Шу кунларда ижтимоий тармоқларда Масжидун-Набавий ҳудудидаги Равзаи муборакка аёллар киролмаяпгани тўғрисида хабарлар тарқалмоқда. Ўзбекистон мусулмонлари идораси ушбу масала юзасидан ваколатли мутасаддилар билан тегишли ўрганиш ишларини олиб борди.

Маълум бўлишича, айни кунларда Саудия Арабистони Ҳаж ва умра вазирлиги жорий этган янги тартибга биноан Мадинаи мунавварадаги Набий соллаллоҳу алайҳи васаллам равзаларига аёл зиёратчиларнинг аксарияти киритилмаяпти. Бошқача қилиб айтганда, аёллар учун Масжиди Набавийда ибодат ва намоз ўқиш учун кириш-чиқиш бемалол, фақатгина ушбу масжиднинг ҳудудида жойлашган Равза қисмига киришга вақтинчалик чекловлар ўрнатилган.

Шу муносабат билан Ўзбекистон Республикасининг Жидда шаҳридаги бош консулхонаси вакиллари 20 февраль куни Саудия Арабистони Ҳаж ва Умра вазирлиги вакили Абдулазиз бин Абдулраҳим Ваззан билан учрашув ўтказиб, Масжидун-Набавийдаги Равзаи шариф зиёратига қўйилган чекловлар муҳокама қилинди.

Ваззан жанобларига кўра, шу йилнинг февраль ойи бошларида карантин чекловлари қайтадан кучайтирилгани сабабли, сиғим имкониятларидан келиб чиққан ҳолда аёллар учун Равзаи шарифни зиёрат қилиш жадвал асосида, ҳар куни 2 маротаба (соат 08:00-12:00 ва 16:00-24:00)да амалга оширилиб, оралиқ масофани сақлаш шарти билан ҳар 30 минутда фақатгина 500 нафар аёл (шундан 200 нафари маҳаллий ахоли)га зиёрат учун рухсат берилган. Чекловдан олдин, яъни 5 февралга қадар бир вақтнинг ўзида 1500 нафар аёлга рухсат берилган эди.

Равзаи шарифни зиёрат қилиш навбати асосида, “Иътамарна” мобил иловаси орқали якка тартибда (зиёратчи томонидан) ёки ҳамкор ширкат томонидан “Tawof” платформасида жамоавий рухсатнома олиш орқали ташкил этилмоқда.

Айни вақтда карантин чекловлари ҳамда навбат юқорилиги сабабли кўп давлатларнинг аёл зиёратчилари, шу жумладан ўзбекистонлик аёллар учун ҳам Равзаи шарифни зиёрат қилиш вақтинча имконсиз бўлмоқда.

Таъкидлаш лозимки, аёллар учун Равзаи шарифга киришга рухсатнома олиш учун Подшоҳлик ҳудудига киргандан бошлаб ўртача 10 кунга қадар кутиш талаб этилмоқда.

Шу муносабат билан ҳамда Ҳаж ва Умра вазирлигининг “1443 ҳижрий йил умра мавсуми қоидалари ва иш юритиш механизмлари тўғрисида”ги Йўриқномасининг 2-бўлим 3-банди (“умрачиларнинг мамлакатга келишлари ва яшашлари билан боғлиқ барча шартлар ва қоидаларни зиёратчиларга етказиш”) асосида Равзаи шарифдаги чекловлар юзасидан зиёратчиларни хабардор этиш таклиф этилди.

Аллоҳ насиб этса, жорий йил март ойидан бошлаб карантин чекловлари юмшатилиб, Равзаи шариф қабул сиғими босқичма-босқич кўпайтирилиши кутилмоқда.

Маълум қиламизки, ушбу масалада енгиллик қилиш мақсадида, Ўзбекистон мусулмонлари идораси Ташқи ишлар вазирлиги орқали Ўзбекистон Республикасининг Саудия Арабистонидаги элчихонаси воситачилигида Ҳаж ва Умра вазирлигига бевосита хат йўллаган.

Ушбу жараёнларни Ўзбекистон мусулмонлари идораси диққат билан кузатиб бориб, умрачиларга зиёратларини тўлиқ амалга ошириш бўйича барча зарур чора-тадбирларни амалга оширади.

Ўзбекистон мусулмонлари идораси Матбуот хизмати

Аввал хабар берганимиздек, Ўзбекистон мусулмонлари идораси раиси, муфтий Нуриддин домла ҳазратлари Қорақалпоғистонга ташрифнинг учинчи кунида Дин ишлари бўйича қўмита раиси Содиқ Тошбоев билан биргаликда Муҳаммад ибн Аҳмад ал-Беруний номидаги ўрта махсус ислом билим юртида бўлиб, у ерда устоз ва талабалар учун яратилган шарт-шароитлар ва имкониятларни кўздан кечирдилар.

