Саудия Арабистони Подшоҳлигидаги Бутунжаҳон мусулмон ёшлар форуми ҳайъати Қозоғистонда пойтахт Остонадан 533 километр узоқликда жойлашган Тараз шаҳрининг “Ясная Полина” ҳудудида янги таълим ва ривожланиш маркази қурилишига тамал тошини қўйди.

Марказ ҳудуд аҳолисига хизмат кўрсатиб, уларнинг турли ҳаётий эҳтиёжларини таъминлашга хизмат қилади, унинг таркибига масжид ва шаҳар ёшларига таълим-тарбия беришга ҳисса қўшадиган маърифат мактаби ва “Вақф” хайрия фонди киради.

Шаҳар аҳли энг яқин марказ ўзидан узоқда жойлашгани, бу эса ўз хизматларидан маҳрум бўлишига олиб келаётгани учун бундай марказга катта эҳтиёж борлигини таъкидлаб, Саудия Aрабистони ҳукумати ва халқининг ушбу мақсадли лойиҳаларни қўллаб-қувватлаш борасидаги саъй-ҳаракатларини юқори баҳолади.

Қозоғистон томони бундай ташаббусдан чексиз хурсандчилик изҳор этиб, Қодир Аллоҳдан Подшоҳликдаги осойишталик ва фаровонлик неъматларини янада бардавом этишини сўради.

Ўзбекистон мусулмонлари идораси

 Матбуот хизмати

Жорий йилнинг 28 июнь – 8 июль кунлари Ўзбекистон мусулмонлари идораси вакили, Фатво маркази масъул ходими Ҳабибулло Жўрабоевнинг Россиянинг Новосибирск, Томск вилоятлари ҳамда Олтой ўлкасига сафари ташкил этилди, деб  хабар  бермоқда «Дунё» АА мухбири.

Мамлакатимизнинг Новосибирск шаҳридаги Бош консуллиги маълумотига кўра, сафар давомида Ўзбекистон мусулмонлари идораси вакилининг мамлакатимиз фуқаролари кўпчиликни ташкил этадиган корхона ва ташкилотларда ишлаётган меҳнат мигрантлари, олий таълим муассаларида таҳсил олаётган ўзбек талабалари, диаспора ташкилоти раҳбарлари ҳамда фаол ватандошлар билан учрашуви, давра суҳбати ва очиқ мулоқотлари  бўлиб ўтди.

Ўзбекистонда амалга оширилаётган кенг кўламли ислоҳотлар, дунёвий ва диний қадриятларнинг ўзаро боғлиқлиги, оила муқаддаслиги, оила тарбиясида миллий ва умуминсоний аҳлоқий маданиятнинг ўрни, шунингдек, хорижда юрган ёшларни турли бузғунчи ёт ғоялар, экстремизм, терроризм каби салбий оқимлар таъсирига тушиб қолишларининг олдини олиш билан боғлиқ масалалар учрашувларнинг асосий мавзуси бўлди.

Ўзбекистон мусулмонлари идораси вакили Новосибирск вилояти муфтийси Салим Шакирзиянов билан ҳам учрашди. Суҳбат чоғида диний масалаларда ҳудудлараро ҳамкорлик қилиш, диний уламолар ўртасида ўзаро тажриба алмашиш юзасидан фикр алмашилди.

Ўзбекистон мусулмонлари идораси
Матбуот хизмати

Япониянинг туризм соҳасини ёритишга ихтисослашган «Tabizine»  онлайн журналида «Шарқ гавҳари» деб аталадиган Ўзбекистон қандай давлат?» сарлавҳали мақола  япон  тилида  эълон қилинди, деб  хабар  бермоқда «Дунё» АА мухбири.

Нашрда мамлакатимиз тарихи, замонавий  ривожланиши ва миллий ўзбек таомлари ҳақидаги маълумотлар қаламга олинган. Мақолада Самарқанд, Бухоро, Хива ва Шаҳрисабз каби шаҳарларимиздаги тарихий обидаларнинг суратлари ҳам  жойлаштирилган.

