muslim.uz
Мулоҳаза: тўйлардаги ўйларимиз
Маълумки, Яратган дунё аҳлига, жумладан инсон оламига бир қанча неъматларни ато этиб, уларни берилган неъматлардан оқилона фойдаланишга, тежаб-тергаб ишлатишга, исрофга йўл қўймасликка чақиради. Бу борада Қуръони каримда:
“...Шунингдек, еб-ичинглар, (лекин) исроф қилмангиз! Зеро, У исров қилувчиларни севмагай” (Аъроф сураси, 31-оят).
Айни пайтда ҳадиси шарифда: “Енглар, ичинглар, садақа қилинглар, аммо исрофгарчилик ва фахрга берилманглар” деб марҳамат қилинган.
Лекин, минг афсуслар бўлсинки, бугунги кунга келиб аксарият холларда исрофдан сақланиш эътибордан четда қолмоқда. Айтишимиз мумкинки, исроф моҳияти шуни ифода этадики, исроф бўлаётган неъмат хох унинг баҳоси қиммат ёки арзон, нодир ёки сероб бўлишидан қатъий назар мақсадсиз истеъмол этиш исроф маъносини ифода этади.
Халқимиз тўй, турли муносабатлар билан ўтказиладиган маросимларни, шодиёналарни яхши кўради. Умри давомида меҳнат қилиб фарзанди учун тўй-хашамларига деб маблағ сарфлайди. Назар солсангиз, бу каби меҳр-мурувват таҳсинга лойиқ. Аммо, ном чиқариш, обрў қозониш, бошқалардан устун бўлиш, тўй ва маросимларини бошқаларникидан бир неча баробар дабдабали қиламан деб фарзандларининг бахтини ўйламай бир қанча исроф ишлар (сон-саноқсиз автоулов, бир неча юз нафар кишилар, бир қанча ҳофизларни жалб қилиш ва ҳоказо )га қўл уриб, натижада кўнгилсизликларга учраш эса ачинарли ҳол.
Аслида тўй-маросимларни меъёрида, дабдабасиз, исрофга йўл қўймаган ҳолда ўтказиб, тўйда сарфланадиган ортиқча маблағларни ёш келин-куёвларнинг келажак ҳаётларида асқотадиган зарур маиший жиҳозларга сарфланса қандай гўзал бўлар эди.
Мамлакатимиз раҳбари Ш.Мирзиёев ҳам тўйларни ихчам, камчиқим ўтказиш бўйича вилоятларга борганларида фаоллар билан учрашганларида гапириб ўтдилар.
Бир донишманд айтганидек, “саховатли бўл, аммо исроф қилма, тежамкор бўл, лекин бахил бўлма”. Исроф саҳийлик эмас, тежамкорлик бахиллик эмас. Тежамкор киши пулини керагидан ортиқча сарфламайди. Пулини фақат ҳаёти, рўзғори, эҳтиёжи учун зарур бўлган нарсаларга харжлайди. Тежаган киши асло фақир бўлмайди, балки икки дунё саодатига эришишини таъкидлаб, муборак ҳадисларда “ Иқтисод қилган киши фақир бўлмайди”, деб марҳамат қилинган экан. Айнан шу маънода Абу Ҳанифа (р.ҳ): “Хайр (яхшилик) ва эҳсонда исроф бўлмаганидек, исрофда ҳам ҳечқандай хайр йўқдир”, деган бўлсалар. Суқрот эса камхарж бўлиб қолганидан шикоят қилган кишига қарата: “ Исрофингга бир чегара қўйиб, маблағингни тежа, ўзинг ўзингдан қарз ол, шунда аҳволинг яхшиланади”, деган экан. Донишманднинг тавсияси бугунги кунимизда хар қадамда исрофга йўл қўйиб, ҳаётининг қийинчилигидан шикоят қилаётган кишиларни тўғри йўлга чорлаётгандек бўлиши барчага сир эмас.
Дейлик, исроф деб фақат маблағ, бойлик ёки мулкни совуриш тушунилмайди. Ҳаётимиз учун зарур бўлган электр энергиясини тежаш, табиий газдан унумли фойдаланиш, ичимлик сувидан меъёрида фойдаланиш, қимматли вақтни беҳуда кетказиш каби фойдали ишларга сарфламаслик ҳам исрофнинг бир туридир. Барчаларимизга ҳаётда тежамкор ва тадбирли бўлишликни, муқаддас ўгитларга мувофиқ умр кечиришимизни насиб этсин деб сўраб қоламиз.
