(бўлган воқеа)

Бу воқеани заргарлик дўконларидан бирида ишлайдиган танишим ҳикоя қилиб берган эди. Ҳайит байрами куни чиройли кийинган бир йигит дўконимга хотини билан кириб келди. Уларнинг ортидан гўдак болани қўлида кўтариб олган кекса онахон кўринди. У дўкон остонасидан ичкарига бир – икки қадам киргач, ундан уёғига ўтмасдан пойгакда туриб қолди. Билсам, бу онахон мазкур йигитнинг онаси, қўлидаги бола эса унинг набираси экан.

Ҳалиги одамнинг аёли тилла ва жавоҳир буюмлар териб қўйилган ойнали пештахталар ичига гўёки шўнғиб кетиб, улардан бошини кўтаролмай қолди. Кўзига яхши кўринган ҳамма нарсани қўлига олиб, бўйнига, қўлларига тақиб кўрар, эрига ҳам “қалай” дегандек кўрсатарди. Шу тариқа, у нархига парво ҳам қилмасдан анча нарсани хариб қилиб қўйди.

Танлайдиганини танлаб бўлгач, эрига имо қилган эди, у: “неча пул бўлди?” дея олдимга югуриб келди. Ҳисобни кўриб, қўрқиб кетади деб ўйлаган эдим.

– Жами йигирма беш миллион бирюз етмиш минг, сўм бўлди...

– “бир юз етмиш минг”и қаердан келди, ака? – деди у пешонаси тиришиб... – ҳисобни тўғри қилинг...

– Ҳа-а-а, ҳалиги,.. онангиз бир юз етмиш минг сўмлик кичкина узук олгандилар...

Шу пайт кўз ўнгимда ғалати ҳодиса юз берди. Бояги одам қани ўша узук дея, харид қилинган бир талай тилла буюмлар ичидан мазкур узукни олиб, олдимга ташлади ва “кампирларга нима бор экан, тилла тақиб(!)”, деди. Бу гапдан титраб кетдим.

Онаси унинг сўзларини эшитиб қолди ва кўзлари ёшланиб, дўкондан чиқиб кетди. Дўконнинг ойнаванд деворидан уни кузата бошладим. У ўғлининг машинасига бориб, маъюс ҳолда ўтирди. Бўғзимга бир нарса қадалгандек бўлди. Унга раҳмим келди. Қаршимда гўёки, ўз онам беҳурмат қилингандек эди.

Шу пайт бояги бойваччанинг ҳоним афандиси қўлларини пахса қилиб, эрини койий кетди.

– Нима қилардиз-а шунақа қилиб?.. Уфф, шу етми турувди. Шу қиганизга энди, ўғлизга қарамай қўйсалар нима бўлади, а?!.. Ким кўтариб юради, энди болани?.. Ман кўтармиман - у ахир!!!

Субҳаналлоҳ... Анави кекса аёл қайнонамиди ўзи, ёки хизматкор?.. Ҳайратдан ёқамни ушлай дедим.

Охири, сабрим чидамасдан ҳалиги одамга танбеҳ беришга мажбур бўлдим. Жуда ҳам хунук иш қилдиз - да, биродар, – дедим. Шунча пул сарфлаганда, биттагина арзон узук нима эди,.. шунинг учун бунчалик пасткашликка бориш керакмиди? Энди, бориб, ойингизни кўнглини олинг, – дея насиҳат қилдим.

Йигит машинада ўтирган онасининг олдига бориб:

– Хоҳласангиз ўша узукни ола қолинг, ойи – и!.. деди. Онаси эса:

– Йўқ!.. ҳеч нарса керакмас, – деди. Шунчаки, ҳамма каби мен ҳам байрам сабабли хурсанд бўлишни хоҳлагандим...

Бу манзарадан кўзларимдан олдин қалбим йиғларди. Нуроний, муштипар онаизорнинг чил-чил синган дилига малҳам топишга ожиз эдим.

Бу воқеани эшитиб, менинг ҳам кўзларим ёшланди. Наҳотки, одамлар ўз ота-оналарига нисбатан бу қадар бемеҳр бўлиб кетишган бўлса!.. Ота-онани хор қилиш шунчалик бўладими? Мурғак гўдаклик чоғимиздан бошлаб то улағайиб, ўзимизни эплайдиган бўлгунимизга қадар емай едириб, киймай кийдирган, бизнинг роҳатимиз учун неча уйқуларини ҳаром қилган, бутун умрини, соғлигини бизларга бахшида қилган ота-оналаримизга ташаккуримиз, муносабатимиз шуми? Яхшиликнинг жавоби наҳот шундай бўлса?.. Ота-онасини бошидаги тож, бирисини ой, бирисини қуёш деб билган олийжаноб халқимизнинг асл қадриятлари қайларда қоляпти?..

