muslim.uz
Кўринмас душман
БИСМИЛЛАҲИР РОҲМАНИР РОҲИЙМ
Куч ва Қудрат эгаси бўлган Аллоҳ таолога ҳамду-санолар ҳамда оламларга раҳмат ўлароқ юборилган, тўғри сўз ва ишончли бўлган Пайғамбаримиз Муҳаммад мустафо соллаллоҳу алайҳи васалламга, у зотнинг аҳли оиласи, саҳобалари ва тобиъинларига кўплаб солату саломларимиз бўлсин.
Бугунги кунда ўзининг мусулмонлигини даъво қилиб, бироқ динини асл моҳияти илм-маърифат эканлигини билмай, ўрганмай, душманнинг ҳийлаларию найрангларига ишониб, ҳатто билмаганлиги ва англамаганлиги туфайли уларга бу ишларда ёрдамчи бўлиб юрган кишиларнинг сони кўпайиб бормоқда.
Энг ёмони ана шу динининг асл моҳияти илм-маърифат эканлигини билмаган, ўрганмаган кишилар умрининг аксарини кераксиз, фойдасиз ишлар, кўпроқ ИНТЕРНЕТдаги фитналар, бузғунчиликлар, туҳматлар, ғийбату бўҳтонлар ва шуларга ўхшаш қабоҳатларни ўқиш ҳамда томоша қилиш билан инсонга бериладиган бебаҳо ва қайтарилмас бўлган ВАҚТ неъматини самарасиз ўтказишларидир.
Бунинг оқибатида муқаддас динимизда қораланган, у сабабли кўплаб тоъату ибодатлар, яхшилигу олийликлар ўз вақтидан қолиб кетишига ёки тарк қилинишига сабаб бўладиган, унинг зарари ҳамда оқибатлари нафақат бу қабиҳ сифат эгасига, балки ўзгаларга ҳам юқадиган, доимо ўрганилиши ва ўргатилиши шарт ҳамда инсониятга кўринмас, туганмас душман бўлган дангасалик, эринчоқлик ва ишёқмаслик сифатига эга бўлганларнинг сони кўпайиб бормоқда. Бунинг зарари нафақат мусулмонларга, балки бутун инсониятга бўлиши барчамизга аниқ ва равшандир.
Ана шу маънода яна бир карра динимизда бу касалликнинг зарарлари, оқибатлари ва унга қарши туришда ҳамда сизу биз бу касаллик билан касалланиб қолмаслигимиз учун динимиз кўрсатмаларини ўрганишимиз ва эслашимиз лозим деб билдим ва унга умумий қилиб, “КЎРИНМАС ДУШМАН” дея ном бердим. Бундан буён ушбу мавзуда давомли шаклда мақолаларимизни бериб борамиз.
Бу борадаги барча изланишларимизни ҳамда ўрганаётган илмимизни манфаъатли ва унга амал қилишимизни Аллоҳ таолонинг ўзи осон қилсин.
“Шайх Зайниддин” жоме масжиди имом-хатиби,
ТИИ ўқитувчиси Абдураҳманов Яҳё Убайдуллоҳ ўғли
“Унинг мойи ўзига олов тегмаса ҳам, ёритиб юборай дейдир”
Ушбу мақолада Аллоҳ таолонинг “Унинг мойи ўзига олов тегмаса ҳам, ёритиб юборай дейдир” деган қовли борасидаги илмий янгиликларни тақдим этамиз.
