22 август куни Москва шаҳридаги “Шайх Муҳаммад Содиқ Муҳаммад Юсуф” марказида уламолар, мутахассислар ва Марказий Осиёлик меҳнат мигрантлари иштирокида давра суҳбати бўлиб ўтди. Мулоқотда Ўзбекистон мусулмонлари идораси раиси маслаҳатчиси Абдуҳаким қори Матқулов, Котибият мудири Муҳаммад Аюбхон Ҳомидов, “Ҳилол-нашр” нашриёт-матбаа мажмуаси раҳбари Исмоил Муҳаммад Содиқ ва Россия диний идоралари вакиллари қатнашди.
Тадбирда меҳнат мигрантлари таълим-тарбияси, маънавият ва маърифати масалаларига алоҳида эътибор қаратилди. Хусусан, Шайх Муҳаммад Содиқ Муҳаммад Юсуф илмий меросини ўрганиш, тарғиб этиш ва китобларини мутолаа қилиш мустаҳкам эътиқодни сақлашда катта аҳамиятга эга экани ҳақида сўз юритилди.
Бу бежиз эмас, албатта. Шайх ҳазратлари нафақат диний, балки маърифий, тарихий, ахлоқий, ижтимоий мавзуларда 100 дан зиёд китоблар ёзган. У кишининг ҳикматли асарлари, суҳбатлари, телевидение ва матбуотдаги чиқишлари ҳар бир инсонни тўғри йўлга бошлайди.
Шуни алоҳида таъкидлаш керакки, Шайх Муҳаммад Содиқ Муҳаммад Юсуф асарлари рус тилига ҳам таржима қилиниб, чоп этилган. “Тафсир Хилал” (Қуръон каримнинг шарҳи), “Хадисы и Жизнь”, “Ийман, Ислам, Куръан”, “Суннитские вероубеждения”, “Разногласия: причины и решения”, “Васатыя – путь жизни”, “Счастливая семья”, “Открытое послание”, “Истина о сути гадания”, “Заем и связанные с ним вопросы” каби китоблар шулар жумласидандир. Шунингдек, олимнинг асарлари қозоқ, қирғиз ва бошқа тилларга ҳам таржима қилинган.
Давлатимиз раҳбари ташаббуси билан Ислом динининг асл моҳиятини тарғиб этиш, ёш авлодни миллий қадриятларимиз руҳида тарбиялашга қаратилган эзгу ишлар қаторида Шайх Муҳаммад Содиқ Муҳаммад Юсуфнинг илмий меросини тарғиб этиш ёш авлод учун улкан тарбия ва ибрат манбаи бўлиб хизмат қилади.
Мулоқотда Ўзбекистон мусулмонлари идораси раиси маслаҳатчи Абдуҳаким қори Матқулов сўзга чиқиб, сўнгги йилларда муҳтарам Президентимиз томонларидан мамлакатимизда амалга оширилаётган кенг кўламли ислоҳотлар, айниқса, диний-маърифий жабҳадаги аҳамияти беқиёс ишлар ҳақида алоҳида тўхталди.
Ўзбекистон мусулмонлари идораси Котибияти мудири Муҳаммад Аюбхон Ҳомидов эса юртимизда дин янги масжид-мадрасалар очилгани, илмий марказлар, ихтисослашган мактаблар ташкил этилгани, шунингдек, ватанга садоқат, оила муқаддаслиги, огоҳлик мавзуларида суҳбат қилиб бердилар.
Давра суҳбати якунида меҳнат мигрантлари сўзга чиқиб, Ўзбекистон ҳукумати томонидан хорижда меҳнат қилаётган шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш борасида сўнгги йилларда жуда катта ишлар амалга оширилаётгани ва буни барча меҳнат мигрантлари ҳис этаётганларини эътироф этишди.

Ўзбекистон мусулмонлар идораси Матбуот хизмати

23 август, жума куни Чеченистоннинг Шали туманида барпо этилган “Рамзан Қодиров” номидаги муҳташам масжиднинг очилиш маросими бўлиб ўтади. Унда мусулмон мамлакатларидан ташриф буюрган мартабали меҳмонлар орасида Ўзбекистон делегацияси ҳам иштирок этади.

Мазкур ўзбекистонлик меъморлар томонидан лойиҳалаштирилган жоме масжид, ҳар бири 63 метр бўлган тўрт минорага ва баландлиги 43 метр бўлган қуббага эга. Масжид қурилиши 2012 йилда бошланган. Чиройи ва услуби жиҳатидан масжид дунёда ўзига хос бўлиб, унинг ичи ва ташқариси юнон оқ мармарлари билан безатилган.

Эътиборли томони шундаки, Шали шаҳрида қад ростлаган улуғвор ва кўркам масжид кўп асрлик бой меъморчилик анъаналарини безавол сақлаб келаётган маҳоратли ва қўли гул ўзбек меъморлари томонидан лойиҳалаштирилган ва Марказий Осиёга хос услубда барпо этилган.

Бино тўрт томондан кириш порталига эга. Бинонинг ташқи ва ички томони оқ рангдаги тошлар, ўзбекона услубдаги орнамент ва нақшлар билан безатилган, шарқона безаклар билан уйғунлашиб кетган. Масжид қадимий Бухоро ва Самарқанд масжидлари услубига ўхшаш.

Чеченистондаги мана шундай файзли масжиднинг заминимиздаги қадимий масжидлар услубида қурилиши ўзбек ва чечен халқларини мустаҳкам ришталар чамбарчас боғлаб туришини яққол намоён этади.
Маълумотларда қайд этилишича, ушбу масжид Европа минтақасидаги энг йирик масжидлардан бири бўлади. Масжидда бир вақтнинг ўзида 30 мингдан зиёд киши ибодат қилиши мумкин экан.

