muslim.uz
Расулуллоҳ соллаллоҳу алайҳи васаллам ҳаётларидан лавҳалар: Аллоҳ сизни мағфират қилсин (Аудио)
ЎМИ матбуот хизмати
Қарзни узмай, кечиктириш – зулм
«Расулуллоҳ соллаллоҳу алайҳи ва саллам бундай огоҳлантирдилар: “Бой одамнинг имкони бўла туриб қарзини кечиктириши зулмдир” (Ибн Ҳажар ривояти).
Қарзни қайтаришга қодир бўла туриб, уни пайсалга солиш зулмдир. Ибн Форис раҳимаҳуллоҳ бундай дейди: “Берилиши шарт бўлган нарсани бермаслик – ҳаром. Гарчи қарз бойдан олинган бўлса ҳам, уни кечиктириш узр бўлмайди”.
Қарзни олгандан кейин уни вақтида, хушмуомалалик билан қайтариш лозим. Набий алайҳиссалом: “Сизларнинг энг яхшингиз қарзини гўзал адо этганидир” (Имом Бухорий ривояти), деб марҳамат қилганлар.
Қарз берганга энг яхши мукофот молини ўз вақтида қайтариб бериш ҳамда қарздор томонидан унинг ҳақига қилинган дуодир. Абдуллоҳ ибн Абу Робиъа розияллоҳу анҳу ривоят қилади: «Набий алайҳиссалом мендан қирқ минг қарз олдилар. У зотга мол келганида уларни менга қайтариб бердилар ва: “Аллоҳ молингга ва аҳлингга барака берсин. Албатта, қарзнинг мукофоти мақтов ва адо этишдир”, дедилар».
Агар қарздор: “Олган қарзимни, албатта, қайтариб бераман”, деб ҳаракат қилса, унга Аллоҳ таоло ёрдамчи бўлади. Аммо нияти ўзгани алдаш, молини еб кетиш бўлса, унинг охири войдир.
Абу Ҳурайра розияллоҳу анҳу ривоят қилади: «Пайғамбаримиз алайҳиссалом: “Ким одамларнинг молларини (қарзга) олиб, уни қайтаришни ният қилса, Аллоҳ уни адо этишда ёрдам қилади. Ким йўқ қилишни ният қилиб олса, Аллоҳ уни йўқ қилади”, деб огоҳлантирганлар. Бу ҳадисни ҳар бир қарз олувчи ёдида тутиши керак.
Жуда кўп инсонлар, қарзни истаганларича, зарурат бўлса ҳам, бўлмаса ҳам олаверишади. Сўнг эсдан чиқариб юборишади. Тўлашни хаёлларига ҳам келти-
ришмайди. Мабодо, баъзисини тўлашса, узоқ муддатдан кейин ҳақдор обдон ялингач, қолганини қайтаради. Иш шу даражага етадики, гўё қарздор – ҳақдорга, ҳақдор – қарздорга айланади.
Шуни ёдда сақлаш лозимки, Аллоҳ таоло Ўз раҳмати билан бандасининг ширкдан бошқа барча гуноҳларини кечиради. Фақат қарзни эмас. Бандалар ўртадаги ўзаро ҳақларини бир-бирларидан кечмагунларича, Аллоҳ таоло кечмайди.
Манбалар асосида Бухоро вилояти
Ромитан туманидаги “Мулло Нарзе”
жоме масжиди имом-хатиби
Суннат ФАХРИЕВ тайёрлади.
“Ҳидоят” журналининг 3-сонидан олинди
Фондни ривожлантириш йўналишлари белгиланди
Жорий йил 19 ноябрь куни “Вақф” хайрия жамоат фондининг Васийлик кенгаши йиғилиши бўлиб ўтди. Унда фаолиятни жадаллаштириш, ижтимоий лойиҳаларни амалга ошириш, инновацион услублардан унумли фойдаланиш ва моддий кўмак бериш имкониятини янада кенгайтириш муҳокама қилинди. Шунингдек, кенгашда иш самарадорлигини ошириш бўйича иштирокчилар фикр-мулоҳазалари ҳам тингланди.
