muslim.uz
Хушхабар: Хай-тек услубида қайта бунёд этилган “Ҳасанхон қори” масжиди иш бошлади
Муборак Рамазон ойининг бошланишига ҳам саноқли кунлар қолди. Шу боис республикамизнинг барча гўшаларида Раҳмат ойини муносиб кутиб олиш ишлари айни авж палласида. Бундай шукуҳли дамларда қайта бунёд этилиб, янги ва замонавий қиёфа акс этаётган масжидларнинг очилаётгани ҳар бир мўмин қалбига қувонч олиб кираётган бўлса ажаб эмас. Айниқса, ана шундай замонавий масжидларга эга бўлаётган намозхонларнинг хурсандчилиги чексиз бўлиши тайин.
Бугун пешин намози аввалида Тошкент шаҳар Учтепа тумани Қатортол маҳалласида хай-тек услубида бунёд этилган “Ҳасанхон қори” масжидининг очилиш маросими бўлиб ўтди. Унда Тошкент шаҳар бош имом-хатиби Абдуқаҳҳор домла Юнусов ҳамда диний соҳа ходимлари қатори нуроний отахонлар ва жамоатчилик вакиллари иштирок этди.
Қуръони карим тиловатлари ва хайрли дуолар билан бошланган тадбирда Абдуқаҳҳор домла Юнусов барча иштирокчиларни Рамазони шариф ва янги масжид билан муборакбод этиб, ушбу масжидни бунёд этишда сахийлик ва жонбозлик кўрсатган юртдошларимиз ҳаққига хайрли дуолар қилди.
Масжиднинг олдинги биноси 1993 йилда 10 сотох ерга қурилган эди. Вақт ўтиши билан у эскириб, намозхонлар учун торлик қила бошлади. Кейинчалик хайрия пуллари ёрдамида масжид ёнидаги ерлар сотиб олиниб, умумий ҳудуди 30 сотихга етказилди. Мана шу ер майдонидан унумли фойдаланиш мақсадида уч ярим йил ичида масжид хай-тек услубида бунёд этилди. Масжид ярим ертўла, биринчи ва иккинчи қаватлардан иборат ва у 4000–4500 намозхонни сиғдира олади. Бундан ташқари, 100 ўринли таҳоратхона, кутубхона, маъмурият хоналари бор. Уларнинг барчаси иситиш ва совутиш тизимларига эга.
Масжидни барпо этишда хизмат қилган барча саховотпешаларни Аллоҳнинг Ўзи мукофотласин.
Ҳадиси шарифда Расулуллоҳ соллаллоҳу алайҳи ва саллам: “Ким қушнинг инича ёки ундан кичикроқ бўлса-да, Аллоҳ учун масжид бино қилса, Аллоҳ таоло у учун бир байт(уй)ни бино қилади”, деганлар (Имом Ибн Можа ривояти).
Ёшларни зарарли иллатлардан ҳимоя қилиш – динимиз талаби!
Бугунги кунда ёшларнинг турли мафкуравий таъсирлар нишонига айланиши ва турли оқимларга кириб қолишларининг асосий сабаблари: диний илмларни ўрганиш учун муносиб устоз танламаслик, ишонувчанлик, айрим ҳолларда қайсарлик ва шон-шуҳратга тез эга бўлишга ҳаракат қилишларидир. Бу омиллардан эса бузғунчи ғояларнинг тарафдорлари унумли фойдаланиб қолмоқдалар.
Муқаддас динимиз шунинг учун ҳам фарзандларимизни ҳам жисмоний, ҳам маънавий таълим-тарбиясига кучли аҳамият беришга ундайди. Хусусан, Қуръони каримда мингдан ортиқ оятлар одоб-аҳлоқ, тарбия ва илмга алоқадорлиги инсонни баркамолликка етаклайдиган мезон бўлса, фарзанд тарбиясига ҳам алоҳида эътибор қаратилиши динимизни нақадар мукаммал эканлигини кўрсатиб беради. Бу ҳақда Аллоҳ таоло шундай дейди:“Эй иймон келтирганлар! Ўзингизни ва аҳли аёлингизни ёқилғиси одамлару тошдан бўлган оловдан сақланг” (“Таҳрим” сураси 6-оят).
Инсон ўзи, аҳли аёли ва фарзандларини қандай қилиб оловдан сақлаши мумкин? Бу сақлаш аввало ўзидан сўнг аҳлларидан жаҳолатни кетказиб, дунё ҳаётида оқибати оловга олиб борадиган турли жинояту гуноҳлардан, нодонлигу бадхулқликлардан таълим ва тарбия воситасида сақлаш билан бўлар экан.
