Бугун, 25 август куни Ўзбекистон халқаро ислом академиясида “Истиқлолнинг 30 йиллигига бағишланган диний-маърифий нашрлар тақдимоти” бўлиб ўтди.

Нуфузли тадбирда Президент маслаҳатчиси, Ўзбекистон ислом цивилизацияси маркази директори Шоазим Минаваров, Бош вазир ўринбосари, Туризм ва спорт вазири Азизбек Абдуҳакимов, Ўзбекистон мусулмонлари идораси раиси биринчи ўринбосари Ҳомиджон домла Ишматбеков, Дин ишлари бўйича қўмита раиси биринчи ўринбосари, Ўзбекистон ислом академияси ректори Музаффар Комилов, Диний идора тизимидаги уламолар, мударрис ва соҳа мутахассислари қатнашди.

Маросимда Истиқлолимизнинг 30 йиллиги муносабати билан Ўзбекистон Ислом цивилизацияси маркази, Ўзбекистон ислом академияси, Имом Бухорий, Имом Мотуридий ва Имом Термизий илмий тадқиқот марказлари томонидан амалга оширилаётган ишлар сарҳисоби ва ушбу муассасалар нашр этган 100 га яқин китоблар тақдимоти ўтказилди.
Тадбирда сўзга чиққанлар бугунги кунда диний-маърифий соҳада, жумладан, буюк аждодларимизнинг беқиёс асарларини ўрганиш, тадқиқ этиш ва чоп этиш бўйича кўплаб хайрли ишлар амалга оширилаётгани, ана шундай эзгу ишларнинг натижасида кўплаб мўътабар китоблар юртимизга олиб келинаётгани, мавжуд қўлёзмалар таржима қилиниб мўмин-мусулмонларга тақдим этилаётганини алоҳида таъкидланди.

Анжуман доирасида Ўзбекистон Бош вазири ўринбосари, Туризм ва спорт вазири Азиз Абдуҳакимов Россия Федерациясидан Ўзбекистонга қайтарилган XIII-XIX асрларга оид қимматбаҳо маданий бойликлар: қўлёзма китоблар, араб, форс ва турк тиллардаги қадимий шеърлар ва кулолчилик буюмларини Ўзбекистондаги Ислом цивилизацияси маркази фондига расман топширди.

Тадбирда диний соҳа мутасаддилари томонидан қуйидаги маълумотлар берилиб, нашр этилган китобларнинг тақдимоти ўтказилди:

Ўзбекистондаги Ислом цивилизацияси маркази фаолияти давомида 12 та китоб ва рисола нашрга тайёрланган, айни пайтда уларнинг 5 таси китоб ҳолида нашр этилган, 7 та китоб эса таржима қилинган. Жумладан, “Бухоро – Ислом олами маданияти пойтахти” китоб-альбоми, шайх Абдулазиз Мансурнинг “Коран. Краткий комментарий” – Қуръони карим оятлари маъноларининг рус тилидаги таржимаси, олий таълим муассасалари талабалари учун “Диншунослик” ва “Религиоведение” китобларининг тақдимоти ўтказилди.

Ўзбекистон ислом академияси томонидан нашрга тайёрланган Буюк ватандошимиз Мажуддин Муҳаммад Уструшанийнинг “Жомиъ аҳком ас-сиғор” китоби тақдим этилди. Ислом тарихида бола ҳуқуқлари бўйича ёзилган илк асар бўлган “Жомиъ аҳком ас-сиғор” китоби биринчи марта ўзбек тилига таржима қилиниб, ундан танлаб олинган юзта фатво ўзбек китобхонлари эътиборига тақдим этилганини алоҳида таъкидланди.

Имом Бухорий халқаро илмий-тадқиқот маркази томонидан нашр этилган Имом Мотуридийнинг “Таъвилот ал-Қуръон” асари 30-жузи, Имом Бухорийнинг “Сулосиётул Бухорий”, Абдуллоҳ ибн Муборакнинг “Муснад”, Жалолиддин Суютийнинг “Лубобул ҳадис”, Абу Бакр Розийнинг “Туҳфатул Мулук” асарларининг ўзбекча таржималари, замонавий исломшуносликка оид “Исломофобияни бартараф этиш омиллари”, “Исломда ижтимоий иллатлар муолажаси”, “Илмдан ўзга нажот йўқ” китоблари, “Барҳаёт аждодларимиз” рукни остида чоп этилган 12 та рисола ҳамда Марказнинг “Имом Бухорий сабоқлари” нашрининг махсус сони тақдимоти ҳам бўлиб ўтди. Марказ фаолияти давомида 78 та китоб ва рисола нашрга тайёрланган, шундан 54 таси чоп этилган, 21 таси эса таржима қилинган.

