5 февраль куни Қашқадарё вилоятида ҳам Қуръон мусобақасининг ҳудудий босқичига оқ фотиҳа берилди. Ушбу вилоятдаги мусобақага ҳам жуда катта тайёргарлик кўрилган. Маълумки, мазкур заминдан олиму уламолар, аҳли тариқатлар ва фақиҳу фуқаҳолар жуда кўплаб чиқишган. Масалан, Қуръони карим ва тасаввуфга оид нодир асарлар муаллифи Абу Ҳафс Насафий, калом илмини такомилга етказган Абу Муин Насафий, фиқҳшунос олим Абул Баракот Насафий шулар жумласидандир. Манбаларда келтирилишича бу диёрдан 300 га яқин дунё эътироф этган Насафий олимлар етишиб чиққан.
Соҳибқирон Амир Темур томонидан 1378-1379 йилларда Шаҳрисабзда бунёд этилган “Оқсарой” мажмуи ҳамда “Лангар ота”, “Султон Мирҳайдар”, “Ҳусам ота”, “Ҳазрати Башир” ва “Исоқ ота” каби зиёратгоҳлар ҳам кўпчиликка маълум ва машҳурдир.
Ана шундай буюк аллома ва азиз авлиёларнинг ҳоки поклари қўним топган табаррук заминда бугун Аллоҳнинг каломини тиловат қилиш бўйича мусобақалар бошланди.
Муҳтарам Қуръон ихлосмандлари, Қашқадарё вилояти Шаҳрисабз туманидаги “Ёшлар ижод уйи”да мусобақанинг ҳудудий босқичлари бошланди. Барчани ушбу мусобақага таклиф этамиз.
Бизнинг muslim.uz портали ва ижтимоий тармоқларни кузатиб боринг. Шаҳрисабздаги мусобақага оид фоторепортаж ва таъсирли лавҳаларни бериб борамиз.

Ўзбекистон мусулмонлари идораси Матбуот хизмати

Бугун, 5 февраль куни мамлакатимизга Тожикистон Республикаси Бош вазири ўринбосари Азим Иброҳим бошчилигидаги делегация ташриф буюради. Бу ҳақда ТИВ Ахборот хизмати хабар қилмоқда. 

Ташриф дастурига кўра, Ўзбекистон ҳукуматида, қатор вазирлик ва идораларда учрашув ва музокаралар ўтказиш кўзда тутилган. 

Мазкур тадбирлар чоғида икки томонлама муносабатларнинг долзарб масалалари ҳамда бўлажак Ўзбекистон-Тожикистон учрашувларига тайёргарлик кўришнинг амалий жиҳатларини муҳокама қилиш режалаштирилмоқда. 

Аввалроқ, Ўзбекистон Республикаси Бош вазири Абдулла Арипов Тожикистонга ташриф буюргани ҳақида хабар берган эдик.

ЎМИ Матбуот хизмати

Кеча, 4 февраль куни Саудия Арабистонида умра зиёратида бўлиб турган зиёратчиларимизнинг дастлабки гуруҳлари Макка шаҳрига етиб боришди. Улар меҳмонхонага жойлашгандан сўнг Масжиди Ҳарамдаги Байтуллоҳни тавоф қилиб, Сафо ва Марва орасида саъй ҳамда соч қисқартириш амалларини ҳам бажариб олишди.
Эслатиб ўтамиз, бу мавсум давомида зиёратчиларимизга Саудия Арабистонида 12 нафар ишчи гуруҳи, 12 нафар ошпаз ва 21 нафар шифокорлар гуруҳи хизмат кўрсатади.
Ўн кунлик умра сафари давомида зиёратчиларимиз Мадина шаҳрида 3 кун бўлиб, “Масатул Бустан” меҳмонхонасида истиқомат қилишади. Макка шаҳрида эса “Аброжул Кисва” меҳмонхонасида зиёратчиларимиз 7 кун давомида бўладилар.
Умра зиёратига тайёргарлик доирасида барча зиёратчилар мавсумий касалликларга қарши эмланиб, давлатимиз рамзи туширилган камзул ва сумкалар билан таъминланди. Сафар олдидан уларга умра сафарининг моҳияти, уни адо этишга доир масалалар гуруҳ раҳбарлари томонидан тушунтирилди ва зиёрат ҳақида тўлиқ маълумот берувчи қўлланма ва диск берилди.
Зиёратчиларимизга барча амалларини мукаммал адо этиб, Яратганнинг даргоҳида қабул қилинишини сўраб қоламиз.

Муҳаммад-Акмалхон Шакиров,
Ўзбекистон мусулмонлари идораси
Халқаро алоқалар бўлими мудири

ЎМИ матбуот хизмати

Кеча Наманганда бошланган қорилар мусобақаси сабаб бутун вилоятни, қолаверса, диёримизнинг барча ҳудудини илоҳий файз‑футуҳ чулғаб олди, байрамлар ва хурсандчиликлар асло тўхтамаяпти, зинҳор тўхтамасин ҳам. Ҳатто дам олиш кунлари ҳам одамларимиз Қуръонга ошно бўлишди, унинг файзидан ором олишди.
Мана шундай шодиёна кунлар бугун ҳам Намангандан ўз зиёсини таратишда давом этади. Барча-барчани Қуръонга бўлган муҳаббатини янада сайқаллашга даъват этамиз.
Маълумки, қалб бир нарсага муҳаббат қилса, унга боғланиб қолади, унга муштоқ бўлади, унга қаттиқ қизиқади. Агар қалб Қуръонга муҳаббат қилса, унинг қироатидан лаззатланади, унга бор эътиборини қаратади ва бунинг натижасида чуқур тушунишу тадаббур ҳосил бўлади. Аксинча, агар муҳаббат бўлмаса, қалбнинг Қуръонга юзланиши қийин бўлади. Қуръонга томон бурилиш фақатгина нафсини қаттиқ тергаш, ўзини мажбурлаш орқали жуда ҳам оғир кечади. Қуръон муҳаббатининг ҳосил бўлиши тадаббурнинг энг кучли ва олий даражада кечишига сабаб бўлади.
Дўсту биродарларимиз, ҳаммамизни икки дунё саодатига етакловчи, ҳидоят манбаи Қуръонга бўлган муҳаббатимизни зиёдалаштирайлик, саралаш босқичига саноқли кунлар қолган қорилар мусобақасини диққат билан кузатайлик, бир неча кундан кейин бундай шукуҳни излаб ҳам топиб бўлмайди.
Шундай экан азизлар, бизнинг muslim.uz портали ва ижтимоий тармоқларни кузатиб боринг. Барчамизга Яратганнинг раҳмати бўлсин.

Ўзбекистон мусулмонлари идораси Матбуот хизмати