Биринчиси, Аллоҳ таоло Ўзини “Нур” деб атади: «Аллоҳ осмонларнинг ва Ернинг нуридир ҳамма нарсанинг нури – ёруғлигини берувчи, борлиқни ёритгувчидир» (Нур сураси, 35-оят).
Иккинчиси, Қуръони каримни: «Эй инсонлар! Муҳаққақки, сизларга Раббингиздан бир бурҳон (ўлароқ мўъжизалар ила ҳазрати Муҳаммад) келди ва Биз сизларга очиқ бир нур (қилиб Қуръонни) нозил қилдик» (Нисо сураси, 174-оят).
«Лекин Биз уни (Қуръонни) бир Нур қилдик, Ўз бандаларимиздан хоҳлаганимизни у орқали тўғри йўлга ҳидоят қилурмиз» (Шўро сураси, 52-оят).
«У ҳолда Аллоҳга, Унинг Расулига ва Биз нозил қилган Нурга (Қуръонга) имон келтиринглар. Аллоҳ қилаётган амалларингиздан тугал хабардордир» (Тағобун сураси, 8-оят).
Учинчиси, Тавротни(нг аслини): «Ҳеч шубҳасиз, ўзида ҳидоят ва нур (аҳком ва насиҳатлар) бўлган Тавротни Биз нозил қилдик» (Моида сураси, 44-оят).
(Изоҳ. Бу васф фақат Таврот туширилган даврга тегишлидир, инсонлар қўли билан бузилган бугунги кундаги нусхаларга алоқаси йўқ.)
Тўртинчиси, кундузни нур деб атади: «Ер Раббининг нури ила ёришур» (Зумар сураси, 69-оят).
Бешинчиси, тавҳидни: «(Улар) Аллоҳнинг нурини (гўё) оғизлари билан ўчирмоқчи бўлурлар. Ҳолбуки, кофирлар ёқтирмаса-да, Аллоҳ Ўз нурини (Ислом динини батамом ёйиб) камолига етказгувчидир» (Саф сураси, 8-оят).
Олтинчи, Исломни: «Аллоҳ кимнинг кўксини (қобилият ва туйғуларини, ният ва истаклари сабабли) Исломга очиб қўйган бўлса, у Раббидан (келган) бир нурда бўлмасми, ахир!» (Зумар сураси, 22-оят).
Еттинчиси, қиёмат кунидаги мўминларнинг нурини: «Бизга қаранглар (бизни кутинглар, токи) нурингиздан ол(иб бир оз фойдалан)айлик», дерлар (Ҳадид сураси, 13-оят).
Саккизинчиси, маърифатни: «Унинг нури мисоли бир токчадаги (қувватли) чироқ кабидир» (Нур сураси, 35-оят).
Изоҳ. Ҳидоят топган мўминларга, хоссатан, нури илоҳийдан етган ҳидоят ва маърифатнинг насибаси шуки, обид мўминнинг жисми бир токча кабидир, ичида юлдуз каби порлоқ бир қандил қўйилгандир. У қандил унинг қалбидирки, олами улвийга боғлиқдир, у қандилда ҳидоят ва маърифат чироғи ёниб туради (тафсири Саййид Маҳмуд Торозий – М.К.).
Тўққизинчиси, Пайғамбар алайҳиссаломни: «Дарҳақиқат, сизларга Аллоҳдан бир нур (ҳазрати Муҳаммад) ва равшан бир Китоб (Қуръон) келди» (Моида сураси, 15-оят).
Изоҳ. Кўпчилик муфассирлар бу оятдаги “Нур”дан мурод Муҳаммад соллаллоҳу алайҳи ва салламдир, деб ёзганлар. Дарҳақиқат, бошқа кўпгина оятларда ҳам у зот нур ва чироқ каби нурафшон нарсаларга ўхшатилган (Аҳзоб сураси, 46-оятга қаралсин.) (Абдулазиз Мансур).
Ўнинчиси, ойни: «У Қуёшни бир зиё, ойни бир нур қилган Зотдир» (Юнус сураси, 5-оят).
«Ва у (етти қават осмон)лар ичида ойни нур қилди, қуёшни эса (ёруғлик манбаи бўлмиш) чироқ қилди» (Нуҳ сураси, 16-оят).

Шайх Аҳмад Ғаззолийнинг
“Баҳрул маҳабба” асаридан.

