muslim.uz

الجمعة, 31 آب/أغسطس 2018 00:00

Афв этилганларнинг кўпчилиги байрамни ўз уйида нишонлайди

Фармон ва ижро

Мустақиллик аталган бебаҳо неъмат халқимизга нафақат жаҳон айвонида тенглар ичра тенг бўлиш бахтини, балки умумэътироф этилган инсон ҳуқуқларидан тўла фойдаланиш имконини берди.

Давлатимизнинг ҳуқуқий пойдевори бўлган Бош қомусимизда инсоннинг эркин яшаш, ўқиш, ишлаш, ижтимоий ҳимояланиш каби асосий ҳуқуқлари кафолатлари мустаҳкамланди. Энг асосийси, инсон ҳуқуқлари – олий қадрият этиб белгиланди.

Фуқароларга берилган бу имкониятлардан барча бирдек, шу жумладан, ҳаётда билиб-билмай адашган кишилар ҳам баҳраманд бўлмоқда. Зеро, халқимизга хос инсонпарварлик, бағрикенглик ғоялари давлатимиз сиёсатининг туб моҳиятида мужассамлаштирилган.

Куни кеча Президент Шавкат Мирзиёевнинг афв этишга оид яна бир фармони эълон қилингани юртимизда инсон ҳаёти, эркинлиги, шаъни, қадр-қиммати ва бошқа ҳуқуқларининг олий қадрият сифатида тан олинишининг яна бир ёрқин намоёни бўлди.

Қайд этиш керакки, давлат раҳбарининг 2017 йил декабрь ойида Конституциямизнинг 25 йиллиги арафасида эълон қилинган фармони билан мамлакатимиз тарихида илк маротаба 2 минг 700 нафар маҳкумни, жумладан, жазони ижро этиш колонияларидан 956 нафар турли шароитлар туфайли жиноят содир этган, қилмишидан чин кўнгилдан пушаймон бўлган, тузалиш йўлига қатъий ўтган, яшаш жойи ва жазони ижро этиш муассасасида ижобий тавсифланган шахслар афв этилган эди.

2018 йил 12 июнда Рамазон ҳайити муносабати билан эълон қилинган афвга оид Президент фармони билан билиб-билмай жиноят содир этган, қилмишига чин кўнгилдан пушаймон бўлган ва тузалиш йўлига қатъий ўтган озодликдан маҳрум этиш жазосини ўтаётган 226 нафар фуқаро афв этилди.

Ватанимиз Мустақиллигининг 27 йиллиги арафасида, яъни 2018 йил 30 августда Президентимиз “Озодликдан маҳрум этиш жазосини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида”ги фармонга имзо чекди.

– Халқимизнинг энг улуғ байрами арафасида Президентимизнинг афв этишга оид фармони эълон қилингани халқимизга хос меҳр-шафқат, инсонпарварлик, бағрикенглик, кечиримли бўлиш, олижаноблик каби эзгу фазилатларини янада юксак намоён этди, –дейди Ўзбекистон Республикаси ички ишлар вазири ўринбосари, ИИВ жазони ижро этиш бош бошқармаси бошлиғи Баҳромбек Одилов. –Ўзбекистон Республикаси Конституциясининг 93-моддаси 23-бандига мувофиқ қабул қилинган фармон билан қилмишига чин кўнгилдан пушаймон бўлган ва тузалиш йўлига қатъий ўтган озодликдан маҳрум этиш жазосини ўтаётган 261 нафар фуқаро афв этилди.

Фармонга мувофиқ, 215 нафар шахс жазони ижро этиш муассасаларидан озод қилиниб, оиласи ва яқинлари бағрига қайтарилади. Шунингдек, 46 нафар шахсга тайинланган озодликдан маҳрум этиш жазосининг муддатлари қисқартирилади.

Афв этилганларнинг 5 нафарини 60 ёшдан ошган шахслар, 135 нафарини тақиқланган ташкилотлар фаолиятида қатнашган шахслар ташкил этади.

Айни пайтда фармон ижросини таъминлаш, афв этилган шахсларни оиласи ва яқинлари бағрига қайтариш чоралари кўрилмоқда.

Тошкент вилоятининг Зангиота туманида жойлашган жазони ижро этиш муассасаларида фармон ижросига оид тадбирлар бўлиб ўтди.

Афв этилганлардан бири – чирчиқлик Хуршид Маматқуловдир. У Ўзбекистонда тақиқланган диний ташкилотларга аъзо бўлгани учун озодликдан маҳрум этилган эди. Қилмишидан чин кўнгилдан пушаймон бўлган, муҳими, ҳаётда тўғри йўл танлашни мақсад қилган Хуршид қамоқдан озод бўлиб, яқинлари бағрига қайтди.

