![muslim.uz](/templates/sj_news_ii/images/placeholder/user.png)
muslim.uz
Икки томонлама ҳамкорлик йўлга қўйилди
Шу йил 9 июль куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков Италия ислом дини жамияти вице-президенти Имом Яҳё Паллавичини билан учрашув ўтказди.
Мулоқотда Ҳомиджон домла сўнгги йилларда Ўзбекистон ва Италия ўртасидаги яқин дўстлик алоқалари мустаҳкамланаётгани, бунда иккала давлат Раҳбарларининг самимий мулоқотлари, ўзаро ташрифлар ва имзоланган олий даражадаги ҳужжатларнинг ўрни муҳимлигини таъкидлади. Шунингдек, икки давлат ўртасидаги дўстлик, илмий-маърифий, маданий ва зиёрат туризми йўналишларида ўзаро ҳамкорлик қилишга кенг йўл берилганини ҳам алоҳида қайд этди.
Ўз навбатида, Имом Яҳё Паллавичини ҳам самимий қабул учун миннатдорлик билдириб, Ўзбекистонда олиб борилаётган ислоҳотларни юқори баҳолаб, бундай ўзгаришлар янада бардавом бўлишини тилади. Ўзбекистон бой маънавий меросга эга экани, ўзи ҳам бир неча кун давомида Бухоро, Самарқанд ва Тошкент шаҳарларидаги табаррук зиёратгоҳлар ҳамда масжид-мадрасалар зиёратида бўлганини таъкидлаб, Имом Бухорий, Имом Термизий, Баҳоуддин Нақшбанд каби мўътабар зотлар бутун мусулмон дунёсига маънавий устоз эканларини эътироф этди.
Мулоқот якунида Ўзбекистон мусулмонлари идораси ва Италия ислом дини жамияти ўртасида Англашув меморандуми имзоланди.
Учрашув дўстона ва самимий руҳда ўтди.
Ўзбекистон мусулмонлари идораси Матбуот хизмати
Наманган вилоятидаги диний соҳа ходимлари билан учрашув бўлиб ўтди
Ўзбекистон мусулмонлари идораси вилоят вакиллигининг мажлислар залида имом-хатиб ва имом-ноиблари учун йиғилиш ўтказилди.
Йиғилиш давомида вилоятда 2024-йилнинг биринчи ярим йиллигида амалга оширилган ишлар ҳамда диний вазиятни соғломлаштириш, мутаассиблик ва радикаллашувни олдини олиш, имомларнинг шахсий намуна кўрсатиши бўйича вазифа ва топшириқлар белгилаб берилди.
Йиғилишда Наманган вилояти ҳокимининг ўринбосари Хатамов Жамшед Мухторивич ўз нутқи давомида тараққиётимизнинг янги даврида диний соҳада жуда катта ислоҳотлар амалга оширилаётганини тахкидлаб ўтди. Ўз навбатида имомлик шарафли ва масъулиятли вазифа экани, бугунги кун имоми замонга зийраклик, теран фикр билан қараши, ўз устида мунтазам ишлаши ва мўмин-мусулмонларнинг маънавий-маърифий соҳадаги эҳтиёжларини қондириш учун тинимсиз изланиб, хизмат қилишлари зарур экани алоҳида қайт этилди.
Бундан ташқари, барча имом-хатиб ва имом-ноиблар ўзларига бириктирилган МФЙлар билан мунтазам алоқада бўлиб, ёшлар тарбиясига алоҳида эътибор қаратиш, илм-маърифатга қизиқтириш ва ёш авлод келажаги учун мустаҳкам пойдевор яратиш, оилаларни тинч-тотув яшаши, фарзандларни бевақт тирик етим бўлмаслиги учун ажримларни олдини олиш, кексаларни ҳурмат қилиш, қўшничилик одобларига риоя қилиш кабиларни тарғибига алоҳида эътибор қаратиш таъкидланди.
Йиғилиш давомида Наманган вилоятидаги диний соҳа ходимлари фаолиятини янада яхшилаш юзасидан муҳим тавсия ва кўрсатмалар берилди. Мураккаб даврда имом-хатибларнинг фаолликларини ошириш, ОАВдаги чиқишлари мазмун-моҳиятини янада яхшилаш, жаҳолатга қарши маърифат билан курашиш ва мўмин-мусулмонлар эҳтиёжларини қондириш борасида тинимсиз хизмат қилиш каби жиҳатларига эътибор қаратилди.
Ўзбекистон мусулмонлари идораси Наманган вилояти вакиллиги Матбуот хизмати
Ливияда Қуръони карим мусобақаси ўтказилади
Шу йилнинг 9 июль куни Ливия пойтахти Триполида Қуръони каримни ёддан ўқиб бериш бўйича 12-халқаро мусобақа бўлиб ўтади. Унда дунёнинг 62 давлати вакиллари иштироки этиши кутилмоқда.
IQNA сайтининг “Livia Observer” нашрига таяниб хабар беришича, Ливиянинг Вақфлар ва Ислом ишлари бўйича бош бошқармаси 9 июль куни Қуръони каримни ёддан ўқиб бериш бўйича 12-халқаро мусобақа бошланганини эълон қилди.
Ливия жамғармаси маъмурияти ушбу танлов доирасида турли маданий ва илмий тадбирлар ўтказилишини ҳам маълум қилди.
Ҳифз, хушовоз ва тартилни ўз ичига олган ушбу мусобақалар мамлакатдаги 10 йиллик танаффусдан сўнг қайта тикланмоқда.
Ўзбекистон мусулмонлари идораси Матбуот хизмати
Хоразмлик ҳожиларнинг дастлабки гуруҳи юртимизга етиб келди
“Ҳаж–2024” мавсумининг илк зиёратчилари Хоразмга етиб келди. Уларни диний соҳа вакиллари ва зиёратчиларнинг яқинлари Урганч аэропортида юқори даражада кутиб олишди.
Улар дунёдаги миллионлаб диндошлари қатори зиммаларидаги Аллоҳнинг фарзини бажариб қайтишди.
Абу Ҳурайра розияллоҳу анҳудан ривоят қилинади: «Расулуллоҳ соллаллоҳу алаиҳи васаллам: “Умрадан умрагача бўлган (сағира) гуноҳлар кечирилади. Мабрур ҳажнинг мукофоти фақат жаннат бўлади!”, дедилар» (Имом Байҳақий ривояти).
Аллоҳдан барча ҳожиларнинг ҳажларини мабрур, ибодатлари мақбул қилсин.
Ўзбекистон мусулмонлари идораси Матбуот хизмати