MuslimShosh

Бурайда хурмолари фестивали маҳаллий фермер ва савдогарларнинг 11 миллиондан ортиқ хурмо дарахтини бозорга чиқариш арафасида бўлиб ўтмоқда.

Саудия Арабистони атроф-муҳит, сув ва қишлоқ хўжалиги вазирлигининг Қассим вилояти бошқармаси ташкил этган ушбу фестивал 25 августга қадар давом этади.

Фестивал хурмо етиштирувчи фермерларни замонавий қишлоқ хўжалиги билан таништириш ва энг яхши хурмо етиштиришнинг инновацион усуллари бўйича тажриба алмашишдан иборат.

Фестивалда 4000 дан ортиқ мавсумий иш ўринлари тақдим этилди. Саудия Арабистони Подшоҳлигининг реклама ва туризм фестивалларининг энг муҳим мақсадларидан бири айнан фуқароларни иш билан таъминлашдир.

Фестивал ташкилий ишлари раҳбари Холид Aл-Нуқайдан яратилган иш ўринлари қўмита ва назорат гуруҳи, савдо маркази, чакана савдо дўкон, фермер хўжалиги, хурмо майдони ва экспорт майдончалари орқали таъминланганини тасдиқлади.

Хурмо экспорти мамлакат иқтисодиётининг ажралмас қисмига айланди. Қироллик маҳаллий ва халқаро миқёсда рақобатбардошлигини ошириш мақсадида хурмо етиштиришни қўллаб-қувватлаш ва ривожлантиришда давом этмоқда.

Фестивал минтақада машҳур бўлган 45 дан ортиқ хурмо турларини тарғиб этиш учун кенг қамровли тадбир ва хизматлар тизимини йўлга қўйди. Фестивал хурмо ва унинг ҳосили бўйича ихтисослашган давлат ва хусусий агентликларнинг иштирокини ўз ичига олади. Шунингдек, маркетингга ихтисослашган 27 дан ортиқ агентлик жалб қилинган.

Шунингдек, вилоят фермерлари ҳам иштирок этиб, фестивалдан ташқари давлат идоралари, ишлаб чиқариш тармоқлари ва самарали оилалар учун бир неча кўргазмалар ташкил этилмоқда.

Ўзбекистон мусулмонлари идораси
Матбуот хизмати

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Хайбар фатҳидан сўнг Расулуллоҳ соллаллоҳу алайҳи васаллам Водил Қуро томон юрдилар. Қишлоқлари кўп бўлгани учун ҳам бу водий шу ном ила аталар эди («Водил Қуро»нинг маъноси «Қишлоқлар водийси»дир). Унда араблар билан яҳудийлар ҳам яшар эдилар. Бу жой Арабистон яриморолидаги энг ҳосилдор ерлардан бўлиб, унда булоқлар ва қудуқлар кўп эди. У Хайбар билан Тиймаа номли жойнинг орасида жойлашган эди.

Пайғамбар соллаллоҳу алайҳи васаллам у ернинг аҳолисига Ислом динини таклиф қилдилар. Агар Исломга кирсалар, молларини ҳам, қонларини ҳам сақлаб қолишлари мумкинлигини айтдилар. Аммо улар Исломни қабул қилмадилар.

Орада уруш бўлди. Бу урушда саҳобалар орасида Зубайр ибн Аввом розияллоҳу анҳу янада шуҳрат қозондилар. Мусулмонлар нусратга эришиб, кўплаб нарсаларни ўлжага олдилар. Пайғамбар соллаллоҳу алайҳи васаллам ўлжаларни саҳобаларига тақсимлаб бердилар. Ер ва хурмоларни ҳосилига тенг шериклик шарти билан яҳудийларга қолдирдилар.

Зубайр ибн Аввом розияллоҳу анҳу Расулуллоҳ соллаллоҳу алайҳи васаллам билан у зотнинг барча жангларида иймон ва ихлос-ла иштирок этдилар.

Имом Ҳоким бу ҳақда Зубайр ибн Аввом розияллоҳу анҳунинг ўзларидан қуйидаги ривоятни келтирадилар:
«Аллоҳга қасамки, Расулуллоҳ соллаллоҳу алайҳи васаллам қай бир жанг ёки сарийяга чиққан бўлсалар, албатта, мен ҳам чиқдим».

Зубайр ибн Аввом розияллоҳу анҳу Ҳудайбия сулҳида ҳам қатнашиб, Ризвон байъати иштирокчилари қаторига қўшилишга мушарраф бўлдилар. 

