muslim.uz
Дуо кучи (таъсирли воқеа)
Кичик бир болакай денгиз бўйида кўзларини бир нуқтага тикиб ўтирарди. Бир соатдан бери ўтирган бу боланинг ҳоли яқин жойда ўтирган бир қариянинг диққатини ўзига тортди. Қария боланинг ëнига бориб:
- Ҳа, ўғлим, хорманг. Бугун денгиз жуда ҳам чиройлими-а? - деди.
Болакай қарияга қарамасдан:
- Лекин бугун шамол бор. Коптогим денгизга тушиб кетиб, шамол билан анча узоққа кетиб қолди.
- Агар ëш бўлганимда, сузиб бориб коптогингни олиб берардим - деди боланинг ëнига ўтирган қария.
Бола жавоб бермади. Кўз олдидан узоқлашиб кетаëтган коптогига қараб ўтиришда давом этди. Қария сокин овоз билан:
- Умидингни хеч қачон йўқотма. Менимча, дуо қилсанг, яхши бўлади.- деди. Бола қувонч билан:
- Дуо қилсам, коптогим қайтиб келадими? - дея сўради.
- Агар Аллоҳ истаса, қайтиб келади. Агар қайтиб келмаса ҳам дуоларингнинг савоби сенга етади.
Болакай қариянинг гаплари хақида озгина ўйланиб, орқасидан бувасидан ўрганган дуоларни ўқий бошлади. Кейин коптоги қайтиб келиши учун Аллоҳдан ëрдам сўради. Лекин бу унинг дардига дармон бўлмади. У коптокни олиш учун узоқ вақт харакат қилган, хатто байрамда олган пулларини хам копток учун асраб қўйган эди. Ҳозир копток қайтиб келишига биргина имконият шамолнинг ўз йўналишини ўзгартириши эди. Лекин денгиз катта, копток эса кичик.
Кечга яқин хаво ўзгарди. Қуëш ботиши арафасида балиқчилар денгиздан қайта бошлади. Уйига коптоксиз кетишни истамаган болакай қария билан бирга ўтириб балиқчиларни кутарди. Қария балиқни хар доим Шерзод балиқчидан харид қиларди. Кўзи билан Шерзодни излаб топган отахон:
- Овингиз бароридан келган бўлса керак иншоАллоҳ - деди. Шерзод балиқчи ëнидаги қутига ишора қилиб:
- Бу сафар балиқ оз - деди.
- Дуо қилмадингизми? - дея гапга аралашди болакай. -Умидингизни асло йўқотманг.
Шерзод балиқчи болакайнинг бошидан силаб:
- Дуо... Дуо қилсам балиқ тутаманми?
- Тута олмасангиз хам дуоларингизнинг савоби сизга етади. Мен ҳозиргина ўргандим буни.
Шерзод балиқчи бу гапни биринчи маротаба эшитаëтган эди.
- Мен ҳам энди ўргандим. Буни менга кичкина ўқитувчи ўргатди - деди балиқчи.
Бу гапларни эшитиб болакай жуда қувонди. Копток унинг эсидан ҳам чиқиб кетган эди. Балиқчи кемасига қайтиб чиқди ва қўлига бир копток олди. Уни болакайга узатиб:
- Ўқитувчилар хақини адо этиш қийин. Бу коптокни денгиздан топиб олдим - деди.
Болакай худди туш кўраëтгандек эди. Кутилмаган нарсалар бўлаëтган туш. Атрофга қаради. Хаммаси хақиқий. Балиқчи ҳам, кема ҳам, қария ҳам... Копток қўлида. Уни қаттиқ қучоқлаб:
- Мендан рухсатсиз узоққа кетиш йўқ - деди. Дуо қилмаганимда нима бўларди?
