muslim.uz
Муфтий Усмонхон Алимов ҳазратлари халқаро анжуманда нутқ сўзлади
Шу йил 24 сентябрь куни Ўзбекистон мусулмонлари идораси раиси, муфтий Усмонхон Алимов ҳазратлари Москва шаҳрида ўтказилган “Глобал дунёдаги ислом: мусулмон мероси ва маданиятлараро мулоқот” номли халқаро анжуманда иштирок этдилар ва нутқ сўзладилар.
Муфтий Усмонхон Алимов ҳазратлари ўз маърузаларида Ўзбекистон билан Россия ўртасидаги ҳамкорлик алоқалари барча соҳалар қатори диний жабҳада ҳам изчил ривожланиб бораётгани, халқларимиз ўртасидаги дўстлик ришталари янада мустаҳкамланаётгани ва икки томонлама муносабатлар янги босқичга кўтарилганига алоҳида урғу бердилар.
Муфтий ҳазратлари анжуман иштирокчилари диққатини ҳозирги кунда барча уламоларнинг асосий саъй-ҳаракатлари муборак Ислом динининг софлигини асраш, миллатлараро тотувликни таъминлаш ва тинчликни қадрлаш эканига қаратдилар.
Дарҳақиқат, Ислом динининг эзгу таълимотларини барчага гўзал шаклда етказиш савоби улуғ амаллардан ҳисобланади. Аллоҳ таоло Қуръони каримда Ўз динига хизмат қилувчиларни шундай ифода этади: “Эй, имон келтирганлар! Агар сизлар Аллоҳга ёрдам берсангиз (динининг ривожи учун ҳаракат қилсангиз), У ҳам сизларга ёрдам берур ва қадамларингизни собит (барқарор) қилур” (Муҳаммад, 7).
Жаҳоннинг мусулмон уламоларининг ҳамкорликдаги бундай саъй-ҳаракатлари Ислом динининг асл қадриятлари ва инсонпарварлик ғояларини тарғиб этиш ҳамда турли хатарларга қарши курашишда жуда ҳам муҳим эканини, - муфтий ҳазратлари алоҳида қайд этдилар.
Халқаро анжуманда Россия Федерацияси мусулмонлари диний идораси раиси, муфтий, шайх Равил Гайнутдин, Туркия диёнат ишлари раиси, профессор Али Эрбош, Миср вақф ишлари вазири Муҳаммад Мухтор, Уммон вақф ишлари вазири Абдулла Муҳаммад ас-Салимий, Сурия муфтийси Аҳмад Ҳассун, Миср муфтийси Шавқий Аллом ва Афғонистон ҳаж ва вақф ишлари вазири Абдулҳаким Мониб каби йирик давлат ва дин арбоблари нутқ қилишди.
Ўзбекистон мусулмонлари идораси Матбуот хизмати
Афв - оилаларга шодлик улашаётган хайрли ташаббус
Халқимизда “Беайб Парвардигор” деган ҳикматли гап бор. Буни одатда билиб – билмай айбли иш содир қилган кишига нисбатан ишлатамиз. Негаки, инсон хатодан холи эмас. Ана шундай хатогарчиликка йўл қўйган, гуноҳ ишларни содир этган, адашиб жиноят кўчасига кириб қолган кишиларнинг хатоларини кечириш, афв этиш, ўз хулқ-атворини ўнглаб олиши учун унга имкон бериш энг олий фазилатлардан саналади.
Авф бу содир этилган гуноҳини ўз вақтида тан олган ва ундан вақт ўтказмай тавба қилган мўмин кишидир.
Аллоҳ таоло Қуръони каримда: “Агар сизлар (уларни) афв этсангизлар, койимасангизлар ва кечирсангизлар, у ҳолда, албатта, Аллоҳ (ҳам) мағфиратли ва раҳмлидир” (Тағобун, 14) деб таълим беради.
Куни кеча пойтахтимизнинг Миробод тумани Сарикўл маҳалласида яшовчи муқаддам содир этган жинояти учун жазога маҳкум этилган, бироқ кейинчалик Президентимизнинг афв эълон қилиш тўғрисидаги фармонига биноан жазодан озод этилган Нодир Султонов хонадонида бўлдик. Оила аъзолари, айниқса, онасининг севинчи чексиз. Ҳукуматимизнинг халқпарварлик, кечиримлилик сиёсати сабаб дилбанди яна бағрига қайтди. Ана шу онларда динимизга хос бўлган афв эта олиш каби фазилатнинг ҳаётда ўз йўлидан тойиган инсон ўз қаддини тутишида қанчалар зарурлигини тушуниб етасан киши.
Ўтмишдаги хатоларига бугун чин пушаймонда бўлган Нодирбек имом-хатиб, маҳалла аҳли ва мутасадди ташкилот вакиллари томонидан кўрсатилган ижтимоий кўмак натижасида жамият ҳаётига фаол киришиб кетган. Қурилиш сохасида хизмат қилиб, мамлактимиздаги жадал бунёдкорлик ишларида ўз ҳиссасини қўшмоқда. Мамлакат она эртаю кеч дуода: бағрикенг юртнинг равнақи, фарзанду аржумандларининг бахт-саодатини, ҳалол ва баракотли ризқини Ҳақ таъолодан сўрайди.