 Муаллиф, шуниндек, «Uzbekistan Airways» АЖнинг «Тошкент-Токио-Тошкент» йўналишидаги тўғридан-тўғри авиақатнови жорий йилнинг  14 апрель кунидан бошлаб қайта тикланганини  маълум қилган.

Ўзбекистон мусулмонлари идораси

Матбуот хизмати

 Ақида – эътиқод масаласи динимизнинг ўзаги ҳисобланади. Барча амалларимизу ибодатларимизнинг Аллоҳ ҳузурида қабул бўлиши айнан эътиқодимизнинг тўғрилигига боғлиқдир. Агар ақида нотўғри ёки бузуқ бўлса, Аллоҳ сақласин, амалларнинг қабул бўлишини умид қилмаса ҳам бўлаверади.

     Диний эътиқод мустаҳкам ақида устига қурилмас экан, унинг натижаси залолатдан бошқа нарса бўлмайди.

    Фарзандларимизнинг имон-эътиқоди борасида Охиратда – Аллоҳ таолонинг ҳузурида масъулмиз! Аллоҳ таоло ҳар бир мўминга хитоб қилиб, шундай буюрган:

яъни: “Эй, имон келтирганлар! Ўзларингизни ва оила аъзоларингизни ёқилғиси одамлар ва тошлар бўлмиш дўзахдан сақлангизки, унда дағал ва қаттиққўл, Аллоҳ буюрган нарсага итоатсизлик қилмайдиган, фақат буюрилган ишни қиладиган фаришталар (хизмат қилурлар)” (Таҳрим сураси 6-оят).

     Киши ўзини ва оила аъзоларини дўзахдан сақлаши – энг аввало соғлом ва мустаҳкам эътиқод билан бўлади. Аллоҳ таолога ширк келтирган ёки имонида шубҳада бўлган кимса Охират диёрида нажот тополмайди.

   Шундай экан, ўзимиз динда билишимиз ва эътиқод қилишимиз зарур бўлган илмларни ўрганиб, фарзандларимиз ва аҳли оиламизга ўргатишимиз лозим! Фарзандларимиз қалбида Ислом ақидасини мустаҳкам сингдиришимиз даркор! Мана шунда уларга турли хуружлар таъсир қилолмайди. Келажак авлодимиз учун хатарга айланаётган – миссионерлик, даҳрийлик, бесуннатлик (ҳадисни инкор қилувчилар) каби тоифа тарафдорларининг қарашлари ва шубҳалари уларни йўлдан оздиролмайди!

    Ҳозирда ақидамизни ўрганиш учун барча шароитлар мавжуд. Хусусан Имом Мотуридий раҳматуллоҳи алайҳ тартибга солган – Аҳли сунна вал жамоа эътиқоди бўйича кўплаб китоблар ёзилди, таржималар қилиб, нашр этилди. Аллоҳга ҳамдлар бўлсинки, ушбу ишлар уламоларимиз томонидан изчил давом эттирилмоқда.

    Қолаверса, Ўзбекистон мусулмонлари идораси томонидан ақида илми бўйича юртимиздаги ишончли уламоларнинг силсилавий дарслари ижтимоий тармоқлар орқали жойлаб борилмоқда. Бизга ушбу дарсларни тинглаш ёки ёзилган асарларни оила даврасида ўрганишимиз қолди холос.

Соғлом эътиқодни оёқости қиладиган ва муқаддас динимизни ўз манфаати йўлида қурол қилиб олган кимсалар борлиги бугун барчамизни ташвишга солмоқда.Маълумки, ақидапараст ва бузғунчи кучлар халқ рухиятини ичдан емириб, ҳалокатга бошлайди. Жамиятнинг ҳамжихатлигини бузади, халқни жар ёқасига олиб боради. Диний тушунчалардан усталик билан фойдаланиб,одамларга унинг асл моҳиятини бузиб кўрсатади. Шунингдек халқнинг ишонувчанлигидан фойдаланиб, оммани норозилик кайфиятида тарбиялайди. Ёшларни эса алдов йўли билан ўзининг жирканч қуролига айлантириб, жувонмарг қилади.

