muslim.uz
«Wilmotte & Associés» Ислом цивилизацияси марказини қуришда иштирок этади
Ўзбекистон Қурилиш вазирлиги ўринбосари Ботир Зокиров бошчилигидаги делегация Париж шаҳрида Ўзбекистон Ислом цивилизацияси маркази биносини қуриш бўйича «Wilmotte & Associés» компанияси билан музокаралар олиб борди.
Француз компанияси билан имзоланган шартномага кўра, Ўзбекистон ислом цивилизацияси маркази концепциясининг тақдимоти ўтказилди. Шунингдек бино лойиҳасини ишлаб чиқиш, ушбу меъморий ансамблнинг ички дизайнини такомиллаштириш масалалари муҳокама қилинди.
«Дунё» ахборот агентлиги хабарига кўра, мажмуа кутубхона, ахборот-ресурс маркази, илмий кафедралар, конференция зали, хизмат хоналари ва бошқа объектларни ўз ичига олади.
«Wilmotte & Associates» компанияси бош директори Борина Андриунинг айтишича, Ўзбекистон ислом цивилизацияси марказини яратиш бу халқаро миқёсдаги йирик ва аҳамиятли лойиҳа ҳисобланади.
“Ўзбекистонда бундай кенг миқёсли лойиҳани муваффақиятли амалга ошириш учун барча шарт-шароитлар мавжуд. Айнан Ўзбекистонда буюк ислом олимлари ва уламолари яшашган ва ижод қилишган. Шунинг учун аҳоли ва халқаро жамоатчиликка исломий маърифатни ўргатиш, сизларнинг буюк аждодларингиз мероси билан хабардор қилишда катта аҳамият касб этадиган бундай лойиҳада иштирок этиш биз учун катта шарафдир”, – деди компания раҳбари.
Ўзбекистон мусулмонлар идораси Матбуот хизмати
Онлайн диний савол-жавобни биласизми?
Диний идора Фатво бўлими бир неча ойдан бери мўмин-мусулмонларнинг шаръий масалаларига илмий ва асосли жавобларни туну кун “SavollarMuslimUzBot” ва savollar.muslim.uz сайти орқали тақдим этиб келмоқдалар. Ушбу телеграм орқали ҳар куни 50-60 та, ҳафтасига 300-350 та, ойига эса 1300 тадан ортиқ турли мавзудаги саволлар келиб тушмоқда ва уларга Фатво ҳайъати аъзолари томонидан жавоблар бериб берилмоқда.
Машҳур тобеъин Муҳаммад Ибн Сирин раҳимаҳуллоҳ: “Дин бу нозик омонатдир! Уни кимдан олаётганингизга эътибор беринг!”, деганларида жуда ҳам катта ҳикмак мужассам. Шундан келиб чиқиб, ўзингизни қизиқтирган диний-маърифий саволларингизни қулай услубда, олиму уламоларга йўллашингиз мумкин ва исталган пайтда бир неча дақиқа ичида асослантирилган жавобларни оласиз.
Бунинг учун SavollarMuslimUzBot га аъзо бўлинг ва ҳафтада 7 кун, кунда 24 соат давомида саволларингизни йўлланг!
Қуйида ушбу каналда эълон қилинган бир савол-жавобни ҳавола этамиз. Савол: Ассалому алайкум, ҳурматли фатво ҳайъати аъзолари! Қиблага оёқ узатиб ўтириш ёки ухлашнинг шариатимиздаги ҳукми қандай?
Ва алайкум ассалом. Узрсиз оёқни қиблага узатиш макруҳ экани борасида ҳанафий мазҳаби уламолари иттифоқ қилишган. Чунки қибла шариатимизнинг шиорларидан саналади. Аллоҳ таоло Қуръони каримда шундай деган:
وَمَن يُعَظِّمْ شَعَائِرَ اللَّهِ فَإِنَّهَا مِن تَقْوَى الْقُلُوبِ
яъни: "Яна кимки Аллоҳнинг шиорларини улуғ деб билса, бас, албатта, (бу) дилларнинг тақвосидандир" (Ҳаж сураси, 32-оят).
Ҳазрати Пайғамбаримиз алайҳиссалом мусулмонларни "қибла аҳли" деб номлаганлар. Бу ҳам қибла Ислом шиори эканига далилдир.
Ҳанафий мазҳабининг муҳаққиқ уламоларидан Муҳаммад Амин Ибн Обидин беморнинг намозига доир масалаларни баён қилиб шундай деган:
"Ўтириб намоз ўқий олмайдиган киши намозини ётиб боши билан ишора қилиб ўқийди. Оёғи қибла томонга қараган бўлади, лекин бироз тиззасини букиб олади. Чунки оёқни қиблага узатиш макруҳ. Бошини бироз кўтариб қиблага юзланиб туради" ("Раддул муҳтор", Касалнинг намози боби).
وَيُكْرَهُ مَدُّ الرِّجْلِ إلَى الْقِبْلَةِ وَإِلَى الْمُصْحَفِ وَإِلَى كُتُبِ الْفِقْهِ فِي النَّوْمِ وَغَيْرِهِ .
