Айни вақтда Маккаи мукаррамадаги Арофот водийсида бўлиб турган Ўзбекистон мусулмонлари идораси раиси, муфтий Нуриддин домла ҳазратлари Қурбон ҳайити муносабати билан ҳаж ибодатини ихлос ила адо этаётган 12 минг нафардан зиёд ҳамюртларимиз номидан муҳтарам Президентимиз ва халқимизга табрик йўлладилар.
Табрикнинг тўлиқ матнини матбуотда эълон қилинади.

Ўзбекистон мусулмонлари идораси Матбуот хизмати

Юртимиз зиёратчилари арафа куни эрта тонгдан ҳажнинг яна бир фарзини бажариш мақсадида Арофат томон йўл олдилар. Ҳадисларда келтирилишича, Арофат энг улуғ манзиллардан бири бўлиб, бу ерда қилинган дуолар шак-шубҳасиз қабул бўларкан. Буни яхши англаган ҳожилар ҳар дамни ғанимат билиб, ундан оқилона фойдаланиш пайидан бўладилар.
Ҳожиларимиз Арофотда дуои хайрлар, ибодатлар ила туришиб, Арафа кунининг пешин ва аср намозларини жам қилиб ўқидилар. Дуо ва тавбаларда бардавом бўлдилар. Аллоҳ-таолодан юртимиз тинч, халқимиз турмуши янада фаровон бўлишини, азиз диёримизни ҳамиша Ўз паноҳида асрашини сўраб дуолар қиладилар.
Арафотдаги вуқуфдан сўнг қуёш ботганидан кейин эса Муздалифага бордилар. Аллоҳ таоло Ўзининг Каломида: “Арафотдан тушганингизда, Машъари Ҳаромда (Муздалифада) Аллоҳни (талбия, таҳлил, такбир, сано билан) зикр этинг” деб марҳамат қилган (Бақара сураси, 198-оят).

Маълумот учун: Арофатга чиқишдан олдин ғусл қилиш суннатдир. Арофатда туриш ҳажнинг асосий рукни бўлиб, бу рукнсиз ҳаж бўлмайди. Ибн Аббос розияллоҳу аҳудан ривоят қилинади. Пайғамбаримиз соллаллоҳу алайҳи васаллам: “Ҳаж – арафадир” деганлар.
Арафа куни заволдан бошлаб, Арофатда туриш вақти киради. Арофат чегарасидан бошқа жойда турса, ҳажи ҳаж бўлмайди. Арофатда Арафа куни заволдан ҳайит куни тонгигача қай ҳолда турса ҳам, бир соат турса соқит бўлади. Бу ерда ҳам талбия айтиб туради. Арофатда ҳам дуога зўр бериш керак, айниқса Жабали раҳмат устиларига чиқиб дуо қилиш тавсия қилинган. Арофатда пешин ва аср намозлари бир азон ва икки иқомат билан қўшиб, қаср қилиб ўқилади, пешин вақтида. Арофатда қуёш ботгунча туриш вожиб ҳисобланади.

Бугун, 7 июль куни зулҳижжа ойининг 8-куни ҳожилар меҳмонхонадан ишчи гуруҳи ва элликбошилар раҳбарлигида уюшган ҳолатда автобусларда талбия айтиб Минога етиб келишди. Ҳожиларимиз Минога келгач: “Ё Аллоҳ, бу Минодир. Бас, дўстларинг ва аҳли тоатингга ато этган эҳсонларингдан менга ҳам инъом эт!”, дея дуолар ўқишди.

Айни пайтда Минода бўлиб турган ҳожиларимиз дуо, ибодат билан машғул бўлишмоқда. Бу Пайғамбар алайҳиссалом суннатларидир. Минода тарвия (ёлғон арафа) кунининг бомдод, пешин, аср, шом, хуфтон намозлари ўқилади.

Минонинг майдони 8 квадрат киллометр бўлиб, унда Ўзбекистон ҳожилари учун алоҳида жой ажратилган. Бу ерда ҳожиларимиз бемолол ибодат қилиши учун барча шароитлар, хусусан, эркак ва аёлларга алоҳида чодирлар, уларда ибодат учун барча шароитлар ҳозирланган. Шунингдек, ҳожиларимиз тамадди қилишлари учун турли хил таомлар, чой, сув каби ичимликлар чордирларга олиб келиб улашилмокда.