Сўзга чиққан нотиқлар вақф мулкчилигини шакллантириш, кам таъминланган фуқароларга моддий ёрдамлар кўрсатиш кўламини кенгайтириш, масжид ва мадрасаларни обод этиш, бу борадаги ишларни жонлантириш лозимлигини таъкидладилар.
Йиғилишда ташкилий масала кўрилди. Аввал хабар берганимиздек, Фонд бошқарув кенгаши раиси Искандар Халилов бошқа ишга ўтгани муносабати билан Тошкент шаҳри Шайхонтоҳур тумани “Шайх Зайниддин” жоме масжиди имом-хатиби Абдураҳмонов Яҳё бошқарув кенгаши раиси этиб тайинланди. Шунингдек, Фонд раиси ўринбосарлари Зоҳиджон Тўраев ва Икромжон Аҳмедов ҳам бошқа ишга ўтганлари маълум қилинди.
Бугунги кунда раҳбарларнинг ҳар жиҳатдан намуна, ташаббускор ва фидойи бўлиши давр талаби эканини ҳам мажлисда алоҳида қайд этилди. Ўз навбатида, белгиланган вазифалар ва истиқболдаги режаларни амалга оширишда жонкуярлик, жамоа бўлиб ишлаш ва замон талабларига монанд тезкорлик билан иш тутишнинг ўрни юқори эканига катта эътибор қаратилди.
Фонднинг янги раҳбарига фаолиятни замон талаблари даражасида олиб бориш, иш унумдорлигини ошириш, ижтимоий лойиҳалар, хайрия ишлари тўғрисида ОАВ ва интернет тармоғи орқали халқимизни хабардор этиш, маблағлар айланишининг шаффофлигини таъминлаш, жамоатчилик билан доимий алоқада бўлиш кабилар юзасидан муҳим тавсиялар берилди.
“Вақф” хайрия жамоат фонди Матбуот хизмати
Москвада Ўзбекистонда диний зиёрат туризмини ривожлантириш масаласи муҳокама қилинди
Россия муфтийлар кенгаши раисининг биринчи ўринбосари, Россия Мусулмонлар диний идораси раиси ўринбосари Рушан Аббясов Ўзбекистон Республикаси элчихонаси маслаҳатчиси Алишер Зиёмуҳамедов билан учрашди. Учрашувда халқаро департамент бошлиғи Илдар Галеев, Россия муфтийлар кенгаши ва Россия Мусулмонлар диний идораси «Муслим Тур» расмий ҳаж-оператор директори Али Ҳожи Гурдин ва Ўзбекистоннинг Россиядаги элчихонаси иқтисодий ишлар бўйича учинчи котиби Азамат Раимов иштирок этди.
Учрашув чоғида Рушан Аббясов Россия Муфтийлар Кенгаши раиси ва Россия Мусулмонлар диний идораси раиси муфтий Шайх Равиль Ғайнутдин номидан Ўзбекистоннинг Россиядаги Фавқулодда ва Мухтор элчисига табригини етказди. Россия муфтийлар кенгаши раисининг биринчи ўринбосари, Россия Мусулмонлар диний идораси раиси ўринбосари элчихонанинг пандемия пайтида ўзбек ватандошларига кўрсатган ёрдами ва қўллаб-қувватлови учун миннатдорчилик билдирди. Рушан Аббясовга кўра, баҳорда ўткир коронавирус пандемияси пайтида мусулмон ташкилотларимизга ўзбекистонлик муҳожирлар бир неча бор мурожаат қилишган. Фақат биргаликдаги саъй-ҳаракатлар орқали бир қатор масалалар, жумладан, уларнинг Ватанга қайтиши ҳал этилди.