Андижонлик Марҳабо Азизова ҳам диний эктремистлар қутқусига учганлардан бири эди.

– Уйдан, фарзандларимдан айро тушгандагина оқибатини ўйламай иш қилганимни тушундим, – дейди М.Азизова. – Аёл учун юртнинг тинчлиги, фарзандлар камоли аслида катта бахт экан. Хатоларимни тушуниб, Президентимизга кечирим сўраб мурожаат қилган эдим. Мени бағрикенглик қилиб кечирганларидан беҳад миннатдорман. Байрамни уйда, болаларим билан нишонлаш бахти насиб этаётганидан қувончим чексиз. Бунинг учун бағрикенг халқимиздан қарздорман, албатта.

Бугун нафақат афв этилганлар, балки уларнинг яқинлари, оилаларига ҳам катта хурсандчилик туҳфа этилмоқда.

Фармонга кўра, афв этилган шахсларнинг ижтимоий ҳаётга мослашиб, фойдали меҳнат билан шуғулланиши, соғлом турмуш тарзини йўлга қўйиб, жамиятда муносиб ўрин топиши учун тегишли ташкилотлар барча зарур кўмак кўрсатади.

Норгул Абдураимова, ЎзА

Published in Мақолалар

الجمعة, 31 آب/أغسطس 2018 00:00

Саудия Арабистонидаги «Бухорийлар»

Ислом дунёсида Имом ал-Бухорийнинг мавқеи ва обрўси шу қадар юқорики, ўзбекистонликларни «Бухорийлар» авлоди, деб аташади. Саудия Арабистонида ҳам улар кўпчиликни ташкил этади.

Мустақиллик байрами арафасида Вазирлар Маҳкамаси ҳузуридаги Дин ишлари бўйича қўмита раиси ўринбосари, “Ҳаж-2018“ мавсумининг ишчи гуруҳ раҳбари Нуриймон Абулҳасан билан Маккаи Мукаррамада Саудиянинг Макка ва Жидда шаҳарларида истиқомат қилаётган ватандошларимиз билан норасмий учрашув ташкил этилди.

Учрашувда мамлакатимиз мустақиллигининг 27 йиллиги нафақат Ўзбекистонда, балки, чет давлатларда ҳам юртдошларимиз томонидан катта тантана билан нишонланаётгани қайд этилди.

Саудиялик ватандошларимиз мустақилликнинг қадри, унинг улуғ неъмат эканлиги, истиқлол уларнинг ҳаётида ҳам катта аҳамият касб этишини таъкидлади. ХХ асрнинг 20-30-йилларида ўзбек миллати вакилларидан минглаб кишилар хорижий мамлакатларга, жумладан, Саудия Арабистонига чиқиб кетишга мажбур бўлган.

Ўша пайтларда Саудия Арабистонига келиб қолган ўзбекларнинг аксарияти ҳаётдан кўз юмган бўлса-да, уларнинг авлодлари шу муқаддас заминда истиқомад қилиб келмоқда.

Эътиборлиси, Саудиядаги «Бухорий»лар ўзбекона миллий урф-одат ва анъаналарни сақлаб қолган. Уларнинг фарзандлари араб тилида таҳсил олади, лекин оилада ва ўзбек жамоаларида ўзбекча сўзлашадилар.

Тадбирда ҳам ўзбекона самимият, ўзига хос кайфият сезилиб турди.

Қўмита раиси ўринбосари Нуриймон Абулҳасан Президентимиз Шавкат Мирзиёев томонидан хорижда яшаётган ватандошларимиз билан алоқаларини янада ривожлантириш борасида кенг кўламли ишлар олиб борилаётгани, юртимизда амалга оширилаётган ислоҳотлар, янгиланишлар, ўзгаришлар, хусусан, мамлакатимизда инвестицион муҳитни янада яхшилаш борасида мисли кўрилмаган ислоҳотлар бўлаётганини қайд этди.

Ўз навбатида, мезбонлар ҳам Ўзбекистонда тадбиркорлар учун қулай шароитлар яратилгани, ўз ватанига сармоя киритишдек бахтни яратиб берган учун Президент Шавкат Мирзиёевдан миннатдор эканлигини билдирди.

– Гарчи беш маҳал ибодатимни Каъба олдида адо қилсам-да, ватаним соғинчи қалбимни тарк этмайди, – деди саудиялик юртдошларимиздан бири.