Шунингдек, меҳмонлар илм даргоҳи ёнида ташкил қилинган «Қуръони карим ва тажвид» курси фаолияти билан яқиндан танишиб, ўтган йили фойдаланишга топширилган 100 ўринли ётоқхона, 200 ўринга мўлжалланган ошхона ва кутубхонани кўрдилар.

Ташриф давомида Муфтий ҳазратлари билим юрти устозлари ҳамда талабалари иштирокида учрашув ташкил қилиниб, дилдан суҳбатлашилди. Учрашувда муфтий ҳазратнинг араб тилида берган саволларига талабалар ҳам араб тилида жавоб беришди. Нуриддин домла ҳазратлари ўз сўзларида толиби илмларга уларни яна ҳам билим олишга қизиқтириб, келаси йили энг аъло баҳоларга ўқиган 2 талабанинг шартнома пулларини тўлаб беришни айтдилар.

Учрашув якунида муфтий ҳазратлари мана шундай кенг имкониятларга эга бўлган ва барча қулайликлар яратилган билим юрти билан танишар эканлар, аввало, ушбу неъматларга шукр қилиш лозимлигини, унинг шукри эса ихлос ва иштиёқ билан ўқиш эканини таъкидлади. Келажакда шу даргоҳдан, юртига, халқига, динига хизмат қиладиган буюк боболаримизга муносиб толиби илмлар етишиб чиқишини тилаб, дуо қилдилар.

Ўзбекистон мусулмонлари идораси Матбуот хизмати

✅ Бугун, 23 февраль куни юртимизнинг бир гуруҳ таниқли уламолари Тошкент шаҳрининг Шайхонтохур ва Чилонзор туманларидаги масжидларга ташриф буюриб Пешин, Аср ва Хуфтон намозларини жамоат билан бирга адо этиб, мўмин-мусулмонларга маърифий суҳбатлар қилиб берадилар.

Қуйида уламолар ва намозларга борадиган масжидлари рўйхати билан танишишингиз мумкин:

? “Хўжа Аламбардор” масжидига:
☀️ Пешинга Ҳасан домла Қодиров;
? Асрга Исмоил Муҳаммад Содиқ;
? Хуфтонга Бахтиёр домла Сатторов;

? “Мўйи муборак Уккоша” масжидига:
☀️ Пешинга Абдуллоҳ домла Юлдашев;
? Асрга Асрориддин домла Хушназаров;
? Хуфтонга Ҳасанхон қори Абдулмажидов;

? “Коҳ ота Бузрук” масжидига:
☀️ Пешинга Аъзамхон домла Эргашев;
? Асрга Жалолиддин домла Ҳамроқулов;
? Хуфтонга Абдуқаххор домла Юнусов;

? “Катта Қозиробод” масжидига:
☀️ Пешинга Саҳобиддин домла Сатимов;
? Асрга Аъзамхон домла Эргашев;
? Хуфтонга Жалолиддин домла Ҳамроқулов;

? “Муҳсинхонтўра” масжидига:
☀️ Пешинга Муҳаммадбобур домла Йўлдошев;
? Асрга Мансур домла Даминов;
? Хуфтонга Йўлдошали домла Каримов;

? “Тинчлик” масжидига:
☀️ Пешинга Бахтиёр домла Сатторов;
? Асрга Абдуқаҳҳор домла Юнусов;
? Хуфтонга Раббимқул домла Муҳаммадиев;

? “Чоштепа” масжидига:
☀️ Пешинга шайх Алижон қори Ҳайдаров;
? Асрга Раббимқул домла Муҳаммадиев;
? Хуфтонга Исмоил Муҳаммад Содиқ ташриф буюрадилар.

? Аллоҳ таоло уламоларимизнинг суҳбатларини манфаатли ва давомли қилсин!

Ташрифлар ва маърифий суҳбатларни сайт ҳамда ижтимоий тармоқларда кузатиб боринг.

#УЛАМОЛАР_ТАШРИФИ
Ўзбекистон мусулмонлари идораси Матбуот хизмати
Muslim.uz
@muslimuzportal | @mp3muslim | @diniysavollar

Айни кунларда муфтий Нуриддин домла ҳазратларининг Қорақалпоғистон диёрига ташрифлари давом этмоқда. Сафар асносида маърифий суҳбатлар ташкил этиш баробарида қорақалпоқ аҳлини юртдаги янгиланишлар моҳияти ҳақида хабардор қилиш, уларнинг дарду ташвишларига қулоқ тутиш, таклиф ва мурожаатларини ўрганиш ишлари амалга оширилмоқда.

