— Мен маҳаллаларда уйма-уй юриб, кийим-кечак, майда-чуйда буюмлар сотиб, оила тебратаман. Кўпинча одамлар насияга олади, кейин пулларни йиғишга борганимда баъзилар имкони бўлса ҳам, қарзини тўламайди ёки орқага суради. Динимизда бундай ҳолатнинг хукми қандай?

— Ҳожати тушганда ўзини хору зор тутиб, синиқлик кўрсатиб, ялиниб-ёлвориб юрган одамлардан баъзилари иши битиб, ҳожати раво бўлганидан кейин қарзни инкор қилиш даражасигача етиб бормоқдалар. Аллоҳ таоло бундай марҳамат қилади: “Эй иймон келтирганлар! Бир-бирларингизнинг молларингизни ботил йўл билан еманг” (Нисо сураси, 29-оят).

Бировнинг молини ботил йўл билан ейишга рибо, қимор, порахўрлик алдамчилик, нархни сунъий равишда кўтариш, ўғрилик, қиморбозлик, товламачилик, қарзни инкор қилиш каби ишлар киради. Шу билан бирга, қарздан тонаётган тараф билиб қўйсинки, охиратдаги ашаддий азобларнинг устига бошқа нарсалар ҳам мавжуд.

Абу Мусо розияллоҳу анҳудан ривоят қилинади. Набий соллаллоҳу алайҳи васаллам: “Аллоҳнинг наздида Аллоҳ наҳйи қилган кабира гуноҳлардан кейинги энг оғир гуноҳ бир кишининг зиммасидаги қарзини узишга нарса қолдирмай ўлиб, у Зотга рўбарў бўлишидир”, дедилар (Имом Абу Довуд ривояти).

Бировдан олган қарзини узмасдан ёки уни узишга имкон қолдирмасдан ўлиб кетишдан оғир нарса йўқлигини баён қилиш учун бу сўзлардан ортиқ ифода топилмаса керак. Қарзни узишга қодир бўлатуриб, бермай юриш, ҳадиси шарифда айтилганидек, ҳақ эгасига зулм қилишдир. Валлоҳу аълам!

Хабарингиз бор, Қорақалпоғистон Республикасига етук уламолардан ташкил топган делегация ташриф буюриб, олис туманлардаги масжид, маҳаллаларга ташриф буюриб, масжид қавми, мўйсафид отахонлар, муҳтарам аҳоли вакиллари ва ёшлар билан учрашувлар ўтказмоқдалар.

Бугун мазкур делегация аъзоларидан Тошкент шаҳар “Ракат” масжиди имом-хатиби домла Раббимқул Муҳаммадиев Нукус туманида жойлашган "Имом Эшон" масжидига азиз намозхонлар билан учрашиш, дилдан суҳбатлашиш мақсадида ташриф буюрдилар. Дастлаб пешин намозини адо этдилар, сўнгра "Тинчлик – олий неъмат" мавзусида намозхонларга ваъз-насиҳат қилиб бердилар. Унда динимизда тинчликни асраш, унинг қадрига етиш, тинчлик учун ҳисса қўшиш улуғ савобли амаллардан экани алоҳида таъкидланди.

Маърифий суҳбатлар савол-жавобларга уланиб, намозхонларда катта таассурот қолдирди. Уламоларимизнинг илмий учрашув ва суҳбатлари давом этмоқда...

Ўзбекистон мусулмонлари идораси Матбуот хизмати

Бугун, 14 сентябрь куни юртимиздаги бир гуруҳ таниқли уламоларнинг Қорақалпоғистон Республикасига ташрифи бошланади. Етук уламолардан ташкил топган делегация ташриф буюриб, олис туманлардаги масжид, маҳаллаларга ташриф буюриб, масжид қавми, мўйсафид отахонлар, муҳтарам аҳоли вакиллари ва ёшлар билан учрашувлар ўтказмоқдалар.