Ўз навбатида, Алишер Зиёмуҳамедов ҳам мана шундай оғир даврда ёрдам кўрсатгани учун Россия Муфтийлар Кенгаши раиси ва Россия Мусулмонлар диний идорасига миннатдорчилик билдирди.
Россия Муфтийлар Кенгаши расмий сайтининг ёзишича, томонлар Ўзбекистонда келаси йилга эпидемиологик вазият туфайли қолдирилган "Маънавий ипак йўли" илмий-амалий анжуманини ўтказиш режаларини муҳокама қилишди. Йиғилиш кун тартибидаги мавзулардан бири Ўзбекистонда диний зиёрат туризмни ривожлантириш бўлди.
Учрашув якунида томонлар ўзбек диаспораси билан яқин алоқада бўлиш зарурлигини айтиб, бундан кейин ҳам самарали ҳамкорлик ҳақида келишиб олдилар. Рушан Аббясов меҳмонларга эсдалик совғалари, жумладан, «Читай» нашриёт уйи китобларини тақдим этди.
Ўзбекистон мусулмонлари идораси матбуот хизмати
Малайзия билан зиёрат туризми бўйича ҳамкорлик кўчаяди
Ўзбекистон элчиси Равшан Усманов Малайзия туризм, санъат ва маданият вазирлиги ҳузуридаги Ислом туризми маркази (Islamic Tourism Centre - ITC) Бош директори Моҳмед Разип Ҳожи Хасан билан учрашув ўтказди. Бу ҳақда “Дунё” ахборот агентлиги хабар бермоқда.
Мулоқот чоғида сайёҳлик соҳасида икки томонлама ҳамкорликни ривожлантириш истиқболлари, Ўзбекистоннинг бой маданий-тарихий мероси, минтақаларининг зиёрат туризми учун ноёб ва улкан салоҳияти ҳақида маълумот берилди.
Моҳмед Разип Ҳожи Ҳасаннинг айтишича, Ўзбекистон малайзиялик сайёҳлар учун жозибадор манзил сифатида кўп давлатлардан устунликка эга. Шу боис дунёдаги пандемия билан боғлиқ вазиятни ҳисобга олган ҳолда мамлакатимизнинг сайёҳлик жозибадорлигини Малайзия жамоатчилиги орасида тарғиб қилиш чора-тадбирларини кўришини таъкидлади.
Учрашув якунида ИТМ ва Давлат туризм қўмитаси ўртасида англашув меморандуми имзолаш ва Бухоро вилоятида туризмни ривожлантириш департменти вакиллари ўртасида видеоанжуман ўтказиш юзасидан бир қанча келишувларга эришилди.
Шунингдек, мамлакатимизда туризм соҳа вакиллари учун “зиёрат туризми”, “muslim friendly” ва “halal tourism” стандартларини ривожлантириш масалалари бўйича бир қатор вебинар ва гидлар малакасини ошириш учун малай тили курсларини ташкил этиш режалаштирилган.
Маълумот учун, Ислом туризми маркази (ИТМ) Малайзияда зиёрат туризмини ривожлантириш бўйича асосий мувофиқлаштирувчи идора сифатида фаолият юритади. Уни тегишли вазирлик, идора ва олий ўқув юртлари вакиллари, туризм ва меҳмондўстлик соҳаси бўйича етакчи мутахассисларни ўз ичига олган директорлар Кенгаши амалга оширади.
ИТМ тадқиқот олиб боради, Малайзияда саноатни барқарор ривожлантириш учун туризм сиёсати бўйича таклифларни расмийлаштиради, мусулмон бозорига қаратилган туристик пакет ва йўналишни тайёрлаш бўйича семинарлар ташкил этади ва туроператорлар билан бирга мусулмон туристларнинг эҳтиёжларини қондириш учун алоҳида маҳсулотлар яратади.
Ўзбекистон мусулмонлари идораси Матбуот хизмати