Қуръони карим – илоҳий китоб, башарият учун ҳидоят маёғи. Асрлар оша жозибадорлиги, мўъжизакорлиги билан олам аҳлини лол қилиб келмоқда. Унга бўлган муҳаббат кун сайин ошиб бормоқда. Аждодлардан авлодларга ўтиб, сайқал топиб, ёд олиниб, амал қилиниб келинмоқда. Тиловат пайтида эт жимирлайди, кўз ёшланади, қалб титрайди. Бу бежиз эмас, албатта.  Ана шундай муборак каломга бўлган эътибор, ҳурмат-эҳтиром ҳар бир кишининг қалбида сайқал топади. 

Набий соллаллоҳу алайҳи васаллам бу китобни ўрганишга, ёд олишга ва уни ўргатишга ундаганлар.

Усмон розияллоҳу анҳудан ривоят қилинади: «Набий соллаллоҳу алайҳи васаллам: «Сизларнинг яхшиларингиз Қуръонни ўрганганларингиз ва ўргатганларингиздир», дедилар» (Бухорий, Абу Довуд ва Термизий ривоят қилишган).

Муқаддас каломни ёд олгандан кейин уни асраб-авайлаш, такрорлаб туриш ҳам керак. Акс ҳолда, Қуръони Каримни ёд олгандан кейин бепарво бўлса, у хотирадан кўтарилиб кетиши ҳеч гап эмас. 

Абу Мусо розияллоҳу анҳудан ривоят қилинади: «Набий соллаллоҳу алайҳи васаллам: «Қуръондан хабар олиб туринглар. Жоним қўлида бўлган Зотга қасамки, албатта, у қочоқликда тушовда турган туядан ҳам ашаддийроқдир», дедилар» (Муттафақун алайҳ).

Ибн Умар розияллоҳу анҳудан ривоят қилинади: «Набий соллаллоҳу алайҳи васаллам: «Албатта, Қуръон соҳибининг мисоли худди тушовланган туя соҳибига ўхшашдир. Агар ундан хабар олиб турса, уни тутиб қолади. Тек қўйса, кетиб қолади», дедилар» (Муттафақун алайҳ).

Имом Бухорий ва имом Термизий бобомиздан ривоят қилинган ҳадиси шарифларнинг бирида Набий соллаллоҳу алайҳи васаллам: «Сизлардан бирингизнинг фалон, фалон оятни унутдим, демоғи қандоқ ҳам ёмон. Лекин у унутдирилгандир. Қуръонни ёдингизда туриши учун ҳаракат қилинг. Албатта, у одамларнинг кўксидан чиқишда қочоқ туядан ҳам ашаддийдир», деганлар». 

Туясини тушовлаб қўйган одам ундан тез-тез хабар олиб турмаса, туя кетиб қолиши турган гап. Худди шунга ўхшаб Қуръони Каримни ёд олган одам ҳам уни тез-тез такрор қилиб туриши лозим. Сал бепарво бўлса, эсидан чиқиб қолиши турган гап. Қуръони Каримни ёд олган одам уни эсдан чиқариб қўймаслик учун доимо такрорлаб юрмоғи керак. 

Ёд олган сура ёки оятларини унутиб қўйишнинг оқибати эса нақадар ёмон. Воҳаланки, бу нарса гуноҳнинг ўзгинаси.

Анас розияллоҳу анҳудан ривоят қилинади: «Набий соллаллоҳу алайҳи васаллам: «Менга умматимнинг гуноҳлари кўрсатилди. Қуръондан бир сура ёки оят унга берилганда унутиб қўйган одамдан кўра катта гуноҳни кўрмадим», дедилар» (Термизий ва Абу Довуд ривоят қилишган).

Аллоҳнинг каломига эътиборсиз бўлиш керак эмас. Шу калом биз учун ҳидоят. Шунга иймон келтирганлар мўмин. Шунинг учун ҳадиси шарифларда ёд олган оятларини ёддан чиқариш қаттиқ қораланган. 

Қуръонни унутмаслигимиз учун уни доимо такрорлаб туришимиз зарур бўлади. Аллоҳ таоло унинг ҳар бир калимасига, ҳар бир ҳарфига кўплаб савобларни ато этади. Буни доимо ҳис қилиб яшамоқ керак.

Ромитан туман бош имом хатиби. 

Отабек Рахимов. 

