Америка Қўшма Штатларининиг Атланта шаҳри мэри мусулмонлар учун муқаддас саналган Рамазон ойи муносабати билан эртага, 29 май куни мусулмонлар жамоасига атаб тантанали ифтор маросимини ўтказмоқчи. Бу ҳақда "ansar" нашри хабар берди.

Шахар раҳбари Киша Лэнс Боттом тадбирни Атланта Мусулмонлар Ташкилоти билан ҳамкорликда уюштиришни режалаштирган.

Ташкилот раҳбари Сумайи Халифа сўзларига кўра, тадбирга 250 нафар меҳмон таклиф этилган бўлиб, улар орасида, шаҳар амалдорлари, мусулмон етакчилар ва бошқа меҳмонлар борлиги қайд этилган.

Ифторлик бевосита шаҳар маъмурияти биносида уюштирилади. Тантанали ифторлик маросимларини давлат идораларида ўтказиш Қўшма Штатлар учун аввалдан одат бўлиб, ҳаттоки яқин кунларга қадар Оқ Уйда ҳам нишонланиб келинган. Ушбу тадбир 2017 йилда айрим сабабларга кўра Рамазон муносабати билан уюштирилмаган.

ЎМИ Матбуот хизмати

“Сизларга муборак ой – Рамазон ташриф буюрди...” биз умматларга бу хабардан ҳам яхшироқ хушхабар бўлмаса керак. Ҳабибимиз Расулуллоҳ соллаллоҳу алайҳи ва саллам Рамазон борасида хабар бериб “муборак ой” дедилар. Дарҳақиқат, бу ой бутун инсониятга ҳар жиҳатдан мубораклик – барокатлар улашади. Рамазоннинг баракаси бутун оламлар Парвардигори бўлган Аллоҳ таолонинг буйруғини бажариш, сабр-қаноат, эҳсону саховат, инсонларнинг ҳолидан хабар, яқинлар қалбига сурур улашиш каби ишларда намоён бўлади.

Лекин биз Рамазоннинг бу барокатлари ҳақида эмас, балки ундан ҳам муҳимроқ барокати – унинг тақвога бўлган таъсири ҳақида сўз юритамиз. Нега айнан тақво дейсизми? Чунки Аллоҳ таоло биз бандаларга юборган диннинг асосини тақво ҳосил қилади. Аллоҳ таоло Ўз каломи шарифида шундай марҳамат қилади:

وَلَقَدْ وَصَّيْنَا الَّذِينَ أُوتُوا الْكِتَابَ مِنْ قَبْلِكُمْ وَإِيَّاكُمْ أَنِ اتَّقُوا اللَّهَ

“Сизлардан олдинги Китоб берилганларга ва сизларга ҳам, Аллоҳга тақво қилингиз, деб амр қилганмиз”. (Нисо сураси, 131-оят)

Қолаверса, тақво инсонни бошқалардан фазилатли қиладиган, уни Ўз Роббисига яна ҳам яқинлаштирадиган хислатдир.

Тақво аслида сақламоқ, сақланмоқ, қўрқмоқ деганидир. Шундан келиб чиқиб “Тақво – инсоннинг Аллоҳ таоло буюрганларини бажариб, қайтарган нарсалардан ўзини сақлаши” десак тўғри бўлади.

Тақво – кишининг ўзи ва ундан қўрқадиган нарсаси ўртасида бир қалқон қилмоғидир. Банданинг Роббига бўлган тақвоси эса – банда ўзи билан Парвардигори ўртасида Унинг ғазаби, нафрати ва азобидан сақлайдиган ҳимоя ҳосил қилмоғидир. Бу ҳимояга эса Ўша Парвардигорнинг буйруқларини бажариб, қайтарганларидан қайтиш, Унга маҳбуб бўлган амалларни кўпайтирмоқ ила эришилади. 

