Хоразм вилояти ташрифи давомида Тошкент шаҳар “Ал-Ҳудайбия” масжиди имом-хатиби Муродулла домла Хуназаров Боғот туманидаги "Хўжа бобо" масжидига, Тошкент шаҳар “Усмон бин Маъзун” масжиди имом-хатиби Ўткиржон домла Ҳакимов Хива туманидаги “Хон Исмоил Журжоний” жоме масжидига пешин намозига ташриф буюришди.

Пешиндан сўнг домла намозхонларга "Тинчлик - олий неъмат", "Шукр қилиш фазилатлари", “Бандаларнинг Аллоҳ таолога севимлироғи шукрли ва сабрлиларидир” мавзуларида маъруза қилиб, намозхонлар томонидан берилган саволларга жавоб беришди.

Аллоҳ таоло вилоятимизга уламоларимиз сафарини хайрли ва манфаатли қилсин!

Хоразм вилоят вакиллиги
матбуот хизмати

Жаҳон тарихида етакчи ўрин тутган қадимий цивилизациялар кўп. Лекин улар орасида Марказий Осиёнинг кўҳна илм-фани, тараққиёт босқичлари, маърифатининг ўз ўрни, аҳамияти бор, албатта.

Давлатимиз раҳбарининг Ўзбекистон Республикаси БМТ Бош Ассамблеясининг 75-сессиясида илгари сурган ташаббуси асосида ўтказилган "Марказий Осиё дунё цивилизациялари чорраҳасида" мавзусидаги халқаро форумда айни саволларга батафсил ва кенг жавоб топиш имкони яратилди.

Президентимиз Шавкат Мирзиёев форум иштирокчиларига табрик йўллади. Бу эса маданият, илм-фан, маънавият ва маърифат масалалари юртимизда давлат сиёсатининг устувор йўналишларидан бирига айланганини кўрсатади.

Дарҳақиқат, бундан уч минг йил муқаддам минтақада илк шаҳарлар ва давлатчилик вужудга келди. Аллома боболаримиз саъй-ҳаракати билан аниқ, ижтимоий-гуманитар фанлар муттасил тараққий этди.

Минтақамизнинг қадимий илм-фан, маданият ва цивилизация марказлари кўҳна Хива, Самарқанд ва Бухоро, Ўтрор ва Хўжанд, Марв ва Ўш сингари ўнлаб шаҳарлар тарихи билан узвий боғлиқ. Айни пайтда Ал-Хоразмий, Аҳмад Фарғоний, Абу Райҳон Беруний, Абу Али ибн Сино, Маҳмуд Замахшарий, Абу Наср Форобий, Мирзо Улуғбек сингари буюк олимлар, Имом Бухорий, Имом Термизий, Имом Мотуридий, Бурҳониддин Марғиноний, Абул Муъин Насафий, Нажмиддин Кубро каби улуғ уламолар, Камол Хўжандий, Абдураҳмон Жомий, Алишер Навоий, Бобур Мирзо, Махтумқули, Абай, Тўқтағул, Бердақ сингари машҳур шоирлар, Шарафиддин Али Яздий, Мирхонд, Хондамир каби тарихчилар, Маҳмуд Музаҳҳиб, Камолиддин Беҳзод каби мусаввирлар, кўплаб хаттот ва созандалар, мусиқашунос ва меъморлар ўзининг бетакрор фаолияти билан дунё тамаддуни ривожига муносиб ҳисса қўшдилар.

Юртимизда кўтаринки руҳда ўтказилаётган Маданий мерос ҳафталиги халқаро миқёсда ҳам юқори баҳоланмоқда.

Ҳафталикнинг навбатдаги босқичида иштирокчиларнинг Катта Гулдурсун қалъа, Тупроқ қалъа, Қизил қалъа сингари қўҳна обидаларга саёҳати, Игорь Савицкий номидаги Қорақалпоқ давлат санъат музейига ташрифи, Нукус шаҳрида ўтказилажак II халқаро бахшичилик санъати фестивалида иштироки кўзда тутилмоқда.

