. Набий соллаллоҳу алайҳи ва саллам: «Aгaр бирoв мaсжидни тaъмирлaётгaнини кўрcaнгиз, унинг мўминлигигa гувoҳ бўлинг. Чунки Аллоҳ таоло: “Аллоҳгa вa oхирaт кунигa имoн кeлтиргaн кимcaлaр мacжидлaрни oбoд қилaди”, – дeгaн», дедилар (Имом Термизий ривояти).

Дарҳақиқат, бугун юртимизда масжидларни ҳар жиҳатдан обод қилаётган азизларимиз чинакам Аллоҳга ва охират кунига имон келтирган, динимиз аҳкомларини тўлиқ бажараётган солиҳ кишилардир. Уларнинг ҳар биридан Аллоҳ рози бўлсин.

“Омилхон Эшон” жоме масжиди бир асрдан зиёдроқ тарихга эга. Масжид 1900 йили қурилиши бошланиб, 1902 йил битказилган. 1992 йил бу жоме ёниб кетган ва 1993 йил қайтадан ҳашар йўли билан барпо этилган. Эски масжиднинг биноси сиғими 200–250 киши эди.

Мўмин-мусулмонлар сафи кенгайиши туфайли масжидни қайтадан қуришга  2019 йил киришилди. Уч йил давомида ҳудудда гўзал масжид қад ростлади. Янги масжидда бир вақтнинг ўзида 600 киши бемалол ибодатлари адо эта олади. Янги жомега монанд тарзда барпо этилган таҳоратхонада ҳам зарур барча шароитлар муҳайё.

Аллоҳ таоло янги масжидни мўмин-мусулмонларга муборак қилсин!

 

Ўзбекистон мусулмонлари идораси

Матбуот хизмати

 

Шу йилнинг 9–18 август кунлари Туркиянинг Кўнё вилоятида V Ислом бирдамлик ўйинлари ўтказилмоқда. Бу мусобақа коронавирус пандемияси туфайли муддатидан бир йил сўнг ташкил этилди.

Мусобақа Ислом бирдамлиги спорт федерацияси ҳамда Ислом ҳамкорлик ташкилоти ҳамкорлигида ташкил этилди, деб ёзади “Анадўлу” ахборот агентлиги.

Унда дунёнинг 56 мамлакатидан 4 мингдан зиёд спортчи 24 спорт тури бўйича жами 355 та медални қўлга киритиш учун беллашмоқда. Мазкур Ислом бирдамлик ўйинларининг сўнгги кунларига келиб Ўзбекистон медаллар жамғаришда Туркиядан кейин 2-ўринга кўтарилиб олди.

15 август кунги баҳслар якунига кўра, мамлакатимиз спортчилари қўлга киритган олтинлар 40 та, кумушлар 28 та ҳамда бронзалар 44 та, жами медаллар сони 112 та.

 

 

 

Ўзбекистон мусулмонлари идораси Матбуот хизмати

Айни кунда республикамиздаги барча ташкилоту идораларида “Ватанпарварлик ойлиги” доирасида турли учрашувлар, тадбирлар бўлиб ўтмоқда. Ана шундай учрашувлардан бири 16 август куни Тошкент шаҳар ИИББ ЖТСБ Патруль-пост хизмати бригадасида ўтказилди. “Ватанга ва халққа садоқат билан хизмат қилиш - олий бурчимиз” шиори остида “Ватанни севмоқ иймондандир” мавзусида ташкил этилган давра суҳбатида ички ишлар ходимлари ва пойтахтимизнинг “Новза” жомеъ масжиди имом хатиби Жалолиддин Хамроқулов иштирок этди.

Ватанпарварлик дарсида Жалолиддин Хамроқулов йиғилганларга динимизда Ватанга бўлган муносабат ҳақида сўз юритиб, Ислом дини аввало, инсонни ўзи туғилиб ўсган она заминига муҳаббатли ва садоқатли бўлишига чақириб, сўнгра бутун дунё ва башариятга яхшилик қилишга ундашини таъкидладилар. Шунингдек, мусулмон киши ватанини севиши, унинг иқболи учун ҳаракат қилиши лозимлигини қайд этиб, ватанпарварлик ҳақидаги ояту ҳадисларни ўқиб бердилар.

Таъсирли маърузадан сўнг Жалолиддин домла иштирокчиларнинг мавзу доирасидаги барча саволларига жавоб берди.

 


Ўзбекистон мусулмонлари идораси Матбуот хизмати

Китоб арабистонлик таниқли журналист, ёзувчи, аждодлари асли Фарғона водийсининг Қўқон шаҳридан бўлган Абдулазиз Муҳаммадамин Қосим томонидан ёзилган. 

У 2019 йил ноябрь-декабрь ойларида ота-боболари юрти – Ўзбекистонга сафар қилиб, мамлакатимизнинг барча ҳудудларида бўлган, миллий урф-одатлар билан яқиндан танишиб, муқаддас қадамжоларни зиёрат қилган. 

Бунинг натижасида Ўзбекистоннинг тарихи, иқтисодиёти, жўғрофий жойлашуви, этнографияси, миллий ўзига хослиги ва миллатлараро муносабатлари, халқаро алоқалари, ўзбек халқининг маданияти, урф-одат ва анъаналари атрофлича ёритилган асар дунёга келди. Муаллиф мамлакатимизнинг замонавий тараққиёти, унда ҳукм сураётган тинчлик ва тотувлик муҳити, Президент Шавкат Мирзиёев томонидан олиб борилаётган тинчликпарварлик ва умуминсоний қадриятларга асосланган ташқи ва ички сиёсат, Ўзбекистонда ҳаётга татбиқ этилаётган кенг кўламли ислоҳотларни атрофлича қаламга олган. Ҳар бир бўлим буюк ва машҳур мутафаккирлар, шоирлар, ёзувчилар, журналистлар, жамоат арбоблари ижодидан иқтибослар билан якунланади. Китоб саҳифаларидан Қуръон оятлари ва ҳадислар ҳам ўрин олган. 

