Бугун, 27 декабрь куни Ўзбекистон мусулмонлари идораси раиси, муфтий Нуриддин домла ҳазратлари Тошкент шаҳридаги Уруш ва меҳнат фахрийлари учун Республика пансионатига ташриф буюриб, хайрия тадбирида иштирок этдилар.

Маросим Қуръони карим тиловати ва эзгу дуолар ила бошланди.

Файзли даврада Муфтий ҳазратлари улуғ ёшдаги отахон ва онахонларга катта эътибор бўлаётгани, уларга ҳукуматимиз томонидан кўп ғамхўрлик кўрсатилаётганини сўзлаш баробарида уларнинг панду насиҳатлари ила ҳаётимиз қут-баракага тўлиши, ёшларимизни маънавий баркамол инсон этиб тарбиялашда катта ибрат эканларини қайд этдилар.

Шунингдек, Муфтий ҳазратлари сўзларида давом этиб, динимиз кексаларни эъзозлашга буюриши, Расулуллоҳ соллаллоҳу алайҳи васаллам: “Кичикларга раҳм-шафқат қилмаган ва кексаларимизни қадрларини билмаганлар биздан эмас” , дея марҳамат қилганларини баён этдилар.

Тадбирда пансионат директори юртимизда уруш ва меҳнат фахрийларига алоҳида ғамхўрлик кўрсатилиб, уларга кенг имкониятлар берилаётганини таъкидлаб, ушбу жойдаги яратилган шарт шароитлар ҳақида сўзлаб берди.

Пансионатда истиқомат қилаётган табаррук 95 ёшдаги муҳтарама онахон яратилган шароитлардан беҳад мамнун эканларини изҳор, этиб мана шундай улуғ савобли ишларга бош бўлган Давлатимиз Раҳбари ва барча мутасаддиларнинг ҳақларига чин юракдан дуолар қилдилар.

Хайрия тадбири асносида отахон ва онахонлар Муфтий ҳазратларига ўз миннатдорлигини билдириб, дуолар қилдилар.

Тадбир давомида уруш ва меҳнат фахрийларига зарур жиҳозлар улашилди ҳамда эҳсон дастурхони ёзилди.

Ўзбекистон мусулмонлари идораси Матбуот хизмати

Айни куз-қиш мавсумида Ўзбекистон мусулмонлари идораси раиси, муфтий Нуриддин домла ҳазратларининг ташаббуслари билан Самарқанд вилоятидаги Ҳадис илми мактабига муқобил электр энергия билан таъминловчи “EASTERN LION” электрогенератор қурилмаси тақдим этилди.

Бу ўз навбатида, мактабда ўқув жараёнларининг узлуксизлигини таъминлаб, олиб борилаётган таълим сифатини янада оширишга хизмат қилади, иншоАллоҳ.

Муфтий ҳазратларининг мазкур хайрли ташаббуслари юртимизда энергия соҳасида олиб борилаётган тадбирлар билан ҳамоҳанг бўлиб, келгусида илм масканидан исломий, хусусан, ҳадис илми бўйича етук мутахассислар етишиб чиқишига муҳим ҳисса бўлади, иншоАллоҳ.

Шунингдек, айни кунларда республикадаги тўртта масжидда ана шундай қуёш панелларини ўрнатиш режа қилинган.

Ўзбекистон мусулмонлари идораси Матбуот хизмати

Инсон дунёда турли хил синовларга дуч келиши мумкин. Аллоҳ таоло қайси бир бандасига бериб, кимнидир маҳрум қилиб синайди.

Яқинда 18 декабр куни Тошкент шаҳар Олмазор туманида “Қорасарой” маҳалласида яшовчи Латиповлар хонадонида ёнғин келиб чиқиши натижасида уй эгалари катта зиён кўрди: турар жой биноси тўлиқ ёниб кетди. Ҳайриятки, хонадоннинг икки оила аъзоси 5 нафар ёш фарзандини қутқариб қолишга муваффақ бўлишди.

Мазкур воқеадан Ўзбекистон мусулмонлари идораси раиси, муфтий Нуриддин домла ҳазратлари чуқур қайғуга тушиб, мазкур хонадонга тезда ёрдам бериш бўйича топшириқ бердилар. Хусусан, кеча жума намозида бир неча масжидда имом-хатиблар ҳомийларни жалб қилган ҳолда 74 миллиондан зиёд маблағ жамланиб, жабр кўрган оилага етказилди.

