muslim.uz
Онанинг танбеҳи: "Маккага имом бўлгур"
Аллоҳ таолнинг энг улуғ инъомларидан бири бу - сўз неъматидир. У икки томони кескир қиличга ўхшайди. Хоҳласа яхшиликка ёки ёмонликка ишлатиш мумкин. Жим туриб саломат қолиш ҳам мумкин.
Имом Бухорий раҳматуллоҳи алайҳнинг "Ал-жоме ас-саҳиҳ" китобларида келган ҳадисда Пайғамбаримиз соллаллоҳу алайҳи васаллам: “Ким Аллоҳга ва охират кунига иймон келтирган бўлса, қўшнисига озор бермасин, ким Аллоҳга ва охират кунига иймон келтирган бўлса, меҳмонини ҳурматласин, ким Аллоҳга ва охират кунига иймон кетирган бўлса, яхшиликни гапирсин ёки сукут сақласин”, деганлар.
Ҳақиқатан ҳам инсон бир оғиз сўз билан бутун умрлик ҳаёт риштасини боғлаши ёки шошқалоқлик қилиб уни узиб ҳам юбориши мумкин. Бир сўз билан иймон калимасини айтиб, қалби билан тасдиқлаб, дунё-ю охират роҳатига эришиш ёки, Худо сақласин, диндан чиқарувчи сўзни айтиб, дунё ва охират жазосига мубтало бўлиши ҳам мумкин.
Сўздан тўғри фойдаланмасдан, беҳаё сўзларни айтиб, ноўрин гаплар билан бировнинг дилини оғритиб, гуноҳга ботса ҳам бўлади. Ёки насиҳат қилиб, ўзгаларнинг қалбига хурсандчилик киритиб, савобга эришса ҳам бўлади. Қуйидаги ҳадисларда тилимиз орқали қандай фойдаларга, савобларга эришиш мумкинлигини ўрганамиз. Имом Термизийнинг "Ал-жоме ал-кабир" китобларида келади.
Росулуллоҳ соллалоҳу алайҳи васаллам: “Ким субҳаналлоҳил аъзим ва биҳамдиҳи (ҳамд бирла, буюк Аллоҳни пок деб ёд этаман) деса, жаннатда у учун бир хурмо кўчати ўтқизилади”, деб марҳамат қилганлар. Яна ушбу китобнинг «Қуръон фазийлати» деган бобида Пайғамбаримиз соллаллоҳу алайҳи васаллам «Ихлос сураси Қуроннинг учдан бирига тенг келади» деганлар. Бундан ташқари биз билмаганимиз учун ёки билсак ҳам, дангасалик қилиб айтмаётган кўплаб зикру тасбиҳлар бордир.
Юқоридагилардан маълум бўладики, инсон кўплаб гуноҳлару хатолардан тийилиб, зикрларни айтиб, қанчадан-қанча савоб олиб, ширин сўз билан ўзгаларни хушнуд қилишга уриниши керак экан.
Сўзимизни Маккаи Мукарраманинг имоми бўлган шайх Абдураҳмон Судайснинг сўзи билан тамомлаймиз. У кишидан бу даражага қандай эришдингиз деб сўрашганда, онам мендан аччиқланганларида қарғаш ўрнига, “Маккага имом бўлгур”, деб танбеҳ берар эдилар, деб жавоб берган эканлар.
Иброхим ТЕМИРОВ
“Ҳидоя” ўрта махсус ислом билим юрти ўқитувчиси
Қашқадарёда вилоятида энг маърифатли имом-хатиб аниқланди
Ўзбекистон мусулмонлари идораси тасарруфидаги масжидлар имом-хатиб ва имом-ноиблари ўртасида “Йил имоми” кўрик танлови анъанавий тарзда мунтазам ўтказиб келинар эди. Жорий йилдан эса мазкур танлов Ўзбекистон мусулмонлари идорасининг 2018 йил 10 сентябрдаги 01/А092-сонли буйруғи асосида “Энг маърифатли имом” номи остида янги Низом асосида ўтказилди.
Ушбу танлов кучли илмий салоҳиятга эга, юқори касбий маҳорат соҳиби бўлган, ташаббускор, илғор фикрли, замонавий ахборот технологияларидан етарлича фойдалана оладиган ва кенг халқ оммасига ўз фикрини аниқ етказиш қобилиятига эга бўлган энг иқтидорли, фаол имом-хатибларни аниқлаш мақсадида ўтказилиши белгиланган эди.
