Ўзбекистон мусулмонлари идорасида янги ташкил этилган “Қуръон тажвидини ўргатиш” бўлими мудири ўринбосари вазифасига Ўзбекистон халқаро ислом академияси фахрий доктори, таниқли блогер Аброр Абдуазимов (Аброр Мухтор Алий) тайинланди.

Аброр Мухтор Алий Андижон вилоятида жойлашган “Саййид Муҳйиддин Маҳдум” мадрасасидаги тайёрлов курсида таҳсил олиб, Наманган шаҳридаги “Мулла Қирғиз” (ҳозирги “Ҳидоя”) ўрта-махсус диний таълим муассасасида ўқиган. Шундан сўнг Имом Бухорий номидаги Тошкент ислом институтида таҳсил олган.

2008 йил Республика қорилар мусобақасида иштирок этиб, “мужаввид қорилар” йўналиши бўйича 3-ўринни олган. 2008 йил Тошкент вилояти “Олимжон ота” жоме масжидида имом-хатиб бўлиб ишлаган. 2008-2009 йилларда Хоразм вилоятидаги “Фахриддин ар-Розий” ўрта-махсус диний таълим муассасаси ўқитувчи вазифасида хизмат қилган. 2009-2011 йилларда Ўзбекистон Миллий университетининг Олий журналистика курсларида таҳсил олиб, магистрлик даражасини олган.

Машҳур аллома Изуддин Байянунийнинг “Таҳорат ва намоз ҳукмлари” номли китобини ўзбек тилига таржима қилган. “Олтин силсила” ҳадислар тўплами таржимонларидан бири ҳисобланади.

Аброр Мухтор Алий блогер сифатида ҳам катта шуҳрат қозонган. Воқеа-ҳодисаларга тезкор ва илмий асосли муносабат билдириши ҳам эътиборга моликдир.

 Ҳақ таоло Аброр Мухтор Алийга масъулиятли ва шарафли вазифасини муборак айласин.

Ўзбекистон мусулмонлари идораси Матбуот хизмати
@muslimuzportal | @mp3muslim | @diniysavollar

фахрий доктори, қироат илми устози Алижон қори янги бўлим мудири этиб тайинланди

 Ўзбекистон мусулмонлари идорасида янги ташкил этилган “Қуръон тажвидини ўргатиш” бўлими мудири вазифасига Ўзбекистон халқаро ислом академияси фахрий доктори, қироат илми устози, мударрис, серғайрат олим Aлижон қори Файзуллоҳ Махдум ўғли Ҳайдаров тайинланди.

Маълумот ўрнида, фазилатли устоз Алижон қори Файзуллоҳ Махдум ўғли 1995 йилда Ўзбекистон мусулмонлари идораси томонидан Миср Араб Республикасидаги Ал-Азҳар университетига ўқишга юборилган. 1998 йил университетнинг Эъдодия-тайёрлов бўлимини, 2001 йилда эса Санавия- бошланғич бўлимини тамомлаган.

2002–2007 йилларда Шариат ва Қонун факультетида таълим олган. 2008 – 2012 йилларда Улумул Қуръон ва қироат илмларига хосланган илм даргоҳида таҳсил олган. Ҳозирда эса Ал-Азҳар университетининг Даъват факультетида таълимни давом эттирмоқда.

Қироат илми устози Алижон қори Қуръони карим ва тажвид илми матнлари бўйича энг мўътабар уламоларнинг ижозаларини олган. Шунингдек, у дунёдаги машҳур қироат алломаларига Аллоҳнинг каломини табаррукона ўқиб берган.

Бугунги кунда қироат олими Алижон қори дунёнинг кўплаб қироат илми уламолари томонидан эътироф этилган забардаст қорилардан биридир. У ўн хил қироат соҳиби бўлиб, 30 йиллик умрини Қуръонга бағишлаган. Қуръон таълимида минглаб шогирдларнинг устози саналади.

Ислом дини манбаларида инсон Қуръонни ўрганиши бир фазилат бўлса, уни бошқаларга таълим бериши яна бир фазилатдир. Қуръонни ўрганиш − улуғ иш. Бу одамдан қунт, истеъдод ва сабр талаб қилади.