Шунингдек, баъзи оилаларда фарзандларининг телевизор ёки телефонлардан қандай фойдаланаётганига аҳамият қаратмайдилар. Уларнинг фарзандларини ўзлари эмас, балки ўша техник жиҳозлар “тарбияламоқда”. Ҳар бир ота болалари тарбияси учун жавобгар эканини унутмаслигимиз ва охиратда бу ҳақда айнан ота сўралишини ёдимиздан чиқармаслигимиз керак! Бу ишлари эса – аҳлини, оятда айтилганидек, дўзахдан сақлаш эмас, балки дўзахга рўбарў қилишдир!
Дунёда илм-фан шиддат билан ривожланмоқда, ҳар куни кашфиётлар қилинмоқда. Лекин шу кашфиётларнинг қанча қисми мусулмонлар ҳиссасига тўғри келмоқда? Афсуски, бу нисбат жуда кам бўлиб, бизни огоҳликка, илм-фан билан янада жиддийроқ шуғулланишга ундайди ва туртки бўлиши керак. Тарихда эса мусулмон олимлари дунё халқларига кўплаб кашфиётларни тақдим этганлар.
Ота-оналар фарзандларининг бу каби ҳолатларидан бехабарликлари ёки кўз юмишлари асло тўғри келмайди!
Ҳар бир ота-она фарзанди дунёда бахт-саодатли, илм-маърифатли, обрў-эътиборли бўлишини хоҳлайди, охиратда эса жаннатий бўлиши орзусида бўлади. Шундай экан, ҳар биримиз ёшларимизни одоб-ахлоқли, илм-маърифатли қилиш билан биргаликда, Яратганни танитиб, Пайғамбари ким, дини нима, имон калимасини биладими, мазҳаби қайси, мазҳабида маҳкам туриш лозимлиги, ҳар хил бузғунчи оқимлардан жиддий эҳтиёт бўлиш каби зарурий нарсаларни ўргатишимиз ҳам керак. Чунки мусулмоннинг фарзанди буларни билмаслиги ота-оналарининг камчилиги ҳисобланади. Пайғамбаримиз саллаллоҳу алайҳи васаллам марҳамат қиладилар:
“Киши фарзандига одоб бериши – бир соъ эҳсон қилишидан афзалдир” (Имом Термизий ривоятлари). (Бир соъ – тақрибан 4 килограммдир).
Фарзандларга илм бериш борасида эса Муъоз ибн Жабал разияллоҳу анҳу шундай дейдилар:
“Билмаганга илм ўргатиш – садақадир”.
Фарзандларини ёмон хулқли кимсалар таъсиридан ҳимоя қилиш ҳам – ота-онанинг бурчидир! Ота-она фарзандларига яхши, ростгўй дўст танлашда ёрдам бериши керак. Чунки ўспиринлик вақти инсоннинг феъл-атвори ва руҳияти шаклланадиган асосий давр ҳисобланади. Бундай пайтда дўстларнинг таъсири катта бўлади.
Бу борада ҳазрати Умар ўғилларига шундай насиҳат қилдилар: “Имон-эътиқодли, ақлли ва одобли киши билан дўстлашгин! У муҳтожлигингда – ёрдамчинг, қийин кунларингда – қўлловчинг, маъюслигингда – қувончинг, хотиржамлигингда – зийнатинг бўлади”.
Ислом тарихига назар солсак, дастлаб Пайғамбаримиз алайҳиссалом тазйиққа учраган мусулмонларни икки марта Ҳабашистонга жўнатдилар. Кейинчалик Аллоҳ таолонинг буйруғи билан Пайғамбаримиз алайҳиссалом бошчилигида саҳобалар Маккадан Мадинага ҳижрат қилганлари маълумдир. Мана шу ҳижрат динимиздаги улуғ ҳодиса сифатида қамарий йил ҳисобининг бошланиш санаси сифатида танланган.
Мазкур ҳижратларда мусулмонлар ўз яшаб турган ерларидан бошқа юртларга кўчиб кетишга жонлари, эътиқодлари ва мол-мулкларига нисбатан хатарнинг ўта кучайганлиги оқибатида содир бўлган. Абу Усмон Мужошиъ ибн Масъуд ривоят қилган ҳадиси ширифда Расулуллоҳ саллаллоҳу алайҳи ва саллам айтдилар:
“Макка фатҳидан кейин ҳижрат йўқ” (Имом Бухорий ривоятлари).