Уч босқичда ўтказилиши лозим бўлган танловнинг биринчи шаҳар-туман босқичи ғолиблари 16 октябрь куни Қарши шаҳридаги “Қум қишлоқ” жоме масжидида ўтказилган вилоят босқичида ўзаро беллашдилар.
Танлов Қуръони Карим тиловати билан бошланди. Тадбир аввалида сўзга чиққан Ўзбекистон мусулмонлари идорасининг Қашқадарё вилоятидаги вакили, вилоят бош имом-хатиби Раҳматилло Усмонов жорий йилги танловнинг аҳамияти ва ўтказилиш тартиблари ва шарт – шароитлари билан йиғилганларни таништирди.
Ўз сўзида Р.Усмонов диний соҳа ходимларини қўллаб-қувватлаш ва рағбатлантириш мақсадида амалга оширилаётган ишлар, юртимизда диний-маърифий соҳага кўрсатилаётган эътиборга алоҳида тўхталди.
Танловда иштирокчиларнинг чиқишлари ҳакамлар ҳайъати томонидан баҳолаб борилди ҳамда танлов сўнгида натижалар эълон қилинди:
“Энг маърифатли имом” танловининг Қашқадарё вилоят босқичи ғолиблари:
I-ўрин: Бойқобилов Аҳмад (Қарши шаҳри “Хонақо” жоме масжиди имом-хатиби)
II-ўрин: Ҳасанов Мавлонберди (Шаҳрисабз тумани “Янги қишлоқ-2” жоме масжиди имом-хатиби)
III-ўрин: Қосимов Фурқат (Нишон тумани “Талимаржон” жоме масжиди имом-ноиби)
“Энг кўп обуна уюштирган имом”
- Жалолов Мухтор (Шаҳрисабз тумани “Бобо Салим” жоме масжиди имом-хатиби
“Энг кўп мақола нашр этган имом”
- Усмонов Азамат (Касби туман “Фазли” жоме масжиди имом-хатиби)
“Энг обод масжид”
- Деҳқонобод тумани “Оқработ ота” жоме масжиди (масжид имом-хатиби Бозоров Ғайрат)
“Энг тарғиботчи имом”
- Қамаров Маҳмуд (Қарши шаҳар “Наво” жоме масжиди имом-хатиби)
“Энг таъсирли ижодий иш”
- Қораев Муҳаммади (Қарши шаҳар “Қумқишлоқ” жоме масжиди имом хатиби
“Энг хушовоз муаззин”
- Аҳмедов Яҳёхон (Қарши шаҳар “Кўкгумбаз” жоме масжиди муаззини)
“Энг ишбилармон мутавалли”
- Расулов Пармон (Китоб тумани “Хожа Бухорий” жоме масжиди мутаваллиси)
“Энг миришкор боғбон”
- Абдуллаев Намоз (Косон тумани “Катта масжид” жоме масжиди имом-хатиби)
“Энг намунали таҳоратхона”
- Чироқчи туман “Саид Боқихон” жоме масжиди таҳоратхонаси (масжид имом-хатиби Боқиев Жамолиддинхон)
“Энг замонавий қоровулхона”
- Шаҳрисабз шаҳар “Оиша она” жоме масжиди қоровулхонаси (масжид имом-хатиби Самиев Абдумуталлаб)
“Энг бой кутубхона”
- Қарши шаҳар “Қумқишлоқ” жоме масжиди кутубхонаси (масжид имом-хатиби Қораев Муҳаммади)
Ғолиблар Қашқадарё вилоят вакиллигининг диплом ва ташаккурномаси ҳамда эсдалик совғалари билан тақдирландилар.
ЎМИ Матбуот хизмати
Навоий вилоятида энг маърифатли имом-хатиб аниқланди
Имом-хатибларнинг илмий салоҳияти, ташаббускорлигини ошириш, касбий малака, маҳорат, билим ҳамда кўникмани зиёда қилишда кўрик-танловлар алоҳида аҳамият касб этади.
Шу боисдан Ўзбекистон мусулмонлари идораси ташаббуси билан ҳар йили юртимиздаги жоме масжидлар имом-хатиблари ўртасида «Йил имоми» танлови ўтказиб келинади.
