Бугун, 9 июль куни юртимиз аҳолиси ва хориждаги ватандошларимиз Ўзбекистон Республикаси Президенти сайловида иштирок этиб, Ватанимиз келажаги учун овоз беришди. Мазкур жараёнда диний соҳа ходимлари, хусусан, Ўзбекистон мусулмонлари идораси ва унинг ҳар бир ҳудудда жойлашган вакилликлари ходимлари, имом-хатиблар бошчилигидаги масжидлар жамоаси, отинойилар, диний таълим муассасалари мударрис ва талаба-ёшлари ўзларининг оила аъзолари билан бирга фаол иштирок этишди. 

Ушбу долзарб палла халқимиз келажаги, Ватанимизнинг эртанги куни, истиқболини белгилашда ниҳоятда катта аҳамият касб этади. Зеро, сайлов муҳим сиёсий жараён. Унда қатнашиш ҳар бир онгли фуқаронинг бурчи. Шу маънода диний соҳа ходимлари ҳам ўз тақдири, фарзандлари келажаги, оилалари фаровонлиги, энг асосийси, юртимиз тинчлигига бефарқ эмаслигини намойиш этишди.

Маълумки, қадимдан давлат раҳбарларини асосан халқ томонидан эркин сайлов йўли билан тайинлаш амалиёти бўлган. Муқаддас динимизда ҳам давлат раҳбари омма томонидан эркин сайлов йўли билан сайланиши белгилаб қўйилган.

Аллоҳ таоло Қуръони каримда мўмин-мусулмонларни мақтаб: “Уларнинг ишлари ўзаро маслаҳат (билан) бўлур”, – дея марҳамат қилган (Шўро сураси 38-оят). Ислом уламолари сайлаш ва сайланиш фаолияти шариатга мувофиқ амал эканига ушбу ояти карима далил эканини қайд этадилар. Сайлов эса айнан мана шу маслаҳатнинг бир шакли ҳисобланади.

Замонамиз уламолари сайлов ҳар бир фуқаронинг ҳуқуқи бўлиб, агар шу йўл билан мусулмон киши ўз дини ва жамияти учун зарур бўлган ишни амалга ошириб, яхшиликни жалб қиладиган бўлса, бу иш ҳолатга қараб, вожиб даражасида бўлиши ҳам мумкин, дейдилар.

Шу боис мусулмон киши жамият ишларида фаол бўлиши, яхшилик борасида барча билан ҳамкор бўлиши лозим. Шунда жамият ривожланади ва адолат қарор топади.

Аллоҳ таоло мамлакатимиз тинчлигини барқарор ва халқимиз фаравонлигини янада зиёда айласин.

Ўзбекистон мусулмонлари идораси
Матбуот хизмати

 Шу кунларда Макка шаҳридаги “Рошидия” меҳмонхонасида ҳаж амалини адо этиб, тоату ибодат билан машғул бўлиб турган аёл зиёратчиларга фурсатни ғанимат билиш, она Ватанга қайтгандан сўнг ҳожилик мақомига муносиб бўлиш ва бошқаларга намуна кўрсатиш ҳақида суҳбатлар мунтазам давом эттирилмоқда.

Суҳбатларда Ишчи гуруҳ вакиллари, Ўзбекистон мусулмонлари идораси раиси ўринбосари Жалолиддин домла Ҳамроқулов, Фатво марказидан Ғуломжон домла Холбоев, Абдулатиф домла Турсунов, Хотин-қизлар масалалари бўйича бўлим мудири Марям Абдуллаева ва Тошкент шаҳар бош имом-хатибининг хотин-қизлар масалалари бўйича ёрдамчиси Зулайҳо Соатова аёл зиёратчиларни ҳожилик мақомига муносиб бўлиш, ибодату зикрлар, яхши амалларни кўпайтириш ҳақида мавъизалар қилмоқдалар. Шунингдек, шаръий саволларга атрофлича жавоб берилмоқда.

Шунингдек, элликбоши, имом-домлалар томонидан зиёратчиларга Ватанга қайтгандан сўнг риё ва бидъат-хурофотга йўл қўймаслик, манманлик ва мақтанишдан узоқ бўлиб, исроф ва дабдабабозликдан сақланиб, жамиятдаги эзгу ишларда ўзгаларга ибрат ўлароқ ҳаёт кечириш ҳақида алоҳида қайд этилди.

Ўзбекистон мусулмонлари идораси Матбуот хизмати
Muslim.uz
@muslimuzportal | @Muftiy_Nuriddin_domla  | @mp3muslim | @diniysavollar

   Бугун, 7 июль куни Ўзбекистон мусулмонлари идораси раиси, муфтий шайх Нуриддин Холиқназар ҳазратлари Тошкент шаҳридаги "Ҳазрати имом" жоме масжидида жамоат билан жума намозини адо этиш ва жамоатга мавиъза қилиш учун ташриф буюрдилар.

Жума аввалида қориларнинг гўзал қироатлари йиғилганлари масрур этган бўлса, Шайх муфтий ҳазратларининг шукроналик ҳақидаги маърузаси барчани бир дам тафаккур қилишга ундади.

Шайх Нуриддин домла ўз сўзида Аллоҳнинг неъматлари чексиз эканини таъқидлаб, мўмин-мусулмонлар бу неъматлар ҳақида гапириши, эътироф этиши зарурлиги қайтди. Жумладан:
– Ислом таълимотида неъматларга шукр қилиш улуғ фазилатдир. Бу ҳақда Абдуллоҳ ибн Аббос розияллоҳу анҳу: “Шукр қилишлик имоннинг яримидир” деган. Бошқа бир ривоятда эса “Имон - сабр ва шукрдан иборат” дейилган.
Шунинг учун ҳам Аллоҳ таоло барчамизни шукр қилишга амр қилиб, унинг зиддидан қайтарган, шукр айтувчиларга чиройли мукофотларни ваъда қилиб, Ўзининг фазилати, карами ва неъматларининг янада зиёда бўлишига шукрни сабаб этган ва Ўзининг гўзал исмларидан бирини шукр орқали ифода қилган.

Буюк бобокалонимиз Қаффоли Шоший эса ўзининг машҳур “Жавоми ул-карим” китобида келтирган Пайғамбаримиз (с.а.в) нинг “Неъматлар ҳақида гапиришлик шукр қилишликдир” деганлар.

Яратган бизларга ато этган беҳисоб неъматларни ёдда тутиш, уни ўз вақтида қадрлай олиш ўша неъматларнинг давомийлигига сабаб бўлади. Шайх Саъдий айтганлар: “Бир нафасга икки марта шукр айтиш вожиб”, зеро, нафас кирсаю қайтиб чиқмаса ёки чиқсаю қайтиб кирмаса, инсон ҳалок бўлишини таъкидлаб, инсон тансиҳатлиги учун, хотиржамлиги учун Яратганга шукрона айтмоқлиги лозим деганлар. Яхшиликка фақат яхшилик билан жавоб қайтариш улуғ фазилатлардан ҳисобланади.

Шайх муфтий ҳазратларининг гўзал мавъизасидан сўнг жума намози адо этилиб, юритимиз ривожи ва элу юрт ҳаққига хайрли дуолар қилинди.

ЎМИ Матбуот хизмати