muslim.uz
Филаделфия аэропортида такси ҳайдовчилари учун масжид ташкил этилди
Филаделфия аэропортининг келаётган рейсларни кутиб олувчи такси автомобиллари тураржойида мўжаз масжид ўз фаолиятини олиб боради.
Бу ерда 300 га яқин такси ҳайдовчилари ишлайди. «Исламосфера» хабарига кўра, Филаделфияда 1500 нафар такси ҳайдовчилари бўлиб, уларнинг ярми мусулмонлардир. Улар уч йил давомида йиғилган хайрия пуллари эвазига 10 минг АҚШ долларига трейлерни сотиб олиб, уни намоз ўқишга мослаштиришди. Унинг ёнида қўлбола таҳоратхонани ҳам ишга туширишди.
Бу масжиднинг имоми йўқ, унда таксичиларнинг ўзлари навбатма-навбат имомлик қилишади, азонни ҳам ўзлари шу тарзда ўқишади. Масжид ичидаги кўк қутида хайрия пуллари йиғилади. Ундан тўпланган пуллар ҳисобига ҳар йили масжидни тозалаш ва унга қараб туришга 1000-2000 доллар атрофида маблағ сарфланади.
Ўзбекистон мусулмонлари идораси Матбуот хизмати
Нишонга урилган гаплар: “Кишининг ҳаромдан топилган бир дирҳамни тарк қилиши унинг учун юз минг дирҳамни садақа қилганидан яхшироқдир”
Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.
Аллоҳ таоло Муҳаммад соллаллоҳу алайҳи васалламни «Оламларга раҳмат» деди. Арабистон ярим оролига, Яқин Шарққа, дунёга демади.
*****
Ўлим ўз ҳақиқатида яхшиликдир. Агар ўлаётганлар яхши инсонлар бўлишса, Аллоҳнинг ҳузуридаги мукофот уларга тезлаштирилади. Агар ўлаётганлар ёмон кимсалар бўлишса, Аллоҳ таоло юртлар ва бандаларини улардан қутқаради.
“Тафсийруш Шаъровий”дан
*****
Кишининг ҳаромдан топилган бир дирҳамни тарк қилиши унинг учун юз минг дирҳамни садақа қилганидан яхшироқдир.
Молик ибн Динор раҳимаҳуллоҳ
*****
«Аёлларни фақат олийжаноб эркаклар ҳурмат қилади. Уларни фақат пасткаш кимсалар хўрлайди».
*****
Бир итни суғорган кишининг гуноҳлари кечирилди. Энди бир инсонни суғорган нима бўларкин?!
*****
«Шижоатли илон балиқни чўкишдан қутқариб қолди»
Баъзи оммавий ахборот воситалари атрофимиздаги воқеаларни ана шундай мазмунда ёритади. Уларнинг алдоқчилиги катта муаммо. Ундан ҳам каттароғи «Балиқ чўкади» деган гапга ишонувчиларнинг борлигидир.
*****
Сўзларини тушунмайдиган кимса билан ўтирган киши худди қамоқда ўтиргандек бўлади.
Жалолиддин Румий раҳимаҳуллоҳ
*****
Тўқнашув икки хил бўлади:
- Бошни очадиган (ёрадиган) тўқнашув;
- Ақлни очадиган тўқнашув.
Аббос Маҳмуд Аққод
*****
Сув ҳамма нарсани поклайди. Аммо заҳарли тилни эмас.
“Тарих муҳрлаган сўзлар”
*****
Ҳокимнинг ақлини белгилашнинг биринчи йўли – атрофига кимларни тўплаб олганига қарашдир.
“Тарих муҳрлаган сўзлар”
*****
Аҳмоқни жавобсиз қолдириш унга жавоб бергандан ҳам қаттиқроқ таъсир қилади.
Имом Шофеий раҳимаҳуллоҳ
*****
Пок инсонларнинг хатоси – ҳаммани ўзларидек пок деб ўйлашларидир.
“Тарих муҳрлаган сўзлар”
*****
Интернет материалларидан тўплаб, таржима қилувчи
Нозимжон Иминжонов
Тошкентда янги мажмуа очилиш арафасида
Йил бошидан буён қор-ёмғирли кунларга қарамай, Шайх Муҳаммад Содиқ Муҳаммад Юсуф роҳимаҳуллоҳ номлари учун барпо этилаётган мажмуада қурилиш ишлари бир лаҳза бўлсин-да, тўхтагани йўқ. Бир йилдан ортиқ вақт давомида олиб борилган қурилиш, ниҳоят ўз якунига етиш арафасида.