Ўзбекистон Республикаси Президенти Шавкат Мирзиёевнинг 2018 йил 16 апрелдаги «Диний-маърифий соҳа фаолиятини тубдан такомиллаштириш чора-тадбирлари тўғрисида»ги Фармони ҳамда Ўзбекистон Республикасининг «Виждон эркинлиги ва диний ташкилотлар тўғрисида»ги Қонунида белгиланган устувор вазифалар ижросини таъминлаш мақсадида Ўзбекистон мусулмонлари идорасининг жорий йил 10 сентябрдаги буйруғига асосан «Йил имоми» танлови негизида «Энг маърифатли имом» танловини ўтказиш белгиланди.
– Танловни ўтказишдан мақсад – бугунги тараққиёт талабларига жавоб берадиган, илмий салоҳияти юқори, касбий маҳорат соҳиби, ташаббускор, илғор фикрли, инновацион ғояларни ўзида жамлаган, замонавий ахборот технологияларидан етарлича фойдалана оладиган, энг муҳими, юртимизда диний соҳада амалга оширилаётган улкан ташаббусларни кенг халқ оммасига етказиш қобилиятига эга имом-хатибларни аниқлаш ва уларни муносиб рағбатлантиришдан иборат, – дейди Ўзбекистон мусулмонлари идорасининг Навоий вилоятидаги вакили, вилоят бош имом-хатиби Тоҳиржон Рўзиев.
Танловнинг қуйи, яъни туман (шаҳар) босқичлари жорий йилнинг сентябрь ойида республикамизнинг барча ҳудудларида уюшқоқлик билан ташкил этилди. Танловнинг Навоий вилояти босқичи бугун, 17 октябрь куни Навоий шаҳридаги «Ҳазрати Алишер Навоий» жоме масжидида ўтказилди. Анъанага кўра, танлов Қуръони карим тиловати билан бошланди.
Танловда Навоий вилояти туман ва шаҳарларида биринчи ўринни қўлга киритган 17 нафар имом-хатиб иштирок этди.
Танловнинг биринчи шарти Қуръони карим тиловат қилиб, унинг тафсири ва нозил бўлиш сабабларини сўзлаб бериш бўлса, иккинчи шарти – билетда кўрсатилган оятни ўқиб, тажвид қоидаларини айтиб бериш; учинчиси – Имом Аъзам Абу Ҳанифа раҳматуллоҳи алайҳнинг “Фиқҳул акбар” китобидан бирор матн ўқиб, уни таржима қилиб бериш; тўртинчи шарт эса, билетда кўрсатилган ҳадисни ўқиб, унинг маъносини айтиб бериш; бешинчиси – фиқҳга оид саволга жавоб қайтариш; олтинчиси – “Мухтасарул виқоя” китобининг матнини ўқиб, шарҳлаб беришдан иборат бўлди.
Ҳакамлар ҳайъатининг якдил хулосасига кўра, биринчи ўрин Нурота туманидаги «Янгитурмуш» жоме масжиди имом-хатиби Мубинов Жамолиддинга насиб этди. Иккинчи ўринга эса Кармана туманидаги «Қосим шайх» масжиди имом-хатиби Юнусов Мустафо, учинчи ўринга Хатирчи туманидаги «Шайх Гадой Селкин» жоме масжиди имом-хатиби Хакимов Бектош муносиб топилди.
Шунингдек, «Энг маърифатли имом» танловининг Навоий вилояти босқичида “Энг тарғиботчи имом” йўналишида Навоий шаҳридаги “Оқтош” жоме масжиди имом-хатиби Дилшод Эргашев, “Энг таъсирли ижодий иш” йўналишида Кармана туманида “Жалойир” жоме масжиди имом-хатиби А.Хакимов, “Энг ишбилармон мутавалли” йўналишида Навбаҳор туманидаги “Хон хўжа Эшон бобо” жоме масжиди мутаваллиси Б.Эрназаров, “Энг миришкор боғбон” йўналишида Қизилтепа туманидаги “Азизобод” жоме масжиди боғбони У.Хақназаров, “Энг намунали таҳоратхона” йўналишида Хатирчи туманидаги “Имом Аъзам” жоме масжиди, “Энг фаол имом” йўналишида Учқудуқ туманидаги “Қизилқум” жоме масжиди имом-хатиби А.Турдиев, “Энг бой кутубхона” йўналишида Қизилтепа туманидаги “Тошмасжид” жомеси имом-хатиби Ж.Рахматов ғолибликни қўлга киритдилар.