Зубайр ибн Аввом розияллоҳу анҳу ўз одатларича, Хайбар жангида ҳам мислсиз фидокорлик кўрсатдилар. Ўша куни ҳазрати Али розияллоҳу анҳу яҳудийларнинг паҳлавони Миҳрабни ер тишлатганларидан кейин унинг укаси паҳлавон Ясир майдонга чиқди. У ўз найзасини мусулмонларга қарата силтаб кела бошлади. Ҳазрати Али розияллоҳу анҳу унинг қаршисига чиқдилар. Шунда Зубайр ибн Аввом розияллоҳу анҳу у кишига:
«Сенга қасам ила айтаманки, уни менга қўйиб бер», дедилар.
Ҳазрати Али розияллоҳу анҳу четга чиқдилар. Ясир найзасини ўйнатиб келаверди. Унинг қаршисида Зубайр ибн Аввом розияллоҳу анҳу пайдо бўлдилар. 

Шунда у кишининг оналари Софийя розияллоҳу анҳо:
«Эй Аллоҳнинг Расули! Менинг ёлғиз ўғлим қатл бўладими!?» деди.
«Йўқ! Ўғлинг уни қатл қилади», дедилар у зот. Бас, Зубайр ибн Аввом розияллоҳу анҳу уни қатл қилдилар. 

Шунда Расулуллоҳ соллаллоҳу алайҳи васаллам:
«Батаҳқиқ, Хайбар «Марҳабо», деди ва осон бўлди», дедилар.
Пайғамбар соллаллоҳу алайҳи васаллам одамларга Маккани фатҳ қилишга тайёргарлик кўришга амр бердилар. У зот бу ишни сир тутиш лозимлигини алоҳида таъкидладилар.

Ҳотиб ибн Абу Балтаъа эса Пайғамбар алайҳиссаломнинг юришга қасд қилганликлари ҳақида хат ёзиб, бир аёл орқали Қурайш қабиласига юборди. Аллоҳ таоло Пайғамбаримиз алайҳиссаломнинг дуоларини қабул айлаб, бунинг хабарини у зотга билдирди.
Пайғамбар алайҳиссалом ҳазрати Али, Зубайр ибн Аввом ва Миқдодни чақириб: «Тезда йўлга отланинглар, сизларга бир боғ дуч келади, у ердан бир аёлни топасизлар, унда хат бор, ўша хатни олиб, қайтинглар», дедилар. 

Учовлон от чоптириб, боққа бориб, аёлни топишди ва «Хатни чиқар», дейишди. Аёл «Менда хат йўқ», деди. Шунда учовлон хатни қидириб бўлса ҳам топишларига ишора қилиб: «Ё хатни чиқарасан, ё кийимларингни ечасан!» дейишди.

Аёл ночор соч турмаклари орасидан хатни чиқариб берди. Учовлари хатни олиб, Пайғамбар алайҳиссалом ҳузурларига боришди. Қарашса, Ҳотибнинг мушрикларга ёзган хати экан.

Бу ҳодисада ҳам Зубайр ибн Аввом розияллоҳу анҳунинг махсус топшириқларни бажарувчилик сифатлари қўл келди.

Расулуллоҳ соллаллоҳу алайҳи васаллам Маккани фатҳ қилиб, шаҳарга музаффар ҳолда кириб борганларида у зотнинг лашкарлари чап қанотининг қўмондони Зубайр ибн Аввом розияллоҳу анҳу эдилар. Ўша куни Ислом лашкарининг ўнг қанотига Миқдод ибн Асвад розияллоҳу анҳу қўмондонлик қилар эдилар. Пайғамбар соллаллоҳу алайҳи васаллам Маккага кириб, ҳамма тинчиб бўлганидан кейин Зубайр ибн Аввом розияллоҳу анҳу ва Миқдод ибн Асвад розияллоҳу анҳу отлари билан у зотнинг ҳузурларига келдилар. Шунда Расулуллоҳ соллаллоҳу алайҳи васаллам ўринларидан туриб бориб, кийимлари билан уларнинг юзларидаги ғуборни артдилар ва:
«Мен отга икки ҳисса ўлжа, отлиққа бир ҳисса ўлжа тайин қилдим. Ким уни ноқис қилса, уни Аллоҳ ноқис қилсин», дедилар.

«Ҳадис ва ҳаёт» китобининг 23-жузидан олинди