muslim.uz
Фаол имом-хатиблар тақдирланди
Бугун, 26 декабрь куни Фарғона вилояти вакиллигида тадбир бўлиб ўтди. Унда вилоят бош имом-хатиби Убайдуллоҳ домла Абдуллаев бошчилигида бир гуруҳ уламо ва аҳли илмлар ҳамда соҳа ходимлари жам бўлишди.
Тадбирда жорий йил давомида аҳли илмлар томонидан амалга оширилган хайрли ишлар зикр қилиниб, келгусида бунданда катта ютуқларга эришиш, муқаддас динимиз софлигини асраш йўлида янада ғайратли бўлиш зарурлиги қайд этилди.
Тадбирда қатнашган вилоят ҳокими ўринбосари Б.Кулдашев имом-хатибларга ташаккур билдириб, доимо фаол бўлишга чақирди.
Шунингдек, тадбирда ижтимоий-маънавий муҳит барқарорлигини янада мустаҳкамлаш, соф Ислом маърифати, хусусан, Ҳанафийлик мазҳаби ва Мотурудийлик таълимоти асосида келажак авлодни тарбиялаш, динимизга ёт бўлган сохта ақидалар ва радикаллашувни олдини олишда самарали фаолият олиб борган бир гуруҳ аҳли илмлар тақдирландилар.
Фарғона вилояти вакиллиги Матбуот хизмати
Саудия Арабистони – Ўзбекистон қўшма қўмитаси олтинчи йиғилиши
“SPA” ахборот агентлиги Ар-Риёд шаҳрида бўлиб ўтган Саудия Арабистони – Ўзбекистон қўшма қўмитаси олтинчи мажлиси тафсилотини батафсил ёритди.
Мақолада Саудия Арабистони инвестициялар вазири Холид бин Абдулазиз Ал-Фолиҳ “Ўзбекистон-2030” стратегияси ва Қиролликнинг 2030 йилга мўлжалланган истиқболи ва Миллий инвестиция стратегиясида белгиланган мақсадлар мувофиқ келиши таъкидланган, Саудия – Ўзбекистон ишбилармонлар кенгаши саъй-ҳаракати ҳар томонлама қўллаб-қувватланиши урғуланган. Шунингдек, икки давлат хусусий секторларини бирлаштириш муҳим аҳамият касб этиши, мазкур учрашувда ҳамкорликнинг аниқ йўналишларига эътибор қаратилиши қайд этилган.
Муаллиф Ўзбекистонда умумий қиймати қарийб 31 миллиард долларлик 50 та инвестиция ташаббуси илгари сурилгани, ушбу лойиҳалар “Ўзбекистон-2030” стратегияси мақсадлари доирасида назарда тутилган 110 миллиард долларлик хорижий инвестиция жорий этилишини таъминлашига тўхталган.
Томонлар энергетика, қайта тикланадиган энергия, соғлиқни сақлаш, инфратузилма, қишлоқ хўжалиги, инсон ресурсини ривожлантириш соҳаларида қўшма лойиҳаларни йўлга қўйиш, бунинг учун зарур сармоя киритиш бўйича эришилган ютуқларни юқори баҳоладилар.
Учрашув якунида қўмита олтинчи йиғилиши баённомаси имзоланди. Мазкур ҳужжат асосида кўплаб қўшма ташаббус, дастурлар, шунингдек икки мамлакат хусусий сектори ўртасида қатор англашув меморандумлари имзоланди.
Муҳаррама Пирматова, ЎзА
Амаллар ниятларга боғлиқ
Ишдан чарчаб келган Муҳаббат қизи пиширган маставани қўлига оларкан, кучли ҳорғинлик сабаб уф тортди. Ғофур ака аёлининг кўнглини олиш ниятида:
– Хотин, иссиққина маставани ичиб ол, чарчоғинг кетади, – дея илтифот кўрсатди.
