Қорақалпоғистон сафари давомида Ўзбекистон мусулмонлари идораси раиси ўринбосари Иброҳим домла Иномов Нукус шаҳридаги “Аллоҳберди азиз” жоме масжидида жамоат билан пешин намозини адо этгандан сўнг йиғилганларга маърифий маъруза қилиб берди. Унда, жумладан, юртимизда диний-маърифий соҳада амалга оширилаётган ислоҳотлар, тинчлик-хотиржамлик неъматининг қадри ҳақида сермазмун мавъиза қилдилар.

Дарҳақиқат, ҳамма даврда ҳам давлатнинг ривожланиши, тараққий топиши жамиятнинг фаровон ва осойишта ҳаёт кечиришига боғлиқлиги аён бўлади. Пайғамбаримиз алайҳиссалом ҳадисларининг бирида тинчлик-хотиржамлик энг улуғ неъмат эканини таъкидлаб бундай деганлар: “Икки неъмат борки, кўпчилик инсонлар унинг қадрига етмайдилар. У – хотиржамлик ва сиҳат-саломатлик” (Имом Бухорий ривоятлари).

Демак, тинчлик ва хотиржамлик Аллоҳ таолонинг катта неъматларидан биридир. Қолаверса, барча эзгу ишлар рўёбга чиқишининг боиси ҳам осойишталикдир. Шундай экан, инсонлар нафақат мавжуд тинчликни қадрига етиб, шукрини адо этишлари, балки унга ношукрлик қилиб путур етказишдан ҳам сақланишлари лозим.

Қуръони каримда бундай дейилади: “Ерни (Аллоҳ хайрли ишларга) яроқли қилиб қўйгандан кейин (унда) бузғунчилик қилмангиз! Унга (Аллоҳга) ҳам қўрқинч ва ҳам умид билан дуо қилингиз! Аллоҳнинг раҳмати эзгу иш қилувчиларга яқиндир” (Аъроф сураси 56-оят).

Тинчлик амалий шукр талаб қиладиган неъматдир. Бу неъматнинг шукрини адо этиш барчанинг зиммасидаги фарздир. Кексалар тинчликнинг мустаҳкамлигини сўраб дуо қилишлари, ўрта ёшлилар ўзларининг ҳалол меҳнатлари, ёшлар эса уни асраш ва қадрига етиш борасида астойдил илм олишга ҳаракат қилмоқликлари билан бу неъматнинг шукрини адо этган бўладилар.

Ҳақ таоло барчамизни Ватанимиз тараққиёти ва фаровонлиги йўлида олиб бораётган хайрли ишларимизга ривож берсин, фарзандларимиз улуғ аждодларга лойиқ фарзандлар бўлишини насиб айласин, дунё ва охиратимиз саодатига етаклайдиган амаллар қилишимизни насибу рўзи айласин!

Маърифий суҳбат давомида жамоат вакиллари ўзларини қизиқтирган саволларга жавоб олди, якунда эса хайрли дуолар қилинди.

Ўзбекистон мусулмонлари идораси матбуот хизмати

Уламоларимизнинг республикамиз бўйлаб ташрифлари давом этмоқда. Айни пайтда аҳли илмларимиз Қорақалпоғистон Республикаси шаҳар ва туманларида бўлиб туришибди.

Тошкент шаҳар бош имом-хатиби ўринбосари Абдуқаҳҳор домла Юнусов Тахиатош туманидаги “Сариқ эшон” жоме масжидига бориб, пешин намозидан сўнг “Шукроналик – буюк фазилат” мавзусида маъруза қилиб берди.

Дарвоқе, бандаларини ҳамиша ва ҳар қачон шукр қилишга буюрган Аллоҳ таоло, биринчи навбатда, Ўзини шукрни қабул қилувчи деб атади: «Агар шукр қилсангиз ва имон келтирсангиз, Аллоҳ сизларни азоблаб нима ҳам қилади?! Аллоҳ шукрни қабул этувчи ва билувчи Зотдир» (Нисо сураси, 147-оят).

Аслида, биз қанча шукр қилсак ҳам кам. Чунки Раббимиз берган неъматларнинг шукрини тўлиқ адо эта олмаймиз.