Абдуллоҳ ибн Амр разияллоҳу анҳудан ривоят қилинган ҳадиси шарифда айтилади:
“Расулуллоҳ саллаллоҳу алайҳи ва саллманинг ҳузурларига бир киши келиб: “Эй Аллоҳнинг Расули, мен ота-онамни йиғлаган ҳолда ташлаб, ҳижрат қилиш учун сизнинг ҳузурингизга келдим”, – деди. У Зот алайҳиссалом эса: “Ота-онангиз олдига қайтиб, уларни қандай йиғлатган бўлсангиз, шундай кулдиринг”, – деб жавоб бердилар (Имом Насоий ривоятлари).
Шунингдек, айрим кимсалар томонидан мақсадли равишда ислом моҳиятига зид бўлган турли хил асоссиз ахборотлар, манбаси аниқ бўлмаган диний хабарлар ёки кишиларни ваҳимага солувчи фото ва видеолавҳалар кенг тарғиб этилмоқда. Баъзи ёшларнинг бу каби динимизга зид бўлган хабарлар, аниқ манбаси кўрсатилмаган маълумотларга ишониб қолишаётгани биз – мусулмонларни ташвишлантирмоқда.
Маълумки, динимизда ҳам нақл қилинган бирор хабарга ишонишдан аввал уни текшириб, аниқлаб олиш талаб этилади. Бу борада Қуръони каримда шундай дейилади:
“Эй, мўминлар! Агар сизларга бирор фосиқ кимса хабар келтирса, сизлар (ҳақиқий аҳволни) билмаган ҳолингизда бирор қавмга азият етказиб қўйиб, (кейин) қилган ишларингизга пушаймон бўлмаслигингиз учун (у хабарни) аниқлаб (текшириб) кўрингиз! (Ҳужурот сураси 6-оят).
Демак, ҳар бир олинган маълумотни текшириб, асосли ёки асоссиз эканини аниқламай туриб, ўша маълумотга қараб иш тутиш, ислом моҳиятига кўра, шайтон йўлига кириш ҳамда ёлғончи бўлиб қолиш билан баробар бўлади.
Абдулазиз БОБАМИРЗАЕВ
Муборак ой олдидан муносиб туҳфа
Масжидлар Аллоҳ таолонинг байти, ер юзидаги энг покиза ва тоза маконлардир. Уларнинг минораларидан муаззинларнинг овозлари янграйди, у жойга фаришталар тушишади, раҳматлар ёғилади, масжид аҳлининг устига баракалар ёғилади. Масжидларда мусулмонлар бир-бирлари билан танишадилар, улфат бўладилар, бир-бирларига ёрдам бериб, ҳамжиҳат бўладилар, бир-бирларини зиёрат қилиб, бир-бирларига раҳм-шафқат кўрсатадилар. Бунинг натижасида ораларида боғланиш, дўстлик, меҳрибонлик кучаяди.
Аллоҳ таоло Қуръони каримда “Албатта, Аллоҳнинг масжидларини фақат Аллоҳга ва охират кунига иймон келтирганлар, намозни тўкис адо этганлар, закотни берганлар ва Аллоҳдан бошқадан қўрқмаганларгина обод қилурлар…” (Тавба сураси, 18-оят) деган.
Охирги йилларда диёримизда диний-маърифий соҳада кўплаб хайрли ислоҳотлар амалга ошириб келинмоқда. Айниқса, масжидларни обод этиш, ибодатга келувчилар учун энг олий даражадаги қулайликлар муҳайё қилинмоқда.
«Учкўприк» жомесининг янги биноси муборак ой олдидан учкўприкликлар учун муносиб туҳфа бўлди. Миллий ва замонавий уйғунликни ўзида мужассам қилган Байтуллоҳда илк жума намози адо этилди. Унда вилоят бош имом-хатиби Убайдуллоҳ домла Абдуллаев, Бувайда тумани бош имом-хатиби Аҳмадхон домла Низомовлар иштирок этишди.
Убайдуллоҳ домла Абдуллаев юртдошларимизни кириб келаётган Рамазон ойи билан муборакбод этиб, масжидларни обод этилишида, аввало, юртимизда диний-маърифий соҳага қаратилаётган эътибор, қолаверса, саховатпеша ва ҳимматли халқимизнинг саъй-ҳаракатлари катта экани таъкидладилар.
Жамоат билан жума намози адо этилиб, якунда юрт равнақи, халқ фаровонлиги, динимиз ривожи ҳамда Рамазон ойи барокатли бўлишини сўраб дуо қилинди.
Фарғона вилояти вакиллиги Матбуот хизмати
Хушхабар: Моҳи Рамазон арафасида “Бектемир” жоме масжиди очилди
Ҳар йили муборак Рамазон арафасида мўмин-мусулмон юртдошларимизнинг кўнглини шод этиш мақсадида янги масжидларни ишга тушириш анъана тусига кириб бормоқда. Албатта, моҳи Рамазон ойини янги масжидларда қарши олиш, таровеҳларда иштирок этиш намозхонларга ўзгача хушкайфият улашади.