 Ҳақ таоло ҳофизи Қуръон Алижон қори Файзуллоҳ Махдум ўғлига масъулиятли ва шарафли вазифасини муборак айласин.

Ўзбекистон мусулмонлари идораси Матбуот хизмати
@muslimuzportal | @mp3muslim | @diniysavollar

Аллоҳга шукрки, юртимиз аҳолисининг диний-маърифий эҳтиёжларини қондириш йўлида бир қатор хайрли ишлар амалга ошириб келинмоқда. Мана шундай ишларнинг узвий давоми сифатида Қуръони каримга мухлис халқимизнинг талаб ва истакларини инобатга олган ҳолда Ўзбекистон мусулмонлари идорасида “Қуръон тажвидини ўргатиш” бўлими очилди.

Ушбу бўлим Олий ва ўрта махсус диний таълим муассасалари, илмий мактаблар, тадқиқот марказлари, Ўзбекистон ислом цивилизацияси маркази ва Ўзбекистон халқаро ислом академияси ҳузурида фаолият юритаётган “Қуръони карим ва тажвид” курсларининг фаолиятини мувофиқлаштириш, бошқариш ва ривожлантириш каби ишлар билан шуғулланади.

Шунингдек, “Қуръони карим ва тажвид” курслари устозларини тайёрлаш, мавжудларини суҳбатдан ўтказиш, уларнинг маҳоратларини тизимли ошириб бориш ва Қуръон таълимини ўргатишдаги энг илғор услубларни қўллашда амалий кўмак беради.

Муҳтарам Президентимизнинг “Қуръонни эшитиш, эшита олиш юксак маънавият, маърифат. Қуръон ҳеч қачон ёмонликка даъват қилмайди. Агар Қуръони каримни эшита олсак, эшиттира олсак, бу – муваффақият бўлади. Элимизга нур келади!”, деган эдилар.

Мана шу юксак эътироф сабаб юртимизда Қуръони каримни ўрганиш ва ўргатиш борасида жуда кенг кўламда ишлар амалга оширилди. Айниқса, Қорилар мусобақалари ўтказилиши, Мусҳафи Шариф чоп этилиши, Қуръон ва тажвид курслари фаолияти кенгайиши ва қироат илмлари кенг тадқиқ этилиши, хусусан, мазкур янги бўлим ташкил этилиши фикримизни янада қўллаб-қувватлайди.

Дарҳақиқат, Пайғамбаримиз соллаллоҳу алайҳи васалламнинг Қуръони каримни ўрганиш ва ўргатиш ҳақида Ҳазрати Усмон розияллоҳу анҳудан ривоят қилинган ҳадиси шарифларида: “Набий соллаллоҳу алайҳи васаллам: “Сизларнинг яхшиларингиз Қуръонни ўрганганларингиз ва ўргатганларингиздир”, деб марҳамат қилганлар (Имом Бухорий ривояти).

 Аллоҳ таоло “Қуръон тажвидини ўргатиш” бўлими фаолиятини муваффақиятли қилсин.

Ўзбекистон мусулмонлари идораси Матбуот хизмати

@muslimuzportal | @mp3muslim | @diniysavollar

 Бисмиллаҳир Роҳманир Роҳийм

Аллоҳ таолога беадад ҳамду санолар, Расулуллоҳ соллаллоҳу алайҳи васалламга дуруду салавотлар бўлсин

Мўминлар учун ҳар куни 5 маҳал дуолари ижобат бўладиган вақт бор. Унда қилинган дуолар Аллоҳ таолонинг наздида қабулдир. Бу вақт – муаззин азон айтган лаҳзалардир. Бу ҳақда Анас ибн Молик розияллоҳу анҳудан ривоят қилинади. Набий алайҳиссалом: "Азон ва иқомат орасидаги дуо рад қилинмайди", дедилар. Шунда саҳобалар: "Ё Расулуллоҳ соллаллоҳу алайҳи васаллам нима деб дуо қилайлик?" деб сўрашди. Расулуллоҳ соллаллоҳу алайҳи васаллам: "Аллоҳ таолодан дунё ва охират офиятини сўранг", дедилар (Имом Абу Довуд, Имом Термизий, Имом Насоий ривояти).