Наҳотки, келинларимиз ҳам биттагина қайноналарини Аллоҳ учун, ёки бундай тушунча уларга бегона бўлса, ҳеч бўлмаганда ўз эрларининг ҳурмати учун кўнглини олишни, ҳурматларини жойига қўйишни ўзларига эп кўролмайдилар?!.. Агар эр ўз ота-онасига бепарво бўлса, уни тўғри йўлга солиш аёл кишидан вожиб эмасми?!..

Қайтар дунё, дейдилар. Эрта бириси кун улар ҳам ўғил уйлантириб, қайнона бўлганларида, ўзларига нисбатан шундай муомала қилинса, чидай олармиканлар?!.. Охиратдачи, охиратда ота-онасига бемеҳр ва бепарво фарзанднинг оқибати не бўларкин?!...

Ота-онага яхшилик қилиш фарз, уларни ранжитиш, дилларини оғритиш эса гуноҳи кабирадир. Ота-онани йиғлатиш, гуноҳга буюрмаган ҳолатда итоат қилмаслик, дилларини оғритиш, кексайганларида яхшилик қилмай, ёрдам бермай ташлаб қўйиш, уларга қарашдан қочиб қариялар уйига олиб бориб қўйиш, дўстни отадан, хотинни эса онадан устун қўйиш ҳам ота-онага оқ бўлиш жумласидан ҳисобланади. Аллоҳ таоло барчамизни ота-онасига яхшилик қилувчи солиҳ бандаларидан қилсин! Ҳеч кимни кексайиб қолганда меҳрга зор қилмасин!

Одилхон қори Юнусхон ўғли

Муҳаммад Аюб Фахриддинов

Тўрақўрғон тумани "Абдулваҳҳоб қори"  жоме масжиди имом хатиби

Ўзбекистон мусулмонлари идораси жамоаси Хатирчи тумани “Сўфи Аллоҳёр” масжиди имом хатиби Хайруллоҳ Бобоназаров ҳамда Кармана тумани "Мавлоно Ориф Деггароний" масжиди имом хатиби Саъдулло Бобоназаровларнинг падари бузруквори Бобоназаров Нормурод отанинг вафоти муносабати билан у кишининг барча оила аъзоларига ва яқинларига чуқур таъзия изҳор этади.
Оламдан ўтган отахоннинг барча солиҳ амалларини Аллоҳ таоло ўзларига ҳамроҳ айлаб, Ўз мағфиратига олсин.
Ҳақ таоло марҳумнинг яқинлари, фарзанду аржумандларига чиройли сабр бериб, бу мусибатларига ажру мукофотлар ато этсин.
«Иннаа лиллааҳи ва иннаа илайҳи рожиъуун!»
«Мусибат етганда «Албатта, биз Аллоҳникимиз ва албатта, биз Унга қайтувчимиз», деган сабрлиларга хушхабар беринг».

Ўзбекистон мусулмонлари идораси жамоаси Тошкент ислом институти Ақоид ва фиқҳий фанлар кафедраси катта ўқитувчиси Фарҳод домла Жўраевнинг падари бузруквори вафоти муносабати билан у кишининг барча оила аъзоларига ва яқинларига чуқур таъзия изҳор этамиз.

Оламдан ўтган отахоннинг барча солиҳ амалларини Аллоҳ таоло ўзларига ҳамроҳ айлаб, Ўз мағфиратига олсин.

Ҳақ таоло марҳумнинг яқинлари, фарзанду аржумандларига чиройли сабр бериб, бу мусибатларига ажру мукофотлар ато этсин.

«Иннаа лиллааҳи ва иннаа илайҳи рожиъуун!»

«Мусибат етганда «Албатта, биз Аллоҳникимиз ва албатта, биз Унга қайтувчимиз», деган сабрлиларга хушхабар беринг».

Ўзбекистон мусулмонлари идораси

Бугун,  9 август куни пойтахтимиздаги Миллий матбуот марказида Ўзбекистондаги Ислом цивилизацияси марказининг жорий йилнинг биринчи ярим йиллигида  “Инсон қадрини улуғлаш ва фаол маҳалла йили” Давлат дастури ижроси борасида амалга оширган ишларига бағишланган матбуот анжумани бўлиб ўтди. Унда Марказ раҳбарияти ва илмий ходимлари ҳамда ОАВ вакиллари иштирок этди.

