muslim.uz
Ўзбекистонликлар март ойида неча кун дам олади?
Ўзбекистон Республикаси Президентининг 2017 йил 28 декабрдаги “2018 йилда расмий саналарни нишонлаш даврида қўшимча ишланмайдиган кунларни белгилаш ва дам олиш кунларини кўчириш тўғрисида”ги фармонига мувофиқ, Наврўз байрами арафасида юртдошларимиз 18, 19, 20, 21, 22 март кунлари дам олади.
Президентнинг мазкур фармони билан қўшимча дам олиш кунлари берилган ва баъзи дам олиш кунлари кўчирилган эди. Яъни, 20 март қўшимча дам олиш куни сифатида берилиб, 17 март (шанба) 19 март (душанба)га, 24 март (шанба) 22 март (пайшанба)га кўчирилган эди.
Дам олиш кунларининг берилишида фуқароларнинг расмий саналарни нишонлаш даврида тўлиқ дам олиши учун қўшимча шарт-шароитлар яратиш ва байрам кунларидан оқилона фойдаланиш, шунингдек, ички туризмни янада ривожлантириш мақсад қилинган.
Шунга мувофиқ юртдошларимиз 8 Март байрамини ҳам ҳисобга олганда 12 кун дам олади.
Эслатиб ўтамиз, Ўзбекистон Республикаси Президентининг ушбу фармони билан мамлакатимиз фуқаролари Янги йилда 5 кун дам олган бўлса, Мустақиллик байрами муносабати билан ҳам шундай дам олишлар гувоҳи бўлишади.
Манба: http://www.uza.uz/
Савол: Эсдан чиққан қарзни қандай адо қилсам бўлади? "Исҳоқ Муҳаммад"
ЎМИ Матбуот хизмати
Уламолар султони
Ислом тарихида “Султонул уламо”, “Амирларни сотувчи” номи билан машҳур бўлган аллома Изз ибн Абдусалломнинг алоҳида ўрни бор.
Унинг тўлиқ исми шарифи қуйидагича: Абу Муҳаммад Изуддин Абдулазиз ибн Абдусалом ибн Абулқосим ибн Ҳасан ибн Муҳаммад ибн Муҳаззаб Суламий Шофий Дамашқий. У ҳижрий 577 сана, милодий 1181 йилда Дамашқда камбағал оилада таваллуд топди. Оиласининг фақирлигидан у ёшлигида кечалари умавийлар жоме масжидининг шимолий эшиги ёнидаги оҳак хумдонида тунашга мажбур бўлган. Бу ҳақида Имом Субкий отасидан ривоят қилган.
Унинг масжидда истиқомат қилиши ибодат ва илм олишига сабаб бўлган. Шу вақтда умавийлар масжидида кўплаб илм халқлари мавжуд бўлиб, дунёнинг турли жойларидан келган талабалар билан доимо гавжум бўлган. Бу тарихий масжидда тафсир, ҳадис, фиқҳ ва бошқа диний ва дунёвий илмлар ўқитилган. Кўплаб машҳур уламо ва фақиҳлар шу масжидда дарс айтишган. Бўлажак алломанинг биринчи ёд олган китоби Абу Исҳоқ Шерозий қаламига мансуб “Танбеҳ” китоби бўлди. У шаръий ва арабий илмларни баробар ўқиб ўрганди. Тафсир, ҳадис, фиқҳ илмларини ва усулларини, луғат, тасаввуф, наҳв, балоғат, ихтилофлар ҳақида илмлардан замонасининг машҳур имомларидан дарс олди. Ибн Имод Ҳанбалий “Табақоти Шофиия Кубро” китобида бундай ёзади: “Изз Абдуссалом фиқҳ, усул ва арабий илмларда жуда машҳур бўлди. У ўзининг бу соҳадаги тенгдошларидан ўтиб кетди, У тафсир, фиқҳ, ҳадис, олимларнинг турли ихтилофли сўзларини билишда моҳир бўлди ва мужтаҳидлик даражасига етди”.
Аллома Иззуддин Абдуссалом ёшлигининг кўп қисмини Дамашқда ўтказди. Кейинчалик Бағдодга келиб муҳаддислардан ҳадис тинглади. Сўнгра Мисрга борди ва умрининг охиригача Мисрда яшади. У 644 ҳижрий санадан кейин ҳаж қилиш нияти билан Ҳижоз ўлкасига сафар қилди.
Аллома Изуддин Ибн Абдуссалом яшаган замонда фатво чиқариш учун расмий мансаб ва вазифа мавжуд бўлмаган. Биринчи расмий ҳукумат фатволари усмонийлар давлатида вужудга келди. Олдинги асрларда фатво беришга иқтидорли ва салоҳиятли уламолар ўзларининг билимлари, аҳкомларни тўғри идрок этишларига қараб ўзларича бу вазифани адо этардилар. Имом Изуддин Абдуссалом Шом диёрида яшаган даврда фатво берган эди. Уни “Шом диёри муфтийси” деб аташарди.
