www.muslimuz
Нишонга урилган гаплар: “Инсонлар сендан узоқлашиб кетсалар ҳам рост гапиришдан қўрқма!”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Университет таълими кишига ақл эмас, балки вазифа (ишга жойлашишга имкон) беради.
Алберт Эйнштейн
*****
Ҳўкизга олди томонидан, эшакка орқа томонидан, аҳмоққа ҳеч қайси томонидан яқин келма.
“Тарих муҳрлаган сўзлар”
*****
Онгсиз халқ куни келиб виждонсиз оммавий ахборот воситаси етаклайдиган қўйлар подасига айланади.
“Тарих муҳрлаган сўзлар”
*****
Эҳтимол ишга жойлашишинг кечикаётгандир, эҳтимол уйланишинг кечикаётгандир, эҳтимол беморликдан тузалишинг кечикаётгандир. Лекин бу синовларга сабр қилганинг учун ажринг асло кечикмайди.
“Ҳикмат дурдоналари”
*****
Бу замондаги кўплаб одамлар ҳақида:
Сиқилсанг, сенга тасалли берадиган инсонни тополмайсан.
Хурсанд бўлсанг, сени табриклайдиган инсонни тополмайсан.
Йиғласанг, кўз ёшингни артиб қўядиган инсонни топа олмайсан.
Лекин хато қилсанг, ҳамма сенга тикилиб турганини кўрасан.
“Ҳикмат дурдоналари”
*****
Одамларни ўзингга жалб этиш учун ёлғон гапирма! Инсонлар сендан узоқлашиб кетсалар ҳам рост гапиришдан қўрқма!
“Ҳикмат дурдоналари”
Тўплаб, таржима қилувчи Нозимжон Иминжонов
Али Тантовий раҳимаҳуллоҳнинг фикрлари
Албатта, сен Рамазон ойида Масжидул Ҳаромда 50 минг намозхонларнинг қўлларида Қуръон ушлаб, уни ўқиб ўтирганларини кўрасан. Лекин улардан 50 кишининг ўзи ўқиётган оятларини тушунишини ёки улар ҳақида тафаккур қилиб кўришини топмайсан.
*****
Агар битта товуқ атрофига иккита хўроз келиб қолса, иккиси ҳам товуқни ҳимоя қилиб, шеригидан рашк қилиб бир-бири билан урушади.
Искандария шаҳрининг денгиз қирғоқларида ва Байрутда мусулмон эркаклар ўзларининг муслима аёлларини бегона эркаклардан рашк қилмайдилар.
*****
Эркакнинг аёлнинг иффатига бўлган ҳамласи бўрининг қўйга бўлган ҳамласидан ва қўйнинг ўлишидан юз маротаба оғирроқдир.
*****
Чекинишдан, мағлубиятдан олинадиган ибрат ғалабадан олинадиган ибратдан каттароқ бўлади.
*****
Лаззатли нарсаларнинг барчасини тотиб, тажриба қилиб кўрдим. Китоб билан холи қолишдан-да ёқимлироқ нарсани кўрмадим.
*****
Шаҳарлар, мамлакатлар ҳам одамларга ўхшайди. Туғилади, ўлади, ёш бўлади, кексаяди, азиз бўлади, хор бўлади.
*****
أَفَلَا يَتَدَبَّرُونَ الْقُرْآنَ أَمْ عَلَى قُلُوبٍ أَقْفَالُهَا
“Қуръонни тадаббур ила ўйлаб кўрмасларми? Ёки қалбларида қулф борми?” (Ҳар бир оятни, ҳар бир сўзни чуқур тушунишга ҳаракат қилиш Қуръонни тадаббур қилишдир. Ўшанда парда кўтарилади, ҳамма нарса равшанлашади, қалб ҳаловот топади, виждон мусаффо бўлади. “Қалбларида қулф” бўлса, унда ҳамма нарса берк, уларга ҳеч нарса, жумладан, Қуръон нури ҳам кирмайди.) (Муҳаммад сураси, 24-оят).
Қуръонда айтилаётган гапларни тушунишимиз учун бу қулфларни қачон синдирамиз?!