М. АЛОХЎЖАЕВ,
Наманган шаҳар “Абдулқодир қори”
жоме масжиди имом-хатиби
ЎМИ Матбуот хизмати
Шавкат Мирзиёев эртага Жиззахга боради
Шавкат Мирзиёев Жиззахга ташриф буюради. Бу ҳақда Ўзбекистон Республикаси президентининг матбуот котиби Комил Алламжонов Facebook ижтимоий тармоғидаги ўзининг саҳифасида хабар берган.
“Президент Шавкат Мирзиёев эртага, 30 март куни Жиззахга боради.
Вилоятнинг бугунги ҳаёти, белгиланган чора-тадбирлар ижроси билан танишиш, фаоллар билан йиғилиш ўтказиш режалаштирилган”, - дейилади матбуот котиб хабарида.
ЎМИ Матбуот хизмати
Фарғонада Ўзбекистон ва Қирғизистон бош вазирлари иштирокида йиғилиш бўлиб ўтмоқда
Қирғизистон Республикаси Бош вазири Сапар Исаков бошчилигидаги Қирғизистон делегацияси амалий ташриф билан мамлакатимизга келди.
ЎзА хабарига кўра, меҳмонларни Андижон вилоятидаги “Дўстлик” чегара мажмуасида Андижон вилояти ҳокими Шуҳратбек Абдураҳмонов, Қирғизистон Республикасининг Ўзбекистондаги элчихонаси вакиллари ва кенг жамоатчилик вакиллари тантанали равишда кутиб олди.
Ташрифдан кўзланган асосий мақсад, икки қўшни мамлакат ўртасида иқтисодий, маданий, чегара масалалари бўйича алоқаларни янада юқори босқичга кўтариш, шунингдек, савдо-сотиқ, туризм, энергетика, транспорт соҳаларидаги ҳамкорлик кўламини кенгайтириш кўзда тутилган.
Чегара мажмуасида меҳмонларни кутиб олишга бағишланган тадбирдан сўнг Қирғизистон Республикаси Бош вазири Сапар Исаков раҳбарлигидаги делегация Фарғона вилоятига етиб келди.
Фарғонада Ўзбекистон Республикаси ва Қирғизистон Республикаси Бош вазирлари раислигидаги икки давлат чегарадош вилоятлари раҳбарлари кенгашининг биринчи йиғилиши бошланди.
Ўзбекистон Республикаси бош вазири А. Арипов, Қирғизистон Республикаси бош вазири С. Исаков иштирок этаётган йиғилишда мамлакатларимиз ўртасидаги стратегик шериклик муносабатлари, дўстлик, яхши қўшничилик ва ўзаро ишончга асосланган ҳамкорликни янада мустаҳкамлаш, ҳудудларда ўзаро ҳамкорликни йўлга қўйиш, савдо иқтисодий, туризм, маданий маърифий соҳаларни ривожлантириш каби масалалар муҳокама қилинмоқда.
Ўзбекистон мусулмонлар идораси матбуот хизмати
Сенат “Ўзбекистон Республикаси Давлат хавфсизлик хизмати тўғрисида”ги қонунни маъқуллади
Мазкур қонун Ўзбекистон Республикаси Президенти Шавкат Мирзиёевнинг 2018 йил 14 мартдаги “Ўзбекистон Республикасининг давлат хавфсизлиги тизимини такомиллаштириш чора-тадбирлари тўғрисида”ги фармонига мувофиқ ишлаб чиқилган.
ЎзА хабарига кўра, Ўзбекистон Республикаси Давлат хавфсизлик хизмати Ўзбекистон Республикасининг конституциявий тузуми, суверенитети, ҳудудий яхлитлиги ва манфаатларини ташқи ва ички таҳдидлардан ҳимоя қилувчи махсус ваколатли орган этиб белгиланган.
Хизмат Ўзбекистон Республикасининг давлат хавфсизлиги ва манфаатларини ташқи ва ички таҳдидлардан ҳимоя қилади.
Мазкур соҳада қонунийлик ва қонун устуворлигини мустаҳкамлаш, ҳуқуқбузарликларнинг олдини олиш, уларни аниқлаш ва уларга барҳам бериш бўйича фаолият олиб боради.