Марказнинг 2022 йил биринчи ярим йиллигидаги фаолияти ва келгусидаги режалари ҳақида Марказ директори Шоазим Миноваров сўз олиб,  Марказ фаолиятини  ҳар томонлама қўллаб-қувватлаш ҳамда унинг олдига қўйилган вазифаларни сифатли ва талаб даражасида бажариш учун муносиб шарт-шароитларни яратиш борасида ҳукуматимиз, шахсан, Президентимиз томонидан доимий ғамхўрлик ва эътибор қаратиб келинаётганини алоҳида таъкидлади.

Шунингдек, тадбирда Марказ томонидан ўтган  давр мобайнида “Шарқ ва Ғарб” нодир китоблар коллекцияси фиҳристи ўзбек, рус, инглиз, араб ва француз тилларига таржима қилингани  ва 4 та жилдда  нашрдан чиқарилгани ҳамда Марказ кутубхонаси фонди жами 515 419 та ёзма манба, замонавий нашр ва электрон нусхадаги манбалар билан бойитилганлиги ҳақида сўз юритилди. Жумладан, ҳозирда Марказ фондининг ёзма манбаларидан 465 та қўлёзма, 623 та тошбосма, 19 415 та замонавий нашрлар ҳамда 494 916 та электрон нусхадаги манбаларни ташкил этади.

Республика фондларида сақланаётган 106 минг 525 та ёзма манбалар тўғрисида маълумотлар базаси яратилиб, уларнинг илмий таҳлили асосида 50 минг 795  та манбаларнинг реестри (паспорти) тайёрланди.

Халқаро ҳамкорлик доирасида, жумладан, Қатар миллий кутубхонасида сақланаётган 19 351 та электрон манбалар, шундан   6,8 минг архив файллари, 1,3 минг хариталар, 591 та фотосуратлар ва 300 га яқин қўлёзмаларнинг электрон нусхаларидан фойдаланишга имконият олиниб, улардан шу кунгача 400 та ноёб қўлёзма манбалар ва 300 та архив ҳужжатлари марказнинг электрон нусхалар фондига юклаб олинган.

Қолаверса, анжуманда Марказ қошида “Алломалар мероси” ўқув маркази ташкил этилиб, республика бўйича 12 та филиали фаолият юритаётгани ҳақида ҳам маълумот берилди. Таъкидланишича, мазкур ўқув марказларга араб тили, хаттотлик, Қуръони каримни ўрганиш бўйича мурожаат қилаётганлар тобора ортиб бормоқда. Бу ҳам халқимизнинг Қуръонга ва илмга бўлган ташналигидан даракдир.

Марказнинг яна бир хайрли ишларидан бири аҳоли ўртасида китобхонлик маданиятини шакллантиришга қаратилгандир. Жумладан, Марказ ташаббуси билан  Тошкент шаҳридаги Ҳазрати Имом мажмуаси майдонида, очиқ осмон остида биринчи бор “Китоб–камолот калити” илмий‐маърифий китоблар кўргазмаси ва савдоси ўтказилди. Кўргазма ва савдода юртимиздаги нашриётлар, босмахоналар ва китоб дўконлари илмий, маърифий ва бадиий китоблари билан иштирок этди.

Рамазон муносабати билан Ҳазрати Имом мажмуасида ўтказилган ушбу маърифий тадбир доирасида китоблар тақдимоти, таниқли шахслар иштирокида ёшларни илм-маърифатга даъват этадиган суҳбатлар, шунингдек китобхонлар ўртасида совринли танловлар ўтказилди. Хаттотлик санъати бўйича маҳорат дарслари ташкил этилди. Шунингдек, нашриёт ва босмахоналар ўртасида турли номинациялар бўйича танловлар ўтказилиб, ғолибларга сертификат ва эсдалик совғалари топширилди. 

Китоб кўргазмаси ҳамда китобхонлик тадбирларининг узвий давоми сифатида Марказ илмий ходимлари томонидан Фарғона водийси вилоятлари ва Қашқадарёда  ушбу тадбирлар  давом эттирилди.

Тадбир сўнггида Марказ раҳбарияти журналистларнинг қизиқтирган барча саволларига батафсил жавоб бердилар.

Ўзбекистон мусулмонлари идораси матбуот хизмати