Бишр Хофий раҳматуллоҳи алайҳ айтади: «Аъзоларидан фақат тили билан шукр қилган кишининг шукри ноқис бўлади. Чунки кўзнинг шукри бирор яхшилик кўрганда унга қараш, ёмонликни кўрганда, кўзни юмишдир. Қулоқнинг шукри яхшиликни эшитганда ёд олиш, ёмонликни эса унутишдир. Қўлларнинг шукри ношойитса нарсаларни ушламасликдир. Меъда (қорин)нинг шукри ҳалол нарсалар билан озиқланиш, ақл ва қалбнинг шукри эса илм ва ҳилм билан зийнатланишдир. Оёқларнинг шукри эса яхшиликдан бошқа йўлда юрмасликдир. Ким мана шуларни бажарса, ҳақиқий шукр қилувчилардан бўлади».

Дилдан суҳбат ва гўзал мавъиза савол-жавобларга уланиб кетди.

Ташрифлар давом этяпти.

Бугун, 14 сентябрь куни юртимиздаги бир гуруҳ таниқли уламоларнинг Қорақалпоғистон Республикасига ташрифи бошланади.

Сафар давомида маънавий-маърифий учрашувлар, олис ва чекка ҳудудлардаги аҳоли вакиллари билан юзма-юз мулоқотлар, таниқли уламолар ишитирокида жоме масжидларда суҳбатлар ўтказилиши ва эҳтиёжманд оилалар ҳолидан хабар олиш каби хайрли ишларни амалга ошириш мақсад қилинган.

Шунингдек, ҳудуд аҳлини юртимизда бўлаётган ўзгаришлар мазмун-моҳияти ҳақида хабардор қилиш билан бир қаторда, уларнинг дарду ташвишларига кўмаклашиш, фикр-мулоҳазаларини тинглаш ва диний соҳага тегишли муаммоларини жойида ўрганиб, бартараф этиш ҳам кўзда тутилган.

Ушбу сафарга Тошкент шаҳридан қуйидаги уламолар бориши кўзда тутилган:

 Ҳомиджон домла Ишматбеков, Ўзбекистон мусулмонлари идораси раисининг биринчи ўринбосари;

 Иброҳим домла Иномов, Ўзбекистон мусулмонлари идораси раисининг ўринбосари;

 Салоҳиддин домла Шарипов, Ўзбекистон мусулмонлари идораси раисининг маслаҳатчиси, “Ҳазрати Али” масжиди имом-хатиби;

 Яҳё домла Абдураҳмонов, “ВАҚФ” хайрия жамоат фонди раҳбари;

 Алижон қори Ҳайдаров, Ўзбекистон мусулмонлари идораси бўлим мудири;

 Аброр домла Мухтор Алий, Ўзбекистон мусулмонлари идораси масъул ходими;

 Абдуқаҳҳор домла Юнусов, Тошкент шаҳар бош имом-хатиби ўринбосари, “Катта Қозиробод” масжиди имом-хатиби;

 Абдуҳаким қори Матқулов, Тошкент шаҳар “Убай ибн Каъб” масжиди имом-хатиби;

 Акбарали домла Маматов, Тошкент шаҳар Мирзо Улуғбек тумани бош имом-хатиби, “Тепа” масжиди имом-хатиби;

 Шавкат домла Ҳамдамов, Тошкент шаҳар “Тўра бува” масжиди имом-хатиби;

 Раббимқул домла Муҳаммадиев, Тошкент шаҳар “Ракат” масжиди имом-хатиби;

 Салоҳиддин домла Тошонов, Тошкент шаҳар “Яккасарой” масжиди имом-хатиби;

 Муҳаммадраҳим домла Абдуқодиров, Тошкент шаҳар “Доруссалом” масжиди имом-хатиби;

 Абдуллоҳ домла Юлдашев, Тошкент шаҳар Олмазор тумани бош имом-хатиби, “Исломобод” масжиди имом-хатиби;

 Собиржон домла Рустамов, Тошкент шаҳар “Оқилон” масжиди имом хатиби

 Эргашали домла Рустамов, Тошкент шаҳар “Собитхон хожи” масжиди имом-хатиби.

 Қолаверса, ушбу мулоқот ва тадбирларда Президент маслаҳатчиси Шоазим Миноваров, Дин ишлари бўйича қўмита раисининг биринчи ўринбосари Музаффар Комилов ва бошқа мутасаддилар ҳам иштирок этиши режа қилинган.

 Аллоҳ таоло уламоларимиз сафарини хайрли ва манфаатли қилсин!

paziylet.uz | @paziyletuz
#ҚОРАҚАЛПОҒИСТОНга_уламолар_ташрифи
Ўзбекистон мусулмонлари идораси матбуот хизмати
@muslimuzportal | @vaqfuz | @diniysavollar

Инновацион ривожланиш вазирлигида “Ислом молияси асослари ва ҳалол савдо фаолияти" мавзусида семинар ташкил қилинди. Семинарни Ислом тараққиёт банки ва унинг шўъба корхоналарида фаолият олиб бораётган, ушбу соҳада тажрибага эга мутахассислар олиб борди. Унда юздан ортиқ тингловчилар, тадбиркор, ҳуқуқшунос, банк ходимлари ва талабалар қатнашди. Бу ҳақда islom.uz сайти хабар қилди.