Манба: https://t.me/hikmatlar
Қуръон забт этган қалблар: Қуръон қалбини забт этган йигит
Китоб муаллифи Имом Саълабий раҳимаҳуллоҳ айтадилар: “Абу Муҳаммад Халил ибн Аҳмад ибн Муҳаммад ибн Масъуд Музаккар раҳимаҳуллоҳнинг бундай деганларини эшитдим: “Баъзи улуғлардан шундай ҳикоя келтирилган:
“Мансур ибн Аммор айтади: “Бир хароба жойга кирдим. У ерда қўрқув билан намоз ўқиётган йигитни кўрдим. Ичимда: “Албатта, бу йигитда бир гап бор. Эҳтимол, у Аллоҳ азза ва жалланинг валий дўстларидандир” дедим. Намоз ўқиб бўлгунича кутиб турдим. Намозидан салом бергач, унга салом бердим. У алик олди. Унга: “Жаҳаннамда бир водий борлигини билмадингизми? Аллоҳ таоло у ҳақида шундай деган:
كَلَّا إِنَّهَا لَظَى
“Йўқ! Албатта у(жаҳаннам) кучли алангадир”.
نَزَّاعَةً لِّلشَّوَى
“Бошнинг терисини сидириб олувчидир”. (Бош териси шилиб олинган дўзахийга Аллоҳ таоло яна янги тери ато этади. Жаҳаннам ўти эса яна уни шилиб олади ва шу тариқа тўхтовсиз давом этаверади.)
تَدْعُو مَنْ أَدْبَرَ وَتَوَلَّى
“У чақирадир; орқага кетган ва юз ўгирганни”.
(Маориж сураси, 15-17-оятлар).
Оятни эшитган йигит чуқур нафас олди-да, ҳўнграб йиғлаб юборди, оҳ тортди-ю, ҳушидан кетди. Ўзига келганда, менга: “Яна Қуръон оятидан ўқиб беринг!” деди. Мен:
وَقُودُهَا النَّاسُ وَالْحِجَارَةُ
“Ёқилғиси одамлар ва тош бўлган” (Бақара сураси, 24-оят) деган оятни ўқидим. Оятни эшитиши биланоқ жони узилиб, ерга йиқилди.
Либосини кўтариб, кўксини очсам, кўкраги устига:
فَهُوَ فِي عِيشَةٍ رَّاضِيَةٍ
“Бас, у розилик ҳаётидадир”.
فِي جَنَّةٍ عَالِيَةٍ
“Олий жаннатдадир”.
قُطُوفُهَا دَانِيَةٌ
“Унинг мевалари яқиндир” (Ҳааққоҳ сураси, 21-23-оятлар) деган оятлар ёзилганини кўрдим.
Кеч бўлгач, уйқуга ётдим. Тушимда уни кароват устида, бошига тож кийиб ўтирган ҳолда кўрдим. Ундан: “Аллоҳ таоло сени нима қилди?” деб сўрадим. Шунда у: “У Зот менга Бадр аҳлининг савобини берди ва яна зиёда қилди” деб жавоб берди. Мен яна ундан: “Нега сенга уларнинг савоби мислича савоб берди?” десам, у: “Чунки, улар кофирларнинг қиличлари билан ўлдирилдилар. Мен эса Маликул Ғаффорнинг қиличи билан ўлдирилдим” дея жавоб берди”.
Бу қиссани Ёфиъий деган олим “Ровзур раёҳийн фий ҳикаятис солиҳийн” китобида зикр қилган”.
Исҳоқ Саълабийнинг “Қотла-л-Қуръан” номли
асаридан Нозимжон Иминжонов таржимаси
ЎМИ Матбуот хизмати
Ҳаром луқманинг тўрт зарари
Ҳакимул уммат, Ҳазрати Мавлоно Ашраф Али Таҳановий раҳматуллоҳи алайҳ айтадилар:
Ҳаром луқманинг инсонга тўрт зарари бўлади:
1. Қалб нури ўчади.
2. Ёмон ҳаёллар ва васвасалар келади.
3. Ялқовлик ва сусткашлик пайдо бўлади.
