Куни кеча Қирғизистон мусулмонлари қурултойи бўлиб ўтди. Унда ташкилий масала кўрилиб, Қирғизистоннинг янги муфтийси сайланди.

Ушбу лавозимга тўққиз киши номзоди қўйилган бўлиб, улар ичидан Замир Ракиев мамлакат олий муфтийси этиб сайланган. Бу ҳақда Қирғизистон мусулмонлари диний идораси матбуот хизмати хабар бермоқда. Янги сайланган Замир Ракиев бир неча йил собиқ муфтий ўринбосари бўлиб фаолият юритган.

Маълумот учун, Замир Ракиев 43 ёшда бўлиб, мамлакатнинг Норин вилоятида таваллуд топган. У Ракиев Мисрдаги диний курсларни тугатган, Бишкек гуманитар университетида шарқшунослик бўйича таҳсил олган. 2020 йилда Бишкек қозиси бўлган.

Шу муносабат билан Ўзбекистон мусулмонлари раиси, муфтий Усмонхон Темирхон ўғли Алимов ҳазратлари Қирғизистон мусулмонлари диний идорасининг янги муфтийси Замир ҳазрат Ракиевга янги лавозимга сайлангани муносабати билан табрик йўлладилар. Унда жумладан бундай дейилган:

“Ҳурматли, Қирғизистон мусулмонлари идораси раиси, муфтий Замир қори Ракиев ҳазратлари! Сизни Қирғизистон мусулмонлари идораси раиси, муфтий этиб тайинланганингиз билан чин қалбдан, самимий муборакбод этаман. Ушбу шарафли вазифани адо этишингизда, Аллоҳ таборака ва таолодан куч-қувват ва улкан зафарлар тилайман.
Маълумки, халқларимиз азалдан бир заминда яшаб, бир дарёдан сув ичган. Хурсандчилик кунларини бирга нишонлаган, оғир дамларида эса бир-бирига ёрдам қўлини чўзган.

Ҳақ таолога шукрки, сўнгги йилларда мамлакатларимиз ўртасидаги ўзаро ҳамкорлик алоқалари янги босқичга чиқиб, жадал ривожланиб бормоқда. Икки давлат президентларининг бу йўлдаги саъй-ҳаракатлари таҳсинга лойиқдир.

Шу ўринда Ўзбекистон мусулмонлари идораси ва Қирғизистон мусулмонлари идораси ўртасидаги ҳамкорлик алоқалари мустаҳкамланиб бораётгани бизни жуда ҳам қувонтирмоқда.

Биз дин пешволари халқларимиз орасидаги яқин қўшничилик, дўстлик алоқаларини янада ривожлантиришга, тинчлик-осойишталикни таъминлашга бор куч-ғайратимизни сафарбар этишимиз лозим.

Ҳурматли муфтий Замир қори Ракиев ҳазратлари! Сизни яна бир бор, Қирғизистон мусулмонлари идораси раиси, муфтий этиб тайинланганингиз билан қутлайман. Ҳақ таборака ва таолодан сиҳат-саломатлик, куч-ғайрат ҳамда иш фаолиятингизда улкан зафарлар тилайман”.

Ўзбекистон мусулмонлари идораси матбуот хизмати

Muqaddas islom dinimizning ma’rifatparvar va tinchlikparvar g‘oyalarini xalqimizga yetkazishda ommaviy axborot vositalarining ham o‘ziga xos o‘rni bor.

Bu jarayon jurnalistlardan bilim, mas’uliyat va mahorat talab etadi.

O‘zbekiston xalqaro islom akademiyasi huzuridagi Imom Moturidiy xalqaro ilmiy-tadqiqot markazida 27-iyun – Matbuot va ommaviy axborot vositalari xodimlari kuni munosabati bilan bo‘lib o‘tgan ma’rifiy tadbirda shu haqda so‘z bordi.

O‘zbekiston xalqaro islom akademiyasi huzuridagi Imom Moturidiy xalqaro ilmiy-tadqiqot markazi rahbari Davronbek Maxsudov mamlakatimizda Prezidentimiz Shavkat Mirziyoyev tashabbusi bilan boshlangan ma’naviy-ma’rifiy islohotlar tobora kengroq quloch yozayotganini ta’kidladi. Bu jarayonda buyuk alloma bobolarimizning boy ma’naviy, ilmiy merosini o‘rganish, targ‘ib etish, ular faoliyatini puxta o‘rganishga ixtisoslashgan markazlar tashkil etish bo‘yicha tizimli ishlar olib borilmoqda.

