muslim.uz
«Ал-Азҳар» диний мажмуасида Ўзбекистон миллий маданияти тақдимоти ўтказилди
Ўзбекистоннинг Қоҳирадаги элчихонаси иштирокида Мисрнинг «Ал-Азҳар» диний мажмуасида таҳсил олаётган ўзбекистонлик хотин-қизлар томонидан мамлакатимиз Давлат байроғи қабул қилинган кун муносабати билан халқимиз миллий урф-одатлари ва таомларини намойиш этувчи маданий тадбир ўтказилди, деб хабар бермоқда “Дунё” АА.
Ушбу маросимда «Ал-Азҳар» диний мажмуаси раҳбарияти, муассасада таҳсил олаётган Малайзия, Индонезия, Нигерия ва бошқа қатор давлатлардан талаба хотин-қизлар қатнашди.
Тадбир аввалида ўзбек аёллари фаоли Муқаддас Ҳайдарова Ўзбекистон Давлат байроғи қабул қилинган кун муносабати билан мамлакатимиз разми ва унинг тарихи ҳақида йиғилганларга батафсил маълумот берди.
Юртдошларимиз томонидан тайёрланган миллий урф-одатларимиз, хусусан, ўзбек келинлари тарбияси, оила одоби тўғрисидаги саҳна чиқишлари меҳмонларга манзур бўлди.
Имом Бухорий, Имом Термизий, Хоразмий, Ибн Сино, Мирзо Улуғбек каби буюк алломаларни тарбиялаб вояга етказган ўзбек аёлларининг оиладаги ўрни ва қадри хорижликлар томонидан катта қизиқиш билан қарши олинди.
Айниқса, мисрлик ва бошқа юрт вакиллари ўзбек миллий пазандачилигига юқори баҳо бериб, палов, сомса, қатлама ва бошқа лаззатли таомларни тайёрлаш сирларидан воқиф бўлди.
«Ал-Азҳар» раҳбарияти келгусида бу каби тадбирларни мунтазам ўтказиш, ўзбек халқи маданияти ва урф-одатларини кенг ёйиш орқали турли миллатлар ўртасида дўстлик ва ҳамжиҳатликни мустаҳкамлашдан манфаатдорлигини изҳор этди.
Ўзбекистон мусулмонлари идораси матбуот хизмати
Мўминлар нажот топдилар
Аллоҳ таоло бундай марҳамат қилади: “Мўминлар нажот топдилар” (Муъминун, 1).
Бу оят, шубҳасиз, мўминларнинг икки дунёда ҳам нажот топишига далолат қилади. Чунки оятдаги «нажот топдилар» ибораси ўтган замон феълида бўлиб, у келаси замондаги «нажот топадилар» маъносидан кучлидир. Шу боис таъкид билан айтилган «нажот топдилар» ояти мўмин банда бор-ки, унинг, албатта, нажот топиши ҳақлигини билдиради. Нажот топадиган мўминларнинг сифатлари қуйидаги оятларда баён қилинган.
– «Улар намозларида ўзларини камтар тутувчидирлар» (Муъминун, 2).
«намозларида ўзларини камтар тутувчилар»дан мурод намозни хушуъ, ҳузуъ билан адо этувчи мўминлардир. Ҳар бир мўмин-мусулмон ибодатини Аллоҳнинг кўриб турганини билиб, қабул бўлишига умид қилиб адо этиши зарур. Аллоҳ таоло хушуъ ва ҳузуъ билан қилинган ибодатларни қабул қилади.
– «Улар беҳуда (сўз ва ишлар)дан юз ўгирувчидирлар» (Муъминун, 3).
Абу Ҳурайра розияллоҳу анҳудан ривоят қилинади: Расулуллоҳ соллаллоҳу алайҳи васаллам: “Кишининг беҳуда нарсаларни тарк этиши хулқининг гўзаллигидандир”, дедилар (Имом Термизий, Ибн Можа ривояти).
– «Улар закотни адо этувчидирлар» (Муъминун, 4).
Молиявий ибодат бўлган закот динимизнинг устунларидан бири бўлиб, у Қуръони каримнинг йигирма етти ўрнида намоз билан баробар зикр қилинган.
– «Улар авратларини (ҳаромдан) сақловчидирлар» (Муъминун,5).
Дунё аҳолиси ҳаётига жиддий хавф солаётган ОИТС касаллигини келтириб чиқарувчи асосий хатар – зинодир. Бу бедаво дардга чалинган беморлар сонининг йил сайин ортиб боришига, асосан, зинодан сақланмаслик сабаб бўлмоқда.
– «Улар (мўминлар) (одамларнинг берган) омонатларига ва (ўзаро боғлаган)аҳд-паймонларига риоя этувчидирлар» (Муъминун,8).
Омонатга риоя, унга хиёнат қилмаслик, ваъдага вафо қилиш ҳам мўминларнинг сифатларидан, имонининг белгиларидандир.
Оятда келган мўминларнинг яна бошқа сифатларидан бири «Улар намозларини асрагувчи (вақтида адо этувчи)дирлар» (Муъминун,9). Зеро, «...намоз мўминларга вақти тайин этилган ва (фарз деб) битилгандир» (Нисо, 103).
Ибн Масъуд розияллоҳу анҳудан ривоят қилинади: “Расулуллоҳ соллаллоҳу алайҳи васалламдан: “Аллоҳга қайси амал маҳбуброқ?” деб сўрадим. “Ўз вақтида ўқилган намоз”, дедилар.
