muslim.uz
Бутунжаҳон ислом уюшмаси Ўзбекистон ташаббусини қўллаб-қувватлади
Ўзбекистон элчиси Улуғбек Мақсудов Бутунжаҳон ислом уюшмаси бош котиби Шайх Муҳаммад бин Абдулкарим ал-Исса билан учрашув ўтказди, деб хабар бермоқда «Дунё» АА мухбири.
Мулоқот давомида Имом Бухорий мажмуаси ҳудудида Пайғамбар алайҳиссалом сийрати ва Ислом цивилизацияси инновацион музейини ташкил этиш масалалари муҳокама қилинди.
Шайх Муҳаммад бин Абдулкарим ал-Исса Ўзбекистон Президентининг 2022 йил 17-18 август кунлари Саудия Арабистонига амалга оширган давлат ташрифи ва унинг доирасида Пайғамбар алайҳиссалом сийрати ва Ислом цивилизацияси музейига зиёратини мамнуният билан эсга олди. Унинг айтишича, ушбу ташриф икки давлат ўртасидаги алоқаларни том маънода ривожлантириши билан бирга, қардош халқлар манфаатларига бирдек хизмат қилади.
«Ўзбекистон ҳукумати томонидан кўплаб мусулмон давлатлар фуқароларига мамлакатингизга визасиз кириш тизими жорий этилгани ўзаро муносабатларни кенгайтириш билан бирга Ислом тамаддуни ривожига ҳисса қўшган буюк алломалар мероси ва тарихий обидаларни зиёрат қилишларига катта имконият яратиб беради», деди Бутунжаҳон ислом уюшмаси бош котиби.
Шунингдек, суҳбатдош сўнгги йилларда давлатимиз раҳбари бошчилигида Янги Ўзбекистонни барпо этиш бўйича олиб бораётган оқилона сиёсатни катта қизиқиш билан кузатиб бораётганини таъкидлади.
Ўзбекистон Президентининг Самарқандда Имом Бухорий мажмуасини барпо этиш бўйича билдирган ташаббуси – давлат раҳбари томонидан ислом уламоларига бўлган юксак ҳурмат ва эътибор эканлиги қайд этилди. Бош котиб мазкур ташаббусни қўллаб-қувватлаб, мажмуани барпо этишда Бутунжаҳон ислом уюшмаси барча саъй-ҳаракатларни сафарбар этишини маълум қилди.
Томонлар Янги Ўзбекистонда бошқа давлатлардан фарқли ўлароқ мукаммал ишлаб чиқилган Пайғамбар алайҳиссалом сийрати, Имом Бухорий ҳаёти ва ижоди ҳамда ислом цивилизациясига бағишланган инновацион музейни қисқа муддатларда барпо этишга умид билдирди.
Учрашув якунида томонлар Имом Бухорий мажмуаси ҳудудида Пайғамбар алайҳиссалом сийрати ва Ислом цивилизацияси инновацион музейини ташкил бўйича тажриба алмашишга келишиб олдилар.
Ўзбекистон мусулмонлари идораси Матбуот хизмати
Ижтимоий ҳимояга муҳтож аҳоли учун ифторлик ташкил этилди
Янгиликлар 24
Вақтингиз ҳаётингиз
Ибн Аббос розияллоҳу анҳумодан ривоят қилинади. Расулуллоҳ соллаллоҳу алайҳи васаллам: “Икки неъмат борки, кўпчилик одамлар ундан бебаҳра қоладилар. Улар соғлик ва бўш вақтдир”, дедилар (Имом Бухорий ривояти).
Муҳаддислар ўз асарларида “Риқоқ китоби” учун жой ажратишни одат қилганлар. Унда қалбни юмшатиб, мулойим қилувчи ҳамда унинг дунёда зоҳид бўлиб, охиратга рағбат қилишига ундайдиган ҳадисларни келтирганлар. Бундай ҳадислар инсон руҳини тарбиялаб, ахлоқини юксалтиришда катта аҳамиятга эга бўлгани учун баъзи машойихлар уларни алоҳида китоб шаклида ҳам тасниф қилганлар. Жумладан, Абдуллоҳ ибн Муборак раҳматуллоҳи алайҳнинг “Зуҳд ва риқоқ”, Аҳмад ибн Ҳанбал ва Вакиъ Ибн Жарроҳ раҳматуллоҳи алайҳларнинг “Зуҳд” номли китоблари исломий кутубхоналар фахри бўлиб туради.