Davlatimiz rahbari tashabbusi bilan tashkil etilgan Imom Moturidiy xalqaro ilmiy-tadqiqot markazi taraqqiyotning yangi bosqichiga intilayotgan o‘zbek xalqining ma’naviy-ma’rifiy barkamolligini yuksaltirishga xizmat qilishi bilan bir qatorda, Uchinchi Renessans davrining ilmiy poydevori vazifasini bajaruvchi ilm-ma’rifat maskanlaridan biri bo‘lishi, shubhasiz.  bugungi keskin globallashuv davrida, insoniyat turli davr sinovlari bilan ro‘baro‘ bo‘layotgan bir paytda Imom Moturidiydek allomalarimiz merosini xalqchil, hayotiy , ravon tarzda hamyurtlarimiz, ayniqsa, yoshlarga tushuntirish olimlar, tadqiqotchilar, ommaviy axborot vositalari xodimlaridan katta mas’uliyatni talab etishi, shubhasiz. Imom Moturidiy xalqaro ilmiy-tadqiqot markazi bu borada jurnalistlar, turli ommaviy axborot vositalari bilan samarali hamkorlikni keng yo‘lga qo‘ygan.

– O‘zbekiston buyuk allomalar diyori, –dedi "Dunyo bo‘ylab" telekanali muharriri Farruxbek Olimov.– "Imom Moturidiy" , "Abu Mu’in Nasafiy" nomli filmlarni yaratib, ularni tomoshabinlarga havola etdik. Buyuk allomalarimiz merosini o‘rganish va targ‘ib etish borasida biz – ommaviy axborot vositalari xodimlarining vazifalari hali bisyor, deb bilaman.

Tadbirda ma’naviy-ma’rifiy mavzuda qalam tebratayotgan tadqiqotchilar, jurnalistlar, blogerlarga tashakkurnoma va  esdalik sovg‘alari topshirildi.  

      N.Usmonova,

    O‘zA

Шу йил 25 июнь куни Ўзбекистон мусулмонлари идораси раиси, муфтий Усмонхон Алимов ҳазратлари бошчилигидаги бир гуруҳ уламоларнинг пойтахтимиз ва Тошкент вилояти ташрифлари бошланади.

Ташриф давомида маънавий-маърифий учрашувлар, олис ва чекка ҳудудлардаги аҳоли вакиллари билан юзма-юз мулоқотлар, таниқли уламолар иштирокида жоме масжидларда суҳбатлар ўтказилиши ва эҳтиёжманд оилалар ҳолидан хабар олиш каби хайрли ишларни амалга ошириш мақсад қилинган.

Шунингдек, пойтахт ва вилоят аҳлини юртимизда бўлаётган ўзгаришлар мазмун-моҳияти ҳақида хабардор қилиш билан бир қаторда уларнинг дарду ташвишларига кўмаклашиш, фикр-мулоҳазаларини тинглаш ва диний соҳага тегишли муаммоларини жойида ўрганиб, бартараф этиш ҳам кўзда тутилган.

Аллоҳ таоло уламоларимиз сафарини хайрли ва манфаатли қилсин!

Ўзбекистон мусулмонлари идораси матбуот хизмати

Ҳамд Аллоҳгадир, Расулига саловат,
Қалб тўла алам, йўқдир ҳаловат,
Аччиқ кўз ёшимга қилма маломат,
Айрилмоқдаман сендан азиз маъҳадим!

Қадринга етмадик шамолдек ўтди йиллар,
Ғанимат билмадик вайрон бўлди диллар,
Таърифин қилай десам, ожиздир бу тиллар,
Айрилмоқдаман сендан азиз маъҳадим!

Етишиб чиқди сендан не-не зотлар,
Муфтий, шайхул-ислом, олим-у қурролар,
Гувоҳдир бунга ярим асрлик замонлар,
Айрилмоқдаман сендан азиз маъҳадим!

Сендадир фидоий азиз устозлар,
Кўкларга қадринг кўтарган улуғ устозлар,
Дин ғамида сочи оқарган буюк устозлар,
Айрилмоқдаман сендан азиз маъҳадим!

Бизларга илм берди олим устозлар,
Фақиҳ, муҳаддис, муфассир, моҳир устозлар,
Ақоидда пешқадам, камтарликда намуна,
Хулқи Қуръон бўлган, зоҳид устозлар,
Айрилмоқдаман сендан азиз маъҳадим!

Бағрингда таълим олдик курсдошлар билан,
Кўзи ёнган шижоатли қалбдошлар билан,
Бир мақсад йўлидаги елкадошлар билан,
Айрилмоқдаман сендан азиз маъҳадим!

Тавсиям сизларга маъҳаддаги толиблар,
Қадрига етин улуғ макон, ғанимат фурсатлар,
Омонатдир сизларга азиз устозлар,
Айрилмоқдаман сендан азиз маъҳадим!