*****
Ким мен(инг ёзганларим)дан бирор нарса ўқиса ёки мен(инг ёзганларим)дан бирор нарса эшитса, ундан менга бўладиган мукофот ҳаққимга дуо қилишидир.
Нозимжон Иминжонов таржимаси
Ҳар бир ишни мушоҳада қилинг!
Мана, эртадан 2019 йил ҳам бошланaди. Бу дегани умримизнинг яна бир йили тугаб, янги саҳифаси очилмоқда. Шунинг учун инсон барча ўтган умридаги ишлардан хулоса қилиб, 2019 йилни икки дунё саодати учун захира бўладиган амаллар билан ўтказишни мақсад қилиши лозим. Мўътабар зотлар: “Кимни икки куни бир хил бўлса, у кунини қадрига етмабди”, деганлар.
Демак, киши янги кунни қадрига етиб, уни ўтган кунидан кўра кўпроқ яхши амаллар билан ўтказишга ҳаракат қилиши лозим. Бажарган ишлари билан кифояланиб, ҳаракатдан тўхташ – оқил кишининг иши эмас. Шу нуқтаи назардан янги йилга савобли амаллар учун захира бўладиган умрнинг бир қисми, деб эътибор билан қараш, янги режалар тузиш, яхши ниятлар қилиш муҳим.
Инсон қилган тижоратини йил якуни бўйича ҳисоб-китоб қилиб, фойда ёки зарарни мушоҳада қилади, фойдасига қувонади, зарарига қайғуради ва яна келгуси иши учун яхши ниятда янги режалар тузади. Инсон тижорати учун шунча жон куйдирганидек, ўтган умри учун ҳам жон койитиб, ўзига-ўзи саволлар бериши керак.
Ҳар куни эрта тонгдан яхши ишлар бажаришни ният қиляпмизми? Кеч тушгач, қилган ниятларимизнинг қанчаси амалга ошди, қанчаси ошмади, ўйлаб кўряпмизми? Эришган ютуқларимиз учун Аллоҳ таолога ҳамд айтиб, хато-камчиликларимизни тўғрилаш тадоригини кўряпмизми?
Шу ўринда айтиш керакки, ҳар бир янги йилнинг аввалида янги режалар тузиш ва эзгу ниятлар билдириш дунё халқларининг одатига айланган. Буни бирор диний байрам эмаслиги, уни бутун жаҳон умумэътироф этган байрам эканини тушуниш керак. Шунингдек, мана шундай хурсандчилик дамларида қилинган ишларни сарҳисоб этиш, эришилган натижаларга шукрона айтиш, орзу-интилишлар қилиш ажойиб анъанадир.
Масалан савдода касодга учралса, пул йўқотилади. Аммо унинг ўрнини тўлдирса бўлади, ҳаёт тугади дегани эмас. Лекин зое қилинган вақтни ортга қайтариб бўлмайди. Нега энди бахт-саодатга эришишимиз гарови бўлган умр неъматига шундай эътибор бермаймиз? Ҳазрати Умар розияллоҳу анҳу “Ҳисоб-китоб қилинишингиздан олдин ўзингизни ўзингиз ҳисоб-китоб қилинг”, деганлар. Шундай экан, инсон хатолари учун ўзини тергаб, ютуқлари учун Аллоҳга ҳамд айтиши ва яна яхши амаллар қилиш учун ниятлар қилиши лозим.
Имом Бухорий ҳазратларининг “ал-Жомеъ ас-Саҳиҳ” асарларида келтирилган саҳиҳ ҳадисда “Барча амаллар ниятларга боғлиқ, ҳар бир кишига фақат ният қилган нарсаси берилади”, деб марҳамат қилинган. Демак, ҳар бир ишнинг сабаби – ният, самараси эса амалдир.
Шу учун ҳам мўйсафидларимиз дуога қўл очганда Аллоҳ таолодан эзгу ниятларимизга етказишини сўрайдилар. Ниятни тўғри қилиб, мақсадни аниқ белгилаб олган инсон ана шу ниятига етиш учун Аллоҳга таваккал қилиб, доимо ҳаракатда бўлади.