Ўзбекистон Республикасининг конституциявий тузуми, суверенитети ва ҳудудий яхлитлигига тажовузларнинг олдини олиш, уларни аниқлаш ҳамда уларга барҳам бериш бўйича разведка ва контрразведка фаолиятини амалга оширади.
Ўзбекистон Республикасининг Давлат чегараларини қўриқлайди ва ҳимоя қилади.
Терроризм, экстремизм, уюшган жиноятчиликка, қурол-яроғ, гиёҳвандлик воситалари ва психотроп моддаларнинг ноқонуний муомаласига қарши курашиш; давлат манфаатлари ва хавфсизлигига таҳдид солувчи миллий, ирқий ва диний адоватни тарғиб этишга қаратилган бузғунчилик фаолиятининг олдини олиш, уни аниқлаш ва унга барҳам бериш бўйича фаолият олиб боради.
Иқтисодий, илмий-техникавий, ижтимоий ва ахборот соҳаларида давлат хавфсизлигини таъминлайди. Ўзбекистон Республикаси халқининг тарихий-маданий ва бой маънавий меросини ҳимоя қилади.
Давлат органлари ва бошқа ташкилотларда давлат манфаатлари ва хавфсизлигига таҳдид солувчи коррупция ҳолатларига қарши курашиш;
телекоммуникация ва транспорт соҳасида давлат хавфсизлигини таъминлаш, фавқулодда ҳолатларни юзага келтирувчи омилларнинг олдини олиш, аниқлаш ва уларга барҳам бериш бўйича кураш олиб боради.
Давлат органлари ва бошқа ташкилотларда давлат сирлари сақланиши, махсус алоқа хавфсизлигининг таъминланиши ҳамда ахборотларни криптографик ҳимоя қилишни ташкил этиш устидан назоратни амалга оширади.
Давлат манфаатлари ва хавфсизлигига таҳдид солувчи ҳуқуқбузарликлар содир этилишига имкон берадиган сабаб ва шарт-шароитларни аниқлаш ҳамда бартараф этиш каби вазифаларни бажаради.
Давлат хавфсизлик хизмати фаолиятига оид ана шундай меъёрлар акс этган қонун муҳокамаси юзасидан сўзга чиққанлар жаҳонда ва минтақамидаги мавжуд мураккаб вазият, террорчилик ва бошқа трансмиллий жиноятларнинг кучаяётгани хавфсизликни кучайтиришни тақозо этаётгани қайд этди. Давлат хавфсизлик хизматининг мустаҳкам қонунчилик асоси яратилгани бу жараёнда муҳим аҳамият касб этади.
Давлат хавфсизлик хизматининг ташкилий-ҳуқуқий механизми яратилгани демокртиштиришга оид давлатимиз сиёсатига ҳам тўлиқ мос келади. Қонун тизимнинг халқ учун очиқлиги таъминланишига замин яратади.
Ўзбекистон мусулмонлар идораси матбуот хизмати
“Абу Мансур ал-Мотуридий” номли китоб тақдимоти ўтказилди
Алишер Навоий номидаги Ўзбекистон Миллий кутубхонасида Саидмухтор Оқиловнинг “Абу Мансур ал-Мотуридий” номли китоби тақдимоти бўлиб ўтди.
ЎзА хабарига кўра, тадбирда Тошкент ислом университети проректори, тарих фанлари номзоди, доцент Иброҳим Усмонов, Имом Термизий халқаро илмий-тадқиқот маркази директори, профессор Убайдулла Уватов, Имом Бухорий халқаро илмий-тадқиқот маркази директори Шовосил Зиёдов ва бошқалар ушбу монография материалларидан исломшунослик тарихи ва назарияси, ислом ахлоқи, маданияти, тарихи, айниқса, калом илми ва ақоид фанлари бўйича дастур тузишда фойдаланиш мумкинлигини таъкидлади.
Қадимий шаҳарларимизда улуғ алломаларимизнинг муқаддас мақбаралари ва улар номи билан боғлиқ табаррук қадамжолар кўп. Юртимизда буюк аждодларимизнинг таълимоти, меросига алоҳида эътибор қаратилиб, уларни ўрганиш, сақлаш ва келажак авлодларга етказиш борасида кенг кўламли ишлар амалга оширилмоқда.
Муаллиф китобни ёзишдан мақсади, унинг аҳамияти ҳақида сўзлаб берди.
Ўзбекистон мусулмонлар идораси матбуот хизмати