ЎМИ матбуот хизмати

Барчага маълумки, ислом динида ризқни ҳалолдан топиш ҳаттоки Аллоҳ Таолога ибодат қилиш мақомига кўтарилган. Энг улуғ зотлар саналмиш пайғамбарлар ҳам ўз ризқларини ҳалол пешона терлари билан топганлари яъни, касб – ҳунар билан шуғулланганликлари барча учун буюк ибратдир. Улар ризқ Аллоҳдан эканлигини билган ҳолларида ҳам ҳунарсиз ўтирмадилар. Тарихдан маълумки, Одам (а.с) деҳқончилик, Нуҳ (а.с) дурадгорлик, Довуд (а.с) темирчилик, Идрис (а.с) хаттотлик ва Муҳаммад (с.а.в) савдогарлик билан шуғулланганлар .

Аллоҳ таоло Қуръони Каримда шундай марҳамат қилади:

يَا أَيُّهَا الَّذِينَ آَمَنُوا إِذَا نُودِيَ لِلصَّلَاةِ مِنْ يَوْمِ الْجُمُعَةِ فَاسْعَوْا إِلَى ذِكْرِ اللَّهِ وَذَرُوا الْبَيْعَ ذَلِكُمْ خَيْرٌ لَكُمْ إِنْ كُنْتُمْ تَعْلَمُونَ

“Эй, имон келтирганлар! Қачонки, жумъа кунидаги намозга (азон) чақирилса, дарҳол Аллоҳнинг зикри сари (имом хутбасини тинглаш учун) ҳаракатга тушингиз ва савдо-сотиқни тарк қилингиз! Агар биладиган бўлсангиз, мана шу (иш) ўзларингиз учун яхшидир” .

Анас ибн Молик ҳазратларидан ривоят қилинади:

“Набий соллоллоҳу алайҳи  васаллам: “Аллоҳ юборган ҳар бир Набий албатта қўй боққандир”, дедилар. “Сиз ҳамми?”, дейишди саҳобалари. “Ҳа, қийротлар  учун Макка аҳли қўйини боққан эдим”, дедилар У зот” .

Аллоҳ таолонинг пайғамбарлари энг тўғри, энг маҳбуб йўлдан юрганлар. Аллоҳ таоло ўзининг барча пайғамбарларига қўй боқишни раво кўрган экан, демак ҳеч бир касбнинг паст-баланди бўлмайди .

Маълумки, Аллоҳ таоло Ўз пайғамбарларини олдиндан тайёрлаб, обрўга путур етадиган нарсалардан сақлаб келган. Демак, Муҳаммад Мустафо соллоллоҳу алайҳи васалламга мардикор – чўпон  бўлишни раво кўриши бу ишнинг шарафини кўрсатади. Бу ҳодисалардан ҳайвон боқиб, ризқ-рўз топиш яхши экани келиб чиқади.

Абу Бакр Сиддиқ розияллоҳу анҳу халифа этиб сайланганларидан кейин:

“Батаҳқиқ, қавмим менинг ҳунарим аҳлимнинг таъминотига етмай қолмаслигини яхши билади. Энди эса мусулмонларнинг иши билан машғул бўлиб қолдим. Бас, Абу Бакрнинг оиласи ушбу молдан егай ва бунда мусулмонлар учун касб қилурман”, дедилар

Юқорида таърифлай бошлаган мақтовларга лойиқ иш – бу Ҳалол касбдир. Касб – инсон яралганидан токи вафот этгунича ўзлаштириб, қўлга киритган ютуқ ва камчиликлар ҳисобланади. Расулуллоҳ соллоллоҳу алайҳи васаллам Анас ибн Молик розияллоҳу анҳуга шундай насиҳат қилган эдилар:

“Эй Анас, касбингни пок қилгин, дуойинг қабул бўлур. Чунки бир одам оғзига бир луқма ҳаромни солса, қирқ кунгача дуоси ижобат бўлмайди” .

Бу нафақат буюк саҳобий Анас розияллоҳу анҳуга, балки, у киши орқали бутун ислом умматига қилинган буюк насиҳатдир.

Аллоҳ таоло инсонни яратгач, унга дунёдаги барча нарсанинг исмини ўргатди ва касб-кор қилиш, шу орқали ризқини териб юришига амр этди. Расулуллоҳ (с.а.в) “Кишининг фарзанди касбидандир, энг ҳалол касбидандир” , – деб марҳамат қилдилар. Касб меҳнат маҳсули бўлиб, фарзандлар эса мана шу касб орқали топган асосий жамғарма ҳисобланади, уларнинг том маънодаги комил инсонлар бўлиб етишишларида илму ҳунарнинг ўрни беқиёсдир.