Ўзбекистон мусулмонлари идораси Матбуот хизмати
Ўзбекистонда диний-маърифий соҳадаги йил сарҳисоби
Ўтаётган йилни сарҳисоб этиш, иш фаолиятни таҳлил қилиш, режалар тузиб, келгуси йил учун мустаҳкам пойдевор тайёрлаш яхши анъанага айланган. Ҳар бир йилнинг ўзига хос номда аталиши эса давлатимиз тараққиётининг муҳим асоси бўлмоқда.
Муҳтарам Президентимиз раҳнамоликларида Қуръон мусобақалари билан бошланган 2018 йил қут-баракали ўтди, Аллоҳ таолонинг неъматлари бисёр бўлди. Юртбошимизнинг диний-маърифий соҳани такомиллаштириш тўғрисидаги бир қатор фармон ва қарорлари асосида:
– Халқаро ислом академияси таъсис этилди;
– Халқаро Ислом цивилизация маркази ташкил этилди;
– “Вақф” хайрия жамоат фонди тузилди;
– Ҳадис илми мактаби номли олий диний таълим муассаси иш бошлади;
– масжид-мадрасаларни давлат рўйхатидан ўтказишда бир қатор имтиёз ва енгилликлар берилди;
– 13 та янги масжид очилди, 39 таси янгидан қурилди, 100 га яқини капитал таъмирланди;
– Ҳаж қилувчилар сони 7200 дан ошди, умра сафарига чекланмаган миқдорда зиёратчилар бориши мумкин бўлди;
– Рамазон ойида 1149 та масжидда хатми Қуръон ўтказилди;
– “Қуръони карим ва тажвид” ҳамда “Араб тили” курслари ташкил этилди, бундан элу халқимиз жуда ҳам мамнун бўлди.
Диний соҳада амалга оширилаётган саъй-ҳаракатларни бутун дунё ҳамжамияти эътироф этмоқда. АҚШ Давлат департаменти Ўзбекистонда диний эркинлик йўлидаги ишларни тан олди. БМТ сессиясида Ўзбекистон ташаббуси билан “Маърифат ва диний бағрикенглик” номли муҳим ҳужжат қабул қилинди.
Юртимиз уламолари халқаро анжуманларда муносиб иштирок этди. Саудия Арабистони, Франция, Испания, Россия, Туркия ва бошқа кўплаб давлатлар мезбонлик қилган нуфузли халқаро тадбирларда вакилларимиз муваффақиятли қатнашди.
Ислом олами билан алоқалар мустаҳкамланиб, мусулмон дунёсининг энг мўътабар уламолари ўлкамизга ташриф буюришди. Азҳари шариф шайхи Аҳмад Тоййиб, йирик муҳаддис Муҳаммад Аввома ва тариқат пешвоси Зулфиқор Аҳмад Нақшбандий каби зотларнинг ташрифи ўзгача файз бахш этди.
2018 йил 28 декабрдаги Президентимиз Мурожаатномасидан келиб чиқсак, 2019 йилни – “Фаол инвестициялар ва ижтимоий ривожланиш йили” деб эълон қилиниши мамлакатимизда тобора куч-қувватга тўлиб бораётган ислоҳотларнинг давоми бўлади. Бошқача айтганда, келгуси йил жамиятимиз ҳаётида инвестиция ва ижтимоий соҳадаги ривожланиш янги босқичига кўтарилади, иншо Аллоҳ.
Ушбу йўналишда Ўзбекистон мусулмонлари идораси ҳам ўзининг муносиб ҳиссасини қўшишга тайёргарлик кўрмоқда. Хусусан, “Вақф” хайрия жамоат фонди аҳолининг ижтимоий ҳимояга муҳтож кишиларини қўллаб-қувватлаш билан бир қаторда жамиятни ижтимоий ривожлантириш лойиҳаларини ҳам ҳаётга тадбиқ этишни ўз олдига мақсад қилган. Сармоядорлар билан ҳам ҳамкорлик ўрнатишни назарда тутган.
Юқорида қайд этилганлар 2018 йилдаги кенг кўламли ишларнинг мухтасар баёни эди. Аллоҳ таоло мана шундай неъматларини янада бардавом айласин.