Одил Холмуродов
Миробод тумани бош имом-хатиби
Муфтий Усмонхон Алимов ҳазратлари Шайх Равил Гайнутдинга табрик йўллади
بسم الله الرحمن الرحيم
Ҳурматли, Россия Федерацияси мусулмонлари диний идораси раиси, муфтий, шайх Равил Гайнутдин жаноблари!
Сизни Россия Федерацияси мусулмонлари диний идорасининг VII қурултойида Россия Федерацияси мусулмонлари диний идораси раиси, муфтий этиб сайланганингиз билан самимий муборакбод этаман.
Ушбу шарафли ва машаққатли вазифани адо этишингизда, Аллоҳ таборака ва таолодан Сизга куч-қувват ва улкан зафарлар тилайман.
Маълумки, Ўзбекистон ва Россия халқлари азалдан дўсту биродарликда аҳил-иноқ яшаб келишган. Оғир дамларда бир-бирига ёрдам қўлини чўзган, ҳол-аҳвол сўраган, ширин сўзини аямаган. Яхши кунларида бир-бирига қувончу шодликлар улашган. Албатта, бу икки халқнинг бугунги кунда ҳам елкадош бўлиб, ўзаро ҳамжиҳатликда ҳаёт кечираётганлари барчамизни мамнун этмоқда.
Яратганга шукрки, ҳозирда мамлакатларимиз ўртасидаги ўзаро ҳамкорлик алоқалари янги босқичга кўтарилиб, жадал ривожланиб бормоқда. Икки давлат Президентларининг бу йўлдаги саъй-ҳаракатлари ва мақсадлари ҳам муштаракдир.
Биз дин пешволари Ислом динимизни янада равнақ топитириш, тинчлик-осойишталик барқарорлигини таъминлаш ва халқларимиз ўртасидаги дўстлик алоқаларини янада мустаҳкамлашга бор кучимизни сафарбар этишимиз лозим.
Ҳурматли шайх Равил Гайнутдин жаноблари! Сизни яна бир бор, Россия Федерацияси мусулмонлари диний идораси раиси, муфтий этиб сайланганингиз билан чин юракдан қутлайман.
Камоли эҳтиром ва чексиз ҳурмат билан,
Усмонхон АЛИМОВ,
Ўзбекистон мусулмонлари идораси раиси, муфтий
Шайх Равил Гайнутдин Россия мусулмонлари диний идораси раиси этиб қайта сайланди
Россия Федерацияси мусулмонлари раҳбари муфтий, шайх Равил Гайнутдин ташкилотнинг VII ҳисобот-сайлов қурултойида Россия Федерацияси мусулмонлари диний идораси раиси лавозимига янги беш йиллик муддатга қайта сайланди.
Россия Федерацияси мусулмонлари диний идораси анжуманида бир овоздан, очиқ овоз бериш йўли билан қайта сайланди.
Шунингдек, ташкилотнинг янги Низоми тасдиқланди. Унга кўра янги тузилган Оқсоқоллар кенгашига узоқ йиллар Россия Федерацияси мусулмонлари диний идораси раисининг биринчи ўринбосари бўлиб ишлаб келган Дамир Гизатуллин раис этиб сайланди.
Москва ислом институти ректори Дамир Мухетдинов Россия Федерацияси мусулмонлари диний идораси раисининг биринчи ўринбосари лавозимига сайланди.
Мазкур қурултойда фахрли меҳмонлар қаторида Ўзбекистон мусулмонлари идораси раиси, муфтий Усмонхона Алимов ҳазратлари ҳам қатнашмоқда.
Ўзбекистон мусулмонлари идораси Матбуот хизмати
Россия мусулмонлари идораси қурултойи ўтказилди
23 сентябрь куни Москва шаҳрида Россия Федерацияси мусулмонлари идораси қурултойи бўлиб ўтди. Тадбир Қуръони карим тиловати ва хайрли дуолар билан бошланди.
Шундан сўнг қурултойнинг ишчи гуруҳи ва Президиум аъзолари тайинланди. Ўзбекистон мусулмонлари идораси раиси, муфтий Усмонхон Алимов ҳазратлари президиум аъзолари қаторидан жой олдилар.
Тадбирда дунё мамлакатларидан келган 150 нафардан зиёд таниқли уламолар, машҳур муфтийлар, профессор-олимлар, етук экспертлар, давлат ва дин арбоблари иштирок этди.
Қурултойда Россия Федерацияси мусулмонлари идораси раиси, муфтий, шайх Равиль Гайнуддиннинг 2014-2019 йиллардаги олиб борган иш фаолият юзасидан ҳисоботи тингланди.
Ўтган даврда Россия Федерацияси мусулмонлари идораси фаолияти натижалари, амалга оширган ишлари ва эришилган ютуқлари тўғрисида тадбир иштирокчилари ўзларининг фикр-мулоҳазаларини билдирдилар.
Қурултой якунида Россия Федерацияси мусулмонлари идорасининг янги таҳрирдаги устави тасдиқланди, 2019-2024 йилларга оид истиқболли дастури маъқулланди ва Қурултой резолюцияси қабул қилинди.
Ўзбекистон мусулмонлари идораси Матбуот хизмати
Мақолалар