Масжид очилиш маросими доирасида Дурди шайх номидаги Қуръон ҳофизлари мактабининг тантанали очилиши, халқаро Қуръон мусобақаси ғолибларини тақдирлаш, Ҳазрати Пайғамбаримиз Муҳаммад соллаллоҳу алайҳи васалламга бағишланган энг яхши нашида мусобақаси ғолиблари чиқишлари каби маросимлар ҳам ўтказилади.

Маълумот ўрнида, Рамзан Қодировнинг отаси, Чеченистон Республикасининг биринчи президенти Аҳмад ҳожи Қодиров дастлаб Бухородаги Мир Араб мадрасасида кейин Тошкент ислом институтида таълим олган эди.

Ўзбекистон мусулмонлари идораси Матбуот хизмати

Тустар форсларнинг мустаҳкам қўрғонли шаҳарларидан бўлиб, мусулмонлар ушбу шаҳарни бир ярим йил давомида қамал қилиб турдилар. Шундан сўнг шаҳар мусулмонлар қўлига ўтди. Бу фатҳ ислом тарихидаги энг қийин фатҳлардан бири эди. Анас ибн Молик розияллоҳу анҳу ушбу фатҳ кунини эсласалар йиғлаб юборар ва у кунни эслашни истамасдилар. Хўш, нега?

Тустарни қамал қилиб турган мусулмонлар шаҳар эшикларини бомдод вақти киришидан бироз олдин очишга муваффақ бўладилар. Мусулмон қўшини шаҳар ичига сел каби оқиб кириб борди. Ичкарига киргач, ўттиз минг кишилик мусулмонлар қўшини бир юз эллик минг сонли форс қўшинига қарши аёвсиз жангни бошладилар. Мусулмонларга ҳар лаҳза ўлим чанг солар, ҳар лаҳза хатар бор эди. Ҳа, вазият ниҳоятда оғир эди.

Аммо охирида Аллоҳнинг фазли билан мусулмонлар душман устидан узил-кесил ғалаба қозонишди. Бироқ бу ғалаба онлари қуёш чиқиб бўлган пайтларга тўғри келди. Ҳа, мусулмонлар шу куни бомдод намозини ўқий олишмаган эди. Шиддатли жанг асносида, қонсираган қиличлар орасида бомдодни ўқиб олишга имкон топа олмадилар.

Умрида бир марта бомдодни қазо қилган Анас ибн Молик розияллоҳу анҳу шу воқеа сабаб ҳўнг-ҳўнг йиғлардилар. У зот узрли бўла туриб йиғлардилар. Ҳа, мусулмонлар ўша онда узрли эдилар. Улар исломдаги энг улуғ амаллардан бири билан машғул эдилар. Лекин улуғ ибодат, буюк фарз қазо бўлди! Улар шунинг учун йиғлашарди.

Буюк саҳобий Анас ибн Молик розияллоҳу анҳуга ушбу фатҳ зикр қилинса, “Менга Тустарни эслатманг! Дарҳақиқат, у бомдод намози вақтини зое қилишимизга сабаб бўлган. Дунёдаги жамийки нарсаларнинг меники бўлиши ушбу намозни ўз вақтида адо этишимдан кўра суюкли эмас!” деб айтардилар.    

Ушбу воқеани ўқир эканмиз, уларнинг ғалаба қозонишлари сабабини англагандек бўламиз.

Хўш, бизнинг ҳаётимизда намознинг қадри, аҳамияти қай даражада?!

Улар Аллоҳ таолонинг йўлида ҳаётларини қурбон қилиб юбордилар. Биз Аллоҳ таолонинг йўлида уйқуларимизни қурбон қила оламизми?! Агар қурбон қила олмасак, у ҳолда қайси ғалабани кутиб, орзу қиляпмиз?!

Унутмайлик, агар қалбимизда ибодатлар, тоатларнинг қадру қиймати йўқолса, бизнинг азизлигимиз ва шарафимиз ҳам йўқолади. Натижада бошқалар бизга қарши бирлашаверади, дунё кўзимизга торайиб, мағлуб бўлиб бораверамиз. 

Интернет маълумотлари асосида Нозимжон Ҳошимжон тайёрлади

Жорий йилнинг 26 – 27 сентябрь кунлари Россия Федерациясининг Санкт-Петербург шаҳрида мусулмон давлатларида фаолият олиб борадиган V халқаро журналистлар форуми ўтказилади.

Ушбу анджуман ташкилотчиси сифатида "Россия Ислом дунёсит стратегик қарашлар гуруҳи ҳамда Татаристон Республикаси президенти қайд этилган.

Ушбу форумда 40дан ортиқ хорижий мусулмон мамлакатлари журналистлари иштирок этиши кутилмоқда. Тадбирнинг очилиш маросими 26 сентябрь куни ўтади.

Ўзбекистон мусулмонлари идораси Матбуот хизмати

Саудия Арабистони ҳаж амалини адо этган ярим миллионга яқин зиёратчи мамлакатни тарк этганини маълум қилди. Бу ҳақда Азон интернет нашри хабар берди.

Паспорт идорасининг билдиришича, қиролликнинг денгиз, ҳаво ва қуруқлик чегараларидан ўтган зиёратчилар сони сешанба куни эрталаб ҳолатига кўра 439 383 кишига етган. Хусусан, ҳаво йўли орқали 370 796, қуруқлик орқали 62 556, денгиз портлари орқали эса 6 031 зиёратчи чиқиб кетган.

Саудия Арабистони Статистика бош бошқармаси маълумотига қараганда, бу йил зиёратчилар сони 2 миллион 489 минг 406 нафарни ташкил этди.

Ўзбекистон мусулмонлари идораси Матбуот хизмати