ЎМИ Матбуот хизмати

Ўзбекистон Республикаси Президенти Шавкат Мирзиёев 2 май куни Бирлашган Араб Амирликлари энергетика ва саноат вазири Суҳайл бин Муҳаммад ал-Мазруий бошчилигидаги делегацияни қабул қилди.

Давлатимиз раҳбари олий даражада эришилган келишувларни амалга ошириш мақсадида мамлакатимизга ташриф буюрган Бирлашган Араб Амирликларининг қатор вазирлик ва идоралари, етакчи инвестиция, молия, логистика, қурилиш ва бошқа компаниялари раҳбарларидан иборат нуфузли делегацияни самимий қутлади.

Ўз навбатида, БАА энергетика ва саноат вазири Суҳайл ал-Мазруий Амирликлар делегацияси номидан Президентимиз Шавкат Мирзиёевга самимий қабул учун миннатдорлик билдирди ҳамда БАА Президенти Шайх Халифа бин Зоид Ол Наҳаён, Абу-Даби Амирлиги валиаҳди, БАА Қуролли Кучлари Олий Бош Қўмондони ўринбосари Шайх Муҳаммад бин Зоид Ол Наҳаён ва БАА Вице-президенти, Бош вазири, Дубай Амирлиги ҳокими Шайх Муҳаммад бин Рошид Ол Мактумнинг саломи ва энг эзгу тилакларини етказди.

Жорий йил март ойида Абу-Даби ва Дубай шаҳарларида ўтказилган олий даражадаги самарали музокаралар дўстлик ва шерикликка асосланган икки томонлама муносабатларни сифат жиҳатидан янги босқичга кўтаришга хизмат қилгани катта мамнуният билан қайд этилди.

Кейинги ойларда бўлиб ўтган юқори даражадаги делегациялар алмашинуви эришилган келишувлар ва имзоланган битимларни амалга оширишнинг аниқ йўналишлари ва биринчи галдаги чора-тадбирларини белгилаб олиш имконини бергани таъкидланди.

Учрашувда Ўзбекистонда иқтисодиётнинг турли тармоқларида истиқболли лойиҳаларни, жумладан, электр станциялари қуриш ва модернизация қилиш, янги конларни ўзлаштириш ва углеводород хомашёсини чуқур қайта ишлашни кенгайтириш, замонавий кимё саноати ва агросаноат корхоналари, логистика марказлари ташкил этиш, мамлакатимиз ҳудудларида инфратузилмани ривожлантириш ва бошқа қўшма ташаббусларни амалга ошириш масалалари батафсил муҳокама қилинди.

Мамлакатимиз иқтисодиётининг рақобатбардошлигини оширишга қаратилган самарали ислоҳотларни амалга ошириш борасида тажриба алмашиш, шунингдек, юқори малакали кадрлар тайёрлаш соҳасида ҳамкорлик қилиш муҳимлиги таъкидланди.

Бугунги кунда шерикликнинг ҳар бир устувор йўналишида тегишли таклифлар ишлаб чиқиш ва икки томонлама тадбирларни ўтказиш бўйича ишчи гуруҳлар фаолият юритмоқда.

Меҳмонлар Ўзбекистондаги давлат ва жамият ҳаётининг барча жабҳаларини қамраб олган кенг кўламли ислоҳотларни, шунингдек, ҳамкорлик учун мавжуд катта имкониятларни юксак баҳоладилар.

Учрашув якунида мамлакатларимиз халқлари фаровонлиги йўлида кўп қиррали муносабатларни изчил ривожлантириш ва мустаҳкамлаш борасидаги интилиш қатъий экани таъкидланди.

Ўзбекистон мусулмонлари идораси Матбуот хизмати

Америкалик туфли савдоси билан шуғулланувчи тадбиркор ходимларидан бирини бошқа давлатга икки ҳафтага юборди. Ходим у ерда туфли сотиш дўкони очса бўладими-йўқми, шуни билиб келиши керак эди. У етиб бориб, икки ҳафта вазиятни ўрганди ва юртига қайтиб келди. Раҳбарининг олдига кириб: “Биз у давлатда дўкон очолмаймиз. Чунки улар мутлақо туфли кийишмас экан” деди. 

Раҳбар ақлли тадбиркор эди. У айнан ўша давлатга бошқа бир ходимини юборди. У ҳам аввалги ҳамкасбидек икки ҳафта юриб, у ердаги ҳолатни ўрганди ва тезда ортига қайтиб, раҳбарининг олдига кирди-да, ҳансираган ҳолда: “Ҳурматли раис, у ерда зудлик билан дўкон очиб, туфли сотишимиз учун жуда ажойиб имкониятимиз бор экан. Чунки улар ҳали бизнинг туфлиларни кийиб кўришмаган экан” деди. 

Ҳа, одамлар битта нарсага турли томондан назар солишади, у ҳақида турлича фикр юритишади. Бу фикр уларнинг ақлий қобилияти, тушунчаси, дунёқарашидан келиб чиқиб фарқ қилади. 

“Вазиятларни бошқариш санъати” китобидан

Нозимжон Иминжонов таржимаси

ЎМИ Матбуот хизмати

Бугун, 2 май куни Ўзбекистон мусулмонлари идораси раиси, муфтий Усмонхон Алимов ҳазратлари Туркиянинг Истанбул шаҳрида барпо этилган, мамлакатнинг энг йирик масжиди бўлмиш “Чамлижа” жомесининг очилиш маросимида иштирок этиш учун Туркия давлатига жўнаб кетдилар.
“Чамлижа” масжиди Истанбул шаҳрида, денгиз сатҳидан 268 метр баландликда қурилган йирик жомедир. Ушбу мажмуа таркибида музей, санъат галереяси, кутубхона, минг кишилик мажлислар зали, саккизта санъат устахонаси ва ёпиқ автотураргоҳ ҳам бунёд этилган.
Мазкур мажмуа нафақат ибодат қилиш маскани, балки ижтимоий, маданий, таълимга йўналтирилган биноларни ҳам ўз ичига олади.
Бир вақтнинг ўзида 60000 кишини ўз бағрига сиғдира оладиган ва шаҳарнинг энг чиройли нуқталаридан бирида бапо этилган масжид Исломнинг XXI асрда Истанбул шаҳрида қолдирган муҳрларидан бири сифатида тарих зарварақларидан ўз ўрнини эгаллайди.
Мазкур улкан мажмуанинг очилиш маросимига оид хабарлар сайтимиз орқали ёритиб борилади.

Ўзбекистон мусулмонлари идораси Матбуот хизмати