2021 йил 20 февраль куни Наманган вилояти Чортоқ тумани Балиқли кўл қишлоғида жойлашган Султон Увайс Қараний зиёратгоҳининг очилиш маросими бўлиб ўтди.

Тантанали маросимда Наманган вилояти ҳокимлиги, Вазирлар Маҳкамаси ҳузуридаги Дин ишлари бўйича қўмита, Туризмни ривожлантириш давлат қўмитаси, Ўзбекистон мусулмонлари идораси вакиллари қатнашди.

Маълумки, Султон Увайс Қараний зиёратгоҳи Чортоқ туман марказидан 35 км узоқликдаги Балиқли кўл қишлоғида жойлашган. Зиёратгоҳда ислом оламининг табаррук авлиёларидан бири Султон Увайс Қаранийнинг мақбаралари мавжуд.

Муҳтарам Президентимиз 2017 йил 7 июль куни Увайс Қараний зиёратгоҳига ташриф буюрганларидан сўнг, зиёратгоҳнинг 6 гектар майдонида ободонлаштириш ва кўкаламзорлаштириш ишлари амалга оширилиб, 1500 тупдан ортиқ манзарали дарахтлар ва гул кўчатлари экилди.

Султон Увайс Қараний мақбараси тўлиқ қайта қурилди.

1400 ўринга мўлжанланган масжид ва таҳоратхона, мақбара ёнида айвон, замонавий меҳмонхона, миллий музей ва кутубхона, 3 та фаввора, дам олиш айвонлари ва хизмат кўрсатиш шохобчалари қурилди.

Увайс Қараний зиёратгоҳининг жанубий томонида оналари Биби Наима она зиёратгоҳи жойлашган. Биби Наима она зиёратгоҳида ҳам қурилиш ва бунёдкорлик ишлари амалга оширилди. 4 гектар майдон ободонлаштирилиб, 1000 тупдан ортиқ манзарали дарахтлар экилди. Буларнинг барчаси зиёратгоҳнинг кўркига кўрк бағишлаб турибди.

Ушбу зиёратгоҳнинг тантанали очилиш маросимида сўзга чиққанлар Президентимиз ташаббуси билан ушбу муборак маскан бугун ўзгача чирой очгани, зиёратчилар учун барча қулайлик ва шароитлар яратилгани, кейинги 4 йил ичида мамлакатимизда қурилиш соҳасидаги янги, замонавий жаҳон стандартларига тўлиқ жавоб берадиган бинолар, иншоотлар қад ростлаётгани, тарихий обидаларимизни қуриш ва реконструкция қилишга алоҳида эътибор қаратилаётганини таъкидладилар.

Шунингдек, ушбу зиёратгоҳ зиёрат туризмини ривожлантириш борасида навбатдаги муҳим қадам бўлгани, бир сўз билан айтганда Наманган вилоятининг ташриф қоғозига айланиши эътироф этилди.

Шу куни иштирокчилар зиёратгоҳдаги бунёдкорлик ва қурилиш ишлари билан яқиндан танишдилар.

Шундан сўнг, Султон Увайс Қаранийга бағишланган илмий конференция бўлиб ўтди. Конференция ишида 100 га яқин маҳаллий ва хорижлик олимлар, профессор-ўқитувчилар он-лайн тарзда иштирок этди.

Унда сўзга чиққанлар сўнгги йилларда диний-маърифий соҳада амалга оиширилаётган кенг кўламли ислоҳотлар, улуғ алломаларимизнинг ибратли ҳаёти ва бой илмий меросини ўрганиш ва халқимизга етказишнинг аҳамияти ҳақида тўхталиб, буюк аждодларимиз қадамжоларининг обод этилиши халқимиз маънавиятининг янада юксалишига боис бўлаётганини қайд этдилар.

Тантанали очилиш маросими доирасида мажмуада Қурбонлик қилиниб, тадбир иштирокчиларига дастурхон ёзилиб, эзгу дуолар қилинди.

