www.muslimuz
Диний-маърифий даврий нашрларни етказиб бериш бўйича тендерда иштирок этинг
“Мовароуннаҳр” нашриёти юртимиз мусулмонлари эътиборига ҳар йили икки миллиондан ортиқ ададдаги газета ва журнал маҳсулотларини тақдим этиб келмоқда. Ушбу нашриётда Ўзбекистон мусулмонлари идорасининг нашрлари - “Ҳидоят” ва “Мўминалар” журналлари ҳамда “Ислом нури” газетаси чоп этилади.
Чоп этилган маҳсулотларни ўз вақтида юртимиз мусулмонларига етиб боришини таъминлаш тизимини яхшилаш мақсадида нашриёт томонидан етказиб берувчи тадбиркорлик субъектларини танлаш бўйича тендер эълон қилди.
“Мовароуннаҳр” нашриёти 2019 йилда Тошкент шаҳар ва Тошкент вилоятининг шаҳар ҳамда туман марказий масжидларига, Қорақалпоғистон Республикаси ва республикамизнинг барча вилоятлар марказига арзон ва тез етказиб бериш имкониятига эга бўлган матбуот тарқатувчи юридик шахсларни ҳамкорлик қилишга таклиф этади.
Тендер 2019 йил 10 январь куни соат 14:00 да “Мовароуннаҳр” нашриётида ўтказилади.
Етказиб берувчига қўйиладиган талаблар:
“Ҳидоят” журнали ҳар ойда бир марта 100 000 (бир юз минг) дона;
“Мўминалар” журнали ҳар чоракда бир марта 50 000 (эллик минг)дона;
“Ислом нури” газетаси ҳар ойда икки марта 40 000 (қирқ минг) донани белгиланган манзилларга 48 (қирқ саккиз) соат ичида етказиб бериш.
Мурожаат учун телефон: +99871-227-34-30; +99871-240-08-23
Диний-маърифий даврий нашрларни чоп этиш бўйича тендер эълон қилинади
Ўзбекистон мусулмонлари идораси ҳузуридаги “Мовароуннаҳр” нашриёти бугунги кунда юртимиз мусулмонлари эътиборига ҳар йили 2 миллиондан ортиқ ададдаги газета ва журнал маҳсулотларини тақдим этиб келмоқда. Юртимиз ва жаҳонда юз бераётган хабар ва янгиликлар, диний ҳамда маърифий мавзудаги мақолалар фуқароларимиз томонидан севиб мутолаа қилинмоқда.
2019 йилда “Мовароуннаҳр” нашриёти фаолиятини тубдан ривожлантириш, замонавий талабларга мос келадиган технологиялар асосида чоп этишни таъминлаш мақсадида нашриёт томонидан тадбиркорлар ўртасида тендер лойиҳасини эълон қилинди.
Ўзбекистон мусулмонлари идорасининг нашрлари - “Ҳидоят” ва “Мўминалар” журналлари ҳамда “Ислом нури” газетасини 2019 йилда жаҳон стандартларига мувофиқ, замонавий усулда арзон ва сифатли чоп этиш имкониятига эга бўлган босмахоналарни ҳамкорлик қилишга таклиф этади.
Тендер 2019 йил 10 январь куни соат 10:00 да “Мовароуннаҳр” нашриётида ўтказилади. Тендерда иштирок этишни истаган томонлар қуйидаги телефон рақамлари билан боғланишлари талаб этилади.
Мурожаат учун телефон: +99871-227-34-30; +99871-240-08-23
Тендер иштирокчиларига қўйиладиган талаблар:
1. “Ҳидоят” журнали.
Бичими – 60х84 1/8;
Муқоваси – Мел. (150 гр), 4+4;
Ҳажми – 32 бет;
Матн – офсет қоғоз (70 гр),4+4.
Адади – 100 000 (бир юз минг) дона.
Чоп этиш муддати – 5 (беш) кун.
Эслатма: Журнал ҳар ойда 100 000 (бир юз минг), бир йилда жами 1200 000 (бир миллион икки юз минг ) нусхада чоп этилади.
2. “Мўминалар” журнали.
Бичими – 60х84 1/8;
Муқоваси – Мел. (130-150 гр), 4+4;
Ҳажми – 32 бет;
Матн – офсет қоғоз (70 гр),4+4.
Адади – 50 000 (эллик минг) дона.
Чоп этиш муддати – 5 (беш) кун.
Эслатма: Журнал ҳар чоракда 50 000 (эллик минг), бир йилда жами 200 000 (икки юз минг ) нусхада чоп этилади.