– Бугун юртимизда ҳар бир фуқаро диний бағрикенглик, виждон эркинлиги тамойилларига амал қилган ҳолда эмин-эркин яшаётгани, масжидларимизда яратилган шароитлар, диний ўқув муассасаларидаги таълим сифатидан кўнгиллар чароғон бўлаётир, –деди Фарғона вилояти бош имом хатиби Салимжон Қодиров. – Юртдошларимизнинг ҳар йили Ҳаж ва Умра ибодатини адо этишлари учун кенг имконият эшиклари очилмоқда, Ўзбекистонда бўлиб ўтган Қуръон мусобақаси каби тадбирлар эса бу борадаги хайрли ишларнинг мантиқий давоми бўлди.

Учрашув якунида саудиялик ватандошларимиз томонидан меҳмонларга муқаддас Каъбапўш туҳфа қилиниб, шу орқали юртимиз ва юртдошларимизга ўзларининг илиқ саломларини изҳор қилдилар.

Тадбирдаги илиқ самимият учун миннатдорлик билдириб, бундай учрашувлар анъанага айланиши ва тез орада Тошкентда ҳам ташкил этилишига истак билдирдилар.

Дин ишлари бўйича қўмита

матбуот хизмати

манба

Published in Мақолалар

الجمعة, 31 آب/أغسطس 2018 00:00

Истиқлол шарофати

Бугун биз асрлар давомида орзиқиб кутилган озод, эркин ва фаровон ҳаётда ўз олдимизга қўйган эзгу мақсадлар сари қадам қўйиб, тинч-осойишта ҳаёт кечиряпмиз. Эришаётган ютуқларимиз бисёр. Бу ютуқларимизни нафақат халқимиз, балки бутун дунё ҳамжамияти тан оляпти. Халқимиз тўқ, ибодатларимиз эмин-эркин адо этилмоқда, буларнинг замирида, албатта, тинчлик-осойишталик ва истиқлол неъмати ётибди. Буларнинг барчасининг қадрига етиш ҳар биримизнинг гарданимиздаги бурчимиз ҳисобланади. Мамлакатимизда икки мингдан ортиқ масжидлар халқимизга хизмат кўрсатиб келмоқда. Уларнинг ҳаммаси замон талабларига жавоб беради. Ҳар йили етти мингдан зиёд юртдошларимиз ҳаж ибодатини ва ўн мингдан зиёд юртдошларимиз умра ибодатларини адо қилиш бахтига муяссар бўлмоқдалар. Имом Бухорий номли Тошкент ислом институти ва Мир Араб олий мадрасаси ҳамда тўққизта ўрта махсус ислом билим юртлари ўз фаолиятини олиб бормоқда ва юртимизга чуқур диний ва дунёвий илмларни эгаллаган мутахассисларни етиштириб чиқармоқда.

Ҳозирги кунда Ўзбекистон мусулмонлари идораси тасарруфидаги таълим муассасаларида Қуръони карим, тафсир, ҳадис, фиқҳ, ақоид, сарф, наҳв, мутолаа каби диний илмлар билан бир қаторда ўзбек тили ва адабиёти, тарих, жўғрофия, инглиз тили, физика, математика, астрономия, информатика каби давлат таълим стандартларига мос бўлган фанлар ўқитилади. Таълим муассасаларида олий маълумотли мударрис ва ўқитувчилар дарс бериб келмоқдалар.

Шунингдек, сўнгги йилларда мамлакатимизда ташкил этилган Ислом цивилизацияси маркази, Ислом академияси, Мир Араб олий мадрасаси, Имом Бухорий ва Имом Термизий халқаро илмий-тадқиқот марказлари бой илмий-тарихий меросимизни ўрганиш ва тарғиб қилишга хизмат қилмоқда.

Албатта, қувонч билан айтишимиз мумкинки, диний таълим муассасаларида таълим олаётган ёшларга яратилаётган бундай шарт-шароитлар келажакда жамиятимиз учун зарур мутахассис-ходимлар тайёрлашда пойдевор бўлиб хизмат қилади.

Аллоҳ таоло барчамизни неъматлари қадрига етувчи ва ўз Ватани, оиласи ва фарзандларига садоқатлилардан қилсин!

О.Ҳошимов,

“Кўкалдош” ўрта махсус ислом билим юрти мударриси

Published in Мақолалар

الجمعة, 31 آب/أغسطس 2018 00:00

Ҳазрати Имом мажмуи

Ҳазрати Имом (халқ орасида Хаст имом номи билан машҳур) – Тошкентнинг энг асосий диққатга сазовор жойларидан биридир. Мажмуа Тошкент имоми, олим, Қуръон ва ҳадис билимдони, Тошкентда исломнинг илк тарғиботчиларидан бири, шоир ва ҳунарманд Ҳазрати Имом (унинг тўлиқ исми Абу Бакир ибн Исмоил Ал-Қаффол Аш-Шоший) қабри атрофида бунёд этилган.

