muslim.uz
Жанубий Корея мусулмонлари федерацияси раҳбари Ўзбекистонга келади
Учрашув чоғида Жанубий Корея мусулмонлари федерацияси билан амалий ҳамкорликни кенгайтириш ва Жанубий Кореядан мамлакатимизга зиёрат туризми йўналиши бўйича сайёҳларни жалб қилиш масалалари муҳокама қилинди.
Ли Жу Хва Ўзбекистоннинг ислом цивилизациясидаги алоҳида ўрнини қайд этиб, Имом Бухорий, Баҳоуддин Нақшбандий, Ҳаким Термизий, Aбу Мансур Мотурудий каби исломшунос олимлар ва мутафаккирлар томонидан яратилган буюк меърос кўплаб хорижий мутахассислар ва мусулмон жамоатчилиги эътиборини қозонганини айтиб ўтди. Унинг сўзларига кўра, Ўзбекистонда шу кунгача сақланиб қолган улуғ аждодларнинг қадамжолари, мақбаралар ва музейлар дунёнинг турли бурчакларидан кўплаб мусулмон зиёратчиларни ўзига жалб қилади.
Ли Жу Хванинг қайд этишича, Жанубий Корея мусулмонлари федерацияси нисбатан янги ташкилот бўлиб, ислом маданияти марказларидан бири ҳисобланган Ўзбекистоннинг бой илмий ва маданий салоҳиятини ўрганишга қизиқиш жуда ҳам катта.
Шу мақсадда федерация раҳбарияти Ўзбекистонга сафар қилиш, Ўзбекистон мусулмонлари идораси, Ўзбекистондаги Ислом цивилизацияси маркази, Халқаро ислом академияси, Имом Бухорий номидаги илмий тадқиқот маркази, бошқа ташкилот ва муассасасалар билан ўзаро ҳамкорлик ўрнатиш истагини билдирди.
Бундан ташқари, Жанубий Корея мусулмонлар федерацияси раҳбарияти Самарқанд, Бухоро ва Тошкент шаҳарларининг зиёрат туризми масканлари билан яқиндан танишиб, ташриф якунларига бўйича юртимиз салоҳиятини Жанубий Корея мусулмонлари орасида кенг тарғиб қилиш ва Ўзбекистонга бораётган сайёҳлар сонининг ошишига ҳисса қўшишни мақсад қилган.
Мулоқот чоғида Жанубий Корея мусулмонлари федерацияси раҳбариятининг Ўзбекистонга сафарини 2022 йилнинг январь ойида ташкил этиш бўйича келишиб олинди.
Динда саволим бор: Пасха каби байрамларда табриклаш ҳақида
— Болалигимиздан турли миллат вакиллари билан қўшни бўлиб яшаб келамиз. Қўшничилик муносабатларимиз яхши, иноқмиз, байрамларда ўзаро табриклаймиз. Улар бизнинг Ҳайит байрамларимизда, биз уларни Пасха каби байрамларида табриклаймиз, ширинликлар улашамиз. Яқинда эшитиб қолдим, мусулмонлар бошқа дин вакилларини байрамлари билан табриклаши мумкин эмас экан. Шу рост-ми?
— Аллоҳ таоло бундай марҳамат қилади:
﴿لَا يَنْهَاكُمُ اللَّهُ عَنِ الَّذِينَ لَمْ يُقَاتِلُوكُمْ فِي الدِّينِ وَلَمْ يُخْرِجُوكُمْ مِنْ دِيَارِكُمْ أَنْ تَبَرُّوهُمْ وَتُقْسِطُوا إِلَيْهِمْ إِنَّ اللَّهَ يُحِبُّ الْمُقْسِطِينَ إِنَّمَا يَنْهَاكُمُ اللَّهُ عَنِ الَّذِينَ قَاتَلُوكُمْ فِي الدِّينِ وَأَخْرَجُوكُمْ مِنْ دِيَارِكُمْ وَظَاهَرُوا عَلَى إِخْرَاجِكُمْ أَنْ تَوَلَّوْهُمْ وَمَنْ يَتَوَلَّهُمْ فَأُولَئِكَ هُمُ الظَّالِمُونَ﴾
“Аллоҳ сизларни диний уруш қилмаган ва диёрларингиздан чиқармаганларга яхшилик ва адолатли муомала қилишдан сизларни қайтармас. Албатта, Аллоҳ адолат қилувчиларни яхши кўрадир. Албатта, Аллоҳ сизларни диний уруш қилганлар, диёрингиздан чиқарганлар ва чиқарилишингизга ёрдам берганларга дўстлик қилишдан қайтарур. Уларни дўст тутганлар, ана ўшалар, золимлардир” (Мумтаҳана сураси, 8-9 – оятлар).
Аллоҳ таоло бу ояти каримада мўмин-мусулмонларни бошқа миллат ва диёнат вакиллари билан агар улар мусулмонларга диний адоват ила уруш қилмаса ва уларни сиқувга олиб ўз диёрларидан чиқариб юборишга уринмаса, яхши алоқада бўлишга буюрмоқда ва уларга нисбатан адолатли бўлишни таъкидламоқда. Аммо кимки мусулмонларга диний адоват туфайли уруш очса, уларни диёрларидан чиқарса ёки душманларига уларни диёрларидан чиқаришда ёрдам берса, албатта, ундай кишиларни дўст тутиб бўлмайди. Бу ҳам айни адолатдир.
