Ўзбекистон Республикаси Вазирлар Маҳкамасининг 2018 йил 15 февралдаги “Муқаддас қадамжолар, зиёратгоҳлар, масжидлар ва қабристонларни ободонлаштириш  ишларини самарали ташкил этиш тўғрисида”ги 120-сон қарорига мувофиқ ҳудудларда фаолият юритаётган масжидларнинг эски биноларини реконструкция қилиш ва таъмирлаш бўйича “Йўл харитаси” тасдиқланган бўлиб, унга кўра Республика бўйича 159 та масжид тўлиқ қайтадан қурилади.

Тошкент шаҳрида ўн иккита масжид мазкур Дастур доирасида қайтадан қурилмоқда.  

Пойтахтимизнинг Олмазор тумани Хончорбоғ маҳалласидаги “Мевазор” масжиди ҳам 1992 йилда қурилган. Вақтлар ўтиб масжид биноси таъмирталаб ҳолга келиб қолган. Айниқса ўша даврда қиблани аниқлашда бироз хатолик бўлгани сабаб  масжид хонақоҳи қиблага нисбатан ноўрин ҳолатда эди.

Жорий йилнинг 26 март куни тегишли рухсат билан маҳалла аҳлининг саъй-ҳаракатлари асосида масжидни тўлиқ янгидан қуриш ишлари бошлаб юборилди. Бугун 28 июн куни Дин ишлари бўйича қўмита мутасаддилари, Ўзбекистон мусулмонлари идораси раиси муфтий ҳазратлари бошчилигида уламолар мазкур масжидга ташриф буюриб, масжид қурилишига табаррукона ғишт қўйиб бердилар.

Олти сотих майдонда барпо этилаётган масжид лойиҳаси кичик жойдан унумли фойдаланган ҳолда ўзига хос лойиҳа асосида бунёд бўлмоқда. Бинони маълум маънода икки қаватлик дейиш мумкин. Пастки қават яхлит таҳоратхонани ташкил этади. Тепа қаватда асосий хоақоҳ, аёллар учун намозхона, хизмат хоналари барпо этилади. Масжиднинг умумий сиғими 800 кишига мўлжалланган.

Муфтий ҳазратлари қурилиш жараёни билан танишар эканлар, масжид йўл бўйидаги қатор хонадонлар қаторида эканлигини инобатга олиб, биринчи ўринда икки тараф қўшниларни рози қилиш, бино уларга азият етказадиган даражада бўлмаслигини алоҳида таъкидладилар. Қурилишга бош бўлиб турган имом-хатиб, саратон иссиғида меҳнат қилаётган қурувчилар, уларга ҳар тарафлама кўмак бериб, бу савобли ишга ҳиссаси қўшилаётган фидоий инсонлар ҳақларига дуо қилдилар.

Аввалроқ, жорий июн ойининг ўзида пойтахтимиздаги “Сирож солиҳ”, “Эшон Бобохон” масжидлари қурилишига биринчи ғишт қўйилгани ҳақида хабар берилган эди.