Ушбу тадбир Ўзбекистонда бўлиб ўтган Ислом тараққиёт банкининг йиллик анжуманидан сўнг ташкил қилингани соҳага қизиқиш ортаётганини англатади. Семинарда Ислом молиясининг асосий тамойиллари, ундаги тақиқлар, шартномаларга қўйиладиган талаблар, шерикчилик ва савдо-сотиқ қоидалари, Ислом банклари фаолияти ва мусулмон тадбиркорнинг ахлоқи мавзуси батафсил ёритилди.

Тадбирга Ўзбекистон мусулмолмонлари идораси бўлим мудири Муҳаммад Айюбхон Ҳомидов ҳам ташриф буюриб, семинар иштирокчиларига савдо-сотиқ ва молиявий муносабатларда ислом дини талабларини тушунтирдилар, тингловчиларнинг Ислом ва тижорат фиқҳига оид саволларига жавоб бердилар.

Семинар якунида иштирокчилар бу соҳада ўқув курсларини ташкиллаштиришга эҳтиёж катталигини, сабаби Ислом молияси ривожланиши мамлакатимиз тадбиркорларига ниҳоятда зарурлигини таъкидладилар.

Ўзбекистон мусулмонлари идораси матбуот хизмати

Бухоро сафари давомида Ўзбекистон мусулмонлари идораси раисининг биринчи ўринбосари, устоз Ҳомиджон Ишматбеков Бухоро шаҳридаги “Сайфиддин Боҳарзий” жоме масжидига ташриф буюриб, жамоат билан аср намозини адо этгач, йиғилганларга “Яхшиликка буюриш, ёмонликдан қайтариш" мавзусида маъруза мазмунли қилдилар.

Дарҳақиқат, Ислом дини инсонларни, ўзаро ҳамжиҳатликда яшашга тарғиб этади. Бунда эса, инсонларнинг ўзаро самимий муносабатда бўлишлари муҳим ўрин тутади. Динимизнинг бош ғояси насиҳат, яъни самимийликдан иборат бўлиб, аввалда ўтган пайғамбарлар ҳам ўз қавмларига насиҳат қилганликлари ҳақида Қуръони каримда хабар берилган. Масалан, Нуҳ а.с. ўз қавмига хитоб қилар экан: “Сизларга Раббимнинг топшириқларини етказурман ва сизларга насиҳат қилурман...”, деган (Аъроф сураси, 62-оят). Солиҳ а.с. ҳам ўз қавмини азобдан огоҳлантирганида шундай деган: “Эй қавмим! Мен сизларга Раббимнинг топшириғини етказдим, сизларга насиҳат қилдим, лекин (сизлар) насиҳатгўйларни ёқтирмайсиз” (Аъроф сураси, 79-оят). Бошқа пайғамбарларнинг ҳам ўз қавмларига насиҳат қилганликлари ҳақида Қуръони каримда хабар берилган.

Пайғамбаримиз с.а.в. ҳадисларининг бирида марҳамат қиладилар. Тамим ад-Дорий р.а.дан ривоят қилинади, Пайғамбар с.а.в.: “Дин насиҳатдир”, дедилар. Биз: “Кимга? – деб сўрадик. У зот: “Аллоҳга, Унинг китобига, Унинг расулига, мусулмонларнинг имомларига ва мусулмонлар оммасига”, – дедилар (Бухорий ва Муслим ривояти).

Ушбу ҳадис динимизнинг асосини баён этувчи манбалардан биридир. Насиҳатнинг маъноси ўзгаларга нисбатан самимий муносабатда бўлиш, демакдир. Шу маънода Пайғамбаримиз с.а.в. насиҳат кимларга бўлишини бирма-бир санаб ўтдилар.

Масжид аҳли устознинг маърузаларини мароқ билан тинглади, сўнг ўзларини қизиқтирган диний ва илмий қизиқтирган саволларга жавоб олишди. Жамоат устознинг маърузаларидан мамнун бўлди.

Якунда Аллоҳ таолодан она диёримиз тинчлиги, фаровонлигини тилаб, дуои хайрлар қилди.

Аллоҳ таоло уламоларимиз сафарини хайрли ва манфаатли қилсин!

Ўзбекистон мусулмонлари идораси матбуот хизмати