Польшанинг машҳур «Swiat Elit» журнали Ўзбекистонда туризм саноатини ривожлантиришнинг амалдаги стратегиясига бағишланган мақолани чоп этди, деб хабар бермоқда "Дунё" ахборот агентлиги.

Ойлик журнал 2002 йилдан буён поляк тилида 6 минг нусхада тираж билан чоп этилган. Польшада ва дунёда сиёсат, бизнес, мудофаа, фан ва таълим, маданият ва спорт соҳасидаги янгиликлар ҳақида материаллар чоп этади. Журналда нуфузли экспертларнинг мамлакат ва дунёда юз берган воқеалар ҳақидаги мақолалари, муҳокамалари ва нуқтаи назарлари тақдим этилган.

Ўзбекистон туризмига оид мақолада сўнгги йилларда энг жадал ривожланаётган соҳалардан бири бўлиб келаётган мамлакат меҳмондўстлиги саноатининг энг муҳим жиҳатлари батафсил очиб берилган.

"Ўзбекистон тарихий обидалари сони бўйича дунёда 9-ўринда туради. 7,4 минг маданий мерос объекти бўлиб, шундан 209 таси тўртта шаҳар-музейларда жойлашган. Хива шаҳридаги Ичан-қалъа, Бухоро ва Шаҳрисабзнинг тарихий маркази, шунингдек, Самарқанд ЮНЕСКОнинг Жаҳон мероси рўйхатига киритилди. Бундан ташқари, республикада сайёҳларни қизиқтириши мумкин бўлган 11 та миллий боғ ва қўриқхоналар, 12 та вақтинчалик қўриқхоналар, 106 та музей ва бошқа кўплаб объектлар мавжуд. - дея хабар беради нашр.

Қайд этилишича, туризм саноатини ривожлантиришни жадаллаштириш 2016 йилнинг охирида бошланган. Туризм соҳасида тадбиркорлар учун солиқ имтиёзлари ва преференциялар, ички ва ташқи бозорларда миллий туризм брендини тарғиб қилиш, виза режимини либераллаштириш ва ўзбек валютасининг конвертация қилинишини очиш борасида қатор қарорлар қабул қилинди.

Туризм соҳасини фаол қўллаб-қувватлаш ва рағбатлантириш сиёсатини давом эттиришда 2019 йилнинг февралида ушбу соҳани ривожлантириш бўйича етти йиллик дастур қабул қилиниши эълон қилинди. 5 январь куни Президент 2019-2025 йиллар давомида туризмни ривожлантириш концепциясини имзолади.

Экскурсия туризми, экотуризм, агротуризм, спорт, бизнес харид (MICE), зиёрат туризми ва этнотуризм (жумладан гастрономик ва маданий тадқиқотлар) муҳим йўналишларга айланди. Зиёрат туризмининг истиқболлари очилди. 2019 йилнинг февраль ойида Бухоро шаҳрида биринчи халқаро форум ўтказилиб, унда 120 дан ортиқ ислом уламолари ва сайёҳлик агентликлари вакиллари иштирок этди. 34 мамлакатдан келган иштирокчилар Ўзбекистонни зиёрат туризми марказларидан бири сифатида эътироф этувчи декларацияни имзоладилар.

Мақолада мутахассислар, ходимлар ва меҳмонхона маъмурлари учун ўқув тизимини такомиллаштиришга ҳам муҳим эътибор қаратилаётгани айтилади. Самарқанд шаҳридаги "Ипак йўли" халқаро туризм университетининг ҳам мақсади шу.

Маълум қилинишича, айни пайтда Ўзбекистон ва Польша ўртасида тўғридан-тўғри рейсларни очиш учун қадамлар қўйилмоқда, бу эса мамлакат бўйлаб саёҳатни янада қулайлаштиради ва сайёҳлар учун вақтни тежайди.