Ўзбекистон мусулмонлари идораси Масжидлар бўлими 

27 июнь куни Ўзбекистон мусулмонлари идорасида “Матбуот ва оммавий ахборот воситалари ходимлари куни” муносабати билан ўтказилган байрам тадбири доирасида “Ойлар султони – Рамазон!” мақолалар танлови ғолибларини тақдирлаш маросими бўлиб ўтди.
Қуйидаги танлов ғолиблари диплом ва совғалар билан тақдирланди:
1-ўрин – “Қадр кечасини изланг!” номли мақола муаллифи Нилуфар Саидазиз қизи биринчи даражали диплом ва Ноутбук компьютери билан тақдирланди.
2-ўрин – “Рамазон ойида Пайғамбаримизнинг амаллари қандай бўлган?” номли мақола муаллифи Муҳаммад Али Муҳйиддин иккинчи даражали диплом ва планшет билан тақдирланди.
3-ўрин – “Қадр кечаси фазилатлари” номли мақола муаллифи Ийсохон Яҳё иккинчи даражали диплом ва телефон аппарати билан тақдирланди.
“Ойлар султони – Рамазон!” мақолалар танловида фаол иштирок этган муаллифлар мақтов ёрлиғи ва совғалар билан тақдирланди:
“Рамазон – ёшлар учун айни фурсат!” номли мақола муаллифи Абдуссамиъ Эргашев;
“Кўз қандай рўза тутади?” номли мақола муаллифи Файзуллаев Дониёр;
“Рўзанинг етти буюк фазилати” номли мақола муаллифи Асадуллоҳ Муҳаммад;
“Рўзанинг инсон саломатлигига тиббий фойдалари” номли мақола муаллифи Омонжонов Зикрилло;
“Ифторлик” номли мақола муаллифи Умида Адизова;
“Рамазонда муслима синглимга дил сўзларим” номли мақола муаллифи Одина Сайдахмедова;
“Рамазон ойи ва унинг рўзасининг фазилатлари” номли мақола муаллифи Умарали Абдулғаффор;
“Муборак Рамазон вақтларини қандай ўтказайлик” номли мақола муаллифи Абдулқайюм Комил;
“Ойлар султони – Рамазон” номли мақола муаллифи Ҳайтмурат Ережепов;
“Хуш бор, Рамазон...” номли мақола муаллифи Зумрад Фозилжон қизи кабилар муносиб тақдирланди.
“Ойлар султони – Рамазон!” танлови доирасида Ўзбекистон мусулмонлари идорасининг Наманган ва Самарқанд вилоятлари вакилликлари матбуот хизматлари мақтов ёрлиқлари ва совғалар билан тақдирланди.
Ўзбекистон мусулмонлари идораси раиси, муфтий Усмонхон Алимов ҳазратлари танлов ғолиблари ва иштирокчиларига Аллоҳ таборака ва таолодан ижодларига қут-барака тилаб, мазкур тақдим этилган совғалар рамзий экани ва олий мукофот Жаноби Ҳақ таолонинг ҳузурида тақдим этилишини сўрадилар.

Ўзбекистон мусулмонлари идораси Матбуот хизмати

27 июнь куни Ўзбекистон мусулмонлари идораси раиси, муфтий Усмонхон Алимов ҳазратлари “Матбуот ва оммавий ахборот восита-лари ходимлари куни” муносабати билан барча ижодкорларни муборакбод этдилар. 

Ушбу байрам тадбирида телевидения, радио, босма ва электрон нашрлар ходимлари, журналистлар, сайт юритувчилари, блоггерлар ва таҳлилчи-шарҳловчилар иштирок этди.

Муфтий Усмонхон Алимов ҳазратлари мана шундай ижод аҳлини бир жойга жам қилиб, Ислом дини маърифатини кенг ёйиш ва ижобий ўзгаришларни халқимизга етказишда мўмин-мусулмонлар манфаати, дин ғами ва Ватан тақдирини юрагидан ўтказиб ишлайдиган ижод аҳлининг даъваткор сўзи, ибратли фаолияти таҳсинларга лойиқ эканини алоҳида қайд этдилар. 

Бугунги тезкор замонда блоггерлар воқеа-ҳодисаларни ёритишда жуда ҳам тезкор бўлаётганлари учун ташаккур айтиб, улар жараёнларни ёритишда холисликни асос қилиб, хабарларни чиройли услубда ёртишни ва берилган имкониятлардан кенг фойдаланишни муфтий ҳазратлари тавсия этдилар.