Таъкидлаш жоиз, бир мусулмоннинг бошига тушган қайғуни аритишни Пайғамбар алайҳиссалом суннати, ўгитлари деб билган доно халқимизнинг саховатпешалик, мурувватлилик хислатлари таҳсинга сазовор. Зеро, Абу Ҳурайра розияллоҳу анҳудан ривоят қилинган ҳадиси шарифда Пайғамбар соллаллоҳу алайҳи васаллам:
“Ким бир мўминдан бу дунё машаққатларидан бир машаққатни аритса, Аллоҳ таоло ундан қиёмат куни машаққатларидан бирини аритади. Ким бир камбағалнинг ишини енгиллатса, Аллоҳ унинг бу дунёю охират ишларини енгиллатади”, деб марҳамат қилганлар.

Шу ўринда азиз юртдошларимизга яна бир бор илтимос қилган бўлардикки, иссиқлик манбаларидан фойдаланишда ҳар биримиз, аввало, ўз ҳаётимиз, кишилар ҳаётини сақлаш, қолаверса, моддий мулкларимиз хавфсизлиги учун ёнғин келиб чиқишининг олдини олишга қатъий эътибор қаратишимиз, ёнғин хавфсизлиги талабларига тўлиқ риоя этишимиз зарур. Акс ҳолда ўзимиз, шунча меҳнат билан топган моддий бойлигимизга, уй-жойимизга зиён етиши мумкин, Аллоҳ сақласин!

Аллоҳ таоло барча бандаларини бундай офатлардан Ўз паноҳида асрасин!

Ўзбекистон мусулмонлари идораси
Масжидлар билан ишлаш бўлими

Шоҳимардон ҳақида эшитмаган, бу жойга келишни орзу қилмаган одам бўлмаса керак. Мўъжаз ва сўлим гўша ҳақида гап очилганда унинг ёқимли табиати, мусаффо об-ҳавоси, кўл ва булоқлари, зилол сувлари кўз ўнгингизга келади. Ушбу қишлоқ азал-азалдан нафақат водийликлар, балки юртимиз ҳамда қўшни мамлакатларимиз аҳолиси учун ҳам азиз зиёратгоҳ, дам олиш маскани ҳисобланади.

Фарғона вилояти бош имом-хатиби Убайдуллоҳ домла Абдуллаев ҳамда вилоят ҳокими ўринбосари Жамшид Хатамовлар Шоҳимардон қишлоғига ташриф буюрдилар. «Ҳазрати Али» масжидида жума намозида иштирок этиб, аҳолининг ижтимоий ҳолати, яшаш шароити билан танишдилар.

Аҳоли билан суҳбат асносида шулар маълум бўлдики, Шоҳимардонга келаётган меҳмонларнинг ташрифи кундан-кун ортиб бормоқда, ўзбек-қирғиз қардош халқ вакиллари ака-укадек истиқомат қилмоқда.

Шоҳимардон Фарғона тумани ҳудуди ҳисобланиб, бу ерда «Ҳазрати Али» масжиди фаолият юритмоқда. Қишлоқ аҳолиси ва бу ерга ташриф буюраётган меҳмонлар масжиднинг кун сайин обод бўлаётганидан мамнун. Масжид жамоасининг сафи ҳам тобора ортмоқда, таҳоратхонадаги шарт-шароитлар ҳам марказдагидан қолишмайди. Бир сўз билан айтганда қишлоқ аҳолиси ва зиёратчилар кайфияти юқори.

Ташрифнинг навбатдаги манзили Фарғона туманидаги Ҳосилот маҳалласининг Қирғизистон ҳудудидаги анклав қисми – Тоштепа-2 кўчаси бўлди. Бу ерда 72 та хонадонда 260 нафардан зиёд аҳоли истиқомат қилади. Ҳудуддаги 60-умумтаълим мактаби биноси қайта таъмирланган бўлиб, унда ўқувчилар учун барча шароитлар яратилган. Бу қишлоқда ҳам икки қардош халқ аҳил-иноқ ҳаёт кечирмоқда.

Вилоят ҳокими ўринбосари ва вилоят бош имом-хатиби маҳалла аҳли билан суҳбатлашиб, аҳоли турмуш тарзини янада яхшилаш учун амалга оширилиши лозим бўлган ишларни белгилаб олдилар.

Фарғона вилояти вакиллиги Ахборот хизмати

Бугун, 23 декабрь Ўзбекистон мусулмонлари идораси раиси, муфтий Нуриддин домла ҳазратлари Тошкент шаҳридаги "Холид ибн Валид" жоме масжидида жума намозида иштирок этдилар.

Жомеда йиғилган минглаб намозхонлар жума намозидан аввал гўзал қироат ва Муфтий ҳазратларининг “Ризқ Аллоҳдан, ҳаракат бандадан!” мавзусидаги файзли суҳбатларидан баҳраманд бўлдилар.

Ўзбекистон мусулмонлари идораси Матбуот хизмати