3. “Ислом нури” газетаси
Бичими – 60х84 1/8;
Ҳажми – 16 бет;
Матн – 4+4, офсет қоғоз (65-70 гр,);
Адади – 40 000 (қирқ минг) дона.
Чоп этиш муддати – 3 (уч) кун.
Эслатма: Газета ҳар ойда 2 марта 40 000 (қирқ минг), бир йилда жами 960 000 (тўққиз юз олтмиш минг ) нусхада чоп этилади.
Хитойлик энг бой одамнинг мулоҳазалари
Агар маймунларнинг олдига пуллар ва ёнғоқлар қўйилса, маймунлар ёнғоқларни танлайди. Чунки улар пулга жуда кўп ёнғоқлар сотиб олиш мумкинлигини билмайди.
Худди шу ишни кўплаб инсонларга қўлладим. Уларнинг олдига бир лойиҳа ва маош олиб ишлаш ихтиёрини қўйдим. Уларнинг жуда кўпчилиги маош олиб ишлашни танлашди. Чунки улар битта лойиҳани амалга ошириш орқали бир ойлик маошдан кўра анча кўп пул топиш ва яшаш тарзини ўзгартириш мумкинлигини билишмайди.
Одамларнинг камбағал бўлишларига сабаб бўладиган нарсалардан бири — турли бизнес лойиҳаларини ишга солиш, улар натижа бергунича сабр қилиш, лойиҳалар билан ишлашдек қулай фурсатни қўлдан бермасликни ўрганмаганларидир. Улар мактаб ва олийгоҳларда «Ишга бориб ишлаш маош олиш учундир» деган нарсани ўрганишган. Улар ўзлари учун ишлашни эмас, бошқалар бой бўлиши учун ишлашни, бировларнинг қўлида ишлашни ўрганишган, холос.
Тўғри, ойлик маош сизни фақир бўлиб қолмаслигингизга сабаб бўлади, лекин шу билан бирга у сизни бой бўлишдан тўсади.
Мен ҳаётимда эрталаб соат 8 дан то кеч соат 3 гача ишлаб, бой бўлиб кетган шахсни кўрмадим. Фақат ойликка ишлайдиган бузуқ табиатли одамгина (порахўрлик, ўғрилик, хиёнат ва ҳоказолар сабабли) бой бўлиб кетганини кўрдим.
Жек Ма,
Хитойнинг энг бой одами, шахсий бойлиги 39 миллиард долларни ташкил этади
Арабчадан Нозимжон Иминжонов таржимаси
Ўзбекистон делегацияси Мисрга жўнаб кетди
Куни кеча, 5 январь куни Ўзбекистон делегацияси Миср Араб Республикасига жўнаб кетди. Сафар доирасида Мисрнинг ал-Азҳар мажмуаси билан диний кадрлар тайёрлаш, уларнинг касб-маҳоратини ошириш, халқаро конференциялар ва семинарлар ўтказишга оид диний-маърифий соҳадаги ҳамкорлик масалалари муҳокама қилинади.
Шунингдек, ал-Азҳар мажмуаси ҳамда Ўзбекистондаги диний соҳага оид марказлар ўртасида ҳамкорлик қилиш тўғрисидаги “Йўл харитаси”ни имзолаш, ал-Азҳар мажмуаси раҳбари Шайх Аҳмад Тоййиб ва ал-Азҳар университети ректори билан учрашувлар ўтказиш режалаштирилган.
Ўзбекистон делегацияси ал-Азҳар университети ва бошқа илмий муассасаларда кенг жамоатчилик иштирокида Ўзбекистонда амалга оширилаётган ислоҳотлар ҳақида такдимотлар ўтказиши мўлжалланган.
Маълумки, Миср юрти Қуръони каримда айнан шу ном билан бир неча марта зикр этилган. Бу эса унинг баракоти, хайри кўплигига далилдир. Бу замин юзлаб саҳоба ва тобиъийлар ҳокини бағрида яширган. Буюк алломалар бу ерда таълим олган, китоблар таълиф этишган.
Миср билан Ўзбекистонни боғлаб турувчи алоқалар жуда қадим тарихга бориб тақалади. Аллома Аҳмад ал-Фарғонийнинг Мисрдаги илмий фаолияти, Ихшидийлар сулоласидан тортиб, Қоҳирадаги ўзбакийя маҳалласигача юртларимиз ўртасидаги минг йиллик алоқалардан сўзлайди.
Сафар жараёнларини сайтимиз орқали ёритиб борамиз.