4. Солиҳ амалларга рағбати бўлмайди.
("Жазаа-ул аъмаал" китобидан. Абдулқаййум Комил таржимаси)
Манба: https://t.me/hikmatlar
“Ўзбекистонга йўл... Афсонавий миноралар ва бозорлар”
Саудия Арабистонида нашр этиладиган «Аш-Шарқ ал-Авсат» газетаси сиҳифасида “Ўзбекистонга йўл... Афсонавий миноралар ва бозорлар” сарлавҳали мақола босилиб чиқди, деб хабар бермоқда “Жаҳон” АА.
Унда таъкидланишича, Ўзбекистон бўйлаб саёҳат республиканинг бой тарихи билан танишиш учун ажойиб имконият яратади. Саёҳат чоғида Самарқанд, Бухоро ва Хоразмнинг мўъживазий гўзаллиги, интеллектуал бойлиги ва кўп маданиятлиликни ўзида жо этган қадриятларидан баҳраманд бўлиш мумкин.
Нашр сайёҳлар учун визуал, интеллектуал ва маданий таассуротлар эшигини очадиган энг муҳим бешта сабабга асосий эътибор қаратган.
Биринчиси – бир неча юз йиллар давомида нафақат савдогарлар, балки рассомлар, шоирлар, диний алломалару мутафаккирлар Шарқдан Ғарбга ва аксинча йўналишда саёҳат қилган, маданиятлар бойишининг чорраҳаси бўлиб хизмат қилган кўҳна Буюк Ипак йўли билан танишиш учун ажойиб имкониятлиги.
Иккинчидан, Ўзбекистоннинг ЮНЕСКО Бутунжаҳон мероси рўйхатидан жой олган тарихий шаҳарлари ва ёдгорликлари билан танишиш. Масалан, Регистон майдони Ипак йўлининг йирик савдо ва маданий маркази ҳисобланадиган афсонавий Самарқанднинг юраги ва мўъжизасидир.
Бундан ташқари, Ўзбекистон табиий гўзалликда ҳам ноёб ва хилмма-хиллиги билан ажралиб туради. Бу, айниқса, экосайёҳлик ишқибозларини ўзига жалб қилади. Саудия Арабистони газетасининг тасдиқлашича, бу учинчи сабаб ҳисобланади.
Тўртинчиси, деб ёзади нашр, ўзбек халқининг меҳмондўстлиги, бетакрор таъми ва мазалилиги билан ажралиб турадиган миллий ошхонаси ҳамда серқуёш ўлканинг мева-чеваларга мўл-кўллиги.
Ўзбекистон миллий санъат ихлосмандлари учун ҳам ажойиб мамлакат эканлиги бешинчи сабаб ҳисобланади. Чунки ўзбеклар замини гавжум бозорлари, ажойиб хиёбонлари, қўлда тайёрланадиган ноёб ҳунармандчилик маҳсулотлари, қоғоз, тери ва ёғочдан тайёрланадиган ранг-баранг буюмлари билан ҳам машҳур.
Мухтасар қилиб айтганда, мамлакатимизнинг сайёҳлик нуқтаи назаридан нақадар жозибадор эканлиги ушбу мақолада атрофлича очиб берилган.
Ўзбекистон мусулмонлар идораси матбуот хизмати
Шавкат Мирзиёев Илҳом Алиевга таъзия билдирди
Ўзбекистон Республикаси Президенти Шавкат Мирзиёев кеча, 2 март куни Озарбайжон Республикаси Президенти Илҳом Алиев ва қардош Озарбайжон халқига Боку шаҳрида рўй берган ёнғин натижасида кўплаб одамларнинг ҳаётдан кўз юмгани муносабати билан самимий ҳамдардлик билдирди.
Бу ҳақда Ўзбекистон Республикаси Президентининг расмий веб-сайтида маълум қилинди.
ЎМИ Матбуот хизмати
Мақолалар
