Ўзбекистон “Адолат” СДП Тошкент шаҳар Кенгаши томонидан партия Сиёсий Кенгашининг “Тинчлик, фаровонлик ва тараққиёт йўлида бирлашайлик!” умумий шиори остида “Диний экстремизм ва ёт маданият тараққиёт кушандаси” мавзусида давра суҳбати бўлиб ўтди.

Тошкент шаҳар 7-сонли  туғруқ комплексида Ўзбекистон Республикаси Вазирлар Маҳкамаси ҳузуридаги Дин ишлари бўйича қўмитаси, Ўзбекистон мусулмонлари идораси, Тошкент шаҳар Ички ишлар бошқармаси, шаҳар педагог кадрларни қайта тайёрлаш ва малакасини ошириш институти ҳамда шаҳар прокуратураси ҳамкорлигида ташкил этилган тадбирда шифокорлар, тиббиёт ходимлари, партия фаоллари ҳамда ОАВ вакиллари иштирок этди.

Тадбирда диний экстремизм инсоният билан бирга ХХI асрга кириб келган, энг хавфли ижтимоий иллатлардан бири эканлиги, диний рангбарангликни рад этиши билан мамлакат тараққиётининг муҳим тарихий омили бўлган фуқаролараро ҳамжиҳатликка раҳна солишига,   ақидапарастлар нафақат ижтимоий ҳаётнинг сиёсий, иқтисодий ёки маданий соҳаларига зарар етказиши, балки жамиятга оммавий тарзда психологик босим ўтказиб,  энг мудҳиш оқибатларга олиб келишига ҳамда динни сиёсийлаштириш ва сохталаштириш орқали мамлакатдаги ижтимоий барқарорликни издан чиқаришга қаратилган ҳар қандай ҳаракатнинг олдини олишда партия ва жамоат ташкилотларини олдида турган ҳаётий муҳим масалалардан бири эканлигига алоҳида эътибор қаратилди.

Тадбирни партиянинг Тошкент шаҳар Кенгаши раиси Равшан Талипов кириш сўзи билан очиб берар экан, юртимизда турли соҳаларда эришилаётган барча улкан ютуқларимизнинг замирида жамиятимизда ҳукм сураётган тинчлик ва осойишталикнинг аҳамияти катта эканлигини таъкидлади. Маълумки, бугун мусулмон оламида мураккаб ижтимоий-сиёсий жараёнлар кечмоқда. Яқин Шарқ ва бошқа ҳудудлардаги қатор мамлакатлар чуқур сиёсий танглик, ижтимоий ва иқтисодий беқарорлик ва нотинчликни бошидан ўтказмоқда. Тинчлик, осойишталик йўлида, ёшларни турли ёт иллатлардан асраш мақсадида партия ҳам қатор ҳаракатлар олиб бормоқда дея, баён қилди. Бу фикрларни давом эттирган шаҳар 7-сонли туғруқ комплекси бош шифокори Зафаржон Илхомов аввалом бор, партия томонидан комплексда ташкиллаштирилгани учун миннатдорлик билдириб, диний экстремизм дунёдаги деярли барча мамлакатларда шахс, жамият ва давлатнинг ҳаётий муҳим манфаатларига таҳдид солиб келаётганини айтиб ўтди. - Албатта, бу жараёнлар барчамизни огоҳликка чақиради. Боиси, тинчлик бўлмаган жойда тараққиётга йўл йўқ.

Диний экстремизмга қарши курашнинг самарадорлигини оширишда партия ҳамкор ташкилотлар билан кўп ва икки томонлама ҳамкорликни йўлга қўйиш, миллий қонунчиликда мустаҳкам ҳуқуқий асос яратиш, шунингдек, ёшлар маънавиятини, тарбиясини кучайтириш ва аҳолида диний экстремистик ғояларга қарши мафкуравий иммунитетни шакллантириш муҳим ўрин тутади.