Абдуллоҳ ибн Амр ибн Ос розияллоҳу анҳудан ривоят қилинади: "Саҳобалардан бири Расулуллоҳ соллаллоҳу алайҳи васалламнинг ҳузурларига келиб: "Ё Расулуллоҳ соллаллоҳу алайҳи васаллам муаззинлар биздан кўра кўпроқ фазилатга эга-ми?" деди. Шунда Расулуллоҳ соллаллоҳу алайҳи васаллам: "Қачонки азон эшитсанг, муаззин айтаётган нарсани айт. Азон тугагач эса Аллоҳга дуо қил. Сўраган нарсанг берилади", дедилар (Имом Абу Довуд ривояти).

Саъд ибн Абу Ваққос ибн Уҳайб Зуҳрий розияллоҳу анҳудан ривоят қилинади. Расулуллоҳ соллаллоҳу алайҳи васаллам: «Ким муаззин айтган нарсани айтса ҳамда “ҳаййа ала” (ҳаййа алас солат ва ҳаййа алал фалаҳ) ларда “Лаа ҳавла ва лаа қуввата” деса жаннатга киради», дедилар (Имом Муслим, Имом Абу Довуд ривояти).

Расулуллоҳ соллаллоҳу алайҳи васаллам: "Қачонки муаззиннинг овозини эшитсангиз, унинг айтганларини қайтаринг, сўнгра менга салавот айтинг. Зеро, ким менга бир салавот айтса, Аллоҳ унга ўн марта салавот йўллайди", дедилар (Имом Муслим ривояти).

Жобир розияллоҳу анҳудан ривоят қилинади. Расулуллоҳ соллаллоҳу алайҳи васаллам: «Ким азонни эшитгандан кейин “Аллоҳумма, Робба ҳазиҳид даъватит таммати вас солатил қоимати ати Муҳаммаданил василата вал фазийлата вабъасҳу мақомам Маҳмудан аллазий ваъадтаҳ” деса, қиёмат куни унга шафоатим ҳалол бўлади», дедилар (Имом Бухорий ривояти).

Саъд ибн Абу Ваққос розияллоҳу анҳудан ривоят қилинади. Расулуллоҳ соллаллоҳу алайҳи васаллам ким муаззинни эшитганда: “Ашҳаду алла илаҳа иллаллоҳу ваҳдаҳу лаа шарийка лаҳу ва ашҳаду анна Муҳаммадан абдуҳу ва Расулуҳу. Розийту биллаҳи Роббан ва би Муҳаммадир Расулан ва бил Ислами дийнан” (Аллоҳдан ўзга илоҳ йўқлигига гувоҳлик бераман. Муҳаммад соллаллоҳу алайҳи васаллам Аллоҳнинг Расулидир. Аллоҳни Робб деб, Муҳаммад соллаллоҳу алайҳи васалламни пайғамбар деб, Исломни дин деб рози бўлдим”) деса, гуноҳлари мағфират қилинади", дедилар (Имом Муслим ривояти).

Аллоҳ таоло Ўзига ихлос ила дуо қилишимизга тавфиқ ато этсин. Дуоларимизни қабул қилсин.

Даврон НУРМУҲАММАД

Пайғамбаримиз соллаллоҳу алайҳи васаллам айтадилар: “Албатта, Аллоҳ таоло ҳаёли, айбларни яширувчи зот, бандаси айбини яширишини яхши кўради”.

Дарҳақиқат, Аллоҳ таоло мўмин банданинг айбларини бу дунёда яширади. Шунинг учун Пайғамбаримиз соллаллоҳу алайҳи васаллам биз умматларини ҳам мўминларнинг айбу нуқсонларини яширишимизга буюрганлар.

Расулуллоҳ соллаллоҳу алайҳи васаллам ҳадисларининг бирида:

اقيلوا ذوي الهيئات زلاتهم

“Ҳурматли кишиларнинг хатоларини кечиринглар”, деганлар (Имом Ибн Ҳиббон ривояти).