Бу мавзудаги баъзи ҳадисларнинг лафзи қисқа бўлишига қарамасдан кенг маъноли. Агар инсон уларни эътибор билан ўрганса, қалби покланиб, нафси тузалишига етарли бўлади. Юқорида келтирганимиз Имом Бухорий раҳматуллоҳи алайҳ “Саҳиҳ”ида “Риқоқ китоби”нинг аввалига қўйган ҳадисдир. У зот дақиқ фикрлайдиган ҳамда иқтидор ва маҳорати инсонни ҳайрон қолдирадиган даражада. “Саҳиҳ”ида келган ҳар бир ҳадиснинг ажиб нукталари бор бўлиб, улар Китоб режали манҳаж асосида ёзилганини англатади. Шу манҳаж сизга ҳадис матнларини ўқиб, фикр юритмасданоқ, уларнинг мавқеини кўрсатиб беради. Бунга мисоллардан бири шуки, Имом Бухорий “Риқоқ” китобини мазкур ҳадис билан бошлаши унинг шу мавзудаги ҳадисларнинг асоси эканига ишора қилган.
Отам раҳматли мавъизаларида, давраларда шу ҳадисни кўп айтардилар. Бир гал Покистонга кўчиб ўтганларидан кейин биринчи марта қайтиб Ҳиндистонга борганларида Девбанддаги “Дорул улум” таълим даргоҳини зиёрат қилдилар. У ердаги устозу талабалар у кишидан ваъз-насиҳат қилиб беришларини сўрашди. Отам ваъзларини: “Ҳозир сиз мени илмий баҳс юритиб илмий нукталарни очишимни ёки чигал масалалар ечими ҳақида гапиришимни кутаётгандирсиз. Аммо мен “Дорул улум” доирасида қилиб юрган бу каби илмий мавзулар ўрнига илмий бўлмаган ва баҳссиз, лекин ўта муҳим бир мавзу ҳақида гапиришни афзал билдим”, деб бошлаб, кейин мана шу ҳадисни кенг шарҳладилар.
Шайх Муҳаммад Тақий Усмоний ҳафизаҳуллоҳнинг
асар ва мақолалари асосида
Тошкент Ислом институти катта ўқитувчиси
Абдулҳодий Ғиёс тайёрлади.
Азалий анъаналар бардавом
Мамлакатимизнинг барча ҳудудларидаги каби Жиззах вилоятининг Шароф Рашидов туманидаги қишлоқ ва маҳалла фуқаролар йиғинларида ҳам эҳтиёжманд, оиласида ногиронлиги бор, боқувчисидан айрилган, ётиб қолган, якка-ёлғиз кексалар ҳолидан хабар олиниб, уларнинг уйларига 17 турдаги озиқ-овқат маҳсулотлари етказиб берилмоқда. Рўзадор отахон ва онахонларга “Маҳалла” хайрия жамоат фонди, саховатпеша ҳомийлар томонидан ифторликлар ташкил этиб берилаётир.
Мамлакатимизда барча соҳаларда амалга оширилаётган ислоҳотларнинг бош мақсади инсон қадрини улуғлаш, унинг қонуний манфаатларини ҳимоялашга қаратилган. Бу борадаги изчил саъй-ҳаракаталар эса халқни рози қилиш, уларни эртанги кунга бўлган ишончини мустаҳкамлашга хизмат қилмоқда.
Кексаларни эъзозлаш, уларга эҳтиром кўрсатиш, ҳурматини жойига қўйиш, эҳтиёжманд, ногирон, ўзгалар кўмагига муҳтож нуронийлар ҳолидан хабар олиш халқимизнинг қон-қонига сингиб кетган, маънавий ҳаётимизнинг ажралмас қисмига айланган азалий анъаналардандир.
Ижтимоий ҳимояга муҳтож кишилар ҳолидан хабар олиш, боқувчисини йўқотган ва кексаларга меҳр-муруват кўрсатиш ҳамда қувонч улашиш азалдан ўзбек халқига хос фазилатлардан саналади. Бу каби саховат тадбирлари айниқса муборак Рамазон ойида янада яққол намоён бўлмоқда.