«Энг маърифатли имом» танловининг Навоий вилояти босқичида биринчи ўринни қўлга киритган имом шу йилнинг ноябрь ойида бўлиб ўтадиган республика босқичида иштирок этади.
Ўзбекистон мусулмонлари идораси Навоий вилоят вакиллиги
Покистон уламоларининг Мир Араб олий мадрасасига ташрифи
Жорий йилнинг 17 октябрь куни Покистон Ислом Республикаси муфтийси Муҳаммад Ризван раҳбарлигидаги “Нақшбандия” тариқати вакилларидан иборат делегация Баҳоуддин Нақшбанд зиёратгоҳига ташриф буюрди.
Делегация таркибида жами 47 нафар Покистон Ислом Республикаси уламолари, жумладан, Шайх Муҳаммад Абдулҳалим ан-Нўъманий,
Шайх қози Аршад ал-Ҳусайний, Лоҳурдаги “Муҳаммадия” университети мудири Шайх Муҳаммад Ҳасан, Файсалободдаги “Имдодия” университети мудири Шайх Муҳаммад Тоййиб, “Мифтаҳул-улум” университети мудири Шайх Муфтий Тоҳир Масъуд, Муҳаммад Аслам Нақшбандий ва бошқалар бўлиб, уларга Покистон Ислом Республикаси муфтийси Муҳаммад Ризван раҳбарлик қилди.
Меҳмонларга сафар давомида Мир Араб олий мадрасаси устоз
ҳамда талабалари ҳамроҳлик қилди.
Зиёратдан сўнг Баҳоуддин Нақшбанд ёдгорлик мажмуаси марказининг конференция залида Покистон Ислом Республикаси делегацияси ва Мир Араб олий мадрасаси устоз ҳамда талабалари иштирокида учрашув ўтказилди.
Учрашувда Ўзбекистон ва Покистон давлатлари ўртасида дўстона муносабатлар яхшилангани, хусусан, Президентимиз Ш.Мирзиёев ташаббуси билан икки томонлама алоқалар янги босқичга кўтарилиб, мазкур делегация учун ҳам қулайликлар таъминлангани, Ўзбекистон уламоларининг ислом дини таълимоти ривожига қўшган буюк ҳиссалари, ўтган улуғ авлиёлар, устозлар ҳақида ижобий фикрлар билдирилди.
Учрашув давомида ўтганлар руҳини шод этиш мақсадида Қуръон тиловат қилиниб, юртимиз ҳақига дуойи хайрлар қилинди.
Тадбир якунида делегация вакиллари Мир Араб олий мадрасаси устозларига фахрий ёрлиқ ва эсдалик совғаларини топширдилар.
ЎМИ Матбуот хизмати
Нишонга урилган гаплар: “Агар бирорта хато қилсам, Исломни эмас, мени маломат қилинглар.”
Қуйида келтириладиган фикрлар ижтимоий тармоқлардаги “Тарих мухрлаган сўзлар” саҳифасидан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
- Ҳидоят йўлини лозим тут! Унда юрувчиларнинг озлиги сенга зарар бермайди. Залолат йўлидан сақлан! Ҳалок бўлувчиларнинг кўплиги сени алдаб қўймасин.
Фузайл бин Иёз раҳимаҳуллоҳ
Улуғларимиз тавсиялари
Салафи солиҳларимиз бир-бирларига қуйидаги уч нарсани тавсия қилишарди:
- Ким ўзи билан Аллоҳнинг орасидаги алоқани ислоҳ қилса, Аллоҳ таоло у билан инсонларнинг орасидаги алоқани ислоҳ қилиб қўяди.
- Ким ичини ислоҳ қилса, Аллоҳ таоло унинг ташини ислоҳ қилиб қўяди.
- Ким Охират ишига кўп эътибор берса, Аллоҳ таоло унинг дунё ва Охират ишига кифоя қилади.
- Мен мусулмонман. Ислом комил диндир. Лекин мен комил инсон эмасман. Агар бирорта хато қилсам, Исломни эмас, мени маломат қилинглар.
Аҳмад Дийдот раҳимаҳуллоҳ
- Эй Аллоҳ! Мусулмонларнинг ишини ислоҳ қилгин! Сўзларини ҳақ устида жамлагин! Қалбларини улфат қилгин! Уларни энг тўғри йўлга йўллаб қўйгин!
Интернет материалларидан тўплаб, таржима қилувчи
Нозимжон Иминжонов