Наманган вилоятига ташриф доирасида Ўзбекистон мусулмонлари идораси раисининг биринчи ўринбосари Ҳомиджон домла Ишматбеков сафари мобайнида Наманган шаҳридаги “Мулла Исмоил" жоме масжидига ташриф буюриб, жамоат билан шом намозини ўқиди.

Сўнг, масжид аҳлига ҳозирда диний таълимдаги ислоҳотлар, ёшларни илмга тарғиб қилиш, уларни зинҳор ва зинҳор ўз ҳолатига ташлаб, бекорчи қилиб қўймайлик, китобга ва илмга бўлган муҳаббатини ошириш ва ўзи қизиқан соҳаси бўйича элга, халққа фойдаси тегадиган инсон бўлиб етишиши учун ҳозирдан ҳаракат қилиш ҳақида ва бу масалада ота-онанинг ўрни беқиёс эканлигини таъкидладилар. Шунингдек илмни диний ва дунёвийси бўлмаслиги, илмни фойдали ва фойдасизи бўлишлиги ҳақида ҳам айтиб ўтдилар ва Аллоҳ таолодан барчаларимизга фойдалик илм беришлиги сўраб дуои хайрлар қилдилар.

****

Ташриф доирасида Тошкент шаҳар бош имом-хатиби ўринбосари Абдуқаххордомла Юнусов ҳам Наманган шаҳридаги "Абдуллоҳ ибн Масъуд" жоме масжидида аср намозини масжид қавми билан ўқигач, масжид аҳлига юртимизда бўлаётган кенг ислоҳотларга, Аллоҳ таоло берган ҳар бир неъматларига шукрона қилиб яшаш, қолаверса жамиятимиз учун долзарб масалалардан бири бўлмиш ёшлар тарбияси, уларни илм ва ҳунар билан банд қилиш тўғрисида маъруза қилиб бердилар.

Ташриф сўнггида масжид жамоати миннатдорлиги ва ташрифдан мамнунлигини изҳор этишди ва дуои хайрлар қилинди.

Ўзбекистон мусулмонлари идораси Матбуот хизмати

Шу йил 14 июнь куни Ўзбекистон мусулмонлари идораси раиси, муфтий Усмонхон Алимов ҳазратлари бошчилигидаги бир гуруҳ уламоларнинг Наманган вилоятига ташрифлари бошланади.

Ташриф давомида маънавий-маърифий учрашувлар, олис ва чекка ҳудудлардаги аҳоли вакиллари билан юзма-юз мулоқотлар, таниқли уламолар иштирокида жоме масжидларда суҳбатлар ўтказилиши ва эҳтиёжманд оилалар ҳолидан хабар олиш каби хайрли ишларни амалга ошириш мақсад қилинган.

Шунингдек, вилоят аҳлини юртимизда бўлаётган ўзгаришлар мазмун-моҳияти ҳақида хабардор қилиш билан бир қаторда уларнинг дарду ташвишларига кўмаклашиш, фикр-мулоҳазаларини тинглаш ва диний соҳага тегишли муаммоларини жойида ўрганиб, бартараф этиш ҳам кўзда тутилган.

Аллоҳ таоло уламоларимиз сафарини хайрли ва манфаатли қилсин!

Ўзбекистон мусулмонлари идораси матбуот хизмати
@muslimuzportal | @mp3muslim | @diniysavollar

Фирибгарлик жинояти молни ботил йўл билан ейишнинг аниқ бир кўриниши бўлиб, бундай йўл билан топилган мол – даромат ҳаром бўлиб, дўзах оташининг бир бўлаги ҳисобланади.

Имом Бухорий раҳматуллоҳи алайҳ Умму Салама розияллоҳу анҳодан ривоят қилган ҳадисда шундай дейилади: “Расулуллоҳ соллаллоҳу алайҳи васаллам ҳужралари олдидаги жанжалнинг овозини эшитиб, ташқарига чиқдилар ва: “Мен ҳам бир инсонман. Менинг ҳузуримга ҳақ талашиб, даъво билан келиб турасизлар. Балки бирингиз бошқангиздан сўзга чечанроқ бўлиб чиқарсиз ва мен уни рост гапиряпти, деб шунга қараб ҳукм чиқараман. Лекин билиб қўйингки, мен кимга бирор мусулмоннинг ҳаққини олиб берган бўлсам, ўша нарса дўзахнинг бир чўғидир. Хоҳлаган уни олсин, хоҳламаган олмасин”, дедилар.

Сир эмаски, кейинги вақтларда бировнинг ҳаққидан қўрқмайдиган харомахўр кимсалар айрим мухтожлиги бор кишиларнинг содда ва ишонувчанлигидан фойдаланиб, гўёки пул тушириб бериш бохонасида уларга тегишли бўлган пластик карта ёки унинг рақамларини олиб, ундаги давлат ёки саҳоватли инсонларнинг кўмаги билан ҳосил бўлган маблағларни фириб йўли билан ўзлаштириб олаётгани кузатилмоқда.

Шу билан бирга халқимизнинг хожатбарорлик хусусиятидан келиб чиқиб, кўчаларда гўёки ўзининг телефони бузилиб қолгани, ёки телефоним йўқ эди, сизнинг телефонингиздан фалончи яқинимга қўнғироқ қилиб олай деган бохона билан, яхшилик қилмоқчи бўлган кишининг телефонини олиб қочиш ҳолатлари ҳам учраб турибди.