Ана шу анъаналарга содиқ ўлароқ, Шароф Рашидов тумани ҳокими Маҳмуд Холбўтаев 2-сектор ҳудудига қарашли “Тоқчилик” маҳалла фуқаролар йиғинида истиқомат қилувчи бир қатор ўзгалар кўмагига муҳтож хонадонлар ҳолидан хабар олди, эҳтиёжманд, боқувчисини йўқотган, ётиб қолган, кекса фуқароларга 17 турдаги озиқ-овқат маҳсулотлари улашиб, уларга сиҳатлик тилаб, кўнгилларини кўтарди.
Бундан ташқари, туман ҳокими ифторлик вақтига қадар шу маҳалладан йўл масалалари бўйича қилинган мурожаатларни жойида бориб ўрганди ва мутасадди ташкилотлар ҳамкорлигида ишларни тез фурсатда бажаришга келишиб олинди.
Юртимизда муборак Рамазон ойи давом этаётган қутлуғ кунларда тумандаги “Қаҳрамон” маҳалла фуқаролар йиғини “Қумри ая” тантаналар мажмуасида бир гуруҳ нуронийлар ҳамда рўзадорларга Рамазон ойи муносабати билан туман “Маҳалла” фонди бўлинмаси томонидан ифторлик дастурхони ёзилди. Унда, рўзадор фуқаролар билан бир дастурхон атрофида туман ҳокими Маҳмуд Холбўтаев ҳам иштирок этди.
Ифторлик сўнгида Қуръон тиловат қилиниб, ўтганларнинг руҳи покига бағишланди, Яратгандан юртимизга тинчлик, халқимизга фаровон ҳаёт, деҳқончиликка, чорвачиликка ва бошқа барча соҳаларга қут-барака ва унум сўралди.
А.ҚАЮМОВ, Ж.ЁРБЕКОВ (сурат), ЎзА
Муфтий ҳазратдан ҳадялар, уйли бўлиш саодати ва болажон қувончи
Шу йил 4 апрель куни Муфтий ҳазратлари Сурхондарё вилоятига ташрифлари чоғида “Вақф” фондининг вилоят филиали томонидан қийналган оилага қуриб берилган хонадонни топшириш маросимида иштирок этдилар.
Ўзбекистон мусулмонлари идораси томонидан янги уй соҳибига 10 миллион сўм пул, мебель жиҳозлари ва телевизор туҳфа қилинди.
Дарҳақиқат, мамлакатимизда кам таъминланган оилаларни ҳар томонлама қўллаб-қувватлаш, уларнинг яшаш шароитларини яхшилаш борасида ибратли ишлар амалга оширилмоқда. Хусусан, Ўзбекистон мусулмонлари идораси томонидан муҳтож оилаларга зарур ёрдам ва хайр-эҳсонлар кўрсатилиб, уларнинг муаммоларига ечим топишда кўмаклашиб келинмоқда.
Куни кеча Ўзбекистон мусулмонлари идораси раиси, муфтий Нуриддин домла ҳазратларининг Сурхондарё вилоятига сафарлари давомида ҳам бир қатор юртдошларимизга инсонпарварлик ёрдамлари кўрсатилди.
Дарвоқе, Термиз тумани, “Шодлик” маҳалла фуқаролар йиғинида яшовчи фуқаро Шукур Марданов ва унинг оила аъзоси анча вақтдан бери уйи йўқлигидан қийналишарди. “Вақф” хайрия жамоат фондининг Сурхондарё вилояти филиали томонидан уларга 5 хонали уй-жой қуриб берилди.
Янги уйни топшириш маросимида уламолар, маҳалла аҳли ва мутасаддилар иштирок этди. Муфтий ҳазрат янги уй-жойли бўлганларни муборакбод этиб, ҳовлида яхши кунлар, тўйлар бўлишини тиладилар.
Шунингдек, тадбир сўнгида Термиз тумани Бунёдкор маҳалласи “Янги давр” кўчаси 16-уйда истиқомат қилувчи Сафар Худойбердиевлар оиласига ҳам уй-жойининг атрофини девор тўсиқ билан ўраш, фарзандлари учун қўшимча хоналар қуриш ҳамда ҳозир яшаб турган хоналарни тубдан таъмирлаб бериш ишларига оқ фотиҳа берилди.
Ўз ўрнида уй соҳиблари ҳам бундай эътибор ва ғамхўрликдан кўнгли тоғдек кўтарилиб, бу ишнинг бошида турганларни, инсонпарварлик сиёсати олиб бораётган давлатимиз раҳбарини дуо қилдилар.
Ўзбекистон мусулмонлари идораси Матбуот хизмати