“Аллоҳ таоло каломи тафсири” атрофида бўлган фитна сабабидан Шом султони Ашраф Мусо уни бу вазифадан озод этгунга қадар унда давом этди.
Бу ишга ҳанафий мазҳаб уламоси, шайх Жамолиддин Хусайрий аралашди ва султоннинг бу ишини маъқул топмади. Натижада султон ўз фикридан қайтди, уни авф этиб, ҳадялар юборди. Изз Абдуссалом султоннинг инъомларни қабул қилмади. Натижада алломанинг шон-шуҳрати атроф ўлкаларда кенг тарқалди.
Аллома Изуддин Абдуссалом турли илмларни пухта ўргангандан кейин илмнинг дарслар айта бошлади. Унинг биринчи айтган дарси Дамашқда бошланган бўлса, охиргиси Қоҳирада бўлди. У Мисрда бўлган вақтда уйида, масжидда ва бошқа кўплаб жойларда илм нурини тарқатди. Ибн Касир шундай дейди: “Талабалар ундан кўп истеъфода қилишди. У Дамашқдаги бир қанча мадрасаларда таълим берди. (Ал Изз ибн Абдуссалом. Қавоид ал Аҳком, 2 жуз, 220-221-бетлар).
Тарихий манбаларда кўрсатилишича, аллома Ибн Абдуссалом мадрасада биринчи бўлиб тафсир илмидан дарс берган. Бу ҳақда Ибн Ибод Ҳанбалий бундай дейди: “У биринчи бўлиб ўз дарсларида тафсирдан дарс берган эди” (Шузурот заҳаб китоби, 5 жуз, 302 бет).
Шайх Изз Абдуссаломни 637 ҳижрий санада султон Солиҳ Исмоил Дамашқдаги умавийлар жоме масжидига имом-хатиб этиб тайинлайди.
Тарихий манбаларда зикр қилинишига аллома, имом Изз Абдуссалом 639 ҳижрий санада Мисрга сафар қилади. Миср султони Солиҳ Айюб унинг алломалигидан хабардор эди. Иттифоқо, унинг Мисрга келиши Миср қозиси Шарофуддин Ибн Айнидавланинг вафотига тўғри келади. Миср султони Солиҳ Айюб уни катта тантана ва ҳурмат-эътибор билан кутиб олади ва қозилар қозиси ҳамда ўша замондаги энг катта ва қадимий бўлган Амр ибн Ос масжидига имом-хатиб этиб тайинлайди.
Миср султони Солиҳ Айюб ўз сиёсий ва ҳарбий мавқеини мустаҳкамлаш ниятида қўшинларини кучайтиради, Марказий Осиё ва унинг ғарбидан кўплаб турк мамлукларни давлат моли ҳисобига сотиб олади. Уларни жангга тайёрлайди. Улар султоннинг ишончига киради, ҳатто айримлари бош қўмондонлик даражасига етишади, улардан бири эса султонга ноиб бўлиш шарафига эришади.
Аллома, Мисрга бош қози этиб тайинлангач салтанатни идора этишдаги айрим хато ва камчиликларни кўрди. Улардан бири амирлар ҳамон қул экани эди. Уларнинг озод этилгани ҳақида бирор ҳужжат мавжуд эмас эди. Шариат ҳукми бўйича эса қуллар бошлиқ бўла олмайди ва ўзларининг ҳаётини тасарруф қила олмайди.
Имом Изз Абдуссалом уларнинг олди-сотди қилиши ва никоҳланиши тўғри эмас, деб эълон қилди. Натижада уларнинг, шу жумладан, султонга ноиб бўлган мамлукларнинг манфатига зарар етди. (Имом Шаъроний, Табақот ал Кубро, 1 жуз, 13-14 бетлар). Бу иш мамлук амирларнинг ниҳоятда ғазабини қўзғади, аммо улар ғазабларини босиб Имом Изз Абдуссалом билан келишиш ва бу масалани чиройли йўллар билан ҳал қилишга ҳаракат қилди. Имом ўз фикрида қатъий турди ва муаммони ҳал этишнинг бирдан-бир йўли уларни қул бозорида кимошди қилиб сотиш, сўнгра озод қилишдир, деди.
Улар бу ҳолдан ниҳоят даражада дарғазаб бўлишди. Бу хабар султон Солиҳ Айюбга етиб борди. Султон Имом Изз Абдуссаломдан фикридан қайтишини ва ўзига тааллуқли бўлмаган ишга аралашмаслигини сўради. Бу гаплар имомга қаттиқ ботди ва бош қозилик вазифасидан истеъфо бериб оиласи билан Қоҳирадан кўчиб кетишини эълон қилди ва дарҳол шаҳардан чиқди. Бу хабар тезда халқ оммасига тарқалди, улар имомнинг ёнини олди ва Имом Қоҳирадан чиқар-чиқмас уламолар, тижоратчилар, солиҳ кишилар ҳатто аёллар ва ёш болалар имомга эргашиб шаҳардан чиқа бошлади. Султоннинг яқинларидан бири унга бундай деди: “Салтанатингни сақлаб қол. Шайх кетиб қолса, мулкинг ҳам кетади”. Султон дарҳол отига миниб шайх, имом Изз Абдуссаломга етишди ва узр сўраб ортга қайтишни илтимос қилди. Аллома амирларни кимошди савдосида сотиш ва сўнгра озод қилиш шарти билан шаҳарга қайтди. У билан бирга бўлганларнинг ҳаммаси шаҳарга қайтди (Шужоат Изз Абдуссалом номли китоб).
