Товус ибн Кайсон раҳимаҳуллоҳ дедилар:
“Одам боласи гапирадиган барча сўз ҳисобга олинади. Ҳатто беморлигида инграгани ҳам”.
*****
Сиррий Сақатий раҳимаҳуллоҳ дедилар:
“Агар молингдан камайиб бораётганига ғам қилаётган бўлсанг, умрингдан камайиб бораётганига йиғла!”
*****
Рабийъ ибн Хайсам раҳимаҳуллоҳнинг отлари ўғирланди. Ушбу отни у кишига йигирма минг (динор ёки дирҳам)га берилган эди. Одамлар у зотга “Ўғрини дуойибад қилинг” дейишди. Шунда у киши: “Эй Аллоҳ, агар ўша киши бой бўлса, уни мағфират қилгин! Агар ўша киши фақир бўлса, бой қилгин!” деб дуо қилдилар.
*****
Зуннун Мисрий раҳимаҳуллоҳ дедилар:
“Жасаднинг касаллиги оғриқлардадир. Қалбларнинг касаллиги гуноҳлардадир. Жасад касал бўлган пайтда таомнинг лаззатини ҳис қилмаганидек, қалб гуноҳлар сабабли ибодат ҳаловатини топмайди”.
*****
Яҳё ибн Муоз раҳимаҳуллоҳ дедилар:
“Ижобатининг йўлларини гуноҳлар билан тўсиб қўйиб, дуо қилганингда, секин ижобат бўляпти дема!”
*****
Яҳё ибн Муоз раҳимаҳуллоҳ дедилар:
“Биродаринг – сенга айбларни танитган кишидир.
Дўстинг – сени гуноҳлардан огоҳлантирган кишидир”.
*****
Рабийъ ибн Хайсам раҳимаҳуллоҳ суҳбатдошларига: “Касаллик, дори ва шифо нималигини биласизларми?” дедилар. Улар: “Йўқ” дейишди. Шунда Рабийъ раҳимаҳуллоҳ: “Касаллик – гуноҳлардир. Дори – истиғфордир. Шифо – тавба қилиб, гуноҳга қайтмаслигингдир” дедилар.
*****
Муҳаммад ибн Восеъ раҳимаҳуллоҳ ўлим тўшагида ётганларида: “Ҳой биродарларим! Мени қаерга олиб борилишини биласизларми? Яккаю Ягона Аллоҳга қасамки, мени ё дўзахга олиб борилади ёки Аллоҳ мени афв қилади” дедилар.
*****
Зуннун Мисрий раҳимаҳуллоҳ дедилар:
“Солиҳларнинг суҳбати сабабли ҳаёт ёқимли, тотли бўлади. Яхшилик солиҳ дўстда жамлангандир. Агар унутсанг, эслатади. Агар эсласанг, кўмаклашади”.
*****
Саъид ибн Мусаййиб раҳимаҳуллоҳ дедилар:
“Агар шайтон бирор нарсадан ноумид бўлса (яъни кимнидир йўлдан уролмаса, васваса қилолмаса), унга аёллар тарафидан келади”.
*****
Яҳё ибн Муоз раҳимаҳуллоҳ дедилар:
“Аллоҳ бир қавмдан рози бўлди, натижада, уларнинг ёмонликларини мағфират қилди. Аллоҳ бир қавмга ғазаб қилди, натижада, улардан яхшиликларни қабул қилмади”.
*****
Ҳотамул Асом раҳимаҳуллоҳ дедилар:
“Нафсингга қуйидаги уч ўринда қараб, кузатиб тур:
- Агар (бирор) амал қилсанг, Аллоҳ сенга назар солиб турганини эсла!
- Агар (бирор гап) гапирсанг, Аллоҳ сени эшитиб турганини эсла!
- Агар сукут қилсанг, Аллоҳ сенинг ичингдагини билиб турганини эсла!”
*****
“Сифатус софва” ва “Ҳилятул авлиё” асарларидан
Нозимжон Иминжонов таржимаси
