Юртимизнинг барча ҳудуларида ўтаётгани каби бугун Жиззах вилоятида ҳам «Энг маърифатли имом» кўрик-танловнинг вилоят босқичи ташкил этилди.

Танлов, анъанага кўра, Қуръони карим тиловати билан бошланди.

– Бугунги танлов ҳар қачонгидан ҳам кўтаринки руҳда, уюшқоқлик билан ўтказилди, – дейди Жиззах вилояти бош имом-хатиби Меҳмонали Жабборов. – Вилоятимизнинг Жиззах шаҳри ва 12 та туманида фаолият юритаётган имом-хатиблар ва имом ноиблари ўзларининг илмий салоҳияти, касбий маҳорати, ташаббускорлиги, замонавий ахборот технологияларидан фойдалана олиш қобилиятини бугунги тадбирда яққол намоён этишди.

Танлов иштирокчиларининг чиқишлари ҳакамлар ҳайъати томонидан баҳолаб борилди.

Табиийки, танловда кимдир ғалаба сурурини туйса, яна кимдир соғлом рақобат муҳитидан фойдаланиб, кейинги тадбирлар учун замин ҳозирлайди.

Ҳакамлар ҳайъати аъзоларининг якдил хулосасига кўра, энг маърифатлилар аниқланди.

“Энг маърифатли имом” танловининг Жиззах вилоят босқичи ғолиблари:

I-ўрин: Аҳмедов Нарзулло (Жиззах шаҳридаги “Ҳавастлик” жоме масжиди имом-хатиби).

2-ўрин: Мирзақулов Лутфулло (Зомин туманидаги “Боймоқли” жоме масжиди имом-хатиби).

3-ўрин: Абдураҳимов Достон (Арнасой туманидаги “Раҳмон”  жоме масжиди имом-ноиби).

Шунингдек, танловда турли номинациялар бўйича ҳам ғолиблар аниқланди.

Улар:

 “Энг тарғиботчи имом” – Атабаев Абдумутал (Жиззах вилояти бош имом-хатиби ўринбосари).

“Энг таъсирли ижодий иш” – Ҳалилов Умид (Жиззах шаҳар "Имом Бухорий" жоме масжиди имом ноиби).

“Энг хушовоз муаззин” – Раимжонов Муҳаммаджон (Жиззах шаҳар "Нижонлик" жоме масжиди имом-ноиби).

“Энг ишбилармон мутавалли” – Соипов Маматқул (Ш.Рашидов тумани "Қўшчинор" жоме масжиди мутаваллиси).

“Энг миришкор боғбон” –  Нурматов Мирзоҳид  (Зомин тумани "Маърифатли" жоме масжиди боғбони).

“Энг намунали таҳоратхона” –  Валиев Султонхон (“Нижонлик” жоме масжиди  таҳоратхонаси).

“Энг замонавий қоровулхона” – Жиззах шаҳар “Хўжа Нуриддин” жоме масжиди  қоровулхонаси (масжид имом ноиби Ўразов Улуғбек).

“Энг бой кутубхона” – Зомин тумани “Маърифатли” жоме масжиди  кутубхонаси (масжид имом хатиби Равшанов Аброр).

Ғолибларга Жиззах вилоят вакиллигининг эсдалик совғалари топширилди.

Т. НИЗОМОВ

ЎМИ Матбуот хизмати

Ўтнафас шоир Расул Ҳамзатовнинг бир шеърида шундай ўхшатиш бор: шеър қаҳрамони тушида ўлиб қолади. Тоғ-у тошлар орасида бежон ётган одам ўз тилида сўзлашаётганларнинг сўзларини эшитгач ҳаётга қайтади. Шоир " Жонимга масиҳдир шу она тилим" дея таърифлайди. Ажиб ўхшатиш. Ҳар бир инсон учун ўз миллий тили жон қадар азиз.