Муҳаббат қўлидаги косани қайта-қайта кавлаб:
– Эй Худо, қани эди ғайбингдан бир коса қаймоқ ато этсанг! Бирам қаймоқ егим келяпти, – деб ғудраниб қўйди. Уни турмуш ўртоғи қанчалик эъзозлаши унга қилаётган муомаласидан ҳам кўриниб турарди.
– Бугун кеч бўлди-да, хотин, айтсанг, келтириб қўярдим. Сен маставани ичиб ол,
жуда ҳам мазали бўлибди. Эртага нонуштага қаймоқ топиб келаман, – деди эри овқатланишдан бир зум тўхтаб.
– Майли, дадаси, энди Аллоҳга бир илтижо қилгим келди-да, – деди Муҳаббат.
Аёл барибир маставани ичмади. Овқатнинг мойи кўпроқ, тузи пастроқ бўлганини баҳона қилиб, бир-икки қошиқ тотинди-да,
косани суриб қўйди.
Ғофур ака хотинининг кайфиятини кўтариш мақсадида ҳовлининг орқа томонидаги қурилишни томоша қилишга эргаштириб борди ва:
– Кел, онаси, йигитлар билан қилган ишларимизга қара, қандай чиройли чиқди,
– деб мақтана бошлади.
– Чиройли чиқибди, аммо сабрим чидамаяпти-да, дадаси, буларнинг томини қачон ёпасиз?! Ҳадемай қор ёғиб қолади. Бир жала қуйиб берса, шунча қилинган меҳнат
бир пул, – дея яна битта муаммони топишга улгурди Муҳаббат. – Эй Художон, Ўзинг
қўлла, шу айвонларнинг томини бирдан шиферлаб олайлик, Ўзинг ғойибдан ато эт!
...Қаттиқ уйқуга кетган аёл бехосдан тақиллаб кетган овоздан чўчиб уйғонди.
Тун ярмидан оққанда кучли шамол турди.
Ҳовли юзида қолган челак, тоғора ва бошқа буюмларни ирғита бошлади. Зим-зиё
тунни дафъатан пайдо бўлган бўрон янада қўрқинчли қилганди. Бу ҳам етмагандек,
дўл ёға бошлади.
Ҳаммаси қўрқиб кетди. Чунки биринчи марта бундай офатга дуч келишлари эди.
Кўчага чиқиш ҳам, уйда ўтириш ҳам хатарли эди.
Қўрқув ичида қолган аёл шу чоқда ҳомиладор қизини эслаб қолди. Юрагини хавотир буткул эгаллаб олди. Болаларини бағрига босиб, яна нола қила бошлади:
– Эй Аллоҳ, табиий офатнинг ёмон оқибатларидан Ўзинг асра!
Сўнг жойнамозни ёзиб, икки ракат намоз ўқиди, Аллоҳдан ҳамма-ҳаммани бўрон балосидан сақлашини сўради.
Бўрон кўп ўтмай тинди. Ғофур ака кўчага чиққанди, бўрондан маҳалласидаги ҳамма қўшнилари, ўзлари ҳам талафот кўргани аён бўлди. Кимнингдир уйи ярмигача қулаб тушганди. Йигирмага яқин ҳовлининг том қисмини бўрон учириб кетган, симёғочлар бир тарафда, томлардан учган шифер бўлаклари бир тарафда сочилиб ётарди.
Уларнинг ҳам томи бутунлай кўчиб, газ қувури қўпорилиб кетган эди. На газ, на электр қолганди. Устига-устак, ҳавонинг авзойи яна бузилди ва энди қор аралаш ёмғир ёға бошлади.
Совуқ ва қоронғи хонада тонгни кутишларига тўғри келди. Иссиққина маставадан нолиган Муҳаббат ўзининг ношукрлигидан уялиб кетди.
Ҳозир эса ҳатто чой қайнатишнинг ҳам имкони
йўқ эди.