Энди эса Рамазоннинг тақвога боғлиқ жиҳатларини ўрганиб чиқсак:

Рўза фақатгина шаклий ибодат бўлмай, балки, рўзадан асл мақсад руҳиятни поклаш, тақвони кучайтиришдир.Аллоҳ таоло бандаларига рўзани фарз қилишининг асл мақсадларидан бири ҳам кишиларнинг тақво ҳосил қилишидир. Бунинг айни ҳақиқат эканини мўминларга  Рўзани фарз қилиб тушган қуйидаги оятда кўришимиз мумкин:   

يَا أَيُّهَا الَّذِينَ آَمَنُوا كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِنْ قَبْلِكُمْ لَعَلَّكُمْ تَتَّقُونَ

“Эй, имон келтирганлар! Сизлардан олдинги (уммат)ларга фарз қилингани каби сизларга ҳам рўза тутиш фарз қилинди, шояд (у сабабли) тақволи бўлсангиз. (Бақара сураси, 183-оят)

Демак, Аллоҳ таоло рамазон рўзасини Ўзига яқинлаштирадиган ибодат бўлиши билан биргаликда инсонлар гуноҳларидан сақланиши, нафсларини тарбиялаб, руҳий оламини поклаши бунинг натижасида эса тақво ҳосил қиладиган сабаб ҳам қилган.

 Рўза тутиш натижасида инсон ўз шаҳватларини кесади. Чунки шаҳватлар асоси кўп таом ейиш, рўзадор эса ўз-ўзидан таомларни камайтириш билан шаҳватлар эшигини ҳам ёпади. Шунинг учун ҳам Расулуллоҳ соллаллоҳу алайҳи ва саллам ёшлар жамоасига қараб шундай хитоб қилган:

“Эй ёшлар жамоаси, сизлардан ким никоҳга қодир бўлса уйлансин! Албатта у кўзни тўсувчи ва фаржни сақловчидир. Ким унга қодир бўлмаса ўзига рўзани лозим тутсин. Чунки рўза у учун (сақловчи) пардадир”. (Имом Бухорий, Имом Муслим ривояти)

Муфассир уламоларимиз “шояд (у сабабли) тақволи бўлсангиз” оятининг тафсирида қуйидагиларни айтишган:

“Рўза тақво ҳосил қиладиган сабабларнинг энг каттасидир. Чунки рўза тутишда Аллоҳ таолонинг амрини бажариш ва ман қилган нарсаларидан сақланиш рўёбга чиқади. Рўза тутиш кишининг тақвосига қуйидагича таъсир кўрсатади:

• Рўза тутвчи киши кун давомида ейиш, ичиш, аҳли аёли билан яқинлик қилиш ва шу каби нафсини роҳатлантирадиган, Аллоҳ таоло ҳаром қилган ишлардан ўзини сақлайди. Бу билан Аллоҳ таолога қурбат ҳосил қилиб, қилаётган амаллари учун савоб умидида бўлади;
• Рўзадор маълум шартларга биноан Аллоҳ таоло билан аҳдлашиб, унга вафо қилаётганини, Аллоҳ таоло эса бандам аҳдига содиқми, ёки йўқми, деб, уни кузатиб турганини ҳис қилади;
• Рўза шайтонларнинг инсонга бўлган таъсирини кесади. Негаки, ҳадиси шарифга биноан шайтонлар инсонларнинг қонлари оқадиган жойда ҳаракатланади. Қон эса таомлар орқали тўпланади
• Рўзадор тоат-ибодатларни кўпайтиради. Ибодатлар эса тақвони ҳосил қилади
• Бой киши рўза тутиш орқали очлик ва йўқсиллик аламини тотиб кўради. Бу эса уни камбағал, йўқсил оилаларга кенгчилик қилишга ундайди. Бу ҳам тақвони оширадиган унсурлардан ҳисобланади.

Энг асосийси, Рўза Аллоҳ таоло буюрган фарз ибодат бўлгани учун ҳам уни қилишнинг ўзи тақво ҳисобланади.

Ибн Масъуд розияллоҳу анҳу  “Аллоҳ таолога ҳақиқий тақво қилинглар”(Оли Имрон сураси, 102-оят) оятини тафсирида шундай дейдилар: “Ҳақиқий тақво – Аллоҳга исён қилмасдан итоат қилиш, эсдан чиқармасдан ёд этиш, неъматларига куфр қилмасдан шукр этишдир”.

Ҳасан Басрий роҳимаҳуллоҳ айтадилар: “Тақво соҳиблари – ҳаром қилинган ишлардан тийилган ва ўзларига фарз қилинган амалларни адо қилган кишилардир”.