Имом шаҳарга қайтгандан кейин кимошди савдоси куни белгиланди ва барча мамлук амирлар бирма-бир ниҳоятда қиммат баҳода сотилди, халқ ҳам бу савдода иштирок этди. Айрим амирларнинг баҳоси жуда кўтарилиб, қимматлашиб сотиб олиш имкони бўлмаганида, султон Солиҳ Айюб ўзининг хос маблағи эвазига сотиб олди. Савдодан тушган маблағни Имом Изз Абдуссалом жам қилди. Барча амирлар сотилгандан кейин Султон уларни озод қилди ва улар ўз хизматларида давом этишди. Имом Изз Абдуссалом йиғилган маблағни мусулмонларнинг умумий манфаатлари йўлига, турли хайрли ишларга сарфлади. Ибн Субкий шундай ёзади: “Аллоҳ раҳм қилсин ва ундан рози бўлсин! Бирон бир киши шундай иш қилгани эшитилмаган эди (Изз Абдуссаломнинг “Мажоз ал Қуръон” китоби).
Уламолар султони Изз Абдуссалом 660 ҳижрий сана, 1262 милодий йилда 83 ёшда Мисрда вафот этди. Имом Изз Абдуссалом чошгоҳга яқин Қоҳира шаҳридаги Муқаттам тоғи этагидаги Қарофа қабристони яқинидаги кўл тарафга дафн этилади. Унинг жанозасини султон Зоҳир Бийбарс ўқиди. Имомнинг жанозасига Миср аҳлининг деярли барчаси иштирок этди (Табақот Шофиия Кубро, 8 жуз, 212-213 бетлар). Султон Зоҳир Бийбарс унинг вафотидан қаттиқ қайғуради ва аллома вафоти ўзининг ҳукмронлиги вақтида бўлганидан жуда афсусланади. Султон бу ҳақда шундай деди: “Лаа илаҳа иллаллоҳ! Шайхнинг вафоти менинг султонлигим вақтида бўлди-я”. Аллома жанозасида амирлар, аъёнлар ва аскарлар иштирок этишди. Султоннинг ўзи тобутни кўтаришди ва дафнда ҳозир бўлди (Табақот Шофиия Кубро китоби, 8 жуз, 212-213 бетлар).
Миср диёрининг барча ўлкаларида, Шомнинг Фрот дарёсигача бўлган барча шаҳарларида Маккаи мукаррама, Мадинаи мунаввара, Яманда, умавийларнинг жоме масжидида ва дунёнинг турли шаҳарларидаги масжидларда алломага ғойибона жаноза ўқилди (Табақот Шофиия Кубро китоби, 8 жуз, 212-213 бетлар).
Аллома Изз Абдуссалом ўзидан бир қанча китоб, рисола ва таснифотлар қолдирган. Аммо бу илмий меросларнинг адади унинг илм ва маърифатига мувофиқ даражада эмас. Шунинг учун ҳам Ёфиъий Яманий буни шундай изоҳлайди: “У китобларидан кўра илми кўп кишилар жумласидан ҳисобланади”. Бунинг сабаби имом Изз Абдуссалом расмий мансаб, халқ хизматида, амру маъруф ва наҳий мункар билан кўпроқ машғул бўлгани билан изоҳланади.
Имом Изз Абдуссаломдан қолган илмий мерослар жумласига унинг тафсири, ҳадис илмида Имом Муслимнинг саҳиҳларининг мухтасари, Тавҳид илмида “Ал Мулихха фи эътиқод аҳли ал ҳақ”, “Алфарқ байнал ислом вал иймон”, “Алғол фи ихтисор ал ниҳоя” (5 жуз), “Мақосид ас солаҳ”, “Мақосид ас савм”, “Маносик ал ҳаж”, “Алфатвойи ал Мисрия”. Усул фиқҳга доир “Қавоъид ал аҳком фи масолих ал аном”, “Ал Имом фи баёни адиллатик аҳком”. Одоб-ахлоқ, таълим ва тарбия, тасаввуф ва зуҳдга доир “Шажаратул маориф вал аҳвол ва солиҳ алақвол ва ал аъмол”, “Мақосид ар риоя ли ҳуқуқиллаҳ”, “Масоил ат тариқа фи илмил ҳақиқа” каби китоблар шулар жумласидандир.