Ҳижрон азоби осон эмас, биламан,
Айрилиқ вақтинчалик, умид қиламан,
Насиб қилса бағринга яна қайтаман,
Айрилмоқдаман сендан азиз маъҳадим!

4-курс талабаси Асадуллоҳ Нуриддинов. (17.06.2021.)

Ўзбекистон мусулмонлари идораси ҳузуридаги Имом Бухорий номидаги Тошкент ислом институтида 2017-2021 йиллар оралиғида таълим олган талабаларнинг “Хатмона – 2021” битирув тадбири бўлиб ўтди. Бу ҳақда ТИИ матбуот хизмати хабар берди.

Тадбирга Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, раис ўринбосари Иброҳимжон домла Иномов, Дин ишлар бўйича қўмита раисининг биринчи ўринбосари Музаффар Комилов, Ўзбекистон халқаро ислом академияси Халқаро муносабатлар кафедраси профессори Муҳаммадсиддиқов Муҳаммадолим, Имом Мотуридий илмий тадқиқот маркази директори Даврон Мақсудов сингари мартабали меҳмонлар ташриф буюришди.
Шунингдек, Ўзбекистон мусулмонлари идораси ва Тошкент ислом институтида узоқ йил меҳнат қилган фахрий устозлар, имом-хатиб ва ходимлар ҳам қатнашди.

Хатмона маросимини Диний идора матбуот хизмати ходими Абдулқаюм Йўлдошев олиб борди. Тадбир аввалида давлат мадҳияси янгради. Сўнг Тошкент Ислом институти 2-курс талабаси Абдулбасир қори Камалов Қуръон каримни тиловати қилди, Салоҳиддин устоз Шарипов хайрли дуо қилдилар.

Тадбирни Тошкент ислом институти ректори Уйғун домла Ғафуров кириш сўзи билан очиб берди. Сўнг минбарга Диний идора раисининг биринчи ўринбосари Ҳомиджон домла Ишматбеков ва Дин ишлари бўйича қўмита раисининг биринчи ўринбосари, Ўзбекистон халқаро ислом академияси ректори Музаффар Комиловлар чиқиб битирувчиларни табриклашди.

Ҳақ йўлида ким санга бир ҳарф ўқитмиш ранж ила,
Айламак бўлмас адо онинг ҳақин минг ганж ила.

Ҳазрат Навоийнинг бу сўзларида ҳеч қандай муболаға йўқ. Дарҳақиқат, устозларнинг ҳақлари беқиёс. Шундай экан, дил изҳорларини устозларга билдириш истагида бўлган тадбир иштирокчилари бўлган битирувчиларга навбат берилди. Абдулазиз Жуманов ўзбек тилида, Ҳикматуллоҳ Рўзиалиев араб тилида, Муҳаммадали Маҳкамов инглиз тилида, Ҳалилуллоҳ Асадуллаев рус тили устозларни ҳурмат ва эҳтиромни ифода қилувчи нутқ сўзлади.

Навбатдаги сўз битирувчиларни табриклаш ва уларга таълим берган устозларга ўз миннатдорчиликларини билдириш учун хатмона кечасига келган ота-оналарга берилди. Улар мана шу тўрт йил мобайнида фарзандларига таълим берган устозларига қалб сўзларини изҳор этди. Битирувчи курс талабаси Асадуллоҳ Нуриддинов институт ҳақида ўзи ёзган шеърни ўқиб берди.

Шундан сўнг ўқиш давомида турли йўналишларда етакчи бўлган талабалар эътироф этилиб, фахрий ёрлиқ билан тақдирланишди.
Тадбирда устоз Салоҳиддин домла Шарипов ўзларининг катта ҳаётий ва касбий тажрибадан келиб чиқиб битирувчиларга керакли маслаҳатларни бердилар.

Тадбир якунида Олий маъҳадда бир неча йил ректор бўлиб ишлаган Зоҳидхон домла Қодиров битирувчи талабаларга оқ фотиҳа бериб дуо қилдилар.

Маълумот учун, Ўзбекистон мусулмонлари идораси Таълим ва илмий-тадқиқот ҳамда Масжидлар бўлими биргаликда битирувчиларни юртимиздаги масжидларга имом-хатиб, ноиб имом вазифаларига, шунингдек олий ва ўрта махсус ислом таълим муассасаларига ўқитувчи лавозими бўйича ишга тақсимот қиладилар.
Таълимни давом эттирмоқчи бўлган битирувчилар магистратура босқичида ўқиш учун республика олий таълим муассасаларининг бирига ҳужжат топширишлари мумкин.

Ўзбекистон мусулмонлари идораси матбуот хизмати