muslim.uz
Нишонга урилган гаплар: “Дўстлик баланд тоғ бўлиб, унга фақат вафодорларгина тирмашиб чиқадилар”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Агар ёмонликка ёмонлик билан жавоб бериладиган бўлса, у ҳолда ёмонлик қачон тугайди?
“Тарих муҳрлаган сўзлар”
*****
Дўстлик баланд тоғ бўлиб, унга фақат вафодорларгина тирмашиб чиқадилар.
“Тарих муҳрлаган сўзлар”
*****
Сув ҳамма нарсани ювади. Аммо заҳарли тилни эмас.
“Тарих муҳрлаган сўзлар”
*****
Ҳақиқий сустлик берк ақлларда бўлади.
“Тарих муҳрлаган сўзлар”
*****
Ватан уч нафар одамнинг устида туради:
- Таом берадиган деҳқоннинг;
- Қўриқлайдиган аскарнинг;
- Тарбия қиладиган муаллимнинг.
“Тарих муҳрлаган сўзлар”
*****
Агар чиройли аёл гавҳар бўлса, фазилатли аёл (гавҳарларга тўла) кондир.
“Тарих муҳрлаган сўзлар”
*****
Қамоқхонанинг ҳидини ҳидламасдан (яъни қамоққа тушмасдан) ўғрилик қилиб юрадиганлар нақадар кўп!
“Тарих муҳрлаган сўзлар”
*****
Ўзи хато қилиб, яна ундан узр сўрашларини кутадиган кимсалар мени жуда ҳам безовта қилади.
Бернард Шоу
*****
Ўзингни оқлаб ўтирма. Дўстларинг ўзингни оқлашингга муҳтож эмаслар. Душманларинг эса бу гапларингга ишонмайдилар.
“Тарих муҳрлаган сўзлар”
*****
Интернет материалларидан тўплаб, таржима қилувчи
Нозимжон Иминжонов
“Расулуллоҳ соллаллоҳу алайҳи васаллам вафот этганларида, У зот ювилган сув қаерга кетган?”
Бугун улуғ олим, шайх Муҳаммад Мутаваллий Шаъровий ҳақидаги ибратли бир қиссани эътиборингизга ҳавола қиламиз.
Кунлардан бир куни дин шайхлари ва уламоларидан бири бошчилигида бир ҳафталик исломий анжуман уюштирилди.
Бу конференцияга шайх Шаъровий ҳам таклиф қилиндилар. Шайх Шаъровий таклифга биноан анжуманга ташриф буюриб, унинг биринчи мажлисига ҳозир бўлдилар. Анжуман бошланди. Шайх Шаъровий мажлис ҳайъатидан жой олдилар. Анжуманга раислик қилаётган киши ўзини илму маърифатда барчадан устун даражада дея мағрурланар ва бу билан ҳузурланар эди.
Мажлис асносида бунга гувоҳ бўлган имом Шаъровий изн сўраб, минбарга чиқдилар ва «Сизларга бир савол бераман:
Расулуллоҳ соллаллоҳу алайҳи васаллам вафот этганларида У зот ювилган сув қаерга кетган?» дедилар.
Мажлис аҳли кутилмаган саволдан ҳангу манг бўлиб қолди. Ҳеч кимдан садо чиқмади. Барча жим, ҳеч ким гапирмайди.
Анжуман раиси ҳижолат ва саросимада қолди. «Наҳотки мен бу саволнинг жавобини билмайман?» ўйларди у. Ниҳоят, раис шайх Шаъровийга: «Бизга фурсат беринг, инша Аллоҳ, эртанги мажлисгача саволингизга жавоб топармиз» деб, бу ҳолатдан чиқди.
Мажлисга раислик қилган киши тўғри уйига борди-ю, кутубхонасига кириб, бу мушкул саволга жавоб қидира кетди. Бироқ, ҳарчанд қидирмасин, китоб титмасин, ҳеч нарса топа олмади. Ҳамма китобларини бирма-бир варақлаб чиқди, лекин бу саволга жавоб топа олмади. Ниҳоят чарчаб, варақлаб ўтирган китобининг устида ухлаб қолди.