Тил - давлатнинг мулки. Уни асраш, ривожлантириш шу миллатнинг юксалиши демакдир. Бундан бир неча йиллар муқаддам ана шундай юксакликка эришишим учун дадил қадам ташланган. Яъни, Ўзбекистон Республикаси конституциясида давлат тилининг мақоми ҳуқуқий жиҳатдан мустаҳкамлаб қўйилган. Бунинг натижаси ўлароқ ўзбек тили давлатимизнинг Байроғи, Герби, Мадҳияси каби қонун йўли билан ҳимояланадиган давлат рамзига айланди. Бу юртдошларимиз ҳаётида унутилмас воқеага айланди.

Истиқлол йилларида барча соҳаларда бўлгани каби тилимиз тараққиётида ҳам муҳим ўзгаришлар юз берди. Халқаро миқиёсда ўзбек тилининг обрўси ошди. "Давлат тили ҳақида"ги қонун тилимизни илмий асосда ривожлантириш учун кенг имкониятлар эшигини очди. Бунинг самарасида эса она тилимиз ўзининг бор гўзаллиги ва жозибасини намоён эта олди. Тил -  миллат қиёфасининг бир бўлаги. Уни гўзал ва мукаммал қилиб яратиш учун мустақилликка илк қадамлар ташланаётган даврдаёқ, биринчи президентимиз томонидан ўзбек тилига давлат тили мақомини бериш масаласи кун тартибига қўйилиб бу иш амалга оширилди.

Бугунги кунда мавжуд тилларнинг 90 фоизи йўқолиб кетиш арафасида турибди. Бу асосан цивилизация сабаб, миллийлигидан ажралаётган кам сонли миллатларнинг тилидир. Шукурки, давлат арбоблари, олим ва ёзувчиларимиз, шоирларимиз саъй- ҳаракатлари сабаб бизнинг тилимиз бундай хавфдан йироқ. Тил фақатгина муомала воситаси эмас, балки халқнинг маданияти, тарихи, турмуш тарзи, урф одати ҳамдир. Маънавий бойлигимизни асраш йўлида кўплаб чора тадбирлар амалга оширилмоқда. Алишер   Навоий номидаги тил ва адабиёт институтининг ташкил этилгани, ўзбек тили ҳақида яртилаётган илмий адабиётлар, қолаверса турли бадиий китобларни чоп эттиришга алоҳида эътибор қаратилаётгани фикримизнинг яққол далилидир.

Тил халқни бирлаштиради, ўқитади, тарбиялайди, анъана ва урф-одатларини сақлайди. Шу боис ҳам ҳар биримиз уни миллий ва умумбашарий тушунчалар асосида тараққий этган тиллар сафига қўшишга ўз ҳиссамизни қўшишимиз даркор. Зеро биз бу тилда ёзилган, ҳамон севиб ўқилаётган жуда улкан маданий-адабий мерос эгаларимиз. Пойдеворимиз ҳам жуда мустаҳкам ва кучли.

Аммо бир нарса кишини чуқур мушоҳадага чорлайди. Кўча-кўйда дўкон, фирмаларнинг номлари, турли рекламалар диққатимизни тортади. Уларнинг кўпчилигида имло хатолари бисёр. Бунданда ачинарлиси ўз миллий маҳсулотларимиз четдан ўзлашган сўзлар билан номланаяпти. Нима тадбиркорларимиз ўз тақдим этаётган маҳсулотига ўзбекча ном қўйса, ҳаридор олмайдими, ёки номи жарангламай қўядими . Асло, ўзбек тилининг ҳеч бир тилдан қолишмайдиган жилоси, сеҳри бор. Бу тилда Алишер Навоию, Заҳириддин Муҳаммад Бобур каби буюк боболаримиз дунё тан олган асарларни яратган. Нега биз ўзлашма сўзларни урчитишимиз керак. Нима учун нутқимизда улардан пала-партиш фойдаланишимиз керак. Келинг, азиз юртдош, мана шу камчиликларга барҳам бериб тилимизнинг бор қудратини намоён этайлик. Ахир бунинг учун барча имкониятлар яратилган.