Ўзбекистон мусулмонлари идораси матбуот хизмати

ЎМИ матбуот хизмати

Тошкент, Санкт-Петербург ва Уфа шаҳарларида мусулмонларнинг муқаддас китоби ҳақидаги ҳужжатли фильмни суратга олиш бошланади. Би-би-си телеканалининг Ўзбекистондаги хизмати ЭОАВМА билан ҳамкорликда халқаро тарихчи ва Қуръон мутахассислари кўмагида Усмон Қуръони ҳақида ҳужжатли фильм яратилади.

Batafsil.uz хабарига кўра, шу кунларда архив ҳужжатлари асосида 1923 йилда Усмон Қуръонининг Ўзбекистонга қайтариш тафсилотларини тиклаш ишлари олиб борилмоқда. Мусулмон дунёсидан ташқарида бўлган даврда муқаддас китобнинг саргузаштлари тарихи ҳали ҳам жумбоқларга тўладир. Фильм муаллифлари шу саволларга жавоб топишга ҳаракат қилишмоқда.

Қандай қилиб ноёб китоб 100 рублга сотилган? Санкт-Петербургда тайёрланган ва Шарқ мамлакатларига катта пулга сотиб юборилган элликта нусханинг тақдири нима бўлган? Усмон Қуръонининг ўша пайтдаги Ислом маркази бўлган Уфа муфтиятига тушиб қолишига қандай қарор сабаб бўлган? Китобнинг тарихида Лениннинг қандай ўрни бор? Айнан унинг қарори туфайли Усмон Қуръони Оренбург орқали махсус поезднинг махсус вагонида Тошкентга олиб келинган ва тарихий Ватанига топширилган экан.

Фильм муаллифлари шу ва бошқа кўплаб саволларга жавоб топишга ҳаракат қиладилар. Фильмда Россия генерали Абрамов XIX аср охирида рамзий мукофот эвазига муқаддас Қуръонни Хўжа Ахрор масжиди муллаларидан сотиб олганлиги ва Туркистон генерал-губернатори Константин фон Кауфманга етказгани, у эса ўз ўрнида китобни Россияга юборгани, шу орқали у Санкт-Петербург Император кутубхонаси қўлёзмалар бўлимига тушиб қолгани ҳақида баён қилинади. Китобнинг тарихий Ватанига етиб келиши, Тошкентдаги Хаст Имом диний мажмуасига топширилгани фильмда батафсил ёритилган.

Ёрқин бадиий образлар орқали архив ҳужжатлари ва тарихий воқеалар саҳналарининг фильмга киритилганлиги томошабинларга албатта манзур келади. Фильмда Усмон Қуроънининг 1989 йилда Ўрта Осиё ва Қозоғистон мусулмонлари идорасига топширилишга гувоҳ бўлганларнинг хотираларидан лавҳалар ҳам келтирилган.
2021 йилнинг 29 сентябрь – 3 октябрь кунлари пойтахтимизда бўлиб ўтадиган Тошкент кинофестивали доирасида фильм премьерасини ташкил қилиш режалаштирилган.

Ўзбекистон мусулмонлари идораси матбуот хизмати

Шайх Салоҳ Абулҳож ҳафизаҳуллоҳ

— “Отаси қизини бировга ваъда қилибди, қулоғини тишлатибди”, деган гапларни кўп эшитганмиз. Бу иш шариатимизга кўра, мумкинми?

— Шариат бўйича бундай қилиш мумкин эмас. Қиз бола вояга етгач, унинг кимга турмушга чиқиши борасида изни олинади. Қиз болани мажбурлаб эрга беришга ҳеч кимнинг ҳаққи йўқ.

Абу Ҳурайра розияллоҳу анҳудан ривоят қилинади. Расулуллоҳ соллаллоҳу алайҳи васаллам айтдилар: “Жувон (aввaл турмуш кўрган aёл) ўзи билан маслаҳат қилинмагунча турмушга берилмайди. Бoкирa қизни унинг изни-рoзилиги олинмагунча турмушга берилмайди”. Сaҳoбaлaр: “Ё Расулуллоҳ, унинг рoзилиги қaндaй (билинади)?” деб сўрашди. “Сукут сaқлaши (розилигидир)”, дeдилaр (Муттафақун алайҳ). Валлоҳу аълам!

Муҳаммад Айюб ҲОМИДОВ