Оролбўйи минтақасини ҳар жиҳатдан ривожлантириш бўйича ҳукуматимиз томонидан амалий ишлар бажарилмоқда. Айниқса, аҳолини иш билан таъминлаш, оилаларни камбағалликдан олиб чиқиш, ёрдамга муҳтож кишиларга кўмак бериш ва атроф-муҳитни ўнглашга қаратилган манзилли дастурлар ижро қилинмоқда.

Муфтий ҳазратларининг ушбу минтақага ишчи гуруҳлар қаторида уюштирган сафарлари мобайнида у ердаги аҳоли билан юзма-юз мулоқотлар қилиш, олиб борилаётган ўзгаришларни қўллаб-қувватлаш билан чекланиб қолмай, Давлатимиз Раҳбари томонидан белгиланган муҳим вазифаларни адо этишда соҳа ходимларининг муносиб ҳиссасини таъминлашга ундамоқдалар.

Ушбу сўзларнинг амалий ифодаси сифатида Муфтий ҳазратлари Диний идора ҳисобидан Қорақалпоғистон мусулмонлари қозиётини маънавий-маърифий соҳадаги фаолиятини қўллаб-қувватлаш учун 100 миллион сўм хайрия сифатида ажратилди. Мазкур молиявий ёрдам минтақадаги масжид-мадрасалар фаолиятини яхшилаш ва диний соҳа ходимларини қўллаб-қувватлаш кабиларга йўналтирилади.

Маълумки, Қорақалпоғистонда 61 та жоме масжид фаолият юритади. Уларда 16 нафар олий маълумотли, 45 нафар ўрта махсус имом-хатиблар меҳнат қилади. Шунингдек, мазкур масжидларда 5 нафар олий маълумотли, 63 нафар ўрта махсус имом ноиблари ҳам хизмат кўрсатмоқда.

Ўтган йили 8 нафар имом-хатиб Тошкент ислом институти ҳузуридаги модуль таълим тизимига олий маълумотли қилиш учун ўқишга қабул қилинди. Бундан ташқари, 2 нафар имом-хатиб Тошкент ислом институти сиртқи бўлимини муваффақиятли тамомлади.

Қорақалпоғистон мусулмонлари қозиёти тасарруфидаги диний ташкилотлар ва соҳа ходимларини ҳар жиҳатдан қўллаб-қувватлаш ишларини бундан буён ҳам давом эттирилади.

Ўзбекистон мусулмонлари идораси Матбуот хизмати

Кейинги йилларда Давлатимиз Раҳбарининг мамлакатимизда халқ билан мулоқот қилиш бўйича янги тизимга асос солганлари ўзининг амалий ва ижобий натижаларини бераётир. Бу йўналишда диний соҳа раҳбарлари, бир гуруҳ уламолар халқ билан мулоқот қилиб, одамларнинг дарду ташвишлари билан яшаш ва ишлаш йўлидаги фаолиятларига ўзгача мазмун, кўтаринки руҳ олиб кириб, бундай ишларни янги босқичга олиб чиқмоқдалар.

Шу кунларда Ўзбекистон мусулмонлари идораси раиси, муфтий Нуриддин домла ҳазратлари Қорақалпоғистон Республикасига ташриф буюрдилар. Ҳазрат сафар давомида кенг халқ оммаси билан маънавий-маърифий учрашувлар ўтказиб, олис ва чекка ҳудудлардаги аҳоли вакиллари билан юзма-юз мулоқот қилмоқдалар.

Бугун ана шундай манфаатли мулоқот Қорақалпоғистон Республикаси Қораузяк тумани «Қораузяк» овул фуқаролари йиғини фаоллари билан бўлиб ўтди.

Муфтий ҳазратлари аҳоли билан учрашиб, юртимизда бўлаётган ислоҳотлар ва ўзгаришлар ҳақида сўз юритиб, буларнинг барчаси инсон қадрини улуғлаш, халқ розилиги учун қилинаётганини қайд этдилар. Шу билан бирга йиғилганларни диний соҳада бўлаётган янгиликлар билан таништириб, аҳолининг эмин-эркин ибодат қилишлари учун барча шарт-шароитлар яратилаётганини таъкидладилар.

Мулоқот якунида муфтий ҳазратлари жамоат ва юртимиз равнақи учун хайрли дуолар қилдилар.

Ташриф давом этмоқда.

Ўзбекистон мусулмонлари идораси Матбуот хизмати