Тарихий манбаларга кўра, шунингдек, у қулфлар ва қалитларни тайёрлаш бўйича уста ҳам бўлган, шу сабабли “Қаффол” (қулфчи) лақабини олган, 72 тилни билган ва Тавротни араб тилига таржима қилган.
Абу Бакр Қаффол Шоший 976-йилда 73 ёшида вафот этади ва у шу кунгача бутун дунёда мусулмонлар томонидан ҳурмат қилинадиган мақбарада дафн этилади.

Ушбу мажмуанинг меъморий элементлари турли даврларда барпо этилган. “Қаффол Шоший” мақбараси, “Бароқхон” мадрасаси ва “Мўйи Муборак” мадрасаси 16-асрда қурилган. “Номозгоҳ” масжиди 18 асрда ва “Тилла Шайх” жоме масжиди 20-асрда барпо этилган.

“Ҳазрат Имом” жоме масжиди ва Ўзбекистон мусулмонлари идорасининг янги маъмурий биноси яқин йилларда (2007) Ўзбекистон Республикасининг биринчи Президенти Ислом Каримов ташаббуси ва лойиҳаси билан барпо этилди.

Ҳазрати Имом мажмуасида катта кутубхона мавжуд. Бугунги кунда қўлёзмалар сони 30000 мингтани ташкил этади. Улар “Тилла Шайх” масжидининг эски биносидаги сақлаш хонасида жойлашган.

Манзил: Зарқайнар кўчаси, Чорсу бозорининг шарқида.

Кийиниш талаблари: Ўзбекистонда аёллар диний диққатга сазовор жойларни зиёрат қилишда тананинг очиқ қисмларини (елкалар, орқа ва оёқлар) ёпиб юриши мақсадга мувофиқ.

манба: tashkentnews.uz

Published in Мақолалар

الجمعة, 31 آب/أغسطس 2018 00:00

Мустақиллигимиз шукримиз билан барқарор бўлади

Мустақиллик! Тинчлик! Бу икки неъматнинг қадрини қанчалик улуғ эканини мамлакатимиз мустақилликка эришгандан буён янада теранроқ ҳис қилиб келмоқдамиз. Ҳозирги кунда айрим жойларда тинчлик учун, бир кеча хотиржам кўз юмиб ором олиш учун борларини беришга тайёр турган одамларни кўрганимизда, биздаги неъматлар қанчалик беқиёс эканини англамоқдамиз. Атрофда бўлаётган тўс-тўпалонлар, уруш-жанжаллар, бегуноҳ қонларнинг тўкилишини кўриб бизнинг устимизга ёғдириб қўйган неъматлари учун Аллоҳга чексиз ҳамду сано айтамиз.

Дарҳақиқат, мустақилликка эришганимизга 27 йил тўлди. Тарихга назар солсак, улкан давлатлар тарихида бу жуда ҳам қисқа давр ҳисобланади. Аммо шу қисқа даврда эришган ютуқларимизни бирма-бир санаб чиқишнинг ўзи имконсиздир. Айниқса, сўнгги икки йил мобайнида амалга оширилган улкан ислоҳотларга дунё миқёсида жуда катта баҳо берилмоқда. Азалий қардош қўшниларимиз билан алоқаларнинг мустаҳкамланиб бораётгани, айрим тушунмовчиликлар сабабли кўп йиллардан бери узилиб қолган халқларимиз орасидаги алоқалар қайта тикланиб, жамиятнинг барча соҳаларида ўзаро ҳамкорликлар йўлга қўйилгани юртимизнинг дунё миқёсидаги обрўсини янада оширди.

Юртимиз фуқароларининг кўп йиллар давомида ҳал қилишга қийналиб келаётган муаммоларини эндиликда давлат органлари вакилларининг ўзлари уйма-уй юриб ҳал қилиб бераётгани бу яқин тарихда ҳеч қаерда эшитилмаган иш десак муболаға қилмаган бўламиз. Бугунги кунда жамиятнинг қайси соҳасини, қайси тоифа вакилини олманг барчасида улкан ислоҳотлар амалга оширилиб, инсон манфаатлари устуворлиги таъминланмоқда. Таълим-тарбия, иқтисодиёт, сиёсат, ижтимоий муносабатлар, қонунчилик тизими, қишлоқ хўжалиги, илм-фан равнақи, тиббиёт, харбий соҳа, уй-жой таъминоти, боринки, барча соҳаларда ота-боболаримиз орзу қилиб ўтиб кетган нарсалар амалга оширилмоқда.