Дунё кўрган инсонларнинг Аллоҳ таолога энг севимлилари, ҳар жиҳатдан баркамол бўлган зотлар – бу Пайғамбар (а.с)лардир. Оламларнинг парвардигори Ўзи учун халифа этиб сайлаган мана шу улуғларнинг барчалари бирор касбнинг моҳир эгалари эдилар. Улар Аллоҳ таолонинг изни ила ёшлик чоғларидан қўй боқар, ҳалол касб қилардилар. Хусусан, Пайғамбаримиз (с.а.в)нинг ўзлари ҳам ёшликда қўй боқиб, улғайганларида эса савдо-сотиқ билан шуғуланганлар. Мушриклар Ул Зотнинг шаънларини пастламоқчи бўлиб: “У ҳақиқий Пайғамбар бўлса нега бозорларда, одамларга аралашиб юради, нега Аллоҳ унга ҳашаматли уй-жой бермайди, нега анави тоғларни тиллога айлантириб қўймайди?” – дейишар, бу билан фақатгина ўзларига жабр қилар эдилар, холос. Жоҳилларнинг  айтаётган бу гаплари Расулуллоҳ (с.а.в)нинг фазилатларига фазилат қўшар, муборак ҳаётлари ҳалол меҳнат орқасидан бировга қарам бўлмасдан, покиза луқма ила ўтаётганини эътироф этар эди. Бу билан пайғамбарнинг шаъну шавкатларига бирор бир заррача футур етиб қолдими? Асло! Ҳар нарсада яхшиларга эргашган, ҳамма учун намуна бўлиб келган халқ ҳам фарзандларини суннатга мувофиқ яшашга ўргатиб келмоқда. Аждодлардан етиб келган халқ оғзаки ижоди бўлган мақолларда, эртаг-у, масалларда ҳам инсонни камолотга етказувчи хусусиятлар куйланган, тараннум этилган. Масалан, “Ҳалол меҳнат яхши одат, берур сенга саодат”, “Меҳнат билан топганинг, қанд-у асал тотганинг”, “Меҳнат- меҳнатнинг таги роҳат”, “Ҳунар- ҳунардан ризқинг унар”, “Бир йигитга қирқ ҳунар ҳам оз” ва бошқалар. Ёшларнинг касб-корли, меҳнаткаш бўлишига ундовчи, алдамчилик, ҳийла йўли билан топилган пул фойда бермаслигини билдирадиган машҳур – косиб ота ва дангаса ўғил ҳақидаги ривоят ҳам равон тили, содда ифодаси билан барчага ёқади ва тез таъсир  қила олади. Тариқатчилар саййиди бўлган ҳазрат Баҳовиддин Нақшбандий – “Кўнглинг Оллоҳда, қўлинг меҳнатда бўлсин” деб бежиз айтмаганлар. Чунки меҳнат инсонни ҳақиқий бахт сари элтувчи мукаммалликдир.

Меҳнатни севиш, ғайрат ва матонат билан ишлаш лозим. Бунда 3 та манфаат бор: Тан саломатлиги, кўнгил роҳати, обрўнинг ортиши. Ўз ҳаётини меҳнат билан яшнатиб келаётган одамларни ҳурмат қилиш, уларни бошга кўтариш, ҳордиқларини, ҳузур-ҳаловатларини ўйлаш одамийликнинг энг муҳим шартларидан биридир. Меҳнатсеварлик кундалик ҳаётни чиройли, фаровон, унумли ўтказиш учун инсонга қувонч ва шодлик бағишлайдиган фазилатдир.

Хадичаи Кубро аёл-қизлар

ўрта махсус ислом билим юрти

М. Саиджалолова 

ЎМИ матбуот хизмати

Ташриф чоғида меҳмонлар таълим муассасаси фаолияти, жумладан, ўқув жараёнлари, маънавий-маърифий ишлар билан яқиндан таништирилди. Шундан сўнг, Танзила Камаловна  билим юрти педагог-ўқитувчилари ва талаба қизлари билан самимий суҳбат олиб борди. Суҳбат жараёнида жамиятда, хусусан, аёл-қизлар ўртасида долзарб ва муҳим бўлган муаммолар, улар орасида юзага келаётган қийин вазиятлар ҳақида маълумотлар бериб, бугунги кунда ечимини кутаётган кўплаб ижтимоий масалалар тўғрисида тўхталиб ўтди.