Маълумот учун Арафа куни тонгда зиератчилар автобусларда уюшқоқлик билан Минодан Арафотга қараб йўлга тушадилар.

Ўзбекистон мусулмонлари идораси Матбуот хизмати

Бугун, 7 июль куни вилоятда бўлиб ўтган «Бахт» жоме масжидининг расмий очилиш маросимида Ўзбекистон мусулмонлари идораси раисининг биринчи ўринбосари Ҳомиджон домла Ишматбеков қатнашди.

Ҳонақоҳи кенг ва чиройли бўлиб, 3 минг нафар одамни сиғдиради. Ташқи тарафидан 37 метрли минора масжидга ўзгача кўрк бериб турибди. Замонавий таҳоратхонасида барча шароитлар ҳозирланган. Шунингдек, жоменинг ён қисмида аёллар учун ҳам алоҳида намозхона қилинган.

— Илк бор 1940 йили қурилган масжид бугунги кунга келиб таъмирталаб бўлиб қолган эди, айни кунда ушбу манзилда замон талабларига мос янги масжидни очдик. Бу Қурбон ҳайити байрами арафасида ҳудуд мўмин-мусулмонларига катта туҳфа ва хурсандчилик бўлди, — дейди масжид имом-хатиби Нурмуҳаммад домла Нарзуллаев.

Пешин намозидан сўнг Ўзбекистон мусулмонлари идораси раисининг биринчи ўринбосари Ҳомиджон домла Ишматбеков масжид қавмини яна бир янги жоме билан муборакбод этиб, муҳим мавзуда маъруза қилиб берди. Якунда хайрли дуолар қилинди.

Ўзбекистон мусулмонлари идораси Матбуот хизмати
Muslim.uz

Ўзбекистон мусулмонлари идораси ҳузуридаги “Вақф” хайрия жамоат фонди раҳбари, пойтахтимиздаги “Шайх Зайниддин” масжиди имом-хатиби Яҳё домла Убайдуллоҳ ўғли таржимаси остидаги таниқли уламо Юсуф Қаразовий қаламига мансуб “Таваккул” асари китоб ҳолида чоп этилди.

Мазкур китобда мўмин-мусулмонлар учун ўта зарур бўлган, инсон умри давомида доимо муҳтож бўладиган, ҳар ишда Аллоҳ таолога таваккул қилиш ҳақида сўз бўради.

Китобни мутолаа қилган киши таваккулнинг фазли, унинг ҳақиқати, ризқ борасида таваккул, дин ишларида таваккул, таваккулнинг фойдалари, сабаблари, таваккул қилишдан тўсувчи омиллар ва бошқа таваккул ҳақидаги билимларга эга бўлиши мумкин.

Аҳамиятли жиҳати, муаллиф ҳар бир мавзуни ёритишда Қуръони карим оятлари ва ҳадиси шарифлардаги таваккулга оид нукталарни дақиқлик билан, атрофлича, ўқувчига тушунарли ҳолда баён этади.

Шу билан бирга китоб уламоларнинг таваккул ҳақидаги фикрлари, ҳаётий воқеалар ва мисоллар билан бойитилган. Таржимон эса асарнинг асл маъноси ва жумлалардаги жозибадорликни сақлаб қолган ҳолда, ўзбек тилида халқона услубда халқимизга тақдим этмоқда.

Мухтасар айтганда, китобда Аллоҳга таваккулнинг нақадар муҳим экани ва унинг фойдалари ҳақида ўзига хос тарзда, ҳаммага тушунарли тилда баён этилган.

Аллоҳ таолодан ушбу китобни таржима қилиш, таҳрирлаш, чоп этиш ва унинг нашр қилинишига ҳисса қўшган барча азизларга дунё ва охиратда яхшиликлар сўраб қоламиз. Ҳақ таоло ушбу янги китобни халқимизга муборак, ўқиганларга манфаатли айласин ва барчамизни Ўзига таваккул қиладиган бандаларидан қилсин!

“Шайх Зайниддин” масжиди (Кўкча) китоб дўконидан сўранг!

Ўзбекистон мусулмонлари идораси Матбуот хизмати