Муаллиф жаҳон цивилизацияси, жумладан, Ислом олами ривожига беқиёс ҳисса қўшган улуғ аждодларимиз ҳаётини атрофлича тасвирлаб берган. 

“Китобни ўқир экансиз, жаҳонга Ислом цивилизациясининг қатор аллома ва намояндаларини тақдим этган, тарихда ўчмас из қолдирган, адоғи йўқ муваффақиятларга эришган, тарихи бугунги кунга қадар муҳрланиб қолган кўҳна бир халқнинг буюк тарихига шоҳид бўласиз. Шу ўринда айтиб ўтиш жоизки, биз бу улуғ юртда яшаб ижод қилган, шуҳрати олис-олис уфқларни забт этган алломалардан айримларининг номларини, афсуски,  ҳанузгача эшитмаган эканмиз, ҳолбуки Ғарбда бу сиймоларга катта қизиқиш билан қарашмоқда, инсоният маданияти ривожига уларнинг қўшган ҳиссаси ҳамда илм-фан тараққиётига хизмат қилувчи ихтиро ва асарлари эътирофи ўлароқ, юлдуз ва сайёралар уларнинг исми  билан аталмоқда”, деб ёзади муаллиф. 

Шу билан бирга, китобда мамлакатимиз тарихи, Ўзбекистоннинг мустақил тараққиёти йўлида эришилган муваффақиятларига оид муҳим маълумотлар келтирилган. 

Муаллиф ўтган аср бошларида катта қийинчиликлар билан бир қанча давлатлар орқали Подшоҳликка келиб, жойлашиб қолган, анъанавий равишда “Бухороликлар” деб аталадиган ватандошларимизнинг бугунги авлодлари ҳақида ҳам сўз юритган. 

Абдулазиз Муҳаммадамин Қосим ўз таассуротлари ва ҳикояларини сарҳисоб қилар экан, Ўзбекистон ва Саудия Арабистони ўртасидаги сиёсий-иқтисодий муносабатларнинг замонавий ривожи, икки давлатнинг турли йўналишлардаги, жумладан, диний-маърифий соҳадаги ҳамкорлиги, ўзбекистонликларнинг Ҳаж ва Умра зиёратлари амалларини бажариш учун яратилган янги имкониятлар ҳақида ҳам тўхталган. 
“Хотима ўрнида шуни ишонч билан айтаманки, Ўзбекистонга уюштирган сафарларим давомида бу юртда кўрганларим мен учун Ўзбекистоннинг Марказий Осиёда тутган мавқеи, элининг ҳиммати, ақл-заковати ва улуғвор ўтмиши туфайли илдамлаб бораётган, яқин келажакда улкан шаъну шавкатга сазовор давлат даражасига қадар юксалишини бот-бот таъкидлашим учун асос бўлади”, деб ёзади Абдулазиз Муҳаммадамин Қосим. 

Бир сўз билан айтганда, ушбу китоб Саудия Арабистонидаги йирик ўзбек диаспораси вакилларига ўз аждодлари Ватанининг тарихи ва замонавий ҳаёти билан яқиндан танишиш имкониятини беради. Шунингдек, Ўзбекистон ва Саудия Арабистони халқлари ўртасидаги биродарлик, дўстлик ва ҳамкорлик ришталарини янада ривожлантиришга хизмат қилади. 

ЎзА

 

 

Вторник, 16 Август 2022 00:00

ҒИЙБАТ НИМА ЭКАНИНИ БИЛАСИЗМИ?

Ҳамма уламолар бир овоздан ғийбатни гуноҳи кабира эканини эътироф этишган.

Расулуллоҳ соллаллоҳу алайҳи ва саллам саҳобалардан:
“Ғийбат нима эканини биласизми?” деб сўрадилар. Улар: “Аллоҳ ва Расули билувчироқ”, дейишди. Набий алайҳиссалом: “Биродарингиз у ҳақида гапирган сўзингизни эшитиб, хафа бўлса, сиз уни ғийбат қилибсиз”, дедилар. Саҳобалар: “Ё Расулуллоҳ, биз айтган сифат унда бўлса-чи?” деб сўрашди. Пайғамбаримиз соллаллоҳу алайҳи ва саллам: “Агар сиз айтган сифат унда бўлса – ғийбат, бўлмаса – бўҳтон қилибсиз”, дедилар» (Имом Муслим ривояти).

Бошқа бир ҳадисда Расулуллоҳ соллаллоҳу алайҳи ва саллам: «Меърожга чиққанимда мисдан бўлган тирноқлари билан юзларию кўксиларини тирнаётган бир қавмнинг олдидан ўтдим. Мен: “Эй Жаброил, улар кимлар?” деб сўрадим. “Булар у дунёда одамларнинг гўштини еб (яъни, ғийбат қилиб), обрўларини тўкканлар”, деб жавоб берди» (Имом Абу Довуд ва Имом Аҳмад ривояти).

Манба: (http://old.muslim.uz/index.php/maqolalar/item/32273)

Muslim.uz
@muslimuzportal | @diniysavollar

#ҒИЙБАТ #БЎҲТОН #СИФАТ

Страница 1 из 577
Top