Бирдан қўлтелефони жиринглаб, қизи Зилоланинг хавотирли овози эшитилди:
– Алло, ассалому алайкум! Ойижон, яхшимисиз?
Шамол бўлдими сизларда ҳам? Тинчмисизлар?
– Ва алайкум ассалом! Қизим, ўзинг яхшимисан? Қўрқмадингми?
– Йўқ, ойижон! Ҳаммамиз ухлаб қолиб, шунча
ғала-ғовурни сезмабмиз ҳам.
– Хайрият, – деди Муҳаббат қувониб, – бир ношукр бандасининг ноласини шунчалар инобатга
олган Раббим шукр қилувчиларга қанчалар бахт
ато этар экан?! – деб ўйлади.
Бир зумда куёви ва қудалари етиб келишди. Вазиятни кўрган қудалари уларни уйга олиб кетди.
Муҳаббат бўлган воқеаларни сўзлаб бераркан, не кўз билан кўрсинки, қўлида бир коса қаймоқ кўтариб қизи Зилола кириб келди.
Эр-хотин бир-бирига қараб қолди.
– Ниятни тўғри қилиш керак, онаси! – деди Ғофур ака. – Мана сенга ғойибдан қаймоқ!
Уйларига қайтиб келишганда Ғофур ака не кўз билан кўрсинки, шамол асосий бинонинг томини кўтариб, янги қурилган айвоннинг устига қўндириб қўйган эди!..
Одина ТЎРАҚУЛОВА,
Учқудуқ тумани бош имом-хатибининг
хотин-қизлар масалалари бўйича ёрдамчиси
"Мўминалар", 4-сон, 2023 йил
Неъматларни борлигида қадрлайлик!
Ҳабибуллоҳ домла Зокиров,
Сирдарё вилояти бош имом-хатиби
“ЯНГИ ҲАЁТ УЧУН, ЯНГИ ЎЗБЕКИСТОН УЧУН!”
Шу йил 22 декабрь куни муҳтарам Президентимиз раислигида ўтказилган Республика маънавият ва маърифат кенгашининг кенгайтирилган йиғилишида берилган топшириқлар ижросини таъминлаш юзасидан мамлакатимиз миқёсида “Янги ҳаёт учун, Янги Ўзбекистон учун!” деган шиор остида зиёлилар, илм-аҳллари ва кенг жамоатчилик иштирокида маънавий-маърифий тадбирлар бошланди.
Бугун, пойтахтимиздаги Адиблар хиёбони, “Наврўз” тўйхонаси, Уч тепа тумани ҳокимияти каби масканлардаги бўлиб ўтган тадбирларда Ўзбекистон Республикаси Президентининг дин ва миллатлараро муносабатлар масалалари бўйича маслаҳатчиси Музаффар Комилов, Ўзбекистон мусулмонлари идораси раиси, муфтий Шайх Нуриддин Холиқназар ҳазратлари, Республика Маънавият ва маданият маркази раҳбари, сенатор Минҳожиддин Мирзо каби зиё аҳллари иштирок этдилар.
Тадбирда сўзга чиққан нотиқлар бугунги мураккаб даврда халқимизнинг миллий манфаатларини асраб-авайлаш, тинч ва осуда ҳаётни сақлаш, дунёнинг айрим нуқталаридаги нотинч вазият туфайли инсонлар азият чекаётгани, ана шундай бир шароитда юртимизда хавфсизлик, миллатлараро тотувлик ва диний бағрикенгликни таъминлаш ҳар қачонгидан ҳам долзарб аҳамият касб этаётганини таъкидладилар. Шунингдек, ушбу мавзулар Қуръони карим оятлари, ҳадиси шарифлар ва ибратли воқеалар асосида таъсирчан баён этилди.