Бугунги кунда бошқа диндагилар билан тинч яшаш босқичидан ҳам ўтиб мулоқот ва ҳамкорлик қилишга ҳам ўтилди. Инсоний алоқа юзасидан ва улар бизни диний байрамларимиз ила табриклашаётгани учун уларни ҳам табрикласа бўлади.
Муҳаммад Айюб ҲОМИДОВ
“Ал-Азҳар овози” ўзбек олимининг мақоласини эълон қилди
Имом Мотуридий қаламига мансуб “Таъвилот ал-Қуръон” асарининг Имом Бухорий халқаро илмий-тадқиқот маркази томонидан ўзбек тилига таржима қилиниши Мисрдаги йирик вактли матбуот нашрларидан бири эътиборини тортди.
Миср Араб Республикасидаги Ал-Азҳар университетининг “Ал-Азҳар овози” газетаси 2021 йил 3 ноябрда Имом Бухорий халқаро илмий-тадқиқот маркази директори ўринбосари О.Муҳаммадиевнинг “Таъвилот ал-Қуръон" асари бўйича яна бир муҳим тадқиқот» номли мақоласини эълон қилди.
“Ал-Азҳар овози” газетаси ислом оламининг нуфузли нашрларидан бири бўлиб, унга Миср Араб Республикаси бош имоми, “Ал-Азҳар” диний мажмуаси раҳбари, доктор Шайх Аҳмад Муҳаммад Тоййиб ҳомийлик килади.
Мисрнинг собиқ бош имоми, марҳум Муҳаммад Саййид Тантовий томонидан асос солинган газета 1999 йилнинг октябрь ойидан буён нашр этиб келинмокда.
Имом Бухорий халқаро илмий-тадқиқот маркази матбуот хизмати
Ҳамдардлик билдирамиз
Ўзбекистон мусулмонлар идораси жамоаси Наманган вилояти Наманган шаҳри “Шодибек” жоме масжиди имом ноиби Аҳмадали домла Убайдуллаевнинг вафоти муносабати билан унинг оила аъзоларига чуқур таъзия изҳор этади.
Аллоҳ таоло раҳматли дин хизматчисининг барча солиҳ амалларини ҳамроҳ айлаб, Ўз мағфиратига олсин.
Ҳақ таоло марҳум олимнинг яқинлари, фарзанду аржумандларига чиройли сабр бериб, бу мусибатларига ажру мукофотлар ато этсин.
Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан раҳматли Аҳмадали домланинг оила аъзолари, фарзандлари, ёр-биродарлари, яқинларига ҳамдардлик билдирамиз.
Иннаа лиллааҳи ва иннаа илайҳи рожиъун!
Яхшиликларнинг онаси
Инсоннинг энг гўзал сифатларидан бири бўлган ҳаё Ислом динида иймоннинг ярмига тенглаштирилади. Ҳаё доимо инсонни эзгуликка ундаб, ёвузликдан қайтаради. Ҳаёсиз киши ўз қилмишларининг оқибатлари нима бўлишини ўйламай қилаверади, улар ўз манфаати йўлида бошқаларнинг инсоний ҳуқуқларини оёқ ости қилишдан тап тортмайди.
“Бир инсон иккинчи бир кишини ҳаёга даъват қилаётганда Расулуллоҳ соллаллоҳу алайҳи васаллам: “Уни ўз ҳолига қўй, ҳаё иймондандир”, деганларини имом Бухорий ривоят қилганлар.
“Ҳаё ва иймон бир жуфт шохга ўхшайди. Вақтики биттаси кўтарилса, иккинчиси ҳам кўтарилади”.
Машҳур олим Ҳусайн Воиз Кошифий: “Ҳаё ва андиша дунёда тартиб сақлашнинг муҳим шартларидан бири ҳисобланади. Ҳаё йўқолса, ҳич кимда виждон ҳам қолмайди. Кишилар бир-бирларига бефарқ қарайдиган бўлиб қолишади”, деганлар. Демак ҳаёнинг йўқолиши иймоннинг йўқолишига олиб келади.
Бу хусусда Пайғамбаримиз Муҳаммад Мустафо соллаллоҳу алайҳи васаллам: “Ҳаё иймондандир, иймоннинг жойи эса жаннатдадир. Беҳаёлик эса жафодандир, жафонинг жойи эса дўзахдадир”, дедилар.
Ҳаё-барча яхшиликларнинг онаси ва барча нарсани гўзаллаштирувчи зийнатдир. Бу борада Расули Акрам соллаллоҳу алайҳи васаллам: “Фаҳш қайси бир нарсада бўлса, уни хунуклаштиради. Ҳаё қайси бир нарсада бўлса уни зийнатлайди”, дедилар.
Иймон банда билан Аллоҳ ўртасидаги воситадир. Ушбу воситанинг натижаси ва меваси – нафс тарбияси, ахлоқнинг тўғриланиши ва амалларнинг яхшиланишидир. Нафсда ҳаё ўрнашсагина инсон хатолардан сақланади, беҳуда, бемаъни ишлардан кўзини юмади.
Кийим-бошда, дин-у диёнатда ва кишилар ўртасидаги барча муомалаларда ҳаё бўлиши керак. Ҳаёсиз одамдан андишасизлик, юзсизлик, виждонсизлик каби иллатлар юзага келади.
ТИИ 4-курс талабаси
Қосимов Абдулваисхон