Хулоса ўрнида, бугунги муборак Рамазон ойларида Аллоҳ таоло фарз қилган Рамазон рўзасини тутаётган, бошқа ибодатларни адо этаётган мусулмонларнинг барчасини тақво соҳиблари десак хато қилмаган бўламиз.

Элёржон АҲМАТҚУЛОВ,

ТИИ “Таҳфизул-Қуръон” кафедраси

кабинет мудири.

Ҳурматли мухлислар!

Ўзбекистон мусулмонлари идорасининг расмий портали ижодкорлари Муборак рамазон ойида Сиз азизлар учун «Muslim.uz да аудиокитоб» номли янги рукнни ишга туширди.

Бугундан бошлаб,  «Muslim.uz да аудиокитоб» рукнимиз орқали Ўзбекистон мусулмонлари идораси раиси, муфтий Усмонхон Алимов қаламларига мансуб “Оилада фарзанд тарбияси” китобининг мухлисларга ҳавола этишга тайёрланаётган аудио вариантини тинглаб, баҳраманд бўлишингиз мумкин.

Ушбу аудиокитоб барчамиз учун манфаатли бўлишини Яратгандан сўраб қоламиз!

ЎМИ Матбуот хизмати

ЎМИ Матбуот хизмати

Аввал хабар берганимиздек, айни кунларда Ўзбекистон мусулмонлари идораси раиси, муфтий Усмонхон Алимов ҳазратлари бошчиликларидаги мутасаддилар жойлардаги аҳоли билан бирма-бир суҳбат қилиш, намозхонлар билан мулоқотлар ўтказиш ва имом-домлалар, масжидлар фаолияти билан яқиндан танишиш мақсадида, Андижон вилояти Шаҳрихон туманидаги хизмат сафарларини давом эттиришмоқда.
Бугун 28 май куни муфтий ҳазратлари Шаҳрихон туманидаги “Жўрабой”, “Якка тут” ва “Муҳаммад Розиқбой” жоме масжидлари фаолияти билан танишиб, намозхонлар билан дилдан суҳбат қилдилар.
“Якка тут” жоме масжиди фаолияти билан танишдилар, масжидда намозхонлар учун яратилган шарт-шароитлар, хусусан, кечки пайт таровиҳ намозига келувчи масжид қавми учун ҳозир қилинган қулайликларни кўриб, хурсанд бўлдилар. Масжид имом-хатибига жоме ҳудудини янада обод қилиш, намозхонлар учун имкон қадар қулайликларни кундан кунга кўпайтириб боравериш кераклигини алоҳида таъкидладилар.
Муфтий ҳазратлари муборак ойнинг мағфират даҳасидаги пешин намозини тумандаги “Муҳаммад Розиқбой” жоме масжидида жамоат билан бирга-бирга адо этдилар. Пешин намози ўқиб бўлингач, намозхонлар билан дилдан суҳбат қурилди. Муфтий ҳазрат томонларидан Рамазон ойи фазилати ҳақида мавъиза қилинди. Шунингдек, бугунги кунда диний соҳада олиб борилаётган ижобий ишлар ҳақида ҳам сўз қилинди. Ўз навбатида муфтий ҳазратлари ҳам бугунги тарихий ўзгаришларни қадрига етиш, шукронасини қилиш кераклигини таъкидлаб, бу кунларга етиб келишда, албатта, ёши улуғ инсонларнинг дуолари сабаб эканини айтдилар. Ташрифдан боши кўкка етган нуроний отахонлар муҳтарам Президентимизни, муфтий ҳазратларини, қолаверса, шу каби ишларга ҳисса қўшаётган барча-барча фидойилар ҳақига узундан узун дуои хайрлар қилишди.

Мулоқотда сўзга чиққан намозхонлар бугунги ўзгаришлардан чексиз мамнун эканликларини изҳор қилиб, Рамазон ойида кишиларга ҳозирланган шароитлар, хатми Қуръон ва таровеҳ намозларини юқори кайфиятда ўтказилиши ҳамда халқимизга берилаётган енгилликлар, айниқса қўшни давлатлардаги қариндош-уруғлар билан борди-келди алоқалари анча осонлашгани туфайли барча фуқароларимиз хонадонларида шукроналар айтилиб, дуолар қилинаётганини билдиришди.

Ўзбекистон мусулмонлари идораси Матбуот хизмати