Ҳозирги мураккаб замонда халқимизни рўйи-рост маълумот билан таъминлашда блоггерларнинг ўрни ва масъулияти ҳар қачонгидан ҳам ортиб бораётгани, айниқса, журналист ва блоггерларнинг жамиятимиздаги диний-маърифий воқеаларнинг аҳамиятини очиб бериш, тараққиётимиз йўлида тўсиқ бўлиб турган муаммоларни дадил кўтариш, мавзуга холисона ва ҳаққоний ёндашиш каби миллий матбуотимизнинг асосий мезонларига доимо амал қилиш лозимлиги таъкидланди.

Муфтий Усмонхон Алимов ҳазратлари қалам аҳлининг меҳнатини нақадар машаққатли эканини тўла англаган ҳолда, уларнинг саъй-ҳаракатларини доимо қўллаб-қувватлашга тайёр эканлари, уларни энг яқин ёрдамчи, деб билишлари, шунингдек, барча ижодкорларга, жумладан, танқидий-таҳлилий йўналишда меҳнат қиладиган муаллифларга ҳам алоҳида эътибор қартишларини ҳамда Диний идора ҳар қандай масалада яқиндан ҳамкорлик қилишга тайёр эканини маълум қиладилар.

Байрам тадбирида турли йўналишлар бўйича ўтказилган танловлар якунлари бўйича бир гуруҳ ижодкорлар тақдинланди.

 Бугун, телеканаллар ва интернет тармоқларини кузатсангиз, ундаги материалларнинг аксарияти кулги ва кулдиришга қаратилганини гувоҳи бўласиз. Касби қизиқчилик ва масхарабозлик бўлганлар четда қолиб, туппа-тузик йигитлар, қизлар, энг аянчлиси ёши катта отахону онахонлар ҳам ўзларининг бачкана қилиқлари, бемаза гаплари ва тутириқсиз сўзлари билан “машҳурлик” илинжида томошабинларни кулдираман деб, бор кучлари билан ҳаракат қилаётгани ақли расо одамларни жиддий ўйга толдиради.

Уларнинг бирортасига насиҳат қилмоқчи бўлсангиз жавоблари ҳам тайёр: “Ҳар ким хоҳлаган ишини қилади, сенинг нима ишинг бор...”. Аслида менинг ишим бўлмасди агар диндош, ватандош ва миллатдош бўлмаганимда. Чунки, бу “қизиқчи”ларнинг қилаётган ҳаракатлари ҳали онги ва ақли тўлиқ ривожланмаган, таҳлил қилиш қобилати паст ўсмирлар, ёшлар ва фарзандларимизнинг руҳиятига ҳам таъсир ўтказиб, тақлид қилиш кайфиятини уйғотмоқда.

Ачинарли ва инсонни ҳушёр тортирадиган жиҳати, бу “қизиқ”чилар кулдираман деб шарм-ҳаёсиз, уят гаплардан ҳам ошиб ўтиб миллатимизнинг энг улуғ қадрияти бўлган динимиз қоидалари ва исломга оид мавзуларни ҳам ҳазил-мазаҳга аралаштирмоқда. Бу инсонлар ўз жонларига зулм қилиб, охират азобини ўзлари учун танлаб олаётганлигини билишармикан?   Аллоҳ таолони шариати – инсонлар унга амал қилиб, охират саодатига эришишликлари учун юборилгандир. Аллоҳ таолонинг шариати – ўйин эмас! Асло бу мавзуларни қўшиб қизиқчилик қилиб бўлмаслигидан хабарлари бормикан?       

Ибн Аббос розияллоҳу анҳодан ривоят қилинди: “Ким-ки кулиб гуноҳ қилса, у йиғлаб дўзаҳга киради”.

Пайғамбаримиз соллаллоҳу алайҳи васаллам айтадилар: “Ёлғон гапириб, одамларни кулдирган кимсага вайл бўлсин, вайл бўлсин, вайл бўлсин!”

Аллоҳ таоло айтади: “Бас, ўзлари касб қилган нарсалари жазосига озгина кулсинлар, кўп йиғласинлар”. (Тавба сураси, 82-оят).