Аллоҳ таоло Қуръони Каримнинг Нур сурасида шундай деб марҳамат қилган:
اللَّهُ نُورُ السَّمَاوَاتِ وَالْأَرْضِ مَثَلُ نُورِهِ كَمِشْكَاةٍ فِيهَا مِصْبَاحٌ الْمِصْبَاحُ فِي زُجَاجَةٍ الزُّجَاجَةُ كَأَنَّهَا كَوْكَبٌ دُرِّيٌّ يُوقَدُ مِن شَجَرَةٍ مُّبَارَكَةٍ زَيْتُونِةٍ لَّا شَرْقِيَّةٍ وَلَا غَرْبِيَّةٍ يَكَادُ زَيْتُهَا يُضِيءُ وَلَوْ لَمْ تَمْسَسْهُ نَارٌ نُّورٌ عَلَى نُورٍ يَهْدِي اللَّهُ لِنُورِهِ مَن يَشَاءُ وَيَضْرِبُ اللَّهُ الْأَمْثَالَ لِلنَّاسِ وَاللَّهُ بِكُلِّ شَيْءٍ عَلِيمٌ
“Аллоҳ осмонлар ва ернинг нуридир. Унинг нурининг мисоли худди бир токча, унинг ичига чироқ қўйилган, чироқ эса, шиша ичида, шиша эса, гўё дурдан бўлган бир юлдуз бўлиб, шарқий ҳам, ғарбий ҳам бўлмаган муборак зайтун дарахтидан ёқилур. Унинг мойи ўзига олов тегмаса ҳам, ёритиб юборай дейдир. (Бу) нур устига нурдир. Аллоҳ хоҳлаган одамни Ўз нурига ҳидоят қилур. Аллоҳ одамларга мисолларни келтирур. Аллоҳ ҳар бир нарсани ўта билгувчидир”. (Суранинг номи ушбу ояти каримадан олинган. Бу ояти карима «Нур» ояти деб ҳам номланади. Оятда Аллоҳ таолонинг Ўзи Ўз зоти олийсини «Нур» деб атамоқда. Лекин бу нур сиз билан бизнинг тушунчамиздаги моддий, кўзга таъсир ўтказадиган ёруғлик нури эмас. Аллоҳ таолонинг ҳеч бир сифати сиз билан бизнинг тасаввуримизга тўғри келмайди. Бу жумлани баъзи уламоларимиз, «Аллоҳ осмонлар ва ерни мунаввар қилгувчидир», деб тушунтирганлар. Бошқа бирлари эса, «Аллоҳ осмонлару ерни вужудга келтиргувчидир», деганлар. Яна бошқалари, Аллоҳ таоло осмонлар ва ерни, яъни, борлиқни Ўз нуридан яратгандир, деган маънода тафсир қилганлар. Бу тушунчаларнинг ҳаммаси араб тилида «нур» сўзи ифода этадиган маънолардан олингандир. «Нур» сўзи аслида ўзи зоҳир бўлиб, ўзгаларни ҳам зоҳир этувчи вужудга нисбатан ишлатилади. Мисол учун, қоронғуликда ёруғлик зоҳир бўлиб, аввал ўзи кўринади ва шунинг баробарида атрофни ҳам ёритади-кўрсатади.) (35-оят)
Ушбу оятда зайтун ёғи, унга олов тегмаса ҳам, ёритиб юборай дейиши айтилмоқда. Маълумки, инсон ва бошқа кўплаб жонзотлар, нарсалар атрофга ўзидан турли тўлқин узунлигида ёруғлик ёки овоз тебранишлари тарқатади. Ҳар бир нарсанинг тебранишлари ўзига хос бўлади. Борлиқдаги жуда кўп нарсалар ўзидан ана шундай тебранишлар тарқатиб туради. Уларнинг баъзиларини сезиш, кўриш, эшитиш мумкин. Улар ушбу тебранишлари орқали Аллоҳ таолога тасбеҳ айтаётган бўлса не ажаб. Зеро, Аллоҳ таоло Қуръони Каримда шундай деб марҳамат қилган:
تُسَبِّحُ لَهُ السَّمَاوَاتُ السَّبْعُ وَالأَرْضُ وَمَن فِيهِنَّ وَإِن مِّن شَيْءٍ إِلاَّ يُسَبِّحُ بِحَمْدَهِ وَلَـكِن لاَّ تَفْقَهُونَ تَسْبِيحَهُمْ إِنَّهُ كَانَ حَلِيماً غَفُوراً
“Унга етти осмону ер ва улардаги кимсалар тасбеҳ айтур. Унинг ҳамди ила тасбеҳ айтмаган ҳеч бир нарса йўқ. Лекин уларнинг тасбеҳини англамассизлар. Албатта, у ҳалийм ва сермағфират зотдир”. (Араб тилида тасбиҳ айтиш «Аллоҳни поклаб ёд этиш» маъносини англатади. Ушбу ояти карима бутун борлиқ, барча мавжудот Аллоҳ таолони айбу нуқсондан поклаб тасбиҳ айтишини таъкидламоқда.) (Исро сураси, 44-оят)
Эътибор берсак, ушбу оятда Аллоҳ таоло “Уларнинг тасбеҳини эшитмассизлар” демади, балки “Уларнинг тасбеҳини англамассизлар” деди. Демак, нарсаларнинг тебранишларини (тасбеҳ айтишларини) сезишимиз, эшитишимиз мумкин, лекин маъносини тушуна олмаймиз.