Мажмуа таркибидаги масжидга кириш жойидаги муҳташам ички ва ташқи пештоқ тўла қуриб битказилди. Мажмуани безаб турадиган иккита минора устига кичик гумбазлар ўрнатилди. Масжид ичидаги безак ишлари якунига етиш арафасида.
Мажмуадаги анжуманлар саройи, минораларнинг қурилиш ишлари якунига етди ҳамда уларнинг қуббасига ҳилол ўрнатилди.
Шунингдек, “Сўгалли ота” мақбарасида ҳам бунёдкорлик ишлари ўз якунига етди. Масжид ҳудудидаги намозхона, аёллар намозхонаси, таҳорат хоналари, минора, 3 та кириш пештоқи, 200 ўринга мўлжалланган анжуманлар саройи, ташқи ва ички фавворалар, мажмуа саҳни, автоуловлар учун тўхташ жойларида қурилиш ва безак бериш ишлари якунланди.
Мажмуа ҳовлиси тўлиқ кўкаламзорлаштирилди, шунингдек ташриф буюрувчи зиёратчиларга қулайликлар яратиш мақсадида замонавий русумдаги ўриндиқлар, чиқинди қутилари ўрнатилди.
Мажмуа ҳудудида бунёд этилган музейда эса Шайх Муҳаммад Содиқ Муҳаммад Юсуф роҳимаҳуллоҳнинг умр йўлига оид қимматли маълумотлар, у кишининг илмий меросини жамлаш режалаштирилган.
Тез кунларда мажмуанинг фойдаланишга топширилиши кутилмоқда.
islom.uz портали таҳририяти
Манба: https://islom.uz
Қозон шаҳрида «Russia Halal Expo – 2019» кўргазмаси бўлиб ўтди
2019 йилнинг 24-26 апрель кунлари Татаристоннинг Қозон шаҳрида «Россия ва Ислом дунёси» шиори остида XI-халқаро иқтисодий саммити бўлиб ўтди. Бу ҳақда islom.uz манбаси хабар берди.
Ушбу саммит доирасида «Russia Halal Expo – 2019» кўргазмаси ҳам ташкил этилди. Унда дунёнинг 50 яқин мамлакатларидан 3000 дан зиёд иштирокчилар қатнашди.
Кўргазма давомида тадбир иштирокчилари томонидан муқаддас қадамжоларга зиёрат туризми йўналишидаги сайёҳларни жалб қилиш бўйича ишларни фаоллаштириш, уни ривожлантириш истиқболлари, бу борада зарур реклама тадбирларини ўтказиш, логистикаларни ташкил этиш масалаларига алоҳида урғу берилди.
Хусусан, саммитда иштирок этган юртимиз вакиллари томонидан Ўзбекистонда туризм ҳамда зиёрат туризми инфратузилмаларини ривожлантириш ва янги туризм объектларини ташкил этишга қаратилган чора-тадбирлар жадаллик билан амалга оширилаётгани ҳақида сўз юритилди. Ушбу соҳада халқаро ҳамкорликни кенгайтириш, мазкур йўналишга тўғридан-тўғри инвестицияларни жалб этиш, Ўзбекистонни зиёрат туризмининг йирик марказларидан бирига айлантириш зарурлиги таъкидлаб ўтилди.
Шу ўринда дунё мўмин-мусулмонлари учун ҳалолликни доимо таъминлаш ва келажак авлодга мерос қолдириш лозимлиги, шу боис, бутун дунёда озиқ-овқат, сув, кийим-кечак, соғлиқ ва тижорат каби барча соҳаларда ҳалол ишлаб чиқариш йўлга қўйилгани эътироф этилди. Бундан кўзланган асосий мақсад – ҳалол озиқ-овқат, ҳалол туризм, ҳалол текстиль, ҳалол тиббиёт каби соҳаларни замонавий технологиялар ёрдамида аслини йўқотмаган ҳолда ривожлантириш ва келажак авлодга мерос қолдириш.
Тадбир давомида «Hilol nashr» матбаа нашриёти фаолияти ҳақида ҳам сўз борди. Юртимиз вакиллари ўз маърузаларида мазкур нашриётнинг фаолияти, бугунги кунда олиб бораётган ишлари, келажакдаги истиқболлари ҳақида тўхталиб ўтишди. Маъруза давомида тадбир иштирокчиларига нашриёт томонидан мамлакатимизда илк марта чоп этилган Қуръони карим нусхаси тақдим этилди.
Ушбу Қуръони каримдан бир нусхаси Татаристон муфтийси Камил Самигуллинга ҳадя қилинди.
Қозон шаҳрида ўтказилган саммит барча иштирокчиларда катта ва унутилмас таассуротлар қолдирди.
Islom.uz портали таҳририяти
Манба: https://islom.uz