Расулуллоҳ соллаллоҳу алайҳи васалламнинг вафотларидан кейин одамлар: «Пайғамбаримиз соллаллоҳу алайҳи васалламнинг хулқлари қандай эди?” деб сўраганларида, Оиша онамиз розияллоҳу анҳо Муъминун сурасининг дастлабки тўққиз оятини ўқиб, “Хулқлари худди шу оятларда айтилгандек эди”, деганлар».
Муъминун сурасида васф этилган сифатлардан хулқланишга ҳаракат қилайлик. Шунда Аллоҳнинг нажот топувчи бандаларидан бўламиз.
Даврон НУРМУҲАММАД
Мисрлик мутахассислар билан қўлёзмалар бўйича ҳамкорлик масалалари муҳокама қилинди
Мамлакатимизнинг Мисрдаги элчихонаси кўмагида Ўзбекистон Ислом тадқиқотлари маркази ҳамда Миср Китоблар уйи ва Миллий архиви мутахассислари ўртасида онлайн-музокаралар ўтказилди, деб хабар бермоқда «Дунё» АА.
Учрашувдан кўзланган мақсад қўлёзмаларни реставрация қилиш соҳасида ҳамкорликни йўлга қўйиш ва ривожлантиришдан иборат бўлди.
Музокаралар натижасида идоралараро ҳамкорликнинг асосий йўналишларини белгилаб берадиган ўзаро англашув меморандумининг якуний таҳрири маъқулланди.
Ҳар бир халқнинг тарихи ва маданиятини ўрганишда қўлёзма китоблар катта аҳамиятга эга экани таъкидланди. Ўзбекистон музейлари ва кутубхоналарида жуда кўп қўлёзмалар сақланмоқда.
Уларни сақлаш ва асраб авайлаш, илмий тадқиқ этиш ва келгуси авлодларга етказиш масалалари мамлакатимиз раҳбарияти жиддий эътиборидаги масала экани қайд этилди.
Ўзбекистонда китобларни индексация қилиш, тиклаш, рақамлаштириш ва чоп этишда Миср тажрибасини қўллаш муҳимлигига эътибор қаратилди.
Шу нуқтаи назардан, мисрлик юқори малакали мутахассисларнинг Ўзбекистонга амалий сафарини ташкил этиш масаласи бўйича фикр алмашилди.
Савдо-иқтисодий ва илмий-техникавий ҳамкорлик бўйича Ўзбекистон-Миср ҳукуматлараро комиссиясининг бўлажак 7-мажлиси доирасида Ўзаро англашув меморандумини имзолаш бўйича келишувга эришилди.
Ўзбекистон мусулмонлари идораси матбуот хизмати
Тасаддуқ Ё Расулуллоҳ – "Абу Бакр Сиддиқ розияллоҳу анҳу" (13-қисм)
Ўзбекистон мусулмонлари идораси раиси, муфтий
Нуриддин домла ҳазратлари
Куала- Лумпурда Ўзбекистон ва Малайзия олимларининг китоби тақдимоти ўтказилди
Ўзбекистоннинг Куала-Лумпурдаги элчихонасида меъморий шаклларни уйғунлаштириш масалаларига бағишланган китобнинг (Uralov A.S., Elina Mohd Husini. Harmonization, Decoration of Architectural Forms and Light. – USIM Press, 2021) тақдимоти бўлиб ўтди, деб хабар бермоқда «Дунё» АА мухбири.
Мазкур китоб Самарқанд давлат архитектура институти профессори Актам Ўролов ва Малайзия Ислом илмий университети (Universiti Sains Islam Malaysia – USIM) профессори Элина Моҳд Ҳусини томонидан тайёрланган ва USIM Press нашриёти билан ҳамкорликда чоп этилган.
1998 йилда ташкил этилган USIM давлат олий таълим муассасаси ҳисобланади.
Университетнинг таълим модели диний фанларни дунёвий фанлар билан интеграциялаш тамойилига асосланган.
Элчихонада гибрид форматда ташкил этилган тақдимотда USIM маркази директори Моҳд Зин Кандар, профессор ва ўқитувчилар иштирок этди.
Самарқанд давлат архитектура институти билан телеконференция ташкил этилди.
Онлайн-тадбирда институт ректори Чидем Жанбай Туркйилмаз ва олий билим юрти ўқитувчилари қатнашди.
Китоб турли асрлар меъморчилиги назарияси, тарихи ва амалиётига бағишланган. Нашрда Ўзбекистон ва Марказий Осиё меъморчилиги ва тасвирий санъатида шакллар уйғунлиги ва мутаносиблик назариясига алоҳида эътибор қаратилган.
Рисола меъморлар, санъатшунослар ва кенг китобхонларга мўлжалланган бўлиб, бакалавр ва магистратура дастурлари талабалари учун дарслик сифатида тавсия этилган.
Тақдимотда малайзиялик тингловчиларга Ислом цивилизациясининг бой маданий меросини, республикамизда кўп асрлик меъморий анъаналарини ўрганиш ва оммалаштириш бўйича амалга оширилаётган саъй-ҳаракатлар ҳақида маълумот берилди.
Томонлар 2019 йилда олий ўқув юртлари ўртасидаги ҳамкорлик доирасида профессор-ўқитувчиларнинг лектор сифатида ўзаро ташрифларини ташкил этиш амалиёти йўлга қўйилганини мамнуният билан қайд этди.
Тадбир якунида ислом меросини биргаликда илмий тадқиқ этиш, халқаро конференциялар, семинарлар ва маърузалар ташкил этиш, Ўзбекистон ва Малайзия нашрларида илмий материаллар нашр этиш, шунингдек, ҳамкорликда таълим дастурларини йўлга қўйиш имкониятларини ўрганиш бўйича университетлараро амалий ҳамкорликни давом эттиришга келишиб олинди.
Ўзбекистон мусулмонлари идораси матбуот хизмати