muslim.uz
Қуръони карим маънолари таржимаси ва тафсири лотин алифбосида чоп этилди
Ҳозирги кунда ислом дини асосларини, айникса, Қуръони каримни илмий ўрганиш дунё микёсида шу даражада оммалашиб кетдики, бу мавзуда чиқаётган адабиётларни энг умумий тарзда ҳам камраб олиш имконидан ташқаридир.
2018 йилда Шайх Абдулазиз Мансур ҳазратлари томонидан имом Аъзам мазҳаби доирасида изоҳланган, янги мукаммал таржиманинг лотин алифбосидаги шакли ҳам нашрдан чиқди.
Ушбу нашрнинг ўзига хос хусусиятлари асосан қуйидагилар экани таъкидлаб ўтилган:
1. У ҳанафий мазҳабига мансуб машҳур муфассирларнинг тафсир китобларига асосланган ҳолда тайёрланди. Бошқа мазҳабларга доир тафсирлардан ҳам керакли жойларда фойдаланилди. Фиқҳий масалалар бўйича тўрт мазҳаб ўртасидаги фарқлар имкон қадар қайд этиб борилди.
2. Оятларнинг таржимасида арабча матн маъноси имкони борича сўзма сўз ифода этилди. Қўшимча ёрдамчи сўз ва изоҳлар қавс ичида берилди.
3. Тафсир китоблар ва бошқа манбааларнинг номлари ичтибослардан кейин қисқртма шаклда рамзий ҳарфлар билан берилди.
4. Мутахассисларнинг фойдаланишига қулайлик яратиш мақсадида таржима ва тафсирлар Қуръони каримнинг арабча матни билан бир саҳифада ёнма ён берилди.
5. Амалда бўлиб келган ёзув қоидаларига риоя қилинди.
Лотин ёзувига асосланган ўзбек алифбосида нашр этилган Қуръони карим маънолари таржимаси ва тафсири китобида 1990 йиллардан бошлаб, асосан, диний адабиётларда ўзгара бошлаган ўзбек ёзуви имлолари қайта тикланди. Масалан, Исо, имон, раб, расул, саҳиҳ, Арафот, салавот каби арабчадан ўтиб қолган сўзларни базилар араб талаффузига мосламоқчи бўлиб, кейинги пайтда Ийсо, иймон, робб, росул, саҳийҳ, Арофат, солават шаклида ёза бошлаган эдилар. Ушбу нашрни тайёрлашда китобхонлар томонидан тақдим этилган фикр ва мулоҳазалар ҳам эътиборга олинган.
Маълумот учун, изоҳли таржима дастлаб 2001, 2004, 2017 йиллари кирил алифбосида қайта чоп этилган.
Мазкур нашр бугунги кунда нафақат исломшунослик йўналишида таҳсил олаётган талаблар учун, балки ижтимоий-гуманитар соҳаларда изланишлар олиб бораётган тадқиқотчиларга ҳам қўлланма бўлиб хизмат қилмоқда.
Қуйидаги телефон рақамлари орқали боғланган ҳолда китобни харид қилишингиз мумкин:
+ 998 99 878 41 42
ЎМИ Матбуот хизмати
Дунё уламолари шифокорлар масъулиятини муҳокама этишмоқда
Саудия Арабистонида Халқаро Ислом фиқҳи академиясининг 23-сессияси давом этмоқда. Мадина Ислом университети ректори, доктор Ҳатим бин Ҳасан Марзуқий сессия давомида 46 давлатдан келган уламолар, олимлар, фақиҳлар ва академиклар қатнашиши, унда 50 дан ортиқ илмий тадқиқот ишлари мунозара қилиниши, 16 та илмий мажлислар ўтказилишини айтиб ўтди. Шунингдек, сессияда молиявий банкротлик, банкдаги имтиёзлар, шифокорлар масъулияти, савдода адолатли бўлиш, муомалада ўлчов бирликлари, даволаниш туфайли рўзани очиш, оталик ҳаққи ва ёш қизларни эрта турмушга беришнинг олдини олиш, оила бошлиғининг мазкур масалани таъқиқлашда раҳбарлик қилиши, даволаниш соҳасида туғма нуқсонлар ҳамда экстремизм ва терроризм ибораларининг амалий ва мафкуравий кўринишлари каби мавзуларга алоҳида тўхталиб ўтилади.
Халқаро Ислом фиқҳи академиясининг 23-сессиясида Шайх Абдулазиз Мансур иштирок этмоқда. Сайтимизни кузатиб боринг муҳокама этилаётган масалалар янада кенгроқ ёритилади.
Ўзбекистон мусулмонлари идораси Матбуот хизмати
Миср 14 асрга тегишли масжидни қайта тиклайди
Миср Араб Республикаси пойтахти Қоҳира шаҳрида бир гуруҳ археологлар 14 асрга оид бўлган масжид деворларини тиклаш ишларини бошлайдилар. Ушбу масжид аҳоли яшаш манзиллари орасида жойлашган.
Қадимий топилмалар вазирлиги берган баёнотга кўра, Қоҳиранинг ал Дарб ал Аҳмар туманида жойлашган Амир ал Мардоний масжидининг қайта таъмирланиши ер ости сувлари ва канализация қувурлари туфайли муаммога учраб келган.
Масжидни қайта таъмирлаш ишлари 2020 йилнинг охирларига бориб якунланиши айтилган.
ЎМИ Матбуот хизмати
Тошкент шаҳрида "Энг маърифатли имом" кўрик танлови бошланди (Фотолавҳа)
ЎМИ Матбуот хизмати
Ўзбекистонлик имомлар Чимкентга борди
Ўзбекистон мусулмонлари идораси тизимида фаолият олиб бораётган имомлар делегацияси Қозоғистоннинг Чимкент шаҳрига ташриф буюрдилар. Делегацияни Чимкент шаҳри бош имоми ўринбосари Абдураҳмонов Бойдавлат ва Тошхўжаев Назирхон кутиб олди.
"Абдулхамид Каттоний" жоме масжидида учрашув ўтказилди. Чимкент шаҳридаги жоме масжидларда суҳбатлар ўтказиш мақсадида, ўзбекистонлик делегация аъзолари беш гуруҳга бўлинган ҳолда иш олиб боришди.
Тинчлик олий неъмат, миллатлараро тотувлик, бағрикенглик, шукроналик, ватанга муҳаббат, бузғунчи оқимларнинг салбий оқибатлари, мусулмонларнинг бўлинмасликлари, мазҳабсизлик мавзуларида суҳбатлар ўтказилди.
Пешин, аср, шом ва ҳуфтон намозларида турли мавзуларда суҳбатлар ташкил этилди.
Делегациянинг ташрифи бугун, 30 октябрь куни ҳам давом этади. Улар масжидларда маърифий суҳбатларни давом эттиришади.
Ўзбекистонда зиёрат туризми соҳасида яратилаётган имкониятлар борасида фикрлар алмашилмоқда. Сафар жараёнларини ёритиб борамиз.
Ўзбекистон мусулмонлари идораси Матбуот хизмати