Иброҳим Ан-Наҳоий айтадилар: “Киши гапириб, атрофдагиларни кулдиради. Бу калима билан Аллоҳ унга ғазаб қилади. Унга Аллоҳнинг ғазаби бўлади. Бу ғазаб унинг атрофдагиларни умум қилади (қамраб олади). Киши бир сўз айтади, Аллоҳ ундан рози бўлади. Унга ва атрофдагиларга раҳмат етади”.

Табассум ҳам кулгининг бир тури, енгил шакли ҳисобланади. Динимизда кулгининг ушбу тури қаттиқ тарғиб қилинган ва ҳатто ибодат даражасига кўтарилган. Расулуллоҳ соллаллоҳу алайҳи васаллам ўзларининг бир ҳадисларида: «Биродарингнинг юзига табассум билан боқишинг ҳам садақадир», деганлар. У зот бу борада ҳам барчага ўрнак эдилар.

Биз ҳеч қачон самимий ва ҳотиржам кулгини қораламаймиз. Аксинча буни набавий суннат дея тарғиб этамиз. Аммо, юқоридаги каби ислом шариати ва аҳкомларига тегишли мавзуларни латифага айлантириб нон топаётган ва болаларини боқаётган “қизиқчи”ларга бу ишингизни тўхтатинг, ўзингизни зарарингизга ишламанг деймиз.

Шу ўринда таъкидлаш жоизки айрим масхарабозлар ва улардан таркиб топган жамоалар машҳур бўламан, мухлис орттираман деб, тап тортмай инсонлар шани ва обрўсини тўкишни ҳам одат қилишяпти. 

Расулуллоҳ соллаллоҳу алайҳи васаллам айтдилар: «Мусулмонга мусулмоннинг номуси, моли ва қони ҳаромдир. Тақво шудир. Мусулмон биродарини ҳақорат қилиши кишининг ёмонлигига етарли далилдир» (Термизий ривояти).

Хулоса шуки, миллатни, жамиятни, халқни маърифатга, маънавиятга, юксак маданиятга тарғиб қилишга ақлингиз, савиянгиз ва имкониятингиз етмаса, яхшиси салбий таъсир ҳам кўрсатманг.

Саидаброр Умаров  

Саудия Арабистони Фаровонлик бош бошқармаси Қуръони карим ва азоннинг энг яхши тиловати танловининг биринчи босқичида 162 та мамлакатдан 13 минг вакил иштирок этганини маълум қилди. Бу ҳақда Ислом.уз интернет нашри хабар берди.

Ал-Рияд гезтасининг хабар беришича, танловга қатнашиш ҳақида 2019 йил 22 май куни эълон берилган эди. Шу кунгача 162 мамлакатдан 13 минг киши қатнашган ва танловнинг биринчи босқичи 22 июлгача давом этади. Мазкур босқичда иштирок этмоқчи бўлганлар ўзларининг Қуръони карим тиловати ва азон ўқишлари файлини quranathanawards.com. сайтига юбориб, араб ва инглиз тилларида батафсил жавоб олишлари мумкин.

Танловнинг иккинчи босқичи 24 июлдан 23 августгача бўлиб ўтади. Шундан сўнг навбатдаги босқичга ўтган номзодлар 24 августдан 24 сентябргача ҳакамлар олдида тиловат қиладилар. Танловнинг финал босқичи эса 25 сентябрдан 25 октябргача бўлиб ўтади.

Талов ғолиблари мукофотининг умумий қиймати 12 млн риал (3,2 млн. АҚШ доллари)ни ташкил этмоқда. Талов қўмитасининг маълум қилишича, тадбирни ташкил этишдан мақсад ислом дунёсининг маданий ранг-баранглигини дунёга кўрсатиш, ёш ислом авлодини Қуръони Каримнинг чиройли тиловатига даъват қилиш ва улар орасидан энг яхши тиловат эгаларини кашф этишдан иборатдир.

Ўзбекистон мусулмонлари идораси Матбуот хизмати