Яқин вақтларда, иншоаллоҳ, эътиборингизга уламолар султони аллома Изз ибн Абдуссаломнинг энг машҳур китобларидан бири “Шажарат ал маориф вал аҳвол ва солиҳ ал аҳвол вал аъмол” китобидан айрим лавҳаларни ҳавола этамиз.
Абдулҳамид ТУРСУНОВ,
Ўзбекистон мусулмонлари идораси раиси маслаҳатчиси
Ота-онага итоат
Ота-она ризолигини топишда, аввало, уларга итоат ва яхшилик қилиш масаласи туради. Итоат ва яхшлик бирга ишлатилса ҳам уларни бир-биридан ажаратиб турадиган жиҳатлари мавжуд, агар алоҳида қилиб ўрганилса уларни тушуниш ҳам амал қилиш ҳам осон бўлади. Чунки итаот бўлмаган жойда яхшилик ҳам бўлмайди, яхшилик деб қилинган иш яхшилик эмас қаршилик бўлиши мумкин. Шунинг учун ҳам биринчи ота-онага итоат қилишнинг мазмун-моҳиятини билиб олишга ҳаракат қиламиз.
Ота ва она – бу дунёдаги ҳеч бир нарса билан тенглаштириб, қиёсслаб бўлмайдиган, инсон фарзанди учун мўътабарларнинг энг мўътабари, азизларнинг энг азизи бўлган инсонлар ҳисобланади.
Оналарнинг ҳеч қандай ажру мукофотсиз, ҳатто, бундай фикру хаёлларга бормасдан, ҳеч иккиланмасдан фарзандларини дунёга келтириб, вояга етгунларича уларнинг беминнат хизматларида бўлишлари ҳаммамизга маълум, бироқ ёзилмаган қоидадир. Инсон фарзандининг бундай ноёб ва қиёси умуман мумкин бўлмаган хислати фақат она номига лойиқ бўлган мўътабар зотига берилган.
Фарзандларини ойлаб она раҳмида олиб юрганлари, туғиш машаққатлари, эмизиш давридаги қийинчиликлар, кечалари ширин уйқуларидан воз кечиб, гўдакларини эмизиш баробарида уларга чексиз меҳр-шафқат кўрсатишларини бу дунёдаги ҳеч бир нарса билан қиёссалб бўлмайди.
Бошқа томонда эса буни илоҳий ҳукм деб, оиланинг моддий таъминотни ҳеч иккиланмасдан ўз зиммасига олган ота, ҳар куни тирикчилик ва уй-рўзғор ташвишида турли машаққат ва таҳликалар билан юзма-юз келиб, фарзандлари роҳати учун ўзларнинг ҳузур-ҳаловатларидан воз кечиб, баъзида ҳаётларини хафв остига қўйб, ҳаётнинг энг оғир синовларини мардларча, сокинлик билан елкаларида кўтариб турадилар. Шунингдек, фарзандалари таълим-тарбияси билан шуғулланиб, Ватани ва халқининг корига ярайдиган инсонлар бўлиб етишлари, илму ҳунарга эга бўлишлари учун бор куч ва ғайратларини сарф этадилар.
Айнан мана шу чексиз фидокорликлари, жасорату матонатлари туфайли ота-онанинг ҳақларини адо этиш мутлақо имконсиз эканлиги келиб чиқади.
Шу сабабдан ҳам ота-онанинг тириклик пайтида хизматларини жону дилдан бажариб, ёшлари улғайганда яшашларига ёрдам бериш, шариатга мувофиқ барча хоҳишларини ўз ўрнида бажариш билан амрларига итоат қилиб, яхшилик қилиш Аллоҳ таоло томонидан бандаларига буюрилган фарз ҳисобланади.
Худди шундай тарзда вафот этиб кетганларидан кейин ҳам уларни хафа қилиб қўймайдиган йўлдан бориб, руҳларига савоблар, садақаларни ҳадия қилиш орқали ҳар доим хотирлаб, яхшиликлар қилиб туриш ҳам фарзандлар учун вожибдир.
Инсон фарзандининг ўз ота-онаси олдидаги Аллоҳ томонидан буюрилган бу каби шарафли мажбуриятлари аслида оддий инсоний фазилатдан бошқа нарса эмаслигини ақл билан идрок этса ҳам бўлади. Зеро, буни қўллаб-қувватловчи бир қанча ояти карималарнинг нозил бўлгани ва ҳадиси шарифларнинг баён этилгани юқорида айтиб ўтилган фикрлар учун далил ҳисобланади.
Ота-онага итоат қилиш, уларга кўрсатган хизматини миннат қилмаслик қатъи фарз бўлганидан, бунинг акси бўлган исён, итоатсизлик, ҳатто, кичик малол келиш ҳам ҳаром бўлиб, катта гуноҳлардан ҳисобланади.
Ҳадис. Расулуллоҳ (соллалоҳу алайҳи ва саллам) бундай огоҳлантирганлар: “Гуноҳи кабираларнинг энг каттаси Аллоҳга ширк келтириш ва ота-онага оқ бўлишдир”. (Имом Бухорий ривояти).