Ҳа, борлиқдаги ҳар бир нарса тасбеҳ айтади. Ўша нарсаларнинг атомлари ҳам тасбеҳ айтади. Чунки ҳар бир жонли ва жонсиз нарсалар атомлардан ташкил топган. Атомлар тебранади, ҳаракатланади, айланади. Ҳар бир атом, ундаги протон ва электронлар, ядролар, ядрони ташкил этадиган моддалар, кварклар, барча-барчаси тебранади, ҳаракатланади, тасбеҳ айтади.
Америкалик кашфиётчи ва микроскоп орқали секинлаштирилган тасвирга олишни илк йўлга қўйган доктор Роял Реймонд Райф озуқа моддаларда ҳам тебранишлар борлигини кашф этди. Озуқа моддалар ичида энг юқори частотали тўлқинлар тарқатадиган нарса бу – ёғлар экан. Барча турдаги ёғлар, масалан, писта ёғи, пахта ёғи, кунгабоқар ёғи, зайтун ёғи ва ҳоказо.
Инсон бир сонияда ўзидан 60 тадан кўпроқ тебраниш чиқарса, қуруқ ўтларда бир сонияда 20 та атрофида тебраниш бўлади. Аммо ёғларнинг тебранишлари сониясига 320 мартагача етар экан. Аммо биз бу тебранишларни ёки бошқача қилиб айтганда ёруғлик тўлқинларини кўра олмаймиз. Аллоҳ таоло бизнинг кўзимиздан баъзи тўлқин узунликларини тўсиб қўйган. Масалан, ультрабинафша, инфрақизил нурларни. Аслида эса бу Роббимизнинг бизга раҳматидир.
Аллоҳ таоло бизнинг кўзимизга маълум узунликдаги ёруғлик тўлқинларини кўриш, қулоғимизга маълум узунликдаги овоз тўлқинларини эшитиш имконини берган. Оддий кўз билан кўра олмайдиган, оддий қулоқ билан эшита олмайдиган нарсаларимизни махсус қурилмалар орқалигина идрок қила оламиз. Аллоҳ таоло юқоридаги оятда ёғлар орасидан зайтун ёғини зикр қилди. Биз ундан чиқаётган нурланишни оддий кўз билан кўра олмасакда, махсус қурилмалар орқали кўришимиз мумкин.
Маълум бўлишича, зайтун ёғида юқори даражадаги энергия мавжуд бўлиб, у 100 тадан ортиқ касалликларга шифо бўлар экан. Ҳатто саратон касаллигига ҳам зайтун ёғи шифо бўлиб, ёғдаги махсус моддалар саратон ҳужайрасини ярим соат ичида ўлдириш хусусиятига эга экан. Зайтун ёғиининг таркибида катта миқдорда энергия бор дедик. Агар биз мазкур ёғни истеъмол қилсак ёки танамизга суртсак, танамизнинг иммун тизими кучайишига ва кўплаб касаликларга қарши чидамли бўлишига сабаб бўлар экан. Шу боис Расулуллоҳ соллаллоҳу алайҳи васаллам бизга зайтун ёғини истеъмол қилиш ва ундан дори сифатида фойдаланишни амр қилганлар.
Умар розияллоҳу анҳудан ривоят қилинади: “Набий соллаллоҳу алайҳи васаллам: “Зайтун ёғини енг ва уни суртинг. Чунки, у муборак дарахтдандир”, дедилар”. Имом Термизий ва Имом Ҳоким ривоят қилишган.
Юқоридаги оятда бошқа ёғларни эмас, айнан зайтун ёғининг келтирилиши Қуръон Аллоҳ таолонинг Каломига эканига яққол далиллардан биридир. Зайтун ёғининг ўзидан ёруғлик тўлқинларини бошқа моддаларга қараганда кўпроқ ва юқорироқ частотада тарқатиши бугунги кунда аниқланган бўлса, бу ҳақиқатни бундан 1400 йил олдин Пайғамбаримиз соллаллоҳу алайҳи васаллам қаердан билдилар экан?! Албатта, бу ҳақиқатни у кишига Аллоҳ таолонинг Ўзи билдиргандир!
Биз кўра олмайдиган нур зайтун ёғидан чиқар экан, агар ушбу ёғга овлов теккизиладиган бўлса, ёруғлик икки ҳисса бўлиб, атроф ёришиб кетади. Аллоҳ таоло юқоридаги оятда “(Бу) нур устига нурдир” деб марҳамат қилган. Чунки, бунда ёғнинг ўзидан чиқадиган нур билан олов нури қоришган бўлади. Яъни зайтун ёғининг кўзга кўринмас нури билан кўзга кўринадиган олов нури жам бўлган бўлади.