Тадбирда диёримизнинг тинчлигига ўз навбатида давлатимиз раҳбарининг бу соҳада олиб бораётган саъй-ҳаракатлари ҳам муҳим омил экани, бу дунёда Ватандан азизроқ макон йўқлиги, у билан фахр-ифтихор туйиш, жадид боболаримизнинг миллий давлатчиликка қўшган ҳиссаси, илм-маърифатга берган эътиборлари ҳақида сўз юритилди.
Истиқлол шарофати билан ижтимоий, маънавий ва диний қадриятларнинг қайтадан тикланиши ва ривожланиши учун кенг йўл очилгани, ҳурлик бизга ўзлигимизни қайтаргани, дину диёнатимизни тортиқ этгани, эркин эътиқод ва ибодат қилишимизни таъмин этгани алоҳида қайд қилинди.
Имом Бухорий, Имом Термизий, Маҳмуд Замахшарий каби улуғ мутафаккир ва алломаларнинг бой мероси, уларнинг илм-фан тараққиёти ривожига бебаҳо ҳисса қўшганлари ҳаётий мисоллар билан эътироф этилди.
Бир сўз билан айтганда, Янги Ўзбекистондаги кенг кўламли ислоҳотлар ҳар бир фуқаронинг миллий ва диний асрий орзу-умидлари рўёбга чиқишига мустаҳкам асосдир. Қувонарлиси, бугунги озод ва обод юртимизда миллий қадриятлар ҳам, диний қадриятлар ҳам сайқал топаётганини ҳар қанча эътироф этсак, шукрона келтирсак арзийди.
Тадбирлар доирасида маънавий-маърифий китоблар, миллий ҳунармандчилик намуналари ва видеолавҳалар намойиш этилди.
ХОРИЖДАГИ ЮРТДОШИМ САҲИФАСИ
КОНЦЕПЦИЯ
Дунё дарвозалари янада кенгроқ очилиб, хорижий давлатлар фуқароларининг юртимизга келиб-кетишларига қулай шароитлар яратилмоқда. Жумладан, 39 та давлат фуқароларига туристик визаларни расмийлаштириш тартиби соддалаштирилди, Ўзбекистон билан визасиз давлатлар сони кўпайди.
Шунинг баробарида бизнинг юртдошларимизнинг ҳам хорижий давлатларга чиқиши ортмоқда.
Одатда, чет элга, умуман, йўлга чиқаётган ҳар қандай йўловчига олдиндан йўловчилик машаққатини тортган, бу борада бой тажриба тўплаган кишилар; китоб кўрган олиму уламолар йўл-йўриқлар кўрсатиб, панду наисҳатлар қилишган. Зеро, нотаниш манзиллар сари сафарга отланган кишиларга бундай тавсияю насиҳатларнинг аҳамияти жуда ҳам катта.
Бинобарин, хорижга чиқаётган мўмин-мусулмонлар ушбу сафарида давлатнинг қонунларига амал қилгани каби шариатимиз кўрсатмаларига ҳам амал қилмоғи ниҳоятда муҳимдир.
Масаланинг ана шу жиҳатлари эътиборга олиниб, muslim.uz Интернет порталида “Муҳожир ватандошлар” лойиҳаси иш бошлади. Ушбу лойиҳа доирасида янги рукн очилиб “Хориждаги юртдошим” номланди.
Ушбу рукнда:
- хорижда таълим олаётган, меҳнат қилаётган, узоқ муддатга даволанишга кетган ватандошларимиз тўғрисида ҳаётий мақолалар;
- йўлга чиқувчиларга тавсиялар, маслаҳатлар;
- узоқ муддатли сафарларнинг ижтимоий ҳаётга, оилавий масалаларга таъсири ва бошқа долзарб муаммоларга доир савол-жавоблар дастурий равишда ёритилади;
- Интернет сайтда эълон қилинган мақоланинг аудио формати ҳам тавсия қилинади.
Ушбу материаллар оят, ҳадис ва уламоларимизнинг илмий меросларига асосланган ҳолда ёритилади.