Мисрнинг “Sawt Al Shaab”, “Misr al Balad” ва “Ал-Хабар ал-Йаум” ахборот агентликлари “Ўзбекистон: буюк ишларга янги уфқлар очган маърифий ташаббус” сарлавҳали мақолани ўз ўқувчиларининг эътиборига ҳавола қилди, деб хабар бермоқда «Дунё» АА мухбири.

Унда Ислом ўзининг диний қадриятлари ва маърифий маданияти билан инсонни бешикдан қабргача бўлган ҳаёт йўлига етаклаши ва тўғри йўлни кўрсатиши, бу эса Исломнинг дин ва эътиқод сифатидаги мақбул маънавий қадриятлари билан ўзининг турли илмий, маданий ва иқтисодий унсурлари орқали узвий боғлиқликда намоён этиши ҳамда табиий равишда жамият тараққиёти, фаровонлиги ва тараққиётига олиб келиши, шу нуқтаи назардан Ўзбекистон ушбу мужассамлик негизларига асосланган мустақил тараққиёт моделига эга эканлиги қайд этилган.

“Ўзбекистон Президенти Шавкат Мирзиёевнинг 2018 йил 16 апрелдаги “Диний-маърифий фаолиятни тубдан такомиллаштириш бўйича алоҳида тартиб-қоидалар тўғрисида”ги қарори ушбу соҳадаги бир қатор улкан ташаббусларни йўлга қўйиш ва ҳаётга татбиқ этишда янги уфқларни очишда ҳал қилувчи таъсирини кўрсатди, деб ёзади Мисар ахборот агентликлари. Мазкур қарорга мувофиқ, Ўзбекистон Вазирлар Маҳкамаси ҳузурида Дин ва ижтимоий масалаларни ўрганиш ва тушунтириш ахборот-таҳлил маркази ташкил этилган бўлса, Ҳадис мактаби ва Ўзбекистон мусулмонлари идораси хайрия жамғармаси, бундан ташқари, дунёнинг кўплаб мутафаккирлари ва ислом фанлари тадқиқотчиларининг эътиборини тортган Ўзбекистон халқаро ислом академияси ташкил этилди. Бу чоралар жаҳондаги кўплаб академик муассасаларни Ўзбекистон билан илмий кўприк ва билим соҳасида ҳамкорлик қилишга ундамоқда”.

Мақолада Ўзбекистон халқаро ислом академияси талабаларига халқаро фанлар, Қуръони карим илмлари, Пайғамбар алайҳиссаломнинг муборак ҳадислари, иймон ва тасаввуф масалалари, араб тили, унинг адабиёти ва маданияти, шунингдек, сиёсатшунослик ва инсоният цивилизацияларини ўрганиш бўйича кенг билим берилаётгани маълум қилинган.
Академиянинг ноёб қўлёзмалар ва эски тарихий китоблар билан тўлдирилган кутубхонаси доимий равишда фуқаролар кўмагида муҳим қўлёзмалар билан таъминланиб, бойитиб борилаётгани, ҳозирги пайтда кутубхонада минглаб қадимий китоблар қаторида 500га яқин нодир қўлёзма ва 1500 қадимги тарихий китоб мавжудлиги қаламга олинган.

Мақолада кейинги йилларда уламолар, таниқли олимлар делегацияларининг мамлакатимизга ташрифлари, шунингдек, Ўзбекистон делегацияларининг халқаро илмий анжуманларда иштирок этиш учун хорижга ташрифлари сони сезиларли даражада ошгани ҳам алоҳида қайд этилган.

Ўзбекистон мусулмонлари идораси матбуот хизмати

Ўзбекистон мусулмонлари идораси «Қуръони карим ва тажвидни ўргатиш» бўлими мудири қироат илми устози, мударрис, олим Aлижон қори Файзуллоҳ Махдум ўғли Ҳайдаров Хоразм вилояти Урганч шаҳридаги “Фахриддин ар-Розий” ўрта махсус ислом билим юртига ташриф буюриб, талабаларга илмий суҳбат қилиб берди.

Ўзбекистон мусулмонлари идораси матбуот хизмати

Она диёримиз бой тарих ва улкан моддий-маънавий меросга эга диёр ҳисобланади. Қолаверса, бу заминда муқаддас қадамжолар ва азиз авлиёлар маскан топган зиёратгоҳлар ҳам талайгина. Сўнги йилларда юртбошимиз томонидан ушбу муқаддас қадамжоларни, зиёратгоҳларни ободонлаштириш, зиёратчилар учун қулай шарт-шароит яратиб бериш мақсадида кенг кўламли ишлар олиб борилгани барчамизга сир эмас. Бугун ҳам шу хайрли ишларнинг давом этиб бораётгани бутун ўзбек халқини қувонтиради, албатта.

Мана шундай зиёратгоҳлардан бири пойтахтимиз Тошкент шаҳри марказида жойлашган “Сузук ота” мажмуасидир. Мажмуа тарихий ва янгидан бунёд этилган масжидлар, мақбара ва ҳунармандлар маҳалласини ўз ичига олган бўлиб, ташриф буюрган инсонларга ўзгача кайфият бахш этади.

Мазкур мажмуага юртимизда яшаб ўтган улуғ тасаввуф устозларидан бўлган  Сузук отанинг номлари берилган.  

