muslim.uz
Ал-Ҳаким ат-Термизийнинг йўқолган асарларидан бири топилди
Туркиядаги қадимий музейлардан бирида изланиш олиб бораётган Термиз давлат университетининг илмий тадқиқотчиси Жўрабек Чўтматов буюк мутаффаккир Абу Абдуллоҳ Муҳаммад ибн Али ибн ал-Ҳасан ибн Башир ал-Ҳаким ат-Термизийнинг бугунгача “мафқуд”, яъни “йўқолган” деб келинган асарини топди. Асар Қуръондаги Фотиҳа ва Бақара сурасининг шарҳига бағишланган. Бу ҳақда Turon24 нашри хабар берди.
Топилган янги қўлёзма Мовароуннаҳрда Қуръон шарҳига бағишланган илк асар сифатида баҳоланмоқда. Ҳозирда мазкур асарни дунё тадқиқотчилари эътиборига ҳавола этиш учун араб тилида чоп этиш ишлари бошланган. Сўнгра ўзбек тилида нашрга тайёрланади.
Мисрлик олим шайх Абдулфаттоҳ Абдуллоҳ Бараканинг таъкидлашича, Термизий тўрт юздан ортиқ китоб ёзган бўлиб, улардан олтмишга яқини бизгача етиб келган. Алломанинг асарлари Париж, Қоҳира, Дамашқ, Искандария, Истанбул ва Лондон каби шаҳарлардаги қўлёзмалар жамғармаларида сақланади.
Тарих фанлари номзоди Жалолиддин Мирзаевга кўра, Ал-Ҳаким ат-Термизий юртимизда тасаввуф ва тафсир илмининг ривожланишини бошлаб берган қомусий олим саналади. Алломанинг Термиз шаҳри яқинида жойлашган мақбараси устида ўрнатилган қабртошдаги битикларда унинг вафот этган санаси ҳижрий 255 (милодий 869) деб ёзилган. Мутафаккир олимнинг 120 йил умр кўргани эътиборга олинса, аллома саккизинчи асрнинг ўрталарида (тахминан 750-760 йиллар оралиғида) таваллуд топган.
ЎМИ Матбуот хизмати
Фотолавҳа: Муфтий ҳазратнинг Қозоғистон давлатига ташрифлари
ЎМИ Матбуот хизмати
“Ал-Азҳар” шайхи Аҳмад Муҳаммад Тоййиб юртимизга ташриф буюрди
Бугун, 10 октябрь куни Миср Араб Республикаси Бош имоми, “Ал-Азҳар” диний мажмуаси раҳбари, шайх Аҳмад Муҳаммад Тоййиб бошчилигидаги делегация мамлакатимизга ташриф буюрди.
“Ал-Азҳар” шайхи Аҳмад Муҳаммад Тоййиб ҳазратлари Ўзбекистонга ташрифлари давомида Тошкент шаҳри, Самарқанд ва Бухоро вилоятларида бўлиб, бир қатор маърифий учрашувлар ўтказиши режалаштирилган.
Шайх ҳазратларининг диёримизга ташрифи сайтимизда батафсил ёритиб борилади.
Ўзбекистон мусулмонлари идораси Матбуот хизмати
Муфтий ҳазрат Қозоғистондаги йирик анжуманда иштирок этмоқда
Аввал, "Ўзбекистон делегацияси Жаҳон ва анъанавий динлар етакчиларининг VI қурултойи"да иштирок этиши ҳақида хабар берган эдик.
Бугун, 10 октябрь куни Қозоғистоннинг Остона шаҳрида "Жаҳон ва анъанавий динлар етакчиларининг VI қурултойи" (съезди) ўз ишини бошлади. Ушбу тадбирда дунёнинг 42 мамлакатидан 80 дан ортиқ делегация вакиллари қаторида Ўзбекистон мусулмонлар идораси раиси, муфтий Усмонхон Алимов ҳазратлари ҳам иштирок этмоқда.
Муфтий Усмонхон Алимов ҳазратлари ушбу анжуманда қатнашиш учун Қозоғистон заминига ташриф буюрдилар. Муфтий ҳазратни Ўзбекистоннинг Қозоғистондаги элчиси Саидакром Ниязхаджаев ҳамда Қозоғистон мусулмонлари идораси раиси ўринбосари Бауржон Есманхан кутиб олди.
Таниқли давлат ва жамоат арбоблари анжуман доирасида бугунги кундаги динлараро ҳамкорлик масалалари борасида музокаралар ўтказишди.
Анжуман Қозоғистон Президенти Нурсултон Назарбоевнинг кириш сўзи билан очилди.
Ушбу анжуман тадбирлари сайтимизда ёритиб борилади.
Ўзбекистон мусулмонлар идораси Матбуот хизмати