Дин ишлари бўйича қўмита

Ахборот хизмати

Бугун, 20 февраль куни Наманган вилоятидаги Султон Увайс Қараний зиёратгоҳи мажмуасининг тантанали очилиш маросими ва илмий конференцияси бошланди. Анжуманда Ўзбекистон мусулмонлари идораси раиси, муфтий Усмонхон Алимов ҳазратлари, Дин ишлари бўйича қўмита раиси Абдуғофур Ахмедов ва Наманган вилояти ҳокими Шавкат Абдураззақов ҳамда 100 нафарга яқин маҳаллий ва хорижлик уламолар, соҳа мутахассислари иштирок этмоқда.

Анжуман Қуръони карим тиловати ва эзгу дуолари билан бошланди.
Сўзга чиққан нотиқлар сўнгги йилларда муҳтарам Президентимиз томонларидан амалга оширилган ислоҳотлар натижасида, хусусан, Наманган вилоятига ташрифлари чоғида берган тавсиялари туфайли вилоятда салмоқли ўзгаришлар ва янгиланишлар амалга оширилгани, ўтган вақт давомида Султон Увайс Қараний зиёратгоҳида кенг кўламли бунёдкорлик ишлари амалга оширилиб, мажмуа таркибидаги жоме масжид, мақбара, музей қайта таъмирланди, янги кутубхона ва меҳмонхона бунёд этилиб, ён-атроф обод этилганини алоҳида қайд қилдилар.

Анжуман иши давом этмоқда.
Ташриф ва тадбирларда меҳмонларга Наманган вилояти бош имом-хатиби Абдулҳай домла Турсунов ва Диний идора Иш бошқарувчиси Рустам Жамилов ҳамроҳлик қилмоқда.

Ўзбекистон мусулмонлари идораси Матбуот хизмати

19 февраль куни Қорақалпоғистон Республикаси Адлия вазирлиги Мўйноқ тумани “Қазақдаря” овул фуқоролар йиғини ҳудудидаги “Қорақум эшон” жоме масжидини давлат рўйхатидан ўтказди.

Шу муносабат билан ушбу масжидда ўтказилган тадбирда Қорақалпоғистон мусулманлари қозиёти қозиси Шамсуддин Баҳоуддинов, Республиканинг Адлия вазирлиги вакиллари ва намозхонлар иштирок этди.

Тадбирда қози Шамсуддин домла Баҳоуддинов иштирокчиларга юртимизда
диний соҳадаги амалга оширилаётган ислоҳотлар, обод бўлаётган масжид ва мадрасалар ҳақида сўзлаб берди, ушбу масжид қурилишига яқиндан ёрдам берган барча инсонларга ташаккур билдирди. Йиғилиш давомида масжид ходимларига жоменинг давлат рўйхатидан ўтгани ҳақидаги гувоҳнома топширилди.

Шундан сўнг масжидда жума намози ўқилди. Қуръони карим хатм қилиниб, “Қорақум эшон” мадрасасининг асосчиси марҳум Қутлихўжа бобо ва бошқа уламолар, ушбу масжидга ҳисса қўшган кишилар ҳақига дуои хайрлар қилинди.

“Қорақум эшон” жоме масжиди Республика марказидан узоқда Мўйноқ туманидаги олис “Қазақ даря” овул фуқаролар йиғини ҳудудида жойлашган.
Маҳаллий ҳокимият томонидан аҳоли мурожаатга биноан масжид қуриш учун “Қозоқдарё” овул фуқаролар йиғини ҳудудидан ер майдони ажратилган эди. Бир йил ичида маҳаллий аҳоли ва саховатпеша тадбиркорлар кўмагида намозхонлар учун барча қулайлиларга эга бўлган жоме қуриб битказилди. Масжидга ўз даврининг маънавият ва маърифат маркази бўлган «Қорақум эшон» мадрасасининг номи берилди.

Маълумот учун, «Қорақум» мадрасаси ХIХ асрнинг ўртаси ва иккинчи ярмида Қорақалпоғистоннинг диний, маърифий ва тасаввуф маркази “Қорақум” масжид-мадрасаси бўлган, унда ХIХ аср охри ва ХХ асрнинг бошида қорақалпоқ халқининг кўплаб фарзандлари таълим олган, шулардан қорақалпоқ халқининг мумтоз шоирлари Бердақ, Кунхожалар таълим олган.