Зайтун ёғи тарқатадиган нур электромагнит тўлқинлар бўлиб, биз буни кўролмаймиз. Аллоҳ таоло бизнинг кўзимизни барча тўлқинларнинг бир қисмини кўра оладиган қилиб яратган. Ҳа, биз радиотўлқинларни кўра олмаймиз, сунъий йўлдошлардан келадиган тўлқинларни кўра олмаймиз, зилзиладан олдин бўладиган ер тўлқинларини ҳам биз сезмаймиз. Аммо баъзи жонзотлар бу тўлқинларни сезади ва қочишга ҳаракат қилади.
Юқоридаги оятнинг сўнггида Аллоҳ таоло “Аллоҳ хоҳлаган одамни Ўз нурига ҳидоят қилур” деб марҳамат қилган.
Аллоҳ таоло барчамизни Қуръон нури узра собит қилсин! Бизга ҳақни кўрсатиб қўйсин ва ботил, тойилиш ва оғишлардан Ўзи асрасин!
Абдуддоим Каҳел ва Islom.uz маълумотлари асосида
Нозимжон Ҳошимжон тайёрлади
Ислом динидаги энг енгил ибодатни биласизми?
Исломдаги энг афзал ибодат, таҳорат қилмай, қиблага юзланмай, пул сарфламай бажариш мумкин бўлган энг енгил тоат Аллоҳни зикр қилишдир.
Аллоҳ таоло Қуръони Каримда шундай деб марҳамат қилган:
الَّذِينَ يَذْكُرُونَ اللّهَ قِيَاماً وَقُعُوداً وَعَلَىَ جُنُوبِهِمْ وَيَتَفَكَّرُونَ فِي خَلْقِ السَّمَاوَاتِ وَالأَرْضِ رَبَّنَا مَا خَلَقْتَ هَذا بَاطِلاً سُبْحَانَكَ فَقِنَا عَذَابَ النَّارِ
“Аллоҳни тик турган, ўтирган ва ёнбошлаган ҳолларида эслайдиган, осмонлару ернинг яратилишини тафаккур қиладиганлар: “Роббимиз, буни бекорга яратганинг йўқ, Ўзинг поксан, бизни ўт азобидан сақлагин” (Оли Имрон сураси, 191-оят)
Аллоҳ таолони кўп зикр қилувчиларга саломатлик бўлсин!
*****
Дин муомалада ҳам кўриниши керак
Дин фақат намоз ўқиётганда, рўза тутаётганда эмас, балки олди-сотди, шариатга мувофиқ келишувлар, берилган ваъдалар, аҳдлар, одамлар билан кўришганда, идораларда навбат кутганда, бемор кўргани борганда, деҳқончиликда ва ҳоказо ўринларда ҳам кўриниши керак.
Шундай қилиб, инсонлар Аллоҳ таолонинг ер юзидаги гувоҳларидир. Ҳар бир инсон бу дунёда қилган амалининг ҳосилини охиратда йиғиб-териб олади.
*****
Бахтиёр бўлишингиз, муваффақиятга эришишингиз, юксалишингиз, нажот топишингиз учун сизга қуйидаги тўрт насиҳатни айтаман:
- Намозга эътиборли бўлинг!
Аллоҳ таоло Қуръони Каримда шундай деб марҳамат қилган:
وَأَقِمِ الصَّلاَةَ طَرَفَيِ النَّهَارِ وَزُلَفاً مِّنَ اللَّيْلِ إِنَّ الْحَسَنَاتِ يُذْهِبْنَ السَّـيِّئَاتِ ذَلِكَ ذِكْرَى لِلذَّاكِرِينَ
“Кундузнинг икки тарафида ва кечанинг бир бўлагида намозни тўкис адо қил! Албатта, яхшиликлар ёмонликларни кетказади. Бу эса, эсловчиларга эслатмадир”. (Уламоларимиз ояти каримадаги “Кундузнинг икки тарафида” адо қилинадиган намоз бомдод, пешин ва аср намозлари, “кечанинг бир бўлагида” адо этиладиган намоз шом ва хуфтон намозлари, дейишган. Мўмин киши томонидан қилинган ҳар бир яхши иш ёмонликларни кетказади. Намоз ўша яхшиликларнинг гултожидир. Ушбу оятда оғир ва аҳамиятли ишларни қилишда, Аллоҳнинг амрига бўйсунишда, кўрсатган йўли ва йўллаган динида мустақийм туришдек масъулиятли ишда намоз ва яхшилик қилиш ила олдинга йўл очишга ундаш бор.) (Ҳуд сураси, 114-оят)
- Қуръонни тиловат қилинг!