2024 йил 8 март, жума куни Тошкент шаҳар Бектемир туманидаги “Бектемир” жоме масжиди намозхонлари ана шундай шодлик туйғусини тўйдилар.
Мазкур жоменинг очилиши Қуръони карим тиловатлари ва хайрли дуолар билан бошланди. Унда Ўзбекистон мусулмонлари идораси раиси ўринбосари Ҳомиджон домла Ишматбеков, маҳаллий имом-хатиблар, нуроний отахонлар ва жамоатчилик вакиллари иштирок этди.
Дастлаб, Ҳомиджон домла йиғилганларни кириб келаётган Рамазони шариф ва янги масжид билан табриклаб, унинг қурилишига ҳисса қўшган барча азиз инсонлар ҳаққига дуои хайрлар қилди ва Рамазон ойининг фазилати ва масжидларни обод қилишга бериладиган ажру савоблар ҳақида маъруза қилдилар. Сўнгра жума намози адо этилиб, масжидни барпо этишда ҳисса қўшган юртдошларимиз ҳаққига дуолар қилинди.
“Бектемир” жоме масжиди замонавий талабларга риоя қилган ҳолда бунёд этилган. Умумий майдони 3 сотохни ташкил этади. Масжид ер тўла билан бирга 3 қават бўлиб, энг тепаси икки ён намозхонадан иборат. Масжид уч мингдан зиёд намозхонга мўлжалланган.
Маърифат маскани бўлган масжидларни обод қилаётган азизларга Яратганнинг розилиги насиб қилсин, юртимиз тинч, осойишта ва фаровонлиги бардавом бўлсин!
Ўзбекистон мусулмонлари идораси
Матбуот хизмати
РАМАЗОНГА ГЎЗАЛ ТУҲФА
Бошимизга ойлар султони, уммат учун улкан имкониятлар ойи – Моҳи Рамазон соя солиб турибди. Айни кунларда республикамизнинг барча ҳудудларида бўлгани сингари Тошкент вилоятида ҳам муборак ойга пухта тайёргарлик кўриляпти. Раҳмат ойи арафасида масжидларнинг янги бинолари фойдаланишга топширилиши хайрли анъанага айланиб қолди.
Бугун – саййидул айём жума куни Зангиота туманидаги "Умир" жоме масжидининг янги биноси Рамазонга гўзал туҳфа сифатида мўмин-мусулмонлар ихтиёрига топширилди.
Қуръони карим тиловати билан бошланган очилиш маросимида Тошкент вилояти бош имом-хатиби Жасурбек домла Раупов, туман бош имоми, нуроний отахонлар, маҳалла фаолари иштирок этди.
Масжиднинг эски биноси таъмирталаб, намозхонлар учун тор бўлиб қолган эди. 2021 йилнинг 15 март куни жоменинг янги биносига илк ғишт қўйилган эди. Орадан уч йил ўтиб барча шарт-шароитга эга замонавий байтуллоҳ қад ростлади.
Янги жоме биносида, ертўла билан қўшиб ҳисоблаганда, бир вақтнинг ўзида уч минг киши бемалол ибодатларни адо этиши мумкин.
Гўзал иморатга монанд тарзда замонавий таҳоратхона ҳам бунёд этилгани мўмин-мусулмонларни беҳад қувонтирди. Масжиднинг шундоқ ёнгинасида автотураргоҳ ҳам барпо этилгани айни муддао бўлди.
Эндиликда намозхонлар ёзнинг жазирамасида ҳам, қишнинг қаҳратонида ҳам бемалол жомега келиб, уловларни автотураргоҳга қўйиб, эмин-эркин ибодатларни адо этишлари мумкин. Чунки масжидга кондиционерлар ўрнатилган, илиқ пол ётқизилган.
Очилиш маросими сўнгида Набий соллаллоҳу алайҳи ва саламнинг «Ким Аллоҳ таоло учун бир масжид қурса, Аллоҳ унинг учун жаннатда бир уй қуради» (Имом Муслим ривояти), деган муборак ҳадислари Аллоҳнинг байтини обод қилишга ҳисса қўшган барча азиз инсонларга мужда тарзида айтилиб, уларнинг ҳақларига хайрли дуолар қилинди.
Эслатиб ўтамиз, Рамазон ойи бошлангунга қадар Тошкент вилоятида яна 2–3 та масжиднинг янги биноларини фойдаланишга топширали, иншоаллоҳ.
Тошкент вилояти вакиллиги
Матбуот хизмати