Аллоҳга ширк келтиришдан кейин энг катта гуноҳ бу ота-онага осий бўлишлик экан, бу гуноҳга ва унга олиб борувчи ҳар қандай йўлдан узоқ туришлик, бу масалага ҳар доим диққат билан қараб, буни ҳеч қачон эсдан чиқармаслигимиз керак.
Ҳадис. Расулуллоҳ соллаллоҳу алайҳи васаллам она-ота ҳақида сўралганида марҳамат қилдилар: “У иккови сенинг жаннатинг ва ё жаҳаннамингдир”. (Ибни Можа)
Машруъ бўлган ишларда уларга итоат қилиб, розиликларини топсанг – жаннатинг. Итоатсизлик қилсанг – жаҳаннаминг. Яъни, ота-онага итоат ё итоатсизлик жаннат ёки жаҳаннамга киришингга сабаб бўлади, деб огоҳлантирмоқдалар Сарвари коинот соллаллоҳу алайҳи васаллам.
Бошқа бир ҳадиси шарифда шундай марҳамат қилдилар: “Аллоҳнинг розилиги она-отанинг розилигидир, Аллоҳнинг ғазаби она-отанинг ғазабидадир”. (“Канзул Уммол”, “Тарғиб”, “Кашфул хофаа”)
Ушбу ҳадиси шарифнинг шарҳи бўйича ўз фикрини баён этган фақиҳ Абу Лайс Самарқандий шундай дейди:
“Аллоҳ таоло ота-онанинг буйруқларига риоя этишни Ўзининг ояти карималарида шу қадар кўп билдирганки, бу мажубриятларни бажариш зарурлигини билдиради. Ақл-ҳуши жойида бўлган инсон учун ота-онани ҳурмат қилишни билиш ва бу вазифани бажариш фарздир. Аллоҳ таоло Таврот, Забур, Инжил ва Қуръони карим каби самовий китобларида буни очиқ маълум қилиб турган бўлса-ю, бу қандай қилиб фарз бўлмаслиги керак. Аллоҳ Пайғамбарларига ота-онага ҳурмат кўрсатиш, уларнинг ҳақларини адо этишга буюриб, Аллоҳнинг ризолиги ота-онанинг ризолигида, ғазаби эса уларнинг ғазабларида эканини маълум қилади.”
Ота-онага итотсизлик қилиш, осий бўлиш қанчалик оғир мусибат бўлса, уларга итоат қилиб, кўнгилларини олиш, қалбларини хушнуд қилиш қандайин савобли амал эканини яхшилаб ёдда тутиш лозим.
Шу нарса аниқки, ҳеч бир яхшилик жавобсиз қолмайди. Агар бу яхшилик эҳсон ва эътибор, итоат ва ҳурмат тарзида ота-онага қилинадиган бўлса, ундан олинадиган савоб ва мукофотнинг ҳадди-ҳисоби бўлмайди. Яъни инсон беҳисоб ажру савобга эга бўлади.
Аллоҳ таолонинг энг кўп қайси амалларни яхши кўришлигини яхшиси Расулуллоҳ соллаллоҳу алайҳи васалламнинг муборак сўзларидан билиб оламиз.
Ҳадис. Буюк муҳаддислар Имом Бухорий ва Имом Муслим Ибни Масъуд розияллоҳу анҳудан қуйидаги ҳадисни ривоят қиладилар.
Ибни Масъуд розияллоҳу анҳу Расулуллоҳ соллаллоҳу алайҳи васалламдан:
– Аллоҳ қайси амални энг кўп яхши кўради? – деб сўрадим. Шу жавобни бердилар:
– Вақтида ўқилган намоз!
– Кейингиси қайси амал?
– Ота ва онага қилинган яхшилик…
– Ундан кейингиси-чи?
– Аллоҳ йўлида жиҳод қилмоқ.
Ушбу ҳадиси шарифда ота-онага яхшилик ва хизмат қилиш жиҳод амалидан олдин келаётгани ҳақида хабар берилмоқда. Бу инсонни чуқур тафаккур қилишга ва ҳушёрлик билан ҳаракат қилишга чақирувчи даъватдир. Чунки ота-онага яхшилик ва хизмат қилиш фазилат ва даража бобида намоздан кейинда келмоқда. Биринчи намоз ўқиш, кейин ота-онага итоат ва яхшилик қилиш.
Демак, хайрли амаллар қаторида намоздан кейинги ўринни эгаллаб турган ушбу муҳим вазифа фарзандлар томонидан ҳеч қандай иккиланишсиз, қатъиян бажарилиши шартлигидан далолат беради.
Абдуллоҳ ибн Амр ибн Оссдан (розияллоҳу анҳу) ривоят қилинган қуйидаги ҳадиси шарифда юқоридаги ҳадис маъно жиҳатидан шарҳлаб берилади.