Аллоҳ таоло Қуръони Каримда шундай деб марҳамат қилган:
اقْرَأْ بِاسْمِ رَبِّكَ الَّذِي خَلَقَ
“Яратган Роббинг номи билан ўқи” (Алақ сураси, 1-оят)
- Тасбеҳ айтинг!
Аллоҳ таоло Қуръони Каримда шундай деб марҳамат қилган:
فَسَبِّحْ بِحَمْدِ رَبِّكَ وَاسْتَغْفِرْهُ إِنَّهُ كَانَ تَوَّاباً
“Бас, Роббингни поклаб ёд эт ва Унга истиғфор айт. Албатта, У тавбаларни кўплаб қабул этувчидир” (Наср сураси, 3-ояти)
- Гўзал муомалали бўлинг!
Аллоҳ таоло Қуръони Каримда шундай деб марҳамат қилган:
وَقُولُواْ لِلنَّاسِ حُسْناً
“Одамларга яхши гаплар айтинг” (Бақара сураси, 83-оят)
Доктор Оиз Қарний саҳифаларидан Нозимжон Ҳошимжон тайёрлади
Мўминаларга ибрат мўминалар: “Аллоҳ бизга омонатга ўғил берган эди. Энди ўша омонатини қайтариб олди”
Умму Сулайм розиллоҳу анҳо Абу Талҳа розиллоҳу анҳу билан саодатли ҳаёт кечирди. Аллоҳ таоло уларни ширин бир ўғил билан сийлади. Абу Талҳа розиллоҳу анҳу ўғлига шу қадар меҳр қўйдики, уни ҳеч кимга ишонмас, ҳаётини суюкли фарзандисиз тасаввур этолмас эди...
Аллоҳ таоло маҳр бобида Умму Сулайм розиллоҳу анҳо сабабидан бир ибрат қолдиргани каби, муслима оналар учун унинг ҳаётида яна бир намуна бўлишини ирода қилди. Тўсатдан унинг гўдак ўғли касалликка чалинди. Бу ҳол Абу Талҳанинг фикру хаёлини машғул этди. У Расулуллоҳ соллаллоҳу алайҳи ва салламнинг ҳузурларига бориб-келиб турар, келган заҳоти ўғлининг аҳволини сўрар эди. Ана шундай кунларнинг бирида ўлим бу маъсум гўдакни уларнинг бағридан узиб олди.
Абу Талҳа розиллоҳу анҳу Набий соллаллоҳу алайҳи ва салламнинг ёнларида эди. Шўрлик она не қилсин? Кўзининг оқу қорасини, жигар порасини йўқотди! Ҳаммамиз биламизки, оналар бундай ҳолатда ўзларини йўқотадилар, дод-фарёд қиладилар, ёқаларини йиртадилар...
Умму Сулайм розиллоҳу анҳо бу ўринда ҳам Момо Ҳаво қизлари ичида мумтоз эканини кўрсатди. Аввал болани ювди, кафанлади, хушбўй нарсалар сепди, устига кийим ёпиб қўйди. Сўнг Анас розияллоҳу анҳуга боланинг вафоти ҳақида ҳеч нарса демасликни тайинлаб, Абу Талҳа розиллоҳу анҳуни чақириб келиш учун юборди.
Абу Талҳа розиллоҳу анҳу келиши билан ўғлининг аҳволини сўради. Умму Сулайм: “Ухлади. Худодан сўрайманки, шояд шу уйқуси роҳатли бўлса”, деб жавоб қилди.
Абу Талҳа хотинининг бу жавобидан: “Бола соғайиб қолибди”, деб гумон қилди. Ўша куни у рўза тугган эди. Ифторлик қилди.
Тун кирди. Шунда ҳам Умму Сулайм қалбидаги маҳзунликни билдирмади. Хушбўйланиб, зийнатланиб, эрининг ёнида бўлди. Тунни бирга ўтказишди...
Тонг отди. Эри масжидга отланар экан, Умму Сулайм секин гап бошлади:
— Абу Талҳа, агар бир кишидан омонат олинса, сўнг эгаси у нарсани сўраса, олганлар уни қайтармасликка ҳақлари борми? — деб сўради.