Мазкур муаммоларни бартараф этиш мақсадида диний ва дунёвий билимлар бериладиган ушбу таълим муассасасининг ўқитувчи ва мураббийлари ҳамда  талаба қизларининг  ўрни жуда муҳим экани, улар билан биргаликда жамиятдаги аёл-қизлар ўртасида соғлом турмуш тарзини яратишга, оилаларда мавжуд бўлган муаммоларни бартараф этишга, ёш қизларни катта ҳаётга ва оила қуришга тайёрлаш  каби масалаларни таъкидлаб ўтдилар. Психолог Р.Тўрахўжаева эса талаба қизлар билан суҳбатлашиб, уларнинг дунёқараши, ҳаётга бўлган қизиқиши, келажакдаги режа ва мақсадлари, уларнинг жамиятдаги ўрни ҳақида савол-жавоб ўтказди.

Суҳбат сўнгида, Республика хотин-қизлар қўмитаси раиси Танзила Камаловна Норбоева ва унинг ўринбосари Мукаррам Ахмедовна Нурматовалар, жамиятдаги ўз ечимини кутаётган турли муаммолар, хусусан, аёллар орасида тарқалган ўз жонига қасд қилиш, турли бидъат-хурофотларга барҳам бериш, ёш оилалар бузилишини, “оммавий маданият” ҳолатларини олдини олиш, ота-онага бўйсунмаслик, ватанга хиёнат, экстремизм ва терроризм ҳамда ёт ғояларга қарши курашиш борасида билим юрти билан мунтазам равишда ҳамкорликда иш олиб бориш, жойлардаги таълим муассасаларида, айниқса, жамиятнинг муҳим бўғини саналган маҳаллаларда билим юрти мударрисалари ва талаба қизлари иштирокида давра суҳбатлари, семинар-тренинглар, учрашувлар ўтказиш, бундай ишларнинг ҳам маънан ҳам диний жиҳатдан тўғри эмаслигини тушунтириш, ёшларда ватанга бўлган муҳаббат туйғусини шакллантириш зарурлигини қайд этиб ўтдилар.

Танзила Норбоеванинг билим юртига ташрифи талаба қизларда катта таассурот уйғотди. Бош вазир ўринбосари томонидан билим юрти талаба қизларига юртимиз равнақи ва илм-фанига ўз ҳиссаларини қўшиш, келажакда улардан диний соҳада улкан натижалар кутилаётгани ҳақида тўхталиб, уларга катта ишонч билдирилди.

Шунингдек, Т.Норбоевага ҳар қандай вазиятда ва мавжуд муаммоларни бартараф этишда мурожаат қилишлари мумкинлиги, хотин-қизлар қўмитаси ҳар доим ёрдамга тайёр эканини,ҳар қандай ижобий фикр ва таклифлар, инновацион ғояларни қўллаб қувватлаш тарафдориэканини айтиб ўтди.

Матбуот хизмати

1.Уйдан чиқаётганингда аёлингга: Яхши қолинг, деб чиқ. Ҳамиша унинг кўнглини ҳушнуд эт! 2.Сени кутиб кўзи тўрт бўлмасин, вақтлироқ уйга кел! 3. Ташқаридан еб-ичганларингдан уйингга ҳам олиб кел! 4. Аёлингни хато-камчиликларини бошқаларга айтма, яхшилик фазилатларини эсла! 5.Уйингни сарф-харажатсиз қолдирма, улар бошқаларга муҳтож бўлишмасин! 6. Ишхонангдаги ноҳушликларни уйга келиб айтма. Уйинг севинчга тўлсин! 7. Тўй ёки саёҳатга борганингда иложи бўлса, аёлингни ҳам олиб бор!  8. Уйга салом бериб ва табассум билан киргин. Уйдагиларинг келганингдан севинишсин! 9.Уйингни Қуръонсиз, китобсиз ва намозсиз қолдирма. Бомдодга турганингда оила аъзоларингни ҳам ўйғот. Раҳмат ва баракот кун бўйи сиз билан бирга бўлсин! 10. Ғайратли бўл, рашқли бўл. Бироқ ноўрин гумон ва шубҳага борма. Айб-камчилик қидиришдан сақлан! 11. Инсофли бўл, аёлинг кучи етмайдиган ишларни унга буюрма. Керак бўлганида унга ёрдам бер! 12. Қарорларингда аёлинг билан ҳам маслаҳатлашишни унутма! 13. Кутилмаган совғалар бериб, кунглини олишни бил! 14. Дунё уйига кириш дунёга муккасидан берилиш эмас, охиратни унутма!  Дининг, ватанинг ва инсоният учун меҳнат қилишни унутма! 15. Озгина ҳалол даромад кўп ҳаром фойдадан яхшидир. Ҳаром луқма ема, хотининг ва фарзандларингга ҳам едирма!!

Хайруллоҳ Саттаров,

Ҳикматлардан

ЎМИ матбуот хизмати

Манба: http://kamolon.uz/