"Оёқни Қиблага, Мусҳафга ва фиқҳ китобларига чўзиш уйқуда ҳам бошқа пайтда ҳам макруҳ" ("Табйинул-ҳақоиқ шарҳу Канзид-дақоиқ", Намозда қиблага юзланиш боби). Валлоҳу аълам.
ЎМИ Матбуот хизмати
Хайрия карвони орқали самарқандликларга қувонч улашилди
24 ноябрь куни “Вақф” хайрия жамоат фонди томонидан Самарқанд вилоятида “Мурувват карвони” номли хайрия тадбири ташкил этилди.
Самарқанд шаҳридаги “Зилол Бахт” тўйхонасида Ўзбекистон мусулмонлари идорасининг Самарқанд вилояти вакиллиги, "Вақф" хайрия жамоат фонди вилоят филиали ҳодимлари ва бошқа мутасадди шахслар билан биргаликда “Мурувват карвони” номли хайрия тадбири ўтказилди.
Тадбир алоҳида тайёргарликлар асосида олиб борилди. Дастлаб Қуръони карим тиловат қилинди. Йиғилганларга Ўзбекистон Республикаси Президентининг 2018 йил 16 апрелдаги "Диний-маърифий соҳа фаолиятини тубдан такомиллаштириш чора-тадбирлари тўғрисида"ги Фармонига биноан ташкил этилган "Вақф" хайрия жамоат фонди фаолияти, мақсад ва вазифалари, ташкил этилган хайрия ишлари ҳақида маълумот берилди.
Тадбирда вилоятнинг барча ҳудудидан таклиф этилган 100 нафар ижтимоий ҳимояга муҳтож, кам таъминланган ва боқувчисини йўқотган шахсларга озиқ-овқат маҳсулотлари, улар орасидан 16 нафар ногиронлиги бор шахсларга ногиронлик аравачаси тақдим қилинди. Тақдимот ишида вилоятдаги устоз домлалар яқиндан кўмак бердилар. Шунингдек, устоз домлалар ҳам фонднинг эсдалик совғалари билан тақдирландилар.
Тадбир давомида хизмат вазифаларини самарали ўтаб келаётган 285 нафар имом-хатибларга рағбатлантириш мақсадида Ўзбекистон мусулмонлари идораси томонидан нашр эттирилган диний-маърифий мазмундаги китоблар тақдим қилинди. Тадбир сўнгида иштирокчилар қилинган эҳсонлардан мамнун бўлишиб, дуои хайрлар қилишди.
Хайрия тадбири сўнгидан ташкилотчилар Самарқанд шаҳридаги "Саховат уйи" ҳамда Ургут туманидаги "Мурувват уйи" учун жами 5 дона ногиронлик аравачаси ҳадя этдилар.
Амалга оширилган хайрия тадбири учун Ўзбекистон мусулмонлари идорасига ҳамда "Вақф" хайрия жамоат фондига ўзимизнинг чуқур миннатдочилигимизни билдирамиз.
ЎМИ Самарқанд вилояти вакиллиги
Росулуллоҳ (с.а.в) нинг кўзлари намланган ҳолатлар (3-қисм)
ЎМИ Матбуот хизмати
Тафаккур қилиб кўрайлик!
Аллоҳ таоло ҳар бир нарсани ҳикмат билан яратган. Атрофимиздаги борлиққа, ҳайвонлар, ўсимликлар, тоғу тошларга эътибор билан назар солсак, ҳар бири гўзал тартиб ва ўзаро мутаносибликда яратилганига гувоҳ бўламиз.
Аллоҳ таоло оғирлиги 4-5 тонна келадиган филга кийикнинг оёғини берганда нима бўларди? Оёқлар танани кўтара олмай, синиб кетган бўларди. Бундай улкан вазнли жонзот учун мана шундай устундек оёқлар керак.
Бордию кийикка филнинг оёғини берганда нима бўларди? Кийик бу оғир вазнли оёқни кўтаришга қийналиб, юра олмаган бўларди. У сакраб-сакраб юра олиши учун унга мана шундай ингичка, нозик оёқлар керак.
Ҳар бир жонзотнинг тана аъзоларини ўзига мослаб яратган Аллоҳ таоло барча айбу нуқсонлардан покдир!
Ҳозирги даврда нималар бўляпти?
- Уйлар катталашди, аммо оилалар кичрайди.
- Тиббиёт ривожланди, бироқ касалликларнинг тури кўпайди.
- Одам Ойга етиб борди, аммо ён қўшнисининг ҳолидан бехабар.
- Пуллар кўпайди, аммо хотиржамлик йўқолди.
- Донолик юксалиб боряпти, лекин ҳис-туйғулар камайиб кетяпти.
- Билим-маърифат ошди, аммо ҳикмат озайди.
- Йўл-йўлакай қўшилиб оладиган дўстлар кўп, бироқ ҳақиқийлари жуда кам.
- Соатлар турли дизайнда ишлаб чиқарилмоқда, аммо кўп нарсага вақт топа олмаймиз.
- Алоқа воситалари кўпайди. Лекин ҳол-аҳвол сўраш, дийдорлашиш камайиб боряпти.
- Одамлар йилдан-йилга кўпайиб бормоқда, бироқ одамийлик йўқолиб бормоқда.
Эй Роббим! Аҳволимизни ислоҳ қилгин ва бизга гўзал хотима бергин!
Нозимжон Иминжонов тайёрлади