Ўзбекистон мусулмонлари идораси Матбуот хизмати
Жумадан жумагача
Саудиялик меҳмонлар эътирофи
14 ноябрь куни Саудия Арабистони Подшоҳлигидан бир гуруҳ меҳмонлар юртимизга ташриф буюришди. Мартабали меҳмонлар Тошкент шаҳридаги “Минор” жоме масжидида жума намозини мўмин-мусулмонларимиз билан бирга-бирга адо этдилар. Шундан сўнг, Диний идора Масжидлар бўлими мудири Раҳимберди Раҳмонов томонидан саудиялик меҳмонларга ушбу муҳташам жоме масжиднинг фаолияти, намозхонлар кайфияти, олиб борилаётган ободонлаштириш ишлари ва юртимиздаги диний-маърифий соҳадаги улкан ўзгаришлар ҳақида сўзлаб берди. Подшоҳликдан келган меҳмонлар, ҳақиқатан, Ўзбекистон заминида сўнгги йилларда катта янгиланишлар ва ижроотлар бўлаётганини эътироф этишди.
Отинойилар учун ўқув-семинари ташкил этилди
11-14 декабрь кунлари Фарғона вилоятида Дин ишлари бўйича қўмита, Ўзбекистон Мусулмонлари идораси ва вилоят ҳокимлиги билан ҳамкорликда отинойилар учун ўқув-семинар ташкил этилди. Семинарни Ўзбекистон Мусулмонлари идораси, Халқаро Ислом академияси докторантлари ва Дин ишлари бўйича қўмита ходимларидан иборат мутахассислар иштирок этиб, белгиланган дастур асосида маърузалар ва давра суҳбатлари ўтказди. Ўқув-семинар долзарб мавзуларга бой савол-жавоблар асосида бўлиб ўтди.
Нукусдаги билим юртида тингловчиларга сертификат топширилди
Ўзбекистон мусулмонлари идорасининг буйруғига мувофиқ Нукус шаҳридаги Муҳаммад ибн Аҳмад ал-Беруний ўрта махсус ислом билим юртида ташкил этилган “Қуръони карим ва тажвид” ўқув курсининг иккинчи давра ўқув машғулотлари якунланди. Жорий йилнинг 10 декбрь куни Муҳаммад ибн Аҳмад ал-Беруний ўрта махсус ислом билим юртида мазкур ўқув курсларининг иккинчи давра тингловчиларига билим юрти томонидан “Қуръони Карим ва тажвид курси”ни якунлаганини тасдиқловчи сертификатлар топширилди.
Нургоҳо Сукамдани: “Асосий мақсад фойда олиш эмас, Аллоҳ ризолигини топиш”
18 декабрь куни Ўзбекистон мусулмонлари идораси раиси, муфтий Усмонхон Алимов ҳазратлари мамлакатимизга ташриф буюрган Индонезиянинг “Саҳид” номли вақф фонди раҳбари Нургоҳо Сукамданини қабул қилдилар. Меҳмонга Индонезиядаги “Истиқлол” музейи масъул ходими жаноб Сайфуддин ва диний таълим муассасалари мажмуаси раҳбари Анда Хоним ҳамроҳлик қилди. Самимий мулоқот чоғида Нургоҳо Сукамдани жаноблари Малайзия фонди томонидан Ўзбекистонда қурилаётган меҳмонхоналар, зиёрат туризмини ривожлантириш, ҳалол стандартлаш, диний таълим муассасалари талабаларини ўқитиш борасида ҳамкорлик қилиш ва “Истиқлол” музейида Ўзбекистон павилионини ташкил этиш таклифларини билдирди. Шунингдек, Ўзбекистондаги диний таълим бериш тизимига алоҳида қизиқиш билдирди. Нургоҳо Сукамдани жаноблари мана шундай ишларни амалга оширишдан асосий мақсад фойда олиш эмас, Аллоҳ ризолигини топиш эканини билдирди.