Имом Мотуридий халқаро илмий тадқиқот маркази фаолияти даврида 10 та рисола, 6 та китоб, 6 та ақида матнлари ва турли мавзудаги ўқув-услубий қўлланмалар ва бошқа турдаги адабиётлар чоп этилган. Шулардан Абу Мансур Мотуридий “Таъвилот ал-Қуръон” асари 29-жузи, Мулла Али Қорийнинг “Шарҳ ал-фиқҳ ал-акбар”, Бурҳониддин Марғинонийнинг “Ҳидоя” асарларининг ўзбекча таржимаси, замонавий исломшуносликка оид “Халқаро ислом ташкилотлари”, “Мутаассибликка қарши мўътадиллик: метод ва таҳлиллар”, “Ислом ниқобидаги мутаассиб гуруҳлар”, “Долзарб раддиялар” каби асарлар, “Юртимиз алломалари” рукни остида чоп этилган рисолалар ва “Мотуридийлик” журнали тақдимот қилинди.

Имом Термизий халқаро илмий тадқиқот маркази бугунги кунга қадар 66 та китоб ва рисола нашрга тайёрланди. Улардан 45 таси китоб ҳолатида чоп этилгани, 14 таси таржима қилинган. Шулардан Ҳаким Термизий рисолалари, Имом Термизийнинг “Ҳадис иллатлари”, “Эҳтиётлар”, “Тариқат одоби”, “Қайтарилган амаллар”, “Яширин масалалар” каби асарларининг ўзбекча таржимаси, Сўфий Аллоҳёр ҳазратларининг “Саботул ожизий” асари шарҳи ва бошқа китоблар тақдимоти бўлди.

Тадбир сўнгида мутассадди вакиллар ОАВ ходимларининг диний-маърифий соҳадаги илмий изланишлар ва ноширлик фаолияти тўғрисидаги саволларига атрофлича жавоб беришди.

Ўзбекистон мусулмонлари идораси матбуот хизмати

Етимларнинг бошини силаш, уларга меҳр кўрсатиш, ғамхўрлик қилиш динимиз тарғиб этган амаллардан. Тақдир тақозосига кўра, ота-онасидан айрилган мурғак қалб эгаларига мурувват кўрсатишнинг, уларнинг ҳолидан хабар олишнинг савоби кўп, ажри бисёр.

Ўзбекистон мусулмонлари идораси Тошкент вилояти вакиллиги жамоаси Бўка туманидаги имом-хатиблар, ҳомийлар билан биргаликда тумандаги Меҳрибонлик уйи тарбияланувчилари ҳолидан хабар олдик.

Энг улуғ, энг азиз айём – Мустақиллик байрами арафасида кўнгли ўксик болажонларнинг қалбига қувонч улашишнинг рамзий маъноси бор, албатта. Чунки ҳар бир хонадонда болажонлар байрамлар, турли тантаналар муносабати билан қандай қувонишса, боқувчисини йўқотган нуридийдалар ҳам шундай шодланишлари керак.

Муҳтарам Президентимиз Шавкат Мирзиёев шу йил 28 июль куни Тошкент шаҳридаги 21-Меҳрибонлик уйига ташриф буюрганларида барча Меҳрибонлик уйлари ва махсус мактаб-интернатларни Ўзбекистон Республикаси Миллий гвардияси масъуллигига ўтказиш таклифини билдирдилар. Бу эса юртимизда боқувчисини йўқотган барча болаларга давлат оталарча ғамхўрлик қилаётганининг амалдаги инъикосидир.

Ислом таълимотига кўра, жамиятнинг ҳар бир аъзосига, у ким бўлишидан қатъи назар, алоҳида эътибор билан муносабатда бўлинади. Хоҳ кичик, хоҳ катта бўлсин, хоҳ ота-она қарамоғида, хоҳ оила бошлиғи қарамоғидан маҳрум бўлган бўлсин, ҳар бир инсон ҳурмат-эҳтиромга лойиқдир.

Етимнинг бошини силаш, унга меҳрибонлик қилиш қалбдаги қаттиқликни кетказади. Абу Ҳурайра розияллоҳу анҳудан ривоят қилинади: “Бир киши Расулуллоҳ солаллоҳу алайҳи ва салламга қалби қаттиқлигидан шикоят қилди. Шунда у зот: “Агар қалбинг юмшашини хоҳласанг, мискинга таом бер ва етимнинг бошини сила!” дедилар (Имом Аҳмад ривояти).

Бир киши Имом Аҳмад раҳимаҳуллоҳдан “Қалбим қандай юмшайди?” деб сўради. У киши “Қабристонга кир ва етимнинг бошини сила!” деди.

Дарҳақиқат, ота-онаси йўқ болаларинг кўзларидаги мунгни кўрган ҳар қандай бағритош инсоннинг ҳам кўнгли юмшайди, беихтиёр кўзларига ёш қуйилади. Мурғаккина қалб эгасиа қўлдан келганича яхшилик қилиб. совғалар улашишга интилади.

Набий соллаллоҳу алайҳи ва саллам етимни кафилликка олган кишига жаннатда ўзлари билан бирга бўлишини башорат бериб бундай дедилар: “Мен билан етимни кафилликка олган киши жаннатда мана шундай ёнма-ён бўламиз” (Муттафақун алайҳ).