Бир пайт тушида Расулуллоҳ соллаллоҳу алайҳи васаллам унинг олдига келдилар. У зотнинг ёнларида фонус кўтарган бир киши бор эди.
Раис дарҳол Расулуллоҳ соллаллоҳу алайҳи васалламнинг ҳузурларига бориб: «Эй Аллоҳнинг Расули, сиз ювилган сув қаерга кетган?» деб сўради. У зот соллаллоҳу алайҳи васаллам ёнларида фонус кўтариб турган кишига ишора қилдилар. Фонус кўтарган киши шундай деди: «Расулуллоҳ соллаллоҳу алайҳи васаллам ювилган сув буғланиб, осмонга кўтарилган. Сўнг ёмғир бўлиб ерга ёққан. Бу ёмғирнинг ҳар бир қатраси ўрнида масжид бино қилинган». Маълум бўлишича, ер юзининг қаерида бўлмасин, Расулуллоҳ соллаллоҳу алайҳи васаллам ювилган сувнинг ҳар бир қатраси тушган жойда бир масжид бино қилинган экан.
Анжуман раиси уйқусидан бахтиёр ҳолда уйғонди. Энди у анжуманга ёруғ юз билан бора оладиган жавобни топган эди. У шоша-пиша анжуманга етиб бориб, шайх Шаъровийнинг оғзига термулиб, кечаги саволнинг жавобини сўрашларини кутди.
Лекин шайх ҳеч нарса бўлмагандек, мажлис ҳайъатида виқор билан ўтирардилар. Раиснинг ичи пишиб, бир амаллаб мажлиснинг охиригача чидади. Ниҳоят, тоқати тоқ бўлиб, имомга деди:
– Кеча бир савол сўраган эдингиз, жавобиини айтайми?
– Жавобини билдингми? – сўрадилар имом Шаъровий.
– Ҳа, – деди раис.
– Хўш, Расулуллоҳ соллаллоҳу алайҳи васаллам ювилган сув қаерга кетган экан?
– Расулуллоҳ соллаллоҳу алайҳи васаллам ювилган сув буғланиб, осмонга кўтарилган экан. Сўнг ерга ёмғир бўлиб ёққан экан. Ўша ёмғирнинг ҳар қатраси ўрнида бир масжид бино бўлган экан, – деди раис.
– Жавобни қандай қилиб билдинг? – сўрадилар имом.
– Тушимда Расулуллоҳ соллаллоҳу алайҳи васаллам олдимга келдилар, У зотдан сўрадим.
– Лекин жавобни сенга фонус кўтарган киши айтди-ку? – дедилар кулимсираб имом Шаъровий.
Раис саросима ва ҳайратдан бир зум ҳайкалдек қотиб қолди. Сўнг ўзига келиб, беихтиёр «Буни қандай билдингиз?» деди. Шунда Шаъровий ҳаммани чексиз ҳайратда қолдириб, «Фонус кўтарган мен эдим!» дедилар…
Бу қиссани ўша анжуман раисининг ўзи ҳикоя қилиб берган.
Роббим, гуноҳларим ҳар қанча улуғ бўлса ҳам, афвинг улуғроқ эканлигини билдим.
Одинахон Муҳаммад Содиқ
Манба: https://azon.uz
Қозон мусулмон киноси фестивалида 400дан ортиқ филм иштирок этади
2019 йилнинг 24-30 апрель кунлари бўлиб ўтадиган XV халқаро мусулмон киноси фестивалида иштирок этиш имкониятини берувчи ариза топшириш жараёни якунланди.
Ушбу фестивалда иштирок этиш учун 44 мамлакатдан 400 дан ортиқ кинокартина иштирок этиши қайд этилмоқда. Унда Афғонистон, Миср, Эрон, Индонезия, Яман, Қатар, Норвегия, Саудия Арабистони, Сурия, Судан, Жанубий Африка сингари мамлакат вакиллари иштирок этиш истагини билдирганлар.