Қашқадарёда Туркия агентлиги иккита тарихий обидани таъмирлайди
Қашқадарё вилоятида 2019 йилда Туркия давлатининг ТИКА агентлиги кўмагида Китоб туманидаги Хўжа Илм Кон ва Мавлоно Дарвеш Муҳаммад Вахшуворий мажмуаларини реконструкция ва реставрация қилиш ишлари амалга оширилади. Қашқадарё вилоятидаги тарихий-маданий обидаларни реставрация қилиш ва ҳудудларни ободонлаштириш дастурига кўра Қарши туманидаги Имом Абу Муъин ан-Насафий мажмуаси ва Касби туманидаги Султон Мир Ҳайдар мажмуасини реставрация қилиш ишлари жорий йилда бошланган бўлиб, 2019 йилда якунланиши кўзда тутилган. Маълумот учун, айни пайтда Қашқадарё вилоятида 1 321 та маданий мерос объекти рўйхатга олинган бўлиб, мавжуд зиёратгоҳларни ободонлаштириш натижасида 2018 йилда сайёҳлар оқими ўтган йилга нисбатан 2 баробарга ортган.
Қуръони каримнинг 900 йиллик нусхаси топилди
Эрон Ислом Республикасининг Теҳрон шаҳридаги музейда Қуръони каримнинг 12 асрга тегишли нусхаси намойиш этилди. Жорий йилнинг 16 декабрь куни Реза Аббосий музейида тадқиқотчилар ва қўлёзма мутахассислари иштирок этган анжуманда қадимий Мусҳаф кўздан кечирилди. Ушбу нусха 1150 йилга тегишли бўлиб, хаттот Абул Фаҳр ибн Абилфазл ал Зафароний томонидан кўчирилган ва унга Зафароний нусхаси деб ном берилган.
Мадридда Ислом маданияти маркази очилди
Испания Қироллигининг пойтахти бўлган Мадрид шаҳрида Ислом маданияти ва диний бағрикенглик маркази ўз фаолиятини бошлади. Ушбу маросимда Испания олий таълим муассасаларининг ўқитувчилари ва мамлакатда фаолият олиб бораётган дипломатик ваколатхона раҳбарлари иштирок этган. Бирлашган Араб Амирликларининг Диний бағрикенглик вазири Шайх Наҳян бин Муборак ҳам Марказнинг очилиш маросимида иштирок этди ва нутқ сўзлади. вазир уз нутқида бу лойиҳа жаҳонда турли дин вакиллари ўртасида ҳамжиҳатликни таъминлашни мақсад қилганини қайд этди.
АҚШда масжидлар "очиқ масжидлар куни"ни ташкил этишди
АҚШнинг Огайо штатидаги масжидларда жорий йилнинг 16 декабрь куни "Очиқ масжидлар куни" ташкил этилди.Огайодаги Марказий Огайо масжидида ҳам ушбу тадбир кенг миқёсда ташкил этилди. Ушбу тадбир Огайо штатида тарихида илк бор ўтказилаётгани қайд этилган. Лойиҳадан кўзланган мақсад мусулмонларга нисбатан жамоатчиликда шаклланган фикрни ўзгартириш экани таъкидланган. Штат аҳолиси эътиқодлараро ҳамкорлик масаласида қилинган ушбу ғояни қўллаб-қувватлашган. Ташриф буюрганлар енгил таомлардан истеъмол қилишлари, мусулмонлар ҳаёти билан танишишлари ва Ислом дини ҳақида маълумот олишларига имконият яратилган.
"Мурувват карвони" сирдарёликлар кўнглини шод қилди
15 декабрь куни «Вақф» хайрия жамоат фонди томонидан “Мурувват карвони”нинг навбатдаги хайрия юклари Сирдарё вилоятига етказилди. Ушбу вилоятда ўтказилган хайрия тадбирлари давомида мухтожларга 20 дона ногиронлик аравачаси, 315 метр аёллар газламаси, 500 кг шакар, 500 литр ёғ, 74 дона Росулуллоҳ рамазонда аудио диски, 296 дона китоблар (Ҳазрати Қусам ибн Аббос-Шоҳизинда, Тафсири Ирфон (19-22 жуз), (22-25 жуз), (26-28 жуз)) китоблари ва пул маблағлари беғараз тақдим этилди. Эслатиб ўтамиз “Вақф” фонди хайру эҳсонингизни ўз эгаларига етказишда очиқлик ва холисликни кафолатлайди, маблағларни шаффофлик асосида ҳақдорларга етказилаётганини vaqf.uz сайти орқали кузатиб боринг.
ЎМИ матбуот хизмати
Мақолалар