 Қайсики мамлакатда экстремистик ва террористик ҳаракатлар содир этилиши, улар оқибатида келиб чиқадиган ижтимоий беқарорлик жамиятда криминал жиноятларнинг авж олишига хизмат қилади, - дейди Ўзбекистон Вазирлар Маҳкамаси ҳузуридаги Дин ишлари бўйича қўмитаси масъул ходими Жамшид Алиев. - Давлат томонидан хавфсизлик чораларини кўриш учун бюджет маблағларини сарфлаши, шунингдек, террористик ҳаракат оқибатида кўрилаётган моддий зарар жамиятга иқтисодий жиҳатдан катта зарар етказади. Оқибатда ишсизлик ошиши, ёшларнинг маънавиятига таъсир қилиши, аҳолининг турмуш даражаси пасайиб кетишига сабаб бўлади.

 Давра суҳбати давомида сўзга чиққанлар бугунги ўта шиддатли даврда ёшларимизни ҳар қандай ёт ғоялар оқимидан сақлашимизда барчамиз бирдек огоҳ ҳамда масъул бўлишимиз таъкидланди.

Дилшод Баҳромов, Чилонзор тумани прокуратураси, прокурор ўринбосари:

• “Адолат” партияси томонидан ўтказилган тадбир бугунги куннинг энг долзарб муаммоларидан биридир.  Албатта, туманимизда ёшлар ҳамда фуқароларни диний оқимлар таъсиридан асраш борасида маҳаллаларда чора-тадбирлар  олиб бормоқдамиз. Туманимиз бўйича диний экстремистик оқим аъзолари сифати 91 нафар шахс рўйхатда бўлиб, шундан 25 нафари жазони ўтаб, озодликка чиқди. 44 нафар шахс эса жазо муддатини ўташ қисмида. Ҳозирги кунда 18 нафар шахсга қидирув эълон қилинган. Албатта, буларнинг орасида ёшлар кўпчиликни ташкил қилади. Бу эса ачинарли ҳолдир. Ёшлар ўртасида саъй-ҳаракатларимизни янада кучайтиришимиз лозим деб, ўйлайман. Уларнинг маънавий онггини, ҳуқуқий савиясини оширсакгина, маданиятнинг ёт иллатларидан асраб қолишга эришамиз. 

  Айни пайтда дунё ҳамжамиятида глобал муаммо сифатида эътироф этиб келинаётган  диний экстремизм ва терроризмга қарши курашда фуқароларнинг мафкуравий иммунитетини ошириш ва маънавиятини юксалтириш долзарб аҳамият касб  этади. Зеро, маънавий етукликка эришган юртдагина, тинчлик ва тараққиёт бўлади.

Давра суҳбати якунида йиғилганлар мавзу юзасидан ўзларининг фикр-мулоҳазаларини билдиришди.      

Зулайҳо ЧЎЛПОНОВА,

Ўзбекистон “Адолат” СДП

Тошкент шаҳар Кенгаши

матбуот котиби

toshkent.uz

Ўтган ҳафта сўнгида Бухоро-Мадина йўналиши бўйлаб парвоз қилган хоразмлик зиёратчилар Мадина шахрига соғ-саломат етиб олдилар. Мадина аэропортида уларни ишчи гурух вакиллари кутиб олиб, махсус автобусларда Пайғамбаримиз (с.а.в) нинг масжидларига яқин бўлган «Жавҳар ар-Рашид” меҳмонхонасига жойлаштирдилар. Зиёратчиларимиз Мадинаи мунавварада Пайғамбаримиз (с.а.в)нинг қабрларини ва Масжид ан-Набавий ёнида жойлашган “Бақиъ” қабристонини зиёрат қилиб, беш вақт намозларини Масжид ан-Набавийда адо қилдилар.

Зиёратчилар эртасига Уҳуд тоғи, Қубо ва Қиблатайн масжидларини зиёрат қилдилар.