Ўзбекистон мусулмонлари идораси Матбуот хизмати
Иброҳим Фиқийдан 10 та насиҳат
Мисрлик машҳур мураббий, инсон имкониятларини ривожлантириш бўйича мутахассис ва шу мавзудаги кўплаб китобларнинг муаллифи, Канада “Инсон тараққиёти” марказининг асосчиси ва раҳбари Иброҳим Фиқийнинг хотиржамлик, бахт-саодат, муаммолардан қутулиш, инсонларга шодлик улашиш, ризқда баракага эришишга оид 10 та насиҳатини келтирамиз.
- Ризо (Аллоҳ таоло берган ризққа рози бўлиш, қаноат) билан ҳаёт ширин бўлади.
Ҳа, Аллоҳ таоло тақсимлаган ризққа рози бўлган инсон хотиржам ва бахтиёр ҳолда яшайди. Аммо бу розилик ҳеч қандай иш қилмай, уйда ўтириш дегани эмас. Балки Аллоҳ таолодан покиза ризқ сўраб, астойдил ҳалол меҳнат қилиб, унинг натижасига рози бўлишдир.
- Табассум сабабли мушкулотлар енгиллашади.
Ҳа, инсонларнинг юзига табассум билан боқиш ҳам садақа эканини унутмайлик!
- Истиғфор сабабли ҳожатлар раво бўлади.
Ҳа, Истиғфор сабабли кўп берк эшиклар очилиб, муаммолар бартараф бўлади. Бундан ташқари кўп истиғфор айтувчи инсоннинг ризқи ҳам зиёда бўлади.
- Дуо сабабли қийин ишлар амалга ошади.
Бир иш сизга қийинлик қиляпти. Лекин у иш Аллоҳ таолога қийин эмас! Шунинг учун Аллоҳ таолога дуо қилиб, қийин ишларни енгиллатишини, мушкулларни осон қилишини сўраш лозим.
- Ким нуқсонсиз дўст хоҳласа, дўстсиз яшайди.
Дунёда нуқсонсиз инсоннинг ўзи йўқ. Ҳаммамизда хато бор. Хатосиз дўст излаган киши ундай инсонни топа олмайди.
- Ким нуқсонсиз жуфт хоҳласа, бўйдоқ яшайди.
Уйланмоқчи бўлган қизнинг нуқсонсиз, баркамол бўлишини ҳамма ҳам хоҳлайди. Аммо ундай қиз йўқ-да. Инсон бўлгач, унда камчиликлар бўлади. Шунинг учун инсон ўз жуфтининг баъзи камчиликларига кўз юмиб, бир-бирини тўлдириб яшашга уриниши керак.
- Ким муаммоларсиз қадрдон хоҳласа, умри қидириш билан ўтади.
Муаммосиз инсоннинг ўзи йўқ. Мен шундай дўст, улфат топайки, унда бирорта муаммо, камчилиги бўлмасин деган одам бир умр дўсту ёрсиз ёлғиз яшайди.
- Ким комил қариндош хоҳласа, қариндошсиз, ноқис ҳолда яшайди.
Қариндошлар ҳақида ҳам юқоридаги гапларни айтиш мумкин.
- Агар сизни бошқаларнинг иши ташвишга солса, билингки, сиз асл табиатли инсон экансиз.
Бошқаларнинг дардларини ҳис қилиш, уларнинг муаммоларига ўз муаммосидек қараш, оғирини енгил қилишга уриниш инсоний фазилатлардандир.
10. Агар бошқа кишида гўзалликни кўрсангиз, билингки, сизнинг ичингиз гўзал экан.
Бошқаларнинг хатосини топишга уриниш ўрнига, улардаги гўзал хислатлар ва фазилатларни кўриш инсоннинг ички дунёси гўзал эканидан даракдир.
“Ховатир роқия журнали” маълумотлари асосида
Нозимжон Иминжонов тайёралади
