Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.

Ўзинг уруш майдонидан узоқда бўла туриб, шижоат ҳақида гапиришинг бунча осон бўлмаса!

“Тарих муҳрлаган сўзлар”

*****

Бошқаларнинг ҳаётини ёритиб, ўзини ёндириб, эритган шам каби бўлма!

“Тарих муҳрлаган сўзлар”

*****

Жамиятимиздаги ғалати ишлардан бири – ўзинг ҳақингда сен ҳам билмайдиган қиссани эшитишингдир.

Иброҳим Фиқий

*****

Жоҳил кимсанинг тортишувда чекиниши қийин масала.

“Тарих муҳрлаган сўзлар”

*****

Баъзилар гумонга ишониб сени сотиб юборади. Баъзилар айбларинг бўлишига қарамай, сени сотиб олади.

“Фикр дурдоналари”

*****

Агар сенга ердаги кимса зулм қилса, Аллоҳ таолонинг адолатини унутма!

“Фикр дурдоналари”

*****

Пулинг кўпайиб, ишларинг юришганда, дўстларинг қаторида кўплаб ҳасадчи, иккиюзламачи, лаганбардор “дўстлар” ҳам кўпаяди.

“Фикр дурдоналари”

*****

Дўстларинг орасида сунъийлик нималигини билмайдиган, ниқобдан фойдаланмайдиган, сени хурсанд қилишга интиладиган, маҳзун бўлсанг, бирга маҳзун бўладиган кишиларнинг борлиги саодатдандир.

“Фикр дурдоналари”

*****

Интернет материалларидан тўплаб, таржима қилувчи

Нозимжон Иминжонов

Жорий йилнинг 24-25 апрель кунлари Қозон шаҳрида RUSSIA HALAL EXPO 2019 халқаро ҳалол индустрия кўргазмаси ўтказилади. Ушбу кўргазма XI халқаро "Россия - Ислом дунёси: KazanSummit 2019" иқтисодий саммит доирасида ташкил этилиши айтилган.

Кўргазмада дунёнинг 10 мамлакатидан 85 та ҳалол маҳсулот ишлаб чиқарувчи компаниялар иштирок этади.

Жорий йилги кўргазма Россия қишлоқ хўжалик вазирлиги ташаббуси билан ўтказилаётгани айтилган. Кўргазма майдони ўтган йилгига қараганда 3,5 баробар ошиб, 5 минг кв.м.ни ташкил этади.

Кўргазмага 5 мингдан ортиқ одамлар ташриф буюриши кутилмоқда.

Ўзбекистон мусулмонлари идораси Матбуот хизмати

ЎМИ Матбуот хизмати

Мамлакатимиз оммавий ахборот воситалари сафига яна бир янги нашр қўшилди: «Hilol-nashr» нашриёт-матбаа мажмуаси муассислигида «Ҳилол» илмий-маърифий, ижтимоий-адабий журнали нашр этила бошланди. Журнални нашр этиш ғояси атоқли олим, фазилатли шайх Муҳаммад Содиқ Муҳаммад Юсуф раҳимаҳуллоҳга тегишли бўлиб, у киши бошлаган катта илмий-маърифий ишларнинг узвий давоми саналади. «Соф Ислом маърифатини кенг ёйиш» шиори остида ўз фаолиятини бошлаган журналга динимиз таълимотларини ёритувчи зарур маълумотлар, маърифий суҳбатлар, амри маъруф ва наҳйи мункар қилиш асосида катта ислоҳотлар қаршисида турган халқимизга соф Ислом таълимотларини тушунтириш, мусулмонлар маърифатини оширишга ҳисса қўшиш вазифаси юкланган.

Журналнинг илк сонида «Тафсир», «Фиқҳ», «Саҳобалар ҳаёти», «Дунё олимлари эътирофи», «Насиҳат», «Фарзанд тарбияси», «Аёллар саҳифаси», «Адабиёт», «Машҳур масжидлар» каби ўнлаб рукнлар остида Ислом дини таълимоти ва мусулмонлар ҳаётига оид кўплаб қизиқарли материаллар эълон қилинган. Айниқса, машҳур араб олими шайх Муҳаммад Аввоманинг «Бу юртнинг илмга садоқатига гувоҳмиз!» номли мақоласи, Нақшбандия тариқатининг йирик намояндаларидан бири Зулфиқор Аҳмад Нақшбандий ҳазратларининг аёлларга эр билан муносабатларни яхшилаш борасида қилган насиҳатлари, фарзандлар қалбида Аллоҳ таолога муҳаббат уйғотиш йўллари ҳақидаги мақолалар ўқувчиларда катта қизиқиш уйғотиши мумкин.