ЎМИ Хоразм вилояти вакиллиги

http://zamaxshariy.uz

Зайд ибн Абу Зарқонинг шундай деганлари ривоят қилинади: “Биз Суфён Саврий раҳимаҳуллоҳнинг эшиги олдида турганимизда у киши чиқиб бундай насиҳат қилдилар: “Эй ёшлар жамоси, илмингизнинг баракаларини илиб қолишга шошилинглар! Сизлар, эртага кўзлаган  мақсадингизга етишасизларми ёки етишмайсизларми билмайсизлар. Бир-бирингизга илм ўргатинглар””.

Суфён Саврий раҳимаҳуллоҳ “илмингизнинг баракаларини илиб қолишга шошилинглар” деганларида, “илм ўрганиш учун бу фурсатингизни ғанимат билиб уни фойдали ўтказинглар” демоқчи бўлганлар. Зеро, инсон ёши улғаяр экан, унда ёшлигида бўлгани каби илм олиш учун куч-қувват, шижоат, фаҳму фаросат ва зеҳн бўлмайди. Бундан ташқари, унинг ўз ёшига яраша масъулиятлари, ишлари ва машғулотлари бўлади. Яна шуни билингки, ёшлик даври жуда ҳам тез ўтиб кетади. Аҳмад ибн Ҳанбал роҳимаҳуллоҳ: “Ёшликни енгимдаги нарсага ўхшатдим, уни тушиб қолганини билмай ҳам қолдим” деганлар.

Лекин минг афсуслар бўлсинки, ҳозирда ёшларимиз, хоссатан, мактаб ёшидаги йигитлар вақтларининг аксарини интернет ва плейстейшн (playstation) клубларида ўтказиб умрларининг энг яхши даврини зое кетказаяптилар.  Уларнинг “бу замон талаби” дея ўзларини оқлашлари инсонни ажаблантиради. Менинг бу гапга айтадиган жавобим шуки, “Агарда бу замон талаби бўлса, Президентимиз кутаётган бухорийлар, насафийлар, термизийлар-у замахшарийларни бу замонда, бу юртдан чиқишидан умидингизни узаверинг”.

Албатта ҳар бир йигит катта ютуқларга эришишни, мол дунёси кўп бўлишини, жамиятда ўз ўрнини топишни  ёки ўзининг бошқа мақсадларига етишни истайди. Бу нарсаларнинг ҳаммасига фақат қийинчиликларга қарамай доимо ҳаракатда бўлиш, Аллоҳдан ёрдам сўраш ва вақтни ғанимат билишлик билан етишилади. Зеро, Аллоҳ таоло шундай марҳамат қилади: “Бизнинг йўлимизда жидду жаҳд қилганларни тўғри йўлга бошлаб қўямиз. Ва албатта Аллоҳ муҳсинлар билан биргадир”. Суфён Саврий раҳимаҳуллоҳ: “Бир-бирингизга илм ўргатинглар” деган сўзлари билан йигитларни илм  мажлисларини қуришга қизиқтирдилар. Зеро, илм мажлисларини фаришталар ўраб олишади ва мажлис аҳлига салавотлар айтишади. Толиби илмлар яна шуни билишлари лозимки, ўзлари яхши тушунмаган ва бефойда масалаларда баҳс қилиб вақтларини бекорга кетказишлари улар учун зарардан бошқа нарса эмас.

Хулоса ўрнида шуни айтиб ўтмоқчимизки, илм йўлида қийинчилиг-у машаққатларга бардош беролмайдиган инсон Аллоҳдан кўп нарса кутмасин.  Зеро, осонликча келган ош томоққа тиқилади.  Аллоҳ ҳаммамизга ўз баракаларидан ато қилсин! Омин!

Манбалар асосида “Мирза Ғолиб” жоме масжид имом-хатиби
Муҳаммадхон Султонхонов тайёрлади. 

http://nasihat.uz

Андижон ҳожиларининг дастлабки гуруҳи буюк шаҳар Маккаю мукаррамага етиб келишди ҳамда барча қулайликларга эга бўлган меҳмонхонага жойлашдилар. Бу улуғ маконда ҳожиларимиз даставвал муборак умра амалини бажаришса, ҳаж кунлари келганида ҳаж ибодатларини адо қилишликка киришадилар.

muslimun.uz