Бир киши Расулуллоҳ (алайҳиссалом)га юзланиб:
“Мен ҳижрат ва жиҳод қилиш учун сизга байъат қиламан. Бунинг савобини эса Аллоҳдан талаб этаман”, деди.
Расулуллоҳ алайҳиссалом: “Ота-онангдан бирорталари тирикми?” дедилар.
У киши:
“Ҳа, икковлари ҳам тирик”, деди.
Расулуллоҳ алайҳиссалом:
“Савобини Аллоҳдан талаб қиласанми?” дедилар.
У киши: “Ҳа”, деди.
Шунда Расулуллоҳ алайҳиссалом: “Унда ота-онанг ҳузурларига бориб, уларга чиройли муомалада бўлиб, хизматларини қилгин”, дедилар. (Муслим)
Мазкур ҳадиси шарифда ота-онага итоат ва яхшилик қилиш, уларга хизмат ва ҳурмат кўрсатишнинг даражаси белгилаб берилмоқда. Юқоридаги ҳадисда ота-онага хизмат қилиш амал бобида жиҳоддан юқорида тургани билдирилган бўлса, кейинги ҳадиси шарифда уларнинг хизматларини астойдил, бекаму кўст адо қилган одам, Аллоҳ йўлида жиҳод қилган инсон каби ажр олишга лойиқ экани маълум қилинди.
Бу ҳадиси шарифни эшитган ҳар қандай ақли соғлом инсон Аллоҳга итоатдан кейин турадиган ота-онага итоат қилишнинг ажру мукофоти бениҳоя юксаклигидан белни маҳкам бойлаб уларнинг хизматларига киришади.
Улуғбек Султоновнинг
"Ота-онага хизмат қилиш
одоблари" китобидан олинди
ЎМИ Матбуот хизмати
ГМО бу – бизнес
Давоми...
“Ҳаммаси очиқ-ойдин китобдадир”
Биринчи Президентимиз 2014 йил Самарқанд ва Тошкентда ўтказилган “Ўзбекистонда озиқ-овқат дастурини амалга оширишнинг муҳим захиралари” мавзуидаги халқаро конференциянинг очилиш маросимидаги нутқида “Генларни модификация қилиш технологиялари, умуман олганда, яхши ниятда юзага келган, яъни ҳосилдорлик ҳажмини оширишга қаратилган. Лекин бундай технологиялар инсон саломатлигига зиён етказмаётгани, ўн ёки йигирма йил ўтгандан кейин салбий оқибатларни келтириб чиқармаслиги аниқ исботланмагунга қадар, мен бу масала билан ҳозир шуғулланаётганларни бу ишларга жуда берилиб кетмасликни тавсия қилган бўлардим. Бунда, ўйлашимча, энг аввало тижорат, ҳатто эгоистик мақсадлар кўпинча устунлик қилади. Менинг шахсий фикрим шуки, бу масала устида ҳар томонлама чуқур ўйлаб кўриш лозим”, деб таъкидлаган эди.
Бинобарин, Европа Иттифоқи, Япония, Хитой, Ҳиндистон, Россия давлатларига ГМО маҳсулотлар муайян чеклашлар билан киритилади. Бундай эҳтиёткорликнинг сабаби аён: ўз мамлакати аҳолисини шубҳали маҳсулотлардан ҳимоя қилиш.
Боз устига ўтган аср сўнгида “Монсанто” бир бизнес ўйин қилиб ҳиндистонлик пахтакор фермерларни касодга учратди. Қарзга ботиб қолган мингдан зиёд фермер ўз жонига қасд қилди. Шундан сўнг Ҳиндистон давлати ва бу ҳодисага гувоҳ бўлган бошқа мамлакатлар ҳам генетик модификация қилинган маҳсулотлар масаласига янада эҳтиёкорлик билан ёндашадиган бўлди.
Кўп ГМОлар фақат бир марта экишга мўлжалланган. Яъни ундан уруғ олиб бўлмайди. Бу – бизнес ҳийла. Шундай қилинса, ўзлари сотаётган ГМОлар нархини йилдан йилга ошириб боравериш учун шароит юзага келади. Шундай ГМОлар борки, улар кейинги авлодда, албатта, аллергия қўзғайди. Масалан, сунъий генетик мутация картошка ёки соя. Лекин бундан барча ГМОлар аллергия қўзғовчи экан деган хулосага келмаслик керак. Уларнинг бу дардга қаршилари ҳам бор. Ерёнғоқ таркибидаги оқсиллар генетик инженерия ёрдамида камайтирилгани айнан ерёнғоққа аллергияси бор одамда ҳам аллергия қўзғамайди. ГМО ўсимликлар чанглаш воситасида ўз ҳамжинсларининг бошқа навларини йўқотиб юборади. Агар ёнма-ён далага ГМО буғдой ва анъанавий буғдой экилса, анъанавий буғдойни ГМО чанглайди, яъни бунинг ҳосили ҳам ГМО бўлиб қолади, уруғи кесилади. Бундан аёнки, ГМО экинларни бир марта сотиб олган давлат яна сотиб олишга мажбур бўлади. Демак, эртами-кеч ГМО уруғлар етиштирувчи компанияларга қарам бўлиб қолади.