Сузук ота номи билан машҳур бўлган бу зотнинг асл исмлари Мустафоқул бўлиб, улуғ валиуллоҳлардан бўлган. Сузук ота машҳур “Яссавия” тариқати асосчиси Хожа Аҳмад Яссавийнинг набираси, яъни қизи Гавҳари Ҳуштожнинг суюкли фарзанди бўлиб, 1140 йилда Сайрамда таваллуд топган. Аҳмад Яссавий ҳазратлари бу неварасини жуда яхши кўриб, доимо “сузугим” (суюклигим) деб атаганларидан бу ном у зотга тахаллус бўлиб қолади.

Соҳиби каромат Сузук ота вояга етганларидан сўнг, оталари Аҳмад ал-Қорачуғай Шайхнинг тавсиясига кўра, Шош воҳасига сафар қилиб, қадим Шош кентининг чеккасидаги бир маҳаллада муқим яшаб қоладилар. Ҳудуддаги кимсасиз, тепалик ва жарликлардан иборат бўлган ерларни ўзлаштириш ва обод қилиш учун, Сузук ота туғилган юртидан қорилар, уста-ҳунармандлар ва яқин биродарларини олиб келиб, янги уй-жойлар қурдириб, янги маҳаллага асос солгач, илм ва ҳунарни кенг оммага жорий қилишни бошлаб юборадилар.

Маҳалла аҳолисининг доно маслаҳатгўйи, ҳунармандлар устози, толибларнинг пири муршиди бўлган Сузук ота 1217-йилда вафот этади ва шу жойда дафн этилди.

Салоҳиддин Тошқандийнинг “Темурнома” асарида қайд этилишича, соҳибқирон Амир Темур 1363-1364 йиллардаги ҳарбий юришлари пайтида Тошкентга ташриф буюради. Ташриф мобайнида маънавий пири бўлган Хожа Аҳмад Яссавийнинг эрка набираси, улуғ валий Сузук отанинг қабрларини ҳам зиёрат қилиб, у зотнинг хотирасига атаб мақбара ва жоме масжид қурилишига амр қилади.   

Асрлар давомида халқимизга маънавий озуқа бериб келган зиёратгоҳ ва масжидда, 2017 йил май ойидан Юртбошимиз Ш.Мирзиёев ташаббуслари билан тўла реконструкция ишлари бошлаб юборилди. 2 йил мобайнида олиб борилган бунёдкорлик ишлари натижасида 6,5 гектар майдонда кириш портали, тарихий тарҳни сақлаб қолган ҳолда қайта таъмирланган ва барча замонавий қулайликларга эга зиёратгоҳ, масжид ва ҳунармандлар учун 30 та замонавий устахона ва яшаш жойларидан иборат кўркам мажмуа вужудга келди.

Айни дамда мазкур мажмуа “Вақф” фонди тасарруфидаги кўркам зиёратгоҳлардан бири сифатида, маҳаллий ва хорижий меҳмонларнинг севимли масканига айланмоқда десак муболаға бўлмайди.

“Вақф” хайрия жамоат фонди Матбуот хизмати

Жамол домла Мавлонов
Бухоро шаҳар "Масжиди Калон"
жоме масжиди
имом-хатиби

Непаллик офталмолог доктор Сундук Роит дунёнинг энг сара 139 нафар шифокорлари ичидан сараланиб, "Инсониятга хизмат учун Исо мукофоти"ни ва бир миллион АҚШ долларилик қимматбаҳо совринни қўлга киритди. Уни Баҳрайн қироли Ҳамад бин Исо Aл Халифа тақдирлади.
Тақдирлаш маросимида Баҳрайн қироли Подшоҳлик томонидан қабул қилинган ушбу глобал ташаббус инсониятнинг бирлигига, барқарорлигига ва мусибатларни кетказишга хизмат қилаётганини таъкидлади. Шунингдек, у непаллик офталмолог доктор Сундук Роитнинг саъй-ҳаракатларини юқори баҳолади.
“Инсониятга хизмат қилгани учун Исо мукофоти” халқаро мукофотлар орасида нуфузли ўринни эгаллайди, у ҳар икки йилда бир марта катта Баҳрайн қироллиги томонидан ўтказилади. Ғолиб бир миллион AҚШ доллари қийматидаги соф олтин медали ҳамда қирол Ҳамад бин Исо Aл Халифа ҳазрати олийлари томонидан фахрли ёрлиқ билан тақдирланади.
Танлов ҳакамлар ҳайъати ғолиб деб кўз касалликкларини янгича усул билан даволашни кашф қилган непаллик офталмологнинг лойиҳасини танлади. Сундук Роитнинг арзон услуби унга катаракта операциясини 5 дақиқадан камроқ вақт ичида амалга оширишга ёрдам беради. Бу вақт давомида у катарактани тикувсиз, кичик кесмалар орқали олиб ташлайди ва уларнинг ўрнига арзон сунъий линза қўяди. У бундай услуб билан 120 000 дан ортиқ кўриш қобилиятини йўқотган беморларни бепул даволади.
Доктор Роит сўнгги 30 йил давомида ўзининг инновацион жарроҳлик усули билан Непалда кўрлик даражасини қарийб ярмига камайтиришга ҳисса қўшди ва у бутун дунё бўйлаб 650 дан ортиқ шифокорларга кўришдаги заифликка қарши курашдаги тажрибасини ўргатди. У шунгача дунё бўйлаб 35 миллиондан ортиқ операцияларни амалга оширди.
Доктор Роит 2030 йилга қадар бир миллион одамни текшириш ва 300 000 дан 500 000 гача одамларни кўз касалликларини даволашни ўз олдига мақсад қилиб қўйган.

Интернет материаллари асосида ЎМИ ходими
И.Аҳмедов тайёрлади.