Ҳа, чиндан ҳам мазкур ҳафталик хорижлик меҳмонларга моддий ва номоддий меросимиз, осори атиқаларимиз, қиммати ҳар қандай бойликлардан устун миллий меросимиз билан кенгроқ танишиш имконини бермоқда.

Назокат Усмонова, ЎзА

Айни кунларда юртимизнинг диний соҳа раҳбарлари, таниқли уламолар Хоразм вилоятида хизмат сафари билан бўлиб турибди. Ташриф давомида маънавий-маърифий учрашувлар ўтказилмоқда.

Ана шундай маърифий учрашувлардан бири Имом Фахриддин ар-Розий ўрта махсус ислом билим юртида Ўзбекистон мусулмонлари идораси бўлим мудири шайх Алижон қори билим юрт мударрислари ва талаба-ёшлар билан учрашди.

Файзли даргоҳга йиғилганларнинг барчалари азиз устознинг маърифий суҳбатларидан баҳраманд бўлдилар.

Аллоҳ таоло устозимизнинг илмини зиёда айлаб, барчамизга манфаатли қилсин!

Хоразм вилояти вакиллиги матбуот хизмати

Хабарингиз бор, юртимизнинг бир гуруҳ таниқли уламолари Қорақалпағистон бўйлаб масжидларда илмий суҳбатлар ўтказиш учун Нукус шаҳрига келишди. Сафарни “Имом эшон Муҳаммад” жоме масжидидан бошлаган домлалар бир неча жомеларда бўлиб, Элликқалъа туманидаги “Абдулла Норинжоний” жоме масжидига етиб келишди. Уламолар ташрифини эшитган мўмин-мусулмонлар тўп-тўп бўлиб масжидга келмоқда.

Ана шундай учрашувлардан бири Ўзбекистон мусулмонлари идораси раиси ўринбосари Иброҳимжон домла Инамов иштирокида “Абдулла Норинжоний” жоме масжидида бўлиб ўтди. Иброҳимжон домла жамоат билан бирга аср намозини адо қилди. Сўнг йиғилганларга “Тинчлик-хотиржамлик – улуғ неъмат” мавзусида гззал маъруза қилди.

Ҳақиқатан тинчлик – бебаҳо неъматдир. Ҳар бир инсон яшаши, Аллоҳга хотиржам ибодат қилиши учун тинчлик зарур. Унинг зидди бўлган уруш-жанжалнинг ҳар қандай кўриниши бўлмасин ёмон ҳолатдир. Катта-катта урушлар уёкда турсин, оддий икки инсоннинг урушиб қолишини Аллоҳ таоло хуш кўрмайди.

Аллоҳ таоло бандалари орасида уруш бўлишини истамагани учун уларни ўзаро аҳиллик, тинчлик-хотиржамликка чақириб бундай марҳамат килади: “Агар мўминлардан икки тоифа ўзаро урушиб қолса, дарҳол улар орасини ислоҳ этингиз" (Хужурот сураси, 9-оят).

Ибн Аббос розийаллоҳу анҳудан ривоят қилинган ҳадисда Пайғамбар алайхиссалом бундай деганлар: “Икки энг азиз неъмат бору, кўплар бунинг кадрига етишмайди, булар саломатлик ва тинчлик-хотиржамликдир” (Имом Бухорий ва Имом Термизий ривоятлари ).

Ривоятларга кўра, Хариш Наимдан Хажжож ибн Юсуф сурабди: “Неьмат нима?” Шунда у: “Тинчлик-хотиржамлик, чунки мен нотинчликдан хавфсираган кишининг ҳаётидан мамнунлигини курмадим", деган эканлар.

Маъруза ниҳоясида жамоатни қизиқтирган саволларга жавоб берилди. Халкимиз, юртимиз ва динимизга барокот сураб дуолар қилинди. Жамоатимиз ҳам шундай учрашувлар тез-тез бўлишини сўраб дуо килди.

Қорақалпоғистон қозиёти матбуот хизмати