Халқимиз азалдан муқаддас ислом динига эътиқод қилиб келади. Юртимиз истиқлолга эришгандан сўнг, муқаддас Ислом динимизни, азалий урф-одатларимиз, қадриятларимизни тиклашга катта эътибор қаратилди. Айниқса, сўнгги йилларда диний соҳа ривожида амалга оширилган улкан ислоҳотлар бутун дунё ислом оламини хушнуд этди. Юртимиздаги диний таълим муассасалари сони ва улардаги квоталар сонининг оширилгани, масжидларимизнинг эскилари қайта таъмирланиб, янгилари қурилаётганлиги, муқаддас ҳаж ва умра зиёратларига борувчилар сони оширилгани, Қуръони карим бўйича Республика қорилар мусобақаси ташкил қилингани, диний мактаблар ташкил қилингани, бир қанча илмий тадқиқот марказлари, Ислом цивилизацияси маркази, Халқаро ислом академияси, “Вақф” хайрия жамоат фонди ташкил қилингани фикримизнинг ёрқин мисолидир.

Муҳтарам юртбошимиз Шавкат Мирзиёевнинг БМТнинг 72-сессиясида олий минбардан туриб, муқаддас Ислом динимизни ҳимоя қилиши, буюк муҳаддис бобомиз Имом Бухорий раҳматуллоҳи алайҳ номини тилга олиши бутун дунё мусулмонларига бир олам қувонч бағш этди.

Юқорида санаб ўтган ютуқларимиз дарёдан бир томчи, хирмондан бир ҳовуч, холос. Зеро, Аллоҳ таолонинг биз берган неъматларини санасак саноғига ета олмаймиз. Аллоҳ таоло Қуръони каримда: “Агар шукр қилсангиз неъматларимни бундан-да бисёр қилурман”, деб марҳамат қилади. Шундай экан, бу неъматлар Аллоҳнинг халқимиз марҳамати эканини ҳар биримиз қалбдан ҳис этишимиз ҳамда унинг шукронасини қилишимиз лозим.

Пайғамбаримиз Муҳаммад мустафо соллалоҳу алайҳи ва саллам: “Неъматга шукр қилиш унинг заволидан омонда сақлайди”, дея марҳамат қилганлар. Неъматларга шукр қилинмаса, у албатта заволга учрайди, йўқолади. Улуғ мутасаввифлардан Фузайл ибн Иёз раҳматуллоҳи алайҳ: “Сизлар неъматлар учун доимо шукр қилмоғингиз вожибдир. Қавмдан кетган бир неъматнинг яна қайтиб келиши жуда мушкул”, деганлар.

Хўш, бу неъматга қандай қилиб шукр қилинади, мустақиллигимизни мустаҳкамлаш учун нима қилмоғимиз даркор? Бунинг учун ҳар биримиз ўз ишимизни виждонан, сидқидилдан бажармоғимиз керак. Ҳаётимизни, агар таъбир жоиз бўлса, уммондаги бир катта елканли кемага ўхшатадиган бўлсак, у кемани бекаму кўст бошқариш учун ҳамма вазифадорлар ўз ишини сидқидилдан ва мукаммал адо этиши лозим. Акс ҳолда кема ундаги бир ёки бир неча бепарво ва лоқайд инсонларнинг айби билан ё гирдобга учрайди ё тўлқинда ағдарилади ёхуд бошқа бирор фалокатга дучор бўлади. Бугунги глобаллашув шароитида юртнинг ҳар бир фарзанди ҳушёр, огоҳ ва содиқ бўлмас экан, бунинг оқибатлари оғир бўлишини ҳали ҳеч биримиз унутганимиз йўқ.

Буюк саркарда Амир Темур бобомиз: “Ишбилармон, мардлик ва шижоат соҳиби, азми қатъий, тадбиркор ва ҳушёр бир киши минг-минглаб тадбирсиз, лоқайд кишидан яхшидир” деганлар. Шундай экан, маънавиятсиз, дунёда яшашдан бирор-бир жўяли мақсади йўқ, лоқайд кишилар қаторига кириб қолмайлик. Ватанимиз, эл-юртимиз равнақи учун ҳисса қўшайлик, азизлар!

Олимжон ОДИЛОВ,

Урганч шаҳар имом Фахриддин ар-Розий

ислом ўрта махсус билим юрти мудири муовини

Published in Мақолалар