— Йўқ, омонат эгасига қайтарилади. Бермаймиз дейишларига ҳақлари йўқ.
Шунда Умму Сулайм мақсадга кўчди:
— Аллоҳ бизга омонатга ўғил берган эди. Энди ўша омонатини қайтариб олди...
Абу Талҳа:
– “Инна лиллаҳи ва инна илайҳи рожиъун” (Биз Аллоҳникимиз ва биз Унга қайтажакмиз), деди. Бошқа ҳеч сўз айта олмади. Чиқиб, Расулуллоҳ соллаллоҳу алайҳи ва салламнинг ҳузурларига борди. Намоз ўқиди. Сўнг кеча шом арафасида ўғли вафот этганини, бундан бехабар тунни хотини билан ўтказганини баён қилди. Ҳазрати Пайғамбаримиз соллаллоҳу алайҳи ва саллам шунда:
— Бу кечангизни Аллоҳ баракотли қилсин, — деб дуо қилдилар.
Расулуллоҳ соллаллоҳу алайҳи ва салламнинг дуоларига осмон эшиклари очилди. Суюкли фарзандларини йўқотган бу оилага Аллоҳ таоло Абдуллоҳ ибн Абу Талҳани берди. Абдуллоҳни эса, тўққизта фарзанд билан
сийлади. Ҳаммалари ҳофизи Куръон бўлишди. Айниқса, тўнғичи Исҳоқ ибн Абдуллоҳ йирик фақиҳ даражасига кўтарилди...
Ушбу ҳикоя муҳтарам оналаримизга, азиза опа-сингилларимизга дунё ва охират саодати сари ойдин йўлни кўрсатади, деб умид қиламиз. Зеро, Пайғамбаримиз соллаллаҳу алайҳи ва саллам:
“Аёлларнинг яхшиси – назар солсанг, хурсанд қиладиган, амр қилсанг, итоат этадиган ва ғойиб бўлсанг, сени ўз нафсида ва молингда муҳофаза қиладиганидир”.
Яна бир ҳадисда Пайғамбаримиз алайҳиссалом: “Агар аёл киши беш вақт намозини ўқиса, бир ой рўзасини тутса, фаржини сақласа ва эрига итоат қилса, унга: “Жаннатнинг қайси эшигидан хоҳласанг, киравер”, дейилади”, деганлар.
Манбалар асосида Саидаброр Умаров тайёрлади
Нишонга урилган гаплар: “Саодатга эришиш йўлларидан бири – сендан рози бўлиб турган онангнинг ихлос билан қилган дуосидир!”
Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.
Эй Аллоҳ! Зикрингдан чалғиган онларимиз учун бизни кечиргин!
“Ховатир роқия журнали”
*****
Гўзал хотима топишнинг 4 та шарти бор:
- Ҳаром қилинган нарсалардан узоқлашиш.
- Фарз, вожиб ва суннат амалларни ўз вақтида адо этиш.
- Мустаҳаб, нафл амалларга эътиборли бўлиш.
- Аллоҳ таолодан гўзал хотима сўраб дуо қилиш ва У Зот ҳақида яхши гумонда бўлиш.
Шайх Муҳаммад Хайр Шаъъол ҳафизаҳуллоҳ
*****
Кўп либосларинг сенинг наздингда эскирган бўлиши мумкин. Аммо уни бирор кишига ҳадя қилсанг, у мазкур кийимни “Ҳайит куни киядиган либос” деб қабул қилади.
Али Тантовий раҳимаҳуллоҳ
*****
Ҳеч кимнинг шодлигини ўғирламанг.
Ҳеч кимнинг қалбига озор берманг.
Умр қисқа. Қабримизда бизни дуоибад эмас, дуоихайр қиладиган кишига муҳтож бўламиз.
“Ховатир роқия журнали”
*****
Саодатга эришиш йўлларидан бири – сендан рози бўлиб турган онангнинг ихлос билан қилган дуосидир!
“Ховатир роқия журнали”
Лаззатли нарсаларни татиб кўрдим. Офиятдан кўра лаззатлироқ нарсани топмадим.
Аччиқ нарсаларни ҳам татиб кўрдим. Одамларга муҳтож бўлишдан кўра аччиқроқ нарсани топмадим.
“Ховатир роқия журнали”
Интернет материалларидан тўплаб, таржима қилувчи
Нозимжон Иминжонов