Бу каби иллатлар бировнинг ишончига хиёнат бўлиши билан бирга, жамиятимизда ўзаро ишончсизликнинг ривожланиши ва авж олишига олиб келади. Бу эса муқаддас динимиз Исломда мутлақо ҳаром амалдир.

Фирибгарликни ўзига касб қилиб олган кимсалар бу билан нафақат оиласи (агар бўлса!), иши ва пулидан барака кетишини балки, дунё ва охиратда албатта Яратган ундайларни касодга учратиши ва хор-зор қилишини яхши англаши зарур! Бундай хор-зорликнинг сабаби эса, Аллоҳ таоло харом қилган бировнинг ҳаққидир!

Бу ҳақда Имом Бухорий раҳматуллоҳи алайҳ Абу Ҳурайра розияллоҳу анҳудан ривоят қилган ҳадисда Пайғамбар соллаллоҳу алайҳи васаллам: “Ким одамларнинг молини қайтариб бериш мақсадида олса, Аллоҳ таоло унга ёрдамчи бўлади. Ким одамларнинг молига талофат етказиш (чув тушириш ёки фириб бериш кабилар) учун олса, Аллоҳ таоло унинг ўзига талофат етказади”, дедилар.

Имом Мусим раҳматуллоҳи алайҳ ривоят қилган бошқа бир ҳадисда келтирилишича, Расулуллоҳ соллаллоҳу алайҳи васаллам дон сотаётган одамнинг ёнидан ўтиб қолибдилар ва унинг дони орасига қўл тиқиб кўрсалар, намланиб бор экан. “Бу нима?!” деб сўрадилар. Сотувчи: “Ё Расуллуллоҳ! Унга ёмғир тегибди”, деди. Шунда Расуллуллоҳ соллаллоҳу алайҳи васаллам: “Уни устига қуймайсанми, одамлар кўрар эди”, дедилар ва “Кимки алдаса, мендан эмас!” дедилар.

Ҳадисдаги “алдаса” деб келтирилган сўз арабча матнда “ғашша” кўринишида келган бўлиб, луғатда “алдамоқ, фириб бермоқ, сохталаштирмоқ” маъноларида келади. Демак, умумий маънода бундан алдамчилик, фирибгарлик, бирор нарсани сохталаштириш мусулмоннинг иши эмас экани англашилади!

Хулосада шуни айтиш лозимки, Фирибгарлик, алдов, ўғрилик каби ишларнинг ҳеч ким ҳеч қачон унутмаслиги лозим бўлган энг муҳим жиҳати – бировнинг ҳаққи ҳеч қачон бошқа бировга буюрмаслигини англашдир! Юртимиз мўмин-мусулмонлари бу борада янада ҳушёр, огоҳ ва ҳамжиҳат бўлмоғимиз ҳам, бундай манфур қилмишларнинг пайи қирқилишига асос бўлади иншааллоҳ.

Акмалхон Ахмедов

Ўзбекистон мусулмонлари идораси мутахассиси

Ўзбекистон мусулмонлари идораси раиси, муфтий Усмонхон Алимов ҳазратлари Фарғона туманининг “Оқбилол” қишлоғида жойлашган “Абу Бакр Сиддиқ” жоме масжидига ташриф буюрдилар.

Мазкур жомеда пешин намози адо этиларкан, масжид атрофида яшовчи ҳатто муфтий ҳазратлари ташрифини эшитиб қўшни қишлоқлардан келган намозхонлар намоз сўнгида муфтий ҳазратларининг суҳбатларидан баҳраманд бўлдилар.
Муфтий ҳазратлари ўз сўзларида бугунги кунда юртимизда диний-маърифий соҳада, хусусан, масжидлар ободончилиги йўлида амалга оширилаётган хайрли ишлар, зиёрат туризми борасида йўлга қўйилаётган янги-янги хизматлар замирида халқ фаровонлиги, динимиз ривожини янада юксалтириш мақсад қилинаётгани жонли мисоллар билан ёритиб бердилар. Бу билан чекланиб қолмай, ҳали олдинда бунданда хайрли ишлар ташаббус қилинаётгани, вақти билан булар амалга ошиши қайд этилди.

Шунингдек, суҳбат ниҳоясида намозхонлар ўзларини қизиқтирган саволларга жавоб олдилар.

Муфтий ҳазратлари масжид жамоаси, бу ерда истиқомат қилувчи барча мўмин-мусулмонлар ҳаққига дуо қилдилар.

Ўзбекистон мусулмонлари идораси Матбуот хизмати

Бугун, 11 июнь куни Ўзбекистон мусулмонлари идораси раиси, муфтий Усмонхон Алимов ҳазратлари Андижон вилоятидаги “Зубайр ибн Аввом” жоме масжидида намозхонлар билан шом намозини бирга-бирга адо этдилар.

Муфтий ҳазратлари ўз мавъизаларида бугунги кунда мўмин-мусулмонларга муҳтарам Президентимиз раҳнамоликларида жуда катта имкониятлар берилаётгани, шароитлар ҳозирланаётгани ҳақида гапириб, диний-маърифий соҳада қилинаётган ўзгаришлар, янгиланишлар ва хушхабарлар ҳақида сўзлаб бердилар.

Ўзбекистон мусулмонлари идораси Матбуот хизмати