Ана шундай файзли учрашувларнинг бири Хужайли тумани "Пирим Эшон бобо" масжидида бўлиб ўтди. Ушбу жомега Ўзбекистон мусулмонлари идораси раисининг маслаҳатчиси, “Ҳазрати Али” масжиди имом-хатиби Салоҳиддин домла Шарипов ташриф буюрдилар. Пешин намозини намозхонлар билан биргаликда адо этиб бўлгач, муҳтарам Салоҳиддин домла "Исломда биродарлик, ака-укалик ришталари" мавзусида маъруза килдилар.

Аллоҳ таолонинг Каломи – Қуръони каримдаги "Албатта, мўминлар динда ўзаро биродардирлар" оятининг мазмун-моҳиятини тафсир қилиб бердилар. Қолаверса, Расулуллоҳ соллаллоҳу алайҳи васалламнинг: "Аллоҳнинг бандалари, бир-бирингизга биродар бўлинглар. Мусулмон мусулмоннинг биродаридир. Унга зулм ҳам қилмайди, ёрдамсиз ташлаб ҳам қўймайди ва таҳқирламайди ҳам", деган ҳадисларини шарҳлаб бердилар.

Шу тариқа маърифий суҳбатлар савол-жавобларга уланиб, намозхонларда катта таассурот қолдирди.

Аллоҳ таоло муҳтарам уламоларимизнинг сафарини хайрли ва манфаатли қилсин!

Ўзбекистон мусулмонлари идораси Матбуот хизмати

Қорақалпоғистон сафари давомида “Вақф” хайрия жамоат фонди раиси, Тошкент шаҳар “Шайх Зайниддин” масжиди имом-хатиби Яҳё домла Абдураҳмонов Хўжайли туманидаги “Муҳаммад Карим” жоме масжидида пешин намозини жамоат билан адо этди. Сўнг масжид қавмига юртимизда диний-маърифий соҳадаги хайрли ишлар ҳақида сўзлади. Маъруза давомида “Ҳалол касбнинг баракаси” мавзусида сермазмун маъруза қилиб бердилар.

Дарҳақиқат, Ислом дини ҳалол меҳнат қилиш, касб-кор қилишни улуғлади ва унга ажр-савоблар ваъда қилди.
Қуръони каримда бундай дейилади: “Бас, қачонки, намоз адо қилингач, ерда тарқалиб, Аллоҳнинг фазли (ризқи)дан истайверингиз! Аллоҳни кўп ёд этингиз! Шояд (шунда) нажот топсангиз” (Жумъа сураси 10-оят).

Рофеъ ибн Хадиж разияллоҳу анҳудан ривоят қилинади. Пайғамбаримиз саллаллоҳу алайҳи васалламдан энг яхши касб қайси, деб сўрашди. У Зот алайҳиссалом: “Энг яхши касб – киши ўз қўли билан касб қилиши ва ҳар бир яхши савдо”, – деб жавоб бердилар (Имом Аҳмад ривоятлари).

Соғлом, меҳнатга лаёқатли кишининг ўзи ва аҳли аёли учун касб-кор қилиб мол топиши – асосий фарзлардан кейинги фарздир. Лекин касбу кор ҳам фарз экан деб, асосий ибодатларни четга суриб қўйилмайди.

Мусулмон киши зиммасидаги оила аҳлини таъминотсиз қолдириб, касб-кор қилишни ташлаши ёки тиланчилик йўлига ўтиши мумкин эмас, балки ҳалол меҳнат қилиши керак. Кишининг касби одамларнинг кўзига ҳар қанча ҳақир кўринмасин, Аллоҳ таолонинг наздида мақбул ва севимлидир.

Мўмин киши ҳалол касб танлаб, пок йўллар билан мол топиши даркор. Ҳаром ва шубҳали моллардан қочиши керак. Зеро Қиёматда киши қаердан топиб, қаерга сарфлаганини ҳисобини бермагунча, оёқлари ўрнидан жилмайди.

Маърифий суҳбат давомида йиғилганлар ўзларини қизиқтирган саволларга жавоб олди. Охирда хайрли дуолар қилинди.

Ўзбекистон мусулмонлари идораси матбуот хизмати