Демак, агар бирортамиз хато иш қилиб қўйса, биродари унинг хатосини фош қилмаслиги, аксинча яшириши лозим бўлади. Зеро, ҳадиси шарифда айтилишича: مَنْ ستر مؤمنًا في الدنيا، ستره الله يوم القيامة  яъни: “Ким бу дунёда бир мўминнинг айбини яширса, Аллоҳ таоло қиёмат кунида унинг айбини яширади”.

Дарҳақиқат, Ислом дини айбларни яширишга, кечиришга, одамлар орасида фахш ишларни ошкора қилмасликка чақиради. Аксинча, маъсият ишларни сир тутиш, уларни яшириш лозим бўлади. Токи, гуноҳ иш қилаётган кишининг ўзи инсофга келиб, гуноҳи ошкор бўлмай туриб, онгли тарзда тавба қилсин, гуноҳни тарк этсин. Шунинг учун ҳам Пайғамбаримиз соллаллоҳу алайҳи васаллам биз умматларини насиҳат қилишга буюрганлар, ўзгаларни изза қилишдан қайтарганлар. Қачонки, мўмин кишига қилган хатосини  мулойимлик билан, сир бўлиб қолиш шарти билан айтилса, бу насиҳат бўлади. Аммо, оммага ошкор қилинса, фазиҳат (шармандалик) бўлади. Биз эса, насиҳатга буюрилганмиз, фазиҳатга эмас. Пайғамбаримиз соллаллоҳу алайҳи васалламнинг ўзлари шу йўлни тутганлар ва буни саҳобаларига ҳам таълим берар эдилар.

Аллоҳ таоло бандасининг минглаган гуноҳларини яширади. Ҳақиқий мўмин банда бундан ўзига тўғри хулоса чиқариб олиши лозим. Бир куни Али ибн Абу Толиб розияллоҳу анҳунинг ҳузурларига бир кишининг қилган жинояти учун жазони ижро этишга олиб келишди. Шунда унинг онаси шафоат тилаб (гуноҳидан ўтишларини сўраб) келди. Шунда Али розияллоҳу анҳу онасига: “Албатта, Аллоҳ таоло жиноят биринчи марта қилинганда уни яширади, одамларга ошкор қилмайди. Фарзандингиз бу жиноятини такрор ва такрор қилган, натижада бунга одатланиб ҳам қолган”, дедилар. Она: “Сиз буни қаердан биласиз?” деб сўради. Али розияллоҳу анҳу: “Чунки Аллоҳ таоло гуноҳларни яширувчи зот, бандасининг ҳам ўз гуноҳини яширишини яхши кўради”, деб жавоб бердилар.

Йигитга жазо қўллаб бўлинганидан кейин, ундан бу жинояти нечанчи марта содир этганлигини сўрадилар. Шунда у, йигирманчи марта эканлигини эътироф этди. Яъни, Аллоҳ таоло унинг жиноятини биринчи, иккинчи, учинчи, тўртинчи ва ҳатто ўн тўққизинчи мартасида ҳам яширган эди. Лекин шунга қарамай, йигит жиноят қилишда давом этаверган. Аллоҳ таолодан ҳаё қилмаган, одамларга зарар етказишда, уларнинг моллари ва обрўларига футур етказишда давом этаверган. Аслида, у аввалроқ Аллоҳга тавба қилиши, унинг айбини, жиноятларини фош этмай, яшираётганлиги Аллоҳнинг унга марҳамати эканлигини билиши керак эди. Лекин, афсуски у буни вақтида англаб етмади.

Аллоҳ таоло бандасининг айбини яширади. Шундай экан, эй мўмин биродар! Сен аввало ўз айбингни яшир, гуноҳларингни сир тут. Расулуллоҳ соллаллоҳу алайҳи васаллам биз умматларини гуноҳларни ошкор қилишимиздан, қилган гуноҳимиз билан фахрланишимиздан қайтарганлар. Қолаверса, мўмин биродарингни айбини фош этишдан сақлан, мўминнинг айбини яшир, уни ошкор этма. Шояд, Аллоҳ таоло қиёмат куни сенинг ҳам айбингни яширса.

Ҳомиджон ИШМАТБЕКОВ,

Ўзбекистон мусулмонлари идораси раисининг биринчи ўринбосари