Ўзбекистон мусулмонлари идораси Матбуот хизмати
Нишонга урилган гаплар: “Бир инсоннинг қандайлигини билмоқчи бўлсанг, унга кўп пул ёки мансаб бериб кўр”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
ТАВАККУЛ ВА ИШОНЧ
Доллар ошди ва нархлар қимматлади. Лекин ризқ Воҳид, Қаҳҳор бўлган Зотнинг зиммасида.
Салафи солиҳларнинг бирларига: “Нархлар қимматлади” дейилди. Шунда у киши: “Уни истиғфор билан туширинглар!” дедилар.
Бир аъробийга: “Бир бурда нон бир динор бўлибди” дейилганда, у: “Аллоҳга қасамки, агар буғдой дони бир динор бўлса ҳам, бу мени ташвишга солмайди. Мен Аллоҳга, У Зот менга буюрганидек ибодат қиламан. У Ўзи ваъда қилганидек менга ризқ беради” деди.
Инсонлар Салама ибн Динорнинг олдига бориб, унга: “Эй Абу Ҳозим! Кўрмайсизми, нарх-наво қимматлабди” дейишди. Шунда у киши: “Бундан нега ташвишланяпсизлар?!! Нарх-наво арзонлигида бизга ризқ берган Зот нарх-наво қимматлаганда ҳам бизга ризқ беради” дедилар.
“Ховатир роқия журнали”
*****
Кучли бўлмоқчи бўлсанг, бирор киши сени яхши кўришини кутмаслигинг керак.
Лев Толстой
*****
Ким мол-дунё ҳамма нарсани қила олади деб ишонса, ўша кимсанинг ўзи ҳам мол-дунё учун ҳамма ишни қилади.
“Тарих муҳрлаган сўзлар”
*****
Мол-дунё гапираётганда, ростгўйлик жим турадиган бўлиб қолди.
“Тарих муҳрлаган сўзлар”
*****
Бўш ҳамёнлар муваффақиятга эришишдан тўсолмайди. Балк бўш ақллар ва бўш қалблар тўсади.
“Тарих муҳрлаган сўзлар”
*****
Инсоннинг ҳамма аъзосига оғриқ, зулм етиши мумкин, аммо тилига эмас.
“Тарих муҳрлаган сўзлар”
*****
Илм қанча кўп бўлса, “мен” деган тушунча камайиб боради. Илм қанча оз бўлса, “мен” деган тушунча кўпайиб боради.
“Тарих муҳрлаган сўзлар”
*****
Инсон ҳар қанча ёлғон гапирмасин, бир кун келиб ҳамма ёлғонлари фош бўлади.
“Тарих муҳрлаган сўзлар”
*****
Яхшилик уч нарса билан чиройли бўлади:
- Сўрамасдан қилиш билан.
- Пайсалга солмасдан, тез қилиш билан.
- Миннатсиз қилиш билан.
Мустафо Сибоий
“Ховатир роқия журнали”
*****
Бошқаларнинг дўзахга тушишини исботлашдан кўра, ўзингни жаннатга киритишга уриниб яшашинг афзалдир.
Али Шариатий
*****
Кўплаб фақир одамлар умр бўйи ғамгин ҳолда яшашади. Бир марта кулганларида эса ҳамма унларни расмга олади-да, остига «Мол-дунё бахтнинг пайдо бўлишига сабаб бўлмайди» деб ёзиб қўйишади.
“Тарих муҳрлаган сўзлар”
*****
Баъзи одамларнинг «Ватан» деб жар солиши сени алдаб қўймасин. Айримлар ташқаридан қараганда ватанпарвар бўлиб кўринса-да, махфий равишда порахўрлик билан шуғулланувчи ва халқнинг мулкини талон-тарож қилувчи хоинлардир.
«Тарих муҳрлаган сўзлар»
*****
Ҳаётнинг ҳаммаси фейсбукдан иборат эмас. Ота-онамиз ёнимизда, бизнинг суҳбатимизга муштоқ бўлиб ўтиришибди. Биз эса телефондан бош кўтармаяпмиз.
*****
Бирор шахсга бўлган ишончнинг кетиши ўша шахснинг ўзининг кетишидан ҳам оғирроқдир.
Вилям Шекспир
*****
Бир инсоннинг қандайлигини билмоқчи бўлсанг, унга кўп пул ёки мансаб бериб кўр.
«Тарих муҳрлаган сўзлар»
*****
Жоҳилнинг учта аломати:
- Ужб (ўзидан қойил қолиш);
- Бефойда гап гапириб, маҳмадоналик қилиш;
- Бир ишдан қайтариб туриб, ўша ишни ўзи қилиш.
Абу Дардо розияллоҳу анҳу
*****
Тўплаб, таржима қилувчи Нозимжон Иминжонов