Ўзининг нафси учун бутун инсониятнинг ҳаёти билан ўйнашадиган кимсаларнинг хабари берилган мана бу оятларга диққат қилинг:
“Одамлар ичида дунё ҳаётидаги гапи сени ажаблантирадиганлари бор. У қалбидаги нарсага Аллоҳни гувоҳ ҳам қилади. Ҳолбуки, у ашаддий хусуматчидир.
Ва бурилиб кетганда, ер юзида фасод учун ҳамда экин ва наслни ҳалок қилиш учун ҳаракат этади. Ва ҳолбуки, Аллоҳ фасодни хуш кўрмас.(Бақара сурасининг 24-25 оятлари).
“АҚШ ва Аргетинада мингдан ортиқ далаларда трансген ўсимликлар билан анъанавий ўсимликлар ҳосилдорлиги ўрганилиб, ниҳоятда
жиддий тарзда олиб борилган ҳисоб-китоблардан шу нарса маълум бўлдики, ГМО йўли билан яратилган навлардан олинган умумий ҳосил анъанавий усулда яратилган навларда етиштирилган ҳосилдан олти фоизга кам экан. Шунча катта харажатларни мутлақо қопламас экан. Боз устига уларнинг физиологик жиҳатдан сифат кўрсаткичлари мутлақо нотабиий ва ҳатто соғликка жуда ҳам зарарли ҳисобланади” (Абдуқодир Эргашев. Умр дафтарин бир-бир варақлаб... Тошкент, 94-бет). Ана сизга озиқ-овқат танқислигини ҳал қилишдаги лофчи ГМО тарафдорларининг ваъдалари. Биринчи Президентимиз уқтирганидек, бу борада ҳовлиқмалик, шошқалоқлик кетмайди. Етти ўлчаб бир кессак сира ҳам адашмаймиз.
ГМ маҳсулотлари устидан Франция, Германия, Англия, Россияда кўплаб тажрибалар ўтказилган. Синовда бўлган ҳайвонларда руҳий мувозанатни йўқотиш, ўсишдан ортда қолиш, тажовузкорлик, ўпка, жигар, бош мия, ичаклар, буйрак фаолиятининг бузилгани, рак ўсмалари пайдо бўлгани кузатилган. Лекин биокимёвий компаниялар бу тажрибаларнинг бирортасини ҳам тан олаётгани йўқ. Ҳар доим уларнинг тажрибасидан бир камчилик топиб жамоатни чалғитиб юбормоқда. Ҳеч жавоб топа олмаган тақдирда: “Тўғри фойдаланилса зарар қилмайди”, деган важ билан вазиятдан чиқиб олмоқда.
Ҳозирги вақтда Америка Қўшма Штатлари генетик модфикация қилинган маҳсулотларни етиштириш ва истеъмол қилиш бўйича дунёда биринчи ўринда туради. АҚШнинг 80 фоиз озиқ-овқатлари таркибида ГМО бор. Бунинг таъсирида ёппасига семириш касалига чалинган америкаликлар яна биокимёвий компаниялар тузоғига тушиб, улардан семиришга қарши турли-туман дорилар сотиб олаётир. Россияда эса 30-40 фоиз маҳсулот – ГМО. Аммо шугина фоиздаги ГМО ҳам Россияда катта муаммоларни келтириб чиқараётир. Ҳозирги вақтда ушбу мамлакатда беш миллион фарзанд кўра олмаётган, бепушт оила бор. Агар тадқиқотчиларнинг ГМ маҳсулотлари инсоннинг репродуктив саломатлигига жиддий зарар етказади деган тахмини илмий тасдиғини топса, демографик хатар янада ортади. Шунга қарамай, ГМО фаол кириб бормаган макон йўқ ҳозир. Масалан, кока-кола, фанта, нестле ва шу каби маҳсулотлар дунёнинг барча мамлакатларида харидорбоп ва уларнинг барчасининг таркибида ГМО бор.
Энг қизиғи, айрим кишилар фантазия қилиб, чаённинг гени қўшилган буғдойни еяпмиз экан, эртага биздан ҳам заҳарли ниш ўсиб чиқмасмикан? деган хавотирда. Бир қарашда бунинг ҳеч хавотирли жойи йўқ. Чунки одамнинг қиёфаси еган нарсасига ўхшаб қолаверса, одам нималарга ўхшаб қолмайди, дейсиз. Аммо ташқи қиёфада намоён бўлмаган ўзгаришлар инсоннинг ботинида юз берса-чи, руҳиятида заҳарли ниши бор, ҳар сўзидан чак-чак заҳар томиб турадиган одамлар пайдо бўлса-чи. ГМОнинг энг хатарли жиҳати ана шу эмасмикан!