“Кўкалдош” ўрта махсус ислом билим юрти мудир ўринбосари

 А.Ғаниев 

Билим юртида ўзбек тилига давлат тили мақоми берилганига 29 йил тўлиши муносабати билан устоз ва мураббийлар ҳамда талабалар иштирокида “Тилга ҳурмат – элга ҳурмат” шиори остида 20 октябрь куни тадбир бўлиб ўтди. Унда она тилининг аҳамияти ва унинг инсон ҳаётидаги ўрни ҳақида суҳбат ўтказилди.   

Она – дунёдаги энг буюк ва қадрли сўз. Бу сўзни ўз тилида айтиш инсонга бениҳоя сурур бахш этади. Бундай бахтни ҳис этиш ҳаммага ҳам насиб этмайди. Тарихдан маълумки, ҳар бир тузум ўзининг тўсиқларини қўйиб келган. Бу борада миллатимиз ҳам кўпдан-кўп тазйиқларга учраб, ўз ҳис-туйғуларини ўзгалар тилида айтишга мажбур бўлганлари ҳеч биримизга сир эмас.

Халқимизнинг узоқ йиллар интиқиб кутган орзуларидан бири 1989 йил, 21октябрда ушалди. Чунки шу кунда жонажон халқимиз ўз орзу-умидлари-ю, қувонч-шодликларини, онажон деган улуғ сўзни ўз тилида эмин-эркин айтишдек улкан бахтга эришди. Ўзбек тилига давлат тили мақоми берилиши, ҳам диний, ҳам дунёвий масалаларда ўзининг ижобий таъсирини кўрсатди. Халқимиз Алоҳнинг каломи – Қуръони карим маъноларини ўзбек тилида ўқишдек, шарафли толега мушарраф бўлдилар. Элимизнинг бундай нуфузли чўққига чиқишлари учун мустабит тузум ғояларига қарши курашиб, не-не буюк аждодларимиз қатағонга учраб, қурбон бўлдилар. Биз бугун ўша улуғ зотларнинг муборак номларини айнан ўзбек тилида фахр билан мадҳ этамиз. Тилимизнинг бугунги кундаги аҳамияти ҳақида сўз бошласак, унинг ижобий таъсирларини санаб адоғига етолмаслигимиз аниқ. Аждодларимиз қазиб кетган илм чашмасидан тўйиб-тўйиб ичиб, ташна дилимизни қондиришимиз ҳам бунга ёрқин далил бўла олади. Ўзбекистон қаҳрамони, халқ шоири Абдулла Орипов тил ҳақида бундай деган:

 “Она тилим, сен борсан, шаксиз

Булбул куйин шеърга соларман.

Сен йўқолган кунинг шубҳасиз,

Мен ҳам тўти бўлиб қолурман”.

 Ҳа, ҳар бир шахснинг айтар сўзи ва ҳис туйғуларини ифодалашга ўз тили бўлмоғи зарур. Йўқса, шоир айтганидек тўтидан ҳеч қандай фарқи қолмайди. Бизни ўз сўзимизни ўз тилимизда айтишимизни таъминлаш йўлида қанчадан-қанча аждодлар жон фидо қилдилар! Энди ўша аждодларимизга муносиб авлод бўлиб, жонажон тилимизни кўз қорачиғимиздек ҳимоя қилиш бизнинг шарафли вазифамиздир.

Янги нашр қилинган китоблар тақдимоти мазкур вазифанинг давомий босқичи бўлди десак муболаға бўлмайди. Жумладан, Абдулла Қодирийнинг “Ўтган кунлар”, “Меҳробдан чаён”, “Диёри бакр”, “Обид кетмон” ва “Адибни хотирлаб” каби беш жилддан иборат китоблар жамланмаси, Қаландар Абдураҳмоновнинг “Буюклар каҳкашонида” асари, Доктор Айман Рушдий Сувайднинг “Қуръон ўганиш қоидалари” ва “Фалсафа асослари” каби рисолалар китобхонларга тақдим этилди.

Тадбир сўнгида она тилимиз ҳақида ва тақдимоти ўтказилган китоблар тўғрисида савол-жавоблар ўтказилди. Китобхонлар ўзларини қизиқтирган саволларга жавоб олишди.

А. ҒАНИЕВ

“Кўкалдош” ўрта махсус

билим юрти мудир ўринбосари