Интернет айниқса, ёшларни соғлом эътиқодига тажовуз қилувчи манбалар маконидир. У ерда ўзларини “дўст сановчи” ёки “ҳидоятга бошловчи” қилиб кўрсатувчилар кўп. Аслида уларнинг дин илмидан хабарлари йўқ. Ўз раҳнамоларидан эшитганларини такрорлашдан нарига ўтмайдилар. Улар ўз жоҳилликлари билан бошқаларни ҳам жарга етаклайдилар.

Абдуллоҳ ибн Муборак (раҳимаҳуллоҳ): “Дин-бу илмдир, уни кимдан олаётганларингизга қаранг ”, - деган.

Эътиқод илмини яхши билмаслиги боис инсоннинг ақидаси ноқис бўлиб қолади.Ислом дини таълимотига кўра, агар ақида бузуқ, эътиқод ботил бўлса, кишининг амали беҳуда кетади ва ўзи залолат ботқоғига ботади.

Қайси жамиятда кишилар эътиқоди соф бўлса, ўша жойда тинчлик мустаҳкам бўлади.Аксинча, бузуқ эътиқодли кишилардан-да хавфли одам бўлмайди, ундайлар ҳар қандай пасткашликка тайёр туради.

Аллоҳ таоло барчаларимизни Ўзи рози бўлган ҳақ йўлида бўлишимизга муваффақ этиб, ақидада адашишдан, турли фирқаларга бўлинишдан паноҳида асрасин!

Интернет манбалари асосида
Янгийўл туман “Имом   Султон” жоме масжиди имом хатиби
Одилжон Нарзуллаев тайёрлади

☀️Йилдан йилга ёз мавсумида ҳаво ҳарорати юқорилаб бормоқда. Албатта, бунга қатор техноген ва табиий омиллар таъсир қиляпти. Бундай шароитда инсонлар аномал иссиқ об-ҳавода яшашга кўникишига тўғри келади, деб хабар беради Соғлиқни сақлаш вазирлиги Матбуот хизмати.

Хўш, ёз чилласини қандай ўтказиш керак?

– Иссиқ ҳавода табиий, ёрқин рангдаги, пахта матосидан бўлган кийимларни кийиш мақсадга мувофиқ. Мавсумга мос бундай либослар терининг нафас олишига имкон яратади, тана қизиб кетишининг олдини олади.
– Иложи борича тўғри тушаётган қуёш нуридан сақланишга ҳаракат қилиш ва бош кийим кийиб юриш лозим.
– Қуёш нури соат 12:00 дан 16:00 гача жуда фаол ҳолатда бўлади. Шунинг учун бу вақт оралиғида кўчага чиқишни режалаштирмаган маъқул.
– Аммо ташқарига чиқишга зарурат бўлса, тананинг очиқ жойларини қуёш нуридан асрашга ҳаракат қилиш керак.
– Иссиқ об-ҳавода организмда сув баланси бузилади ҳамда кўп намлик йўқотилади. Шунинг учун жазирамада кунига 3 литрдан кам бўлмаган миқдорда суюқлик ичиш зарур.
– Ёз кунлари чанқоқни олча, олма ва нордон мевалардан тайёрланган шарбатлар, айрон ҳамда лимонли сувлар босади.
☕️⛔️ Жазирама кунларда қаҳвадан воз кечган маъқул. Чунки у иссиқ кунда чарчоқни оширади.
❌ Ширин ва газланган ичимликлар ҳам тавсия этилмайди.

Ўз навбатида жазирама иссиқ кунлари ҳақида Расулуллоҳ соллаллоҳу алайҳи васаллам бундай деганлар: "...Албатта, ҳароратнинг шиддати жаҳаннамнинг қайнаб чиққан иссиғидандир", деганлар.

Уламоларимиз томонидан жазирама иссиқ кунларда кўпроқ "Аллоҳумма, ажирний минан-наар" (Аллоҳим, мени дўзахдан сақлагин) деб дуо қилиш тавсия этилади! Зеро, Набий соллаллоҳу алайҳи васаллам: "Албатта, дуо нозил бўлган ва нозил бўлмаган нарсага фойда келтиради. Эй Аллоҳнинг бандалари! Ўзингизга дуони лозим тутинг!" деганлар.

Интернет маълумотлари асосида
Баҳриддин Хушбоқов тайёрлади