Набий алайҳиссалом шу гапни айтганларида кўрсаткич ва ўрта бармоқлари билан ишора қилдилар-да, уларнинг орасини бироз очдилар.

Ибн Баттол айтади: “Ушбу ҳадисни эшитган кишининг зиммасида Набий соллаллоҳу алайҳи ва саллам билан жаннатда бирга бўлиш учун унга амал қилиш вазифаси бордир. Зеро, жаннатда бундан афзал мартаба йўқдир”.

Етимга табассумини, насиҳатини, гўзал тарбия беришни, юмшоқ сўзни аямаслиги, унга меҳрибон ота бўлиши керак. Қатода раҳимаҳуллоҳ “Етимга раҳмли ота бўлинг!” деганлар.

Бугун ўз фарзандлари билан бирга яқинларидан эрта жудо бўлган етимларни ҳам боқаётган, парвариш қилаётган оила бошлиқлари айрим машаққатлар, қийинчиликларга дуч келса, асло нолимаслги керак. Чунки уларнинг уйлари энг яхши уй эканини Набий алайҳиссалом башорат берганлар.

Абу Ҳурайра розияллоҳу анҳу ривоят қилади. Расулуллоҳ соллаллоҳу алайҳи ва саллам: “Мусулмонларнинг энг яхши уйи унда етим яхшилик кўрадиган уйдир. Мусулмонларнинг энг ёмон уйи унда етимга ёмонлик қилинадиган уйдир” (Имом Бухорий ривояти).

Аллоҳга шукр, юртимизда етимларнинг бошини силайдиган меҳрибонлик уйлари ҳолидан хабар олиб турадиган саховатли инсонлар бор. Аммо бу имкониятлар қанчалик яхши бўлмасин, барибир уларнинг кемтик қалбларини “оила” деган улуғ даргоҳдан ўзга нарса тўлдира олмаслиги аниқ. Лекин, шундай бўлса-да. Ҳар доим биз ота-онасидан маҳрум бўлган болалар билан бирга бўлишимиз керак.

Ота-боболаримиз етимларнинг яшаш тарзлари қандай бўлишидан қатъи назар, бу масалага жиддий ёндашишган ва уларга ўз уйларидан, нафақат уйлари, балки қалбларидан жой беришган. Чунки улар ким етимга жой берса, унинг бошини силаса ва унга ғамхўрлик қилса, жаннатда Пайғамбаримиз соллаллоҳу алайҳи ва саллам билан бирга бўлишларини яхши билишган.

Аллоҳ таоло кўнгли ўксик боладонларнинг ҳолидан хабар оладиган. Уларга ҳадялар улашадиган азизлармизнинг мартабаларини улуғ қилсин.

Жасурбек домла РАУПОВ,

Тошкент виляти бош имом-хатиби

Мир Араб ўрта махсус ислом билим юрти мударриси

Тожиддинов Абдусамад

Нурали домла Мавлонов

Мамлакатимиз Жанубий Кореядаги элчихонасида ЮНЕСКО фольклор ижодиёти халқаро ташкилотининг Осиё бўйича Бош котиби, профессор Мун Хюнг Сук билан учрашув бўлиб ўтди, деб хабар бермоқда «Дунё» АА.

Тадбирда Ўзбекистоннинг зиёрат туризми имкониятларига бағишланган ҳужжатли фильм суратга олиш масалалари муҳокама қилинди.

Ўзбекистон ҳудудидаги ислом маданиятининг меъморий обидаларига бағишланган ушбу ҳужжатли фильм 30 дақиқа давом этадиган кўп қисмли телевизион дастурнинг бир қисми бўлади. Ушбу дастур учун 2020 йилдан бери Хитой, Ҳиндистон, Япония, Мўғулистон, Исроил, Туркия, Саудия Арабистонидаги энг қадимий обидалар ҳамда муқаддас қадамжоларга бағишланган ҳужжатли фильмлар суратга олиниб, эфирга узатилмоқда.

Жанубий Кореянинг «KNN» телерадиокомпанияси томонидан яратилаётган фильм учун маслаҳатчи вазифасини бажарувчи Мун Хюнг Сук Ўзбекистоннинг бой ислом маданияти ва илм-фани ривожида алоҳида ўрин тутишини таъкидлади. У сценарийга кўра, фильмда мамлакатимизнинг ЮНЕСКОнинг Жаҳон мероси сифатида тан олинган ёдгорликлари, ислом маданияти намуналари ва зиёрат туризми обидалари намойиш этилишини таъкидлади.

Ушбу ҳужжатли фильм Жанубий Корея телевидениеси орқали жорий куз фаслида эфирга узатилиши ва келажакда халқаро кинофестивалларда тақдим этилиши режалаштирилган.

Учрашув натижаларига кўра, томонлар мазкур лойиҳани амалга ошириш бўйича ҳамкорликни давом эттириш тўғрисида келишувга эришди.

Ўзбекистон мусулмонлари идораси матбуот хизмати