Ҳар бир нашр ўз ўқувчиларининг муҳаббатини қозониш, уларнинг қалбига етиб бориш ва ўзаро мулоқотни кучайтириш орқалигина эътибор топади, оммалашади. Шу боис таҳририят ўқувчиларга мурожаат қилиб, журнал билан мунтазам ҳамкорлик қилиш, қимматли тавсия-маслаҳатлари, фикр-мулоҳазалари билан журнал фаолиятида иштирок этишга чорлайди.

Янги журнал мамлакатимизнинг барча мусулмонларига муборак бўлсин, унинг қадами қутлуғ келсин! Кўп йиллар давомида халқимизга буюк Аллоҳни танитиш, умумбашарият учун фойдали бўлган динимизнинг барча нодир, эзгу фазилатларини баён этиш, одамларимиз иймон-эътиқодини янада мустаҳкамлаш, уларга дин арконларини ўргатишда энг яхши ҳамкор ва йўлдош бўлишини Аллоҳнинг Ўзи муваффақ айласин!

Islom.uz портали таҳририяти

2019 йил 8 апрель куни Каримов Рустамбек исмли фуқаро Ўзбекистон мусулмонлари идораси раҳбарияти қабулига кириш учун ҳамроҳи “Тўлқин” исмли шахс билан бирга Ўзбекистон мусулмонлари идорасига келади. Масъуллар Р.Каримовни “Фуқаролар қабулини қайд қилиш журнали”га ёзиб қўйишган ва бироз кутишини айтишган. Лекин у одобсиз хатти-ҳаракатлар қилиб, ходимларга ҳурматсизлик қилган. Шунингдек, ўзининг “Фейсбук” ижтимоий тармоғидаги (Rustam Karim) саҳифаси орқали Диний идора ва уламоларни обрўсизлантирадиган, ҳақоратомуз ва истеҳзоли сўзларга тўла онлайн (жонли) чиқишлар қилган.

Жумладан, “Қўштирноқ ичидаги Шайх Аблулазиз Мансур билан учрашдик!...” ва “Диний идорага келдик, Инша Оллоҳ муфтий билан учрашиш ва ҳамма муаммолар ҳақида гаплашайликчи..., нима жавоб берар экан!..”, “Чойла билан кутиб олишаркан, чойини ичмайман, яна шерик бўлиб қолмай буларга (истеҳзомуз кулади)”, “... фалончи бобо” деган ибораларни ўзининг шахсий саҳифасида изоҳ қилиб қолдирган ва онлайн чиқишларида шундай гапларни айтган.

Р.Каримов Ўзбекистон мусулмонлари идораси раиси ўринбосари Шайх Абдулазиз Мансур қабулига кирган.

Мулоқот жараёнида Р.Каримов  ўзининг турли масалалардаги  саволларини берган. Ушбу масалаларга Шайх Абдулазиз Мансур томонидан батафсил жавоб берилган. Шундай бўлсада, суҳбат жараёнида Р.Каримов Шайхга нисбатан одобсиз хатти-ҳаракатлар қилган ва бир неча ўринда суҳбатни бўлган. Мулоқот якунлангандан сўнг, Р.Каримов ҳурмат билан кузатиб қўйилган. Диний идорадан чиққач, у одоб-ахлоқ мезонларини четлаб, яна ўзининг “Фейсбук” саҳифаси орқали онлайн чиқиш қилган.

Аслида, мусулмон кишининг одоби, жамиятда ўзини тутиши, бошқалар билан муносабати қандай бўлишини Пайғамбаримиз алайҳиссалом ўз амалларида ва ҳадиси шарифларида қатъий белгилаб берганлар. Юқоридаги шахснинг ҳаракатлари ва ўзини тутиши набавий ахлоқ тугул, оддий инсонийлик нуқтаи назаридан ҳам мутлақо ножоиздир. На одоб, на илм, на олимларга нисбатан муҳаббати бор. Аксинча, жамиятда фитна уруғини сочиб, одамларни тарафкашликка чақирадиган шундайларни кўриб, Мир Алишер Навоий ҳазратлари бежиз қуйидаги байтни битмаган эканлар, дейсан киши:

Адаб ўргангилу илм ҳосил қил,

Аҳли маъноға ўзни восил қил.

Ўзбекистон мусулмонлари идораси