Аллоҳ таоло ушбу масжиднинг мўмин-мусулмон халқимизга қиёматга қадар хизмат қилишини насиб қилсин.

Ўзбекистон мусулмонлари идораси матбуот хизмати

Устоз Ҳикматуллоҳ домла

Фатво бўлими

Кимдир: «Уйланган куним», дейди.

Кимдир: «Институтни битирган куним», дейди.

Кимдир: «Фалон шайхни кўрган куним», дейди ва ҳоказо...

Аммо гоҳида бошқача бўлиши ҳам мумкин. Кўчадан ўтиб кетаётиб йўлда ётган тиканни йўлдан олиб ташлаган ва шу иши учун Аллоҳ уни мағфират қилган киши ўша кунни энг бахтли куни эканини хаёлига ҳам келтирмаган эди.

Зинокор аёл чанқаб тиллари осилиб ётган итга сув берганида, бунинг натижаси ўлароқ Аллоҳ уни мағфират қилганида ўша кунни ҳаётидаги энг саодатли кун эканлигини хаёлига ҳам келтирмаган эди.

Улар куни келиб қиссалари оламлар саййиди Расулуллоҳ соллаллоҳу алайҳи васалламнинг тилларидан янграшини, сўнгра мусулмонлар у қиссани келажак авлодларига ибрат ўлароқ нақл қилишларини хаёлларига келтиришмаган эди.

Улар тиканни йўлдан олиб ташлаш ёки итни суғориш қиссасини Аллоҳнинг китобидан сўнг энг ишончли китобда зикр қилинишини билишармиди?!

Бадрда иштирок қилган саҳобалар «Истаган ишингизни қилинг, сизни мағфират қилдим» хитобини эшитган кунлари энг бахтли кунлари эмасмиди?!

Талҳа ибн Убайдуллоҳ розияллоҳу анҳу Уҳудда Расулуллоҳ соллаллоҳу алайҳи васалламга ўз танаси билан зинапоя вазифасини ўтаганида Расулуллоҳ соллаллоҳу алайҳи васаллам: «Талҳа жаннатни вожиб қилди!», деган кун Талҳа розияллоҳу анҳу учун энг саодатли кун эмасмиди?!

Гоҳида бандага биргина ўринда Аллоҳ таоло абадий саодатни ёзиши мумкин. Ўша кунингиз қани? Уни топдингизми ёки у олдиндами?

У гоҳида Аллоҳдан қўрқиб хилватда тўккан бир томчи ёшингиз бўлиши ҳам мумкин.

Гоҳида эса ҳавойи нафсингизга хилоф чиққан кунингиз бўлиши ҳам мумкин.

Ёки бир мусулмоннинг қалбига киритган шодлигингиз ҳам бўлиши мумкин.

У гоҳида бир етимнинг бошини силашингиз ҳам бўлиши мумкин.

У гоҳида онангизнинг қўлидан ўпишингиз ҳам бўлиши мумкин.

У гоҳида мусулмон биродарингизнинг юзига табассумла боқишингиз ҳам бўлиши мумкин.

У гоҳида ҳақ гапни гапиришингиз ҳам бўлиши мумкин.

У гоҳида мазлумга ёрдам беришингиз ҳам бўлиши мумкин.

У баъзан ғазабингизни ютишингиз ҳам бўлиши мумкин.

У гоҳида бировнинг хатосини кечиришингиз ҳам бўлиши мумкин.

У баъзан бировнинг айбини беркитишингиз ҳам бўлиши мумкин.

Биз бахт соати қаердан келишини билмаймиз. Ҳар куни солиҳ амалимиз бўлсин. Махфий бўлса янада яхши бўлади. Балки нажотимизга сабаб бўлиб қолар. Балки бахтли кунимиз ўша кун бўлар!

Абдулқодир Полвонов