Ер юзи аҳолиси сони ортиб бораверса озиқ-овқат маҳсулотлари етмай қолади, дегани ўта мантиқсиз даъво эканини мақола бошида айтган эдик. Яна шу гапга қайтамиз. Аҳоли кўпайиб борар экан ризқи ҳам ортаверади. Бунга тарихда ўқиганимиз бир мисол: сайёрамиз аҳолиси бир миллион ёки икки миллион бўлган замонларда одамлар ҳозиргилардан яхши еб-ичганми, башанг кийинганми!..
Одамлар кўпайиб кетса, озиқ-овқат танқислиги кучайиб кетади, дея дунё халқини ваҳимага солиб, унинг ортидан ўзларининг зарарли маҳсулотларини тиқиштираётганлар ва уларнинг алдовларига учиб юрган кимсалар Аллоҳ таоло ўзларига бериб қўйган неъматларнинг санаб адоғига ета олармикан! Ета олмайди. Чунки бунинг хабари Қуръони каримда қуйидагича бериб қўйилган:
Ва У сизга барча сўраган нарсаларингиздан берди. Агар Аллоҳнинг неъматларини санасангиз, саноғига ета олмассизлар. Албатта, инсон ўта золим ва ўта ношукрдир (Иброҳим сураси, 34-оят).
Аллоҳ таоло берган неъматларнинг ҳисоб-саноғини билмасдан, унинг шукронасини келтиришга уринмасдан туриб, озиқ-овқат етишмай қолади, дейиш ва Аллоҳ таоло яратган мавжудотларнинг генларини аралаштириб юбориш Унга нисбатан осийликдир.
“Жин ва инсонни фақат Менга ибодат қилиш учунгина яратдим.
Мен улардан ризқ хоҳламасман ва Мени тоамлантиришларини ҳам хоҳламасман.
Албатта, Аллоҳ Ўзи ризқ берувчи, қувват эгаси, шиддатлидир. (Демак, Аллоҳ таоло инсу жиндан ризқ сўрамайди, балки уларга ризқ беради. Аллоҳнинг бирдан-бир ирода қилгани ибодатдир, инсу жинни яратишдан мақсад ҳам шудир. Лекин ибодатдан кимга фойда бор? Ибодат қилувчининг ўзига. Унга икки дунёнинг бахтини ибодат беради)” (Зарийат, 56-57-58 оятлар).
Комил ишонч билан айтиш мумкинки, инсонлар сони кўпайгани сайин, бир калладан икки калла яхши деганларидек, ақли ҳам юксалади, тадбиркорлиги ҳам ортади.. Яшаши учун керакли маҳсулотларни генетик инженерия йўли билан бўлмаса, анъанавий селекция, SRI ва ҳозирча фанга номаълум бўлган бошқа йўллар билан етиштириб, ҳаётий эҳтиёжини таъминлайди. Генетик инженерия эса ҳозирча таъминот манбаи эмас... ҳалокат воситаси бўлиб кўринмоқда.
Биз бандалар эса ҳар хил шайтониё васвасаларга учмасдан ибодатимизга маҳкам бўлсак, ниятни тўғри қилиб меҳнат қилаверсак, Аллоҳ таолонинг Ўзи мана бу оятдаги ваъдасига мувофиқ ризқимизни зиёда қилиб қўяверади: “Аҳлингни намозга амр эт ўзинг унга сабр қил. Биз сендан ризқ сўрамасмиз. Биз сенга ризқ берурмиз. Оқибат тақвоникидир” (Тоҳо, 132).
*****
Интернет саҳифаларида 109 нафар Нобель мукофоти совриндорларининг ГМОни ҳимоя қилиб чиққан хитобномаси эълон қилинди. Улар, тўғрисини айтганда, “Монсанто” компанияси муҳофазасига чоғлангани айнан шу компания номини тилга олганидан кўриниб турибди. Чунки “Монсанто” ген инженерлиги билан шуғулланадиган ягона компания эмас. “Буюк”ларнинг айтишича, шу вақтга қадар ўтказилган кўплаб тадқиқотларнинг бирортасида ГМОнинг зарарли экани тасдиғини топмаган эмиш...
Ҳиндистон молекуляр биология ва биотехнология фанлари асосчиси, аҳолининг тиббий маданиятини юксалтириш ташкилоти – MARCH раиси, Ҳайдарободдаги дунёнинг энг замонавий Тўқималар маркази ва молекуляр биология лабораториясига асос солган П.М.Бхаргава ҳурматли олимлар фикрига зид ўлароқ “Монсанто”нинг табиатга, инсониятга жиддий зарар етказгани, миллионлаб одамларнинг ўлимига сабаб бўлгани боис 16 марта жавобгарликка тортилгани, ҳатто АҚШ ва Ҳиндистон ҳукумати аъзоларини пора эвазига сотиб олмоқчи бўлганини ёзган.
Бунга нима дейсиз!
Дамин